ក្រុមអ្នកឃ្លាំមើលសង្គម លើកឡើងថា ការសម្រេចចិត្តរបស់បេសកជនពិសេសរបស់អង្គការសហប្រជាជាតិទទួលបន្ទុកកិច្ចការមីយ៉ាន់ម៉ា អ្នកស្រី ណូអេលីន ហេហ្សឺ (Noeleen Heyzer) ដែលនឹងមិនវិលត្រឡប់ទៅធ្វើទស្សនកិច្ចនៅប្រទេសភូមា សាជាថ្មី ដោយសារមិនបានចូលជួបមេដឹកនាំរដ្ឋាភិបាលស៊ីវិល អ្នកស្រី អ៊ុងសាន ស៊ូជី គឺជាការសម្រេចចិត្តដ៏ត្រឹមត្រូវ ដើម្បីជំរុញឱ្យរបបសឹកភូមា ងាកទៅរកការអនុវត្តតាមប្រព័ន្ធប្រជាធិបតេយ្យឡើងវិញ។
អនុប្រធានវេទិកាពលរដ្ឋ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី៧ កញ្ញា នេះថា ការសម្រេចរបស់បេសកជនពិសេសរបស់អង្គការសហប្រជាជាតិទទួលបន្ទុកកិច្ចការភូមា គឺជាការបង្ហាញពីគោលបំណងក្នុងការទាមទារឱ្យរបបសឹកភូមា បញ្ចប់នូវវិបត្តិរបស់ខ្លួនយ៉ាងពិតប្រាកដ ប៉ុន្តែការធ្វើដំណើរទស្សនកិច្ចរបស់ប្រធានអាស៊ានប្តូរវេន លោក ហ៊ុន សែន កន្លងមក គឺជាសញ្ញានៃការលើកទឹកចិត្តឱ្យរបបសឹកភូមា អនុវត្តរបបដឹកនាំផ្ដាច់ការរបស់ពួកគេកាន់តែខ្លាំងទៅវិញប៉ុណ្ណោះ។
លោក ម៉ែន ណាត លើកឡើងថា តួនាទីជាប្រធានអាស៊ានប្តូរវេនរបស់លោក ហ៊ុន សែន នៅពេលនេះមិនត្រឹមតែមិនអាចជួយដោះស្រាយវិបត្តិក្នុងតំបន់សម្រាប់អាស៊ានបានប៉ុណ្ណោះទេ ប៉ុន្តែបែរជាធ្វើឱ្យប្រទេសដែលជាសមាជិកអាស៊ានមានការបែកបាក់សាមគ្គីដោយសារតែខ្លួនទៅវិញ។ ជាក់ស្តែង កិច្ចប្រជុំចង្អៀតនៃរដ្ឋមន្ត្រីការបរទេសអាស៊ានកាលពីពាក់កណ្តាលខែមករា ឆ្នាំ២០២២ កន្លងទៅ ត្រូវបានលើកពេលផងដែរ ដែលបញ្ហានេះបញ្ជាក់ឱ្យឃើញពីភាពមិនចុះសម្រុងគ្នារវាងមេដឹកនាំអាស៊ានផ្សេងទៀតក្រោមការរៀបចំរបស់មេដឹកនាំកម្ពុជាយ៉ាងធ្ងន់ធ្ងរ។
កាលពីថ្ងៃទី៦ ខែកញ្ញា ឆ្នាំ២០២២ ទីភ្នាក់ងារសារព័ត៌មាន AFP បានចុះផ្សាយថា បេសកជនពិសេសទទួលបន្ទុកកិច្ចការមីយ៉ាន់ម៉ារបស់អង្គការសហប្រជាជាតិ អ្នកស្រី ណូអេលីន ហេហ្សឺ (Noeleen Heyzer) កាលពីថ្ងៃទី៥ កញ្ញា បានប្ដេជ្ញាថា អ្នកស្រីនឹងមិនត្រឡប់ទៅធ្វើទស្សនកិច្ចនៅប្រទេសភូមា សាជាថ្មីឡើយរហូតទាល់តែអ្នកស្រីត្រូវបានអនុញ្ញាតឱ្យចូលជួបអតីតមេដឹកនាំរដ្ឋាភិបាលស៊ីវិល អ្នកស្រី អ៊ុងសាន ស៊ូជី។
ការអះអាងនេះ ធ្វើឡើងបន្ទាប់ពីអ្នកស្រី ណូអេលីន ហេហ្សឺ (Noeleen Heyzer) បានធ្វើដំណើរទស្សនកិច្ចលើកដំបូងរបស់ខ្លួនកាលពីខែសីហា ឆ្នាំ២០២២ ទៅកាន់ប្រទេសភូមា ដើម្បីជួបជាមួយមេយោធាផ្ដាច់ការភូមា ដើម្បីពិភាក្សារកដំណោះស្រាយវិបត្តិនានាដែលកំពុងកើតមានសព្វថ្ងៃនេះ ប៉ុន្តែក្នុងដំណើរទស្សនកិច្ចនេះ អ្នកស្រីមិនត្រូវបានអនុញ្ញាតឱ្យជួបជាមួយអតីតមេដឹកនាំរដ្ឋាភិបាលស៊ីវិល អ្នកស្រី អ៊ុងសាន ស៊ូជី ឡើយ។
វិបត្តិនយោបាយនៅប្រទេសភូមា បានកើតឡើងចាប់តាំងពីរបបសឹកភូមា ធ្វើរដ្ឋប្រហារបង្ហូរឈាមដណ្តើមអំណាចដោយទម្លាក់រដ្ឋាភិបាលស៊ីវិលរបស់អ្នកស្រី អ៊ុងសាន ស៊ូជី ចាប់តាំងពីខែកុម្ភៈ ឆ្នាំ២០២១ មក ដែលបញ្ហានេះបានក្លាយទៅជាវិបត្តិមួយដែលប្រទេសជាសមាជិកអាស៊ានទាំង៩ ត្រូវដោះស្រាយ ដើម្បីកុំឲ្យវិបត្តិដែលកើតលើប្រទេសនេះក្លាយទៅជាវិបត្តិកាន់តែធ្ងន់ធ្ងរផ្សេងទៀតក្នុងតំបន់។
ទាក់ទិននឹងបញ្ហានេះ ក្រុមអ្នកសង្កេតការណ៍រិះគន់ថា ចាប់តាំងពីកម្ពុជាក្លាយជាប្រធានអាស៊ានប្តូរវេនកាលពីដើមខែមករា ឆ្នាំ២០២២ មក គឺមានរយៈពេល ៨ខែក្នុងតួនាទីជាប្រធានអាស៊ាន កម្ពុជាមិនអាចជំរុញឱ្យរបបសឹកភូមា អនុវត្តកិច្ចព្រមព្រៀងទាំង ៥ចំណុចរបស់អាស៊ានបាន ១ចំណុចនោះទេ ហើយកម្ពុជាក៏នៅតែគ្មានវិធានការណាមួយចំពោះរបបសឹកនេះដែរ ទោះបីជារបបសឹកនេះបានកាត់ទោសប្រហារជីវិតលើអ្នកតស៊ូដើម្បីសេរីភាពរបស់ប្រជាជនភូមាក៏ដោយ។
ជុំវិញបញ្ហានេះ កាលពីចុងខែធ្នូ ឆ្នាំ២០២១ មេដឹកនាំកម្ពុជា លោក ហ៊ុន សែន ធ្លាប់បានអះអាងថា នៅពេលលោកធ្វើជាប្រធានអាស៊ាន លោកមិនអាចទុកឱ្យអាស៊ាននៅមិនគ្រប់ទឹកដូចសព្វថ្ងៃនេះទេ ព្រោះថាអាស៊ានដែលមានតែ ៩ប្រទេសបែបនេះ គឺជាអាស៊ានមិនគ្រប់ទឹក ហើយក៏មិនអាចសម្រេចកិច្ចការផ្សេងៗជាឯកច្ឆន្ទបានដែរ។ លោកនឹងធ្វើឱ្យពិភពលោកភ្ញាក់ផ្អើលអំពីយុទ្ធសាស្ត្ររបស់លោកក្នុងការដោះស្រាយវិបត្តិនៅភូមា៕