សាលាឧទ្ធរណ៍សម្រេចតម្កល់សាលក្រមសាលាដំបូង ដោយឲ្យសកម្មជនបក្សប្រឆាំង ១២នាក់ និងអតីតមន្ត្រីក្រសួងមហាផ្ទៃម្នាក់ជាប់ពន្ធនាគារម្នាក់ៗ ៣ឆ្នាំ ៨ខែដដែល។
ចៅក្រមសាលាឧទ្ធរណ៍រាជធានីភ្នំពេញ លោក យន់ ណារ៉ុង បានប្រកាសសាលដីកានៅថ្ងៃអង្គារ ទី១៣ កញ្ញា នេះថា ត្បិតពេលសវនាការនៅថ្ងៃទី១៦ ខែសីហា កន្លងទៅ ពួកគេបានបដិសេធក្ដី ប៉ុន្តែបើតាមការសួរដេញដោល និងភស្តុតាងរបស់មន្ត្រីនគរបាលយុត្តិធម៌ រកឃើញថាពួកគេបានប្រព្រឹត្តបទល្មើសប្រាកដមែន។
លោកបញ្ជាក់ថា តុលាការសម្រេចតម្កល់សាលក្រមរបស់សាលាដំបូងរាជធានីភ្នំពេញទុកជាបានការដដែល និងបង្គាប់ឲ្យឃុំខ្លួនសកម្មជនបក្សសង្គ្រោះជាតិ ១២នាក់ និងអតីតមន្ត្រីក្រសួងមហាផ្ទៃម្នាក់ជាប់ពន្ធនាគារម្នាក់ៗ ៣ឆ្នាំ ៨ខែ។
បន្ទាប់ពីស្ដាប់ចៅក្រមប្រកាសសាលដីការួចហើយ ភរិយាសកម្មជនបក្សប្រឆាំងបាននាំគ្នាធ្វើពិធីកោរសក់នៅមុខព្រះអង្គដងកើ ដោយស្នើសុំឲ្យវត្ថុស័ក្តិសិទ្ធិជួយបន្ទន់ចិត្តរដ្ឋមន្ត្រីក្រសួងមហាផ្ទៃ ជួយបញ្ជូនស្វាមីពួកគេមកឃុំនៅពន្ធនាគារព្រៃសវិញ។ ពួកគេចាត់ទុកការសម្រេចរបស់សាលាឧទ្ធរណ៍នាថ្ងៃនេះថាជារឿងអយុត្តិធម៌សម្រាប់គ្រួសាររបស់ពួកគេ ដែលមិនបានធ្វើអ្វីខុសច្បាប់ តែបែរជាត្រូវជាប់ពន្ធនាគាររហូតដល់ជាង ៣ឆ្នាំ ហើយត្រូវបញ្ជូនទៅឃុំខ្លួននៅកន្លែងឆ្ងាយថែមទៀតផងដែរ។
សកម្មជនបក្សសង្គ្រោះជាតិជាង ១០នាក់ ត្រូវបានបញ្ជូនទៅឃុំខ្លួននៅពន្ធនាគារត្រពាំងផ្លុង ខេត្តត្បូងឃ្មុំ ជាប់ព្រំដែនកម្ពុជា-វៀតណាម កាលពីថ្ងៃទី២១ ខែសីហា ឆ្នាំ២០២២ ក្រោយពីត្រូវបានឃុំខ្លួននៅពន្ធនាគារព្រៃសអស់រយៈពេល ២ឆ្នាំ។
សាលាដំបូងរាជធានីភ្នំពេញកាលពីថ្ងៃទី១៧ ខែមីនា ឆ្នាំ២០២២ បានផ្ដន្ទាទោសថ្នាក់ដឹកនាំ និងសកម្មជនគណបក្សសង្គ្រោះជាតិដែលត្រូវតុលាការរំលាយចំនួន ២១នាក់ ព្រមទាំងអតីតមន្ត្រីក្រសួងមហាផ្ទៃម្នាក់ឱ្យជាប់ពន្ធនាគារចន្លោះ ៥ ដល់ ១០ឆ្នាំ។ ក្នុងចំណោមជនជាប់ចោទ ២១នាក់នោះមានថ្នាក់ដឹកនាំគណបក្សសង្គ្រោះជាតិចំនួន ៧នាក់ ត្រូវបានតុលាការសម្រេចផ្ដន្ទាទោសចំនួន ១០ឆ្នាំ ក្រោមបទចោទប្រកាន់ «ញុះញង់ឲ្យប្រព្រឹត្តបទឧក្រិដ្ឋជាអាទិ៍ ញុះញង់ឲ្យយោធិនមិនស្ដាប់បញ្ជា និងរួមគំនិតក្បត់»។
ចំណែកសកម្មជនបក្សប្រឆាំងចំនួន ១២នាក់ និងអតីតមន្ត្រីក្រសួងមហាផ្ទៃម្នាក់ ដាក់ពន្ធនាគារម្នាក់ៗ ៥ឆ្នាំ ក្រោមបទ «រួមគំនិតក្បត់ និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម» ប៉ុន្តែអនុវត្តទោសក្នុងពន្ធនាគារចំនួន ៣ឆ្នាំ ៨ខែពាក់ព័ន្ធដំណើរវិលត្រឡប់របស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩៕