សាលាដំបូងរាជធានីភ្នំពេញនឹងប្រកាសសាលក្រមលើបណ្តឹងរបស់គណៈកម្មាធិការជាតិរៀបចំការបោះឆ្នោត (គ.ជ.ប) ដែលប្តឹងលោក សុន ឆ័យ ជាប់ពាក់ព័ន្ធការ «បរិហារកេរ្តិ៍ជាសាធារណៈ» នៅព្រឹកថ្ងៃទី៧ ខែតុលា ឆ្នាំ២០២២ ខាងមុខនេះ ហើយនៅថ្ងៃដដែលនោះ ក៏ជាថ្ងៃដែលតុលាការបន្តបើកសវនាការជំនុំជម្រះលើបណ្តឹងរបស់គណបក្សប្រជាជនកម្ពុជាផងដែរ។
នៅព្រឹកថ្ងៃទី២៩ ខែកញ្ញា ឆ្នាំ២០២២ នេះ អនុប្រធានគណបក្សភ្លើងទៀន លោក សុន ឆ័យ ជាមួយមេធាវីរបស់លោក បានចូលទៅតុលាការភ្នំពេញដើម្បីតទល់ជាមួយ គ.ជ.ប និងគណបក្សប្រជាជនកម្ពុជា ដែលប្តឹងលោកពីបទបរិហារកេរ្តិ៍។ ការចំណាយពេល ១ព្រឹកក្នុងការបើកសវនាការមិនគ្រប់គ្រាន់ដើម្បីបញ្ចប់បណ្តឹងទាំងពីរនេះទេ ដោយអង្គសវនាការបានត្រឹមបញ្ចប់បណ្តឹងរបស់ គ.ជ.ប ប៉ុណ្ណោះ ឯបណ្តឹងរបស់គណបក្សប្រជាជនកម្ពុជា មិនទាន់ត្រូវបានលើកមកជំនុំជម្រះនៅឡើយទេ។
ក្រោយពីចំណាយពេលពេញមួយព្រឹក លោក ហម ម៉េងសែ ដែលជាចៅក្រមជំនុំជម្រះ បានថ្លែងថា សាលក្រមដែលសម្រេចសេចក្តីលើបណ្តឹងរបស់ គ.ជ.ប នឹងត្រូវប្រកាសនៅព្រឹកថ្ងៃទី៧ ខែតុលា ឆ្នាំ២០២២ ហើយនៅថ្ងៃនោះ ក៏ជាថ្ងៃដែលតុលាការបន្តបើកសវនាការជំនុំជម្រះលើបណ្តឹងរបស់គណបក្សប្រជាជនកម្ពុជាដែរ។
តំណាងអយ្យការអមសាលាដំបូងរាជធានីភ្នំពេញ បានចោទប្រកាន់អនុប្រធានគណបក្សភ្លើងទៀន លោក សុន ឆ័យ ពីបទ «បរិហារកេរ្តិ៍ជាសាធារណៈ» តាមបណ្ដឹងរបស់គណបក្សប្រជាជនកម្ពុជា និងតាមបណ្តឹងរបស់គណៈកម្មាធិការជាតិរៀបចំការបោះឆ្នោត (គ.ជ.ប)។
ថ្លែងប្រាប់អ្នកសារព័ត៌មាននៅមុខសាលាដំបូងរាជធានីភ្នំពេញកន្លងមក លោក សុន ឆ័យ ថាបណ្ដឹងដែលគណបក្សប្រជាជនកម្ពុជា និង គ.ជ.ប ប្តឹងរូបលោក វាជាការរៀបចំឡើងសម្រាប់គណបក្សកាន់អំណាចប៉ុណ្ណោះ។
លោកបានស្នើតុលាការឱ្យតម្កល់បណ្ដឹងរបស់គណបក្សប្រជាជនកម្ពុជា និងបណ្ដឹង គ.ជ.ប កុំចាត់ការ ដោយថាជុំវិញអ្វីដែលរូបលោកបានលើកឡើងបន្ទាប់ពីទទួលបានរបាយការណ៍ពីសមាជិកគណបក្សភ្លើងទៀនតាមបណ្ដារាជធានី-ខេត្ត ដូច្នេះអ្វីដែលរូបលោករិះគន់នោះ សុទ្ធតែមានភស្តុតាងច្បាស់លាស់ទាំងអស់។
កាលពីថ្ងៃទី១៤ ខែមិថុនា ឆ្នាំ២០២២ មេធាវីរបស់គណបក្សប្រជាជនកម្ពុជា គឺលោក គី តិច បានដាក់ពាក្យបណ្ដឹងទៅកាន់តុលាការប្រឆាំងនឹងលោក សុន ឆ័យ ដោយក្នុងបណ្ដឹងនោះ លោក សាយ ឈុំ អនុប្រធានគណបក្សប្រជាជនកម្ពុជា និងជាប្រធានព្រឹទ្ធសភាផងនោះ បានទាមទារសំណងជំងឺចិត្តពីលោក សុន ឆ័យ ចំនួន ១លានដុល្លារអាមេរិក។
ក្រៅពីបណ្ដឹងគណបក្សប្រជាជនកម្ពុជា លោក សុន ឆ័យ ក៏ត្រូវបានគណៈកម្មាធិការជាតិរៀបចំការបោះឆ្នោត ប្ដឹងទៅតុលាការពីបទ «បរិហារកេរ្តិ៍ជាសាធារណៈ» និងបានទាមទារសំណងពីលោក សុន ឆ័យ ចំនួន ១លានដុល្លារ ហើយត្រូវធ្វើលិខិតសុំទោសជាសាធារណៈថែមទៀត ប៉ុន្តែលោក សុន ឆ័យ ប្រកាសជំហរនឹងមិនសុំទោសនោះទេ៕