សាលាដំបូងរាជធានីភ្នំពេញកាត់ទោសនាយការិយាល័យអន្តរាគមន៍នៃស្នងការដ្ឋាននគរបាលខេត្តកំពង់ឆ្នាំង លោក កែវ ណារុន ដាក់ពន្ធនាគារជាង ៣ឆ្នាំកន្លះ និងពិន័យជាប្រាក់ចំនួន ៥លានរៀល ករណីទន្ទ្រានកាន់កាប់ដីព្រៃលិចទឹកនៅតំបន់៣ នៃបឹងទន្លេសាបក្នុងខេត្តកំពង់ឆ្នាំង។
ចៅក្រមជំនុំជម្រះនៃសាលាដំបូងរាជធានីភ្នំពេញ លោក អ៊ឹម វណ្ណៈ នៅថ្ងៃសុក្រ ទី៩ កញ្ញា នេះ បានប្រកាសសាលក្រមដោយផ្ដន្ទាទោសប្រធានការិយាល័យអន្តរាគមន៍ និងតម្រួតបទបញ្ជានៃស្នងការដ្ឋាននគរបាលខេត្តកំពង់ឆ្នាំង លោក កែវ ណារុន ដាក់ពន្ធនាគារ ៣ឆ្នាំ ៦ខែ និងពិន័យជាប្រាក់ ៥លានរៀល ទាក់ទិននឹង ៣បទល្មើសតាមច្បាប់ក្រមព្រហ្មទណ្ឌ និងច្បាប់ស្ដីពីជលផល និងច្បាប់ស្ដីពីការប្រឆាំងអំពើពុករលួយ។
បទចោទប្រកាន់ទាំង ៣បទល្មើស ក្នុងនោះ បទចោទ «បំផ្លាញ និងគៃបំបាត់ និងបទហ៊ុមព័ទ្ធកាន់កាប់ដីព្រៃលិចទឹក» រួមទាំងបទចោទ «មិនប្រកាសទ្រព្យសម្បត្តិ និងបំណុល» ដែលប្រព្រឹត្តនៅចំណុចដែនព្រៃលិចទឹកតំបន់៣ នៃបឹងទន្លេសាប ក្នុងភូមិសាស្ត្រភូមិកង្កែប និងភូមិធ្លក ឃុំច្រណូក ស្រុកកំពង់លែង ខេត្តកំពង់ឆ្នាំង កាលពីអំឡុងឆ្នាំ២០១៧ ដល់ឆ្នាំ២០២១។
កាលពីថ្ងៃទី២៨ ខែវិច្ឆិកា ឆ្នាំ២០២១ លោក ហ៊ុន សែន ក៏ជំរុញទៅស្ថាប័នពាក់ព័ន្ធឱ្យចាត់វិធានការច្បាប់ចំពោះមន្ត្រីពាក់ព័ន្ធ ជាពិសេសអតីតអភិបាលខេត្តកំពង់ឆ្នាំង លោក ឈួរ ចាន់ឌឿន ក្រោយពីលោកទន្ទ្រានកាន់កាប់ដីព្រៃលិចទឹកក្នុងភូមិសាស្ត្រខេត្តកំពង់ឆ្នាំង។
ក្រោយពីមានបញ្ជានេះ សមត្ថកិច្ចចាប់ និងឃុំខ្លួនលោក កែវ ណារុន ជាមួយនឹងស្នងការរងនគរបាលខេត្តកំពង់ឆ្នាំង លោក ស៊ុំ សុជាតិ កាលពីថ្ងៃទី១៩ ខែធ្នូ ឆ្នាំ២០២១ តាមដីកាបង្គាប់ចៅក្រមស៊ើបសួរលោក កូយ សៅ។
ការចាប់ខ្លួននេះ កើតឡើងក្រោយពីអង្គភាពប្រឆាំងអំពើពុករលួយចុះស៊ើបអង្កេត ដោយរកឃើញថា អតីតអភិបាលខេត្តកំពង់ឆ្នាំង លោក ឈួន ចាន់ឌឿន និងលោក កែវ ណារុន និងលោក ស៊ុំ សុជាតិ ជាប់ពាក់ព័ន្ធរឿងកាន់កាប់ព្រៃលិចទឹកនៅតំបន់ហាមឃាត់ស្ថិតក្នុងខេត្តកំពង់ឆ្នាំង។ ប៉ុន្តែអតីតអភិបាលខេត្តកំពង់ឆ្នាំង លោក ឈួន ចាន់ឌឿន មិនត្រូវបានអង្គភាពប្រឆាំងអំពើពុករលួយ និងតុលាការចាត់វិធានការច្បាប់ឡើយ ទោះបីរកឃើញថាលោកបានទន្ទ្រានដីព្រៃលិចទឹក ២០០០ហិកតារក៏ដោយ។
ចំណែកលោក ស៊ុំ សុជាតិ ស្នងការរងនគរបាលខេត្តកំពង់ឆ្នាំង ត្រូវបានចៅក្រមសាលាដំបូងរាជធានីភ្នំពេញផ្ដន្ទាទោសដាក់ពន្ធនាគារ ៤ឆ្នាំពីបទទន្ទ្រានព្រៃលិចទឹកដោយខុសច្បាប់ជុំវិញបឹងទន្លេសាបចន្លោះឆ្នាំ២០១១ ដល់ឆ្នាំ២០២១។
ប្រធានរាជបណ្ឌិត្យសភាកម្ពុជា លោក សុខ ទូច ធ្លាប់បានថ្លែងកន្លងមកថា អាជ្ញាធរបានធ្វើបាបពលរដ្ឋដែលគ្រប់គ្រងលើដីតែពីរ ឬបីហិកតារ ស្របពេលអ្នកមានទ្រព្យធន និងមានអំណាចបានទន្ទ្រានដីព្រៃលិចទឹកទំហំរាប់រយហិកតារ។
តាមការអះអាងរបស់អាជ្ញាធរខេត្តតាមរយៈសកម្មភាពដែលបានចុះធ្វើការកន្លងមក ខេត្តកំពង់ឆ្នាំង មានប្រជាពលរដ្ឋប្រមាណជិត ៣០០គ្រួសារក្នុងស្រុកចំនួន៣ មានស្រុកកំពង់លែង ស្រុកជលគិរី និងស្រុកបរិបូណ៌ បានចូលខ្លួនប្រគល់ដីព្រៃលិចទឹកជិត ៣ពាន់ហិកតារត្រឡប់មកឲ្យរដ្ឋវិញ៕