តុលាការកំពូលសម្រេចបដិសេធមិនដោះលែងកញ្ញា សេង ធារី ឲ្យមានសេរីភាព ដោយសំអាងថា បើធ្វើការដោះលែងកញ្ញារូបនេះ នោះអាចបង្កចលាចលក្នុងសង្គម និងប៉ះពាល់ដល់សណ្ដាប់ធ្នាប់សាធារណៈ ដោយតម្កល់ការសម្រេចរបស់សាលាឧទ្ធរណ៍រាជធានីភ្នំពេញជារឿងត្រឹមត្រូវ។
នៅថ្ងៃសុក្រ ទី៣០ កញ្ញា ប្រធានក្រុមប្រឹក្សាជំនុំជម្រះតុលាការកំពូល លោក គង់ ស្រ៊ីម បានបើកសវនាការសួរដេញដោលចំពោះការមិនសុខចិត្តរបស់មេធាវីការពារក្ដីឱ្យកញ្ញា សេង ធារី ដែលប្ដឹងសាទុក្ខ។ ក្រោយពេលបើកសវនាការជិត ១ម៉ោង លោក គង់ ស្រ៊ីម បានប្រកាសសាលដីកាភ្លាមៗដោយបដិសេធដោះលែងកញ្ញា សេង ធារី ក្រោមហេតុផលថា ការសម្រេចរបស់សាលាឧទ្ធរណ៍ និងសាលាដំបូងរាជធានីភ្នំពេញជារឿងត្រឹមត្រូវ។
លោក គង់ ស្រ៊ីម បញ្ជាក់ថា មូលហេតុដែលតុលាការមិនដោះលែងកញ្ញា សេង ធារី គឺដើម្បីទប់ស្កាត់កុំឲ្យមានចលាចលក្នុងសង្គមផងដែរ។
ការប្រកាសសាលដីការបស់តុលាការនៅថ្ងៃសុក្រនេះ ប្រធានក្រុមប្រឹក្សាជំនុំជម្រះតុលាការកំពូលបានបើកសវនាការបណ្ដឹងសាទុក្ខរបស់លោក ជូង ជូងី មេធាវីការពារក្ដីឱ្យកញ្ញា សេង ធារី ដែលបានប្ដឹងទៅតុលាការកំពូល ក្រោយពីមិនសុខចិត្តចំពោះសេចក្ដីសម្រេចសាលាឧទ្ធរណ៍រាជធានីភ្នំពេញកាលពីថ្ងៃទី០១ ខែកញ្ញា ឆ្នាំ២០២២។
កញ្ញា សេង ធារី និងថ្នាក់ដឹកនាំ ព្រមទាំងអ្នកគាំទ្រគណបក្សសង្គ្រោះជាតិ ប្រមាណ ៥០នាក់ ត្រូវបានលោក រស់ ពិសិដ្ឋ ចៅក្រមជំនុំជម្រះនៃសាលាដំបូងរាជធានីភ្នំពេញ ផ្ដន្ទាទោសដាក់ពន្ធនាគារ ៦ឆ្នាំ ខណៈចន្លោះពី ៥ ទៅ ៨ឆ្នាំក្រោមបទចោទប្រកាន់ «ញុះញង់ និងរួមគំនិតក្បត់» ជុំវិញការប្រកាសជំហរគាំទ្រការធ្វើមាតុភូមិនិវត្តន៍ថ្ងៃទី៩ វិច្ឆិកា របស់លោក សម រង្ស៊ី។
កញ្ញា សេង ធារី ដែលមានសញ្ជាតិអាមេរិកាំង ត្រូវបានសមត្ថកិច្ចរាជធានីភ្នំពេញបញ្ជូនកញ្ញាចេញពីពន្ធនាគារព្រៃសរាជធានីភ្នំពេញ ទៅឃុំនៅពន្ធនាគារខេត្តព្រះវិហារ កាលពីថ្ងៃទី១៥ ខែមិថុនា ឆ្នាំ២០២២ ក្រោយពីសាលាដំបូងរាជធានីភ្នំពេញកាត់ទោសលើកញ្ញា។
ក្នុងដំណើរទស្សនកិច្ចនៅកម្ពុជាកាលពីដើមខែសីហា រដ្ឋមន្ត្រីការបរទេសសហរដ្ឋអាមេរិក លោក អែនតូនី ប្លីងខិន (Antony J. Blinken) ក៏បានទទូចឲ្យលោក ហ៊ុន សែន ដោះលែងកញ្ញា សេង ធារី មេធាវីខ្មែរសញ្ជាតិអាមេរិកាំងដែលត្រូវបានសមត្ថកិច្ចកម្ពុជាចាប់ឃុំខ្លួន និងដែលអាមេរិកចាត់ទុកថាជាការចាប់ឃុំខ្លួនក្រោមហេតុផលនយោបាយ៕