 នឹងធ្វើឱ្យខូចឈ្មោះកម្ពុជាធ្ងន់ធ្ងរនៅលើឆាកអន្តរជាតិ។){kind=link}
មន្ត្រីជាន់ខ្ពស់បក្សប្រឆាំង លើកឡើងថា ការមិនអើពើពីសំណាក់លោក ហ៊ុន សែន និងក្រសួងការងារលើបញ្ហាដែលកើតមានរវាងបុគ្គលិកនៃក្រុមហ៊ុនណាហ្គាវើលដ៍ (NAGA World) នឹងធ្វើឱ្យខូចឈ្មោះកម្ពុជាធ្ងន់ធ្ងរនៅលើឆាកអន្តរជាតិ។
មន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានប្រាប់សារព័ត៌មាន The Cambodia Daily នៅថ្ងៃទី៣ តុលា នេះថា ការបណ្តែតបណ្តោយឱ្យបញ្ហានេះបន្តកើតមាន និងអូសបន្លាយតទៅមុខទៀត មិនមែនជារឿងល្អសម្រាប់កម្ពុជានោះទេ។ ផ្ទុយទៅវិញ គ្រាន់តែបង្ហាញពីការគាបសង្កត់សិទ្ធិការងាររបស់កម្មករនិយោជិតដែលកំពុងទាមទាររកយុត្តិធម៌ប៉ុណ្ណោះ ហើយបញ្ហានេះនឹងធ្វើឱ្យខូចឈ្មោះកម្ពុជាយ៉ាងធ្ងន់ធ្ងរនៅលើឆាកអន្តរជាតិថែមទៀត។
លោក មាជ សុវណ្ណារ៉ា អះអាងថា ច្បាប់ស្ដីពីការងាររបស់កម្ពុជាអាចផ្តល់សិទ្ធិអំណាចឱ្យក្រសួងពាក់ព័ន្ធ ដូចជាក្រសួងការងារ និងបណ្តុះបណ្តាលវិជ្ជាជីវៈ ជាដើម មានសិទ្ធិពេញលេញក្នុងការអន្តរាគមន៍លើករណីរំលោភបំពានលើសិទ្ធិការងាររបស់កម្មករ ដែលស្ថិតក្រោមការមើលការខុសត្រូវរបស់ខ្លួនសព្វថ្ងៃនេះ ប៉ុន្តែដោយសារក្រសួងអសមត្ថភាព ទើបបញ្ហានេះកើតមានឡើង និងបន្តអូសបន្លាយពេលដោយគ្មានដំណោះស្រាយបែបនេះ។
មន្ត្រីជាន់ខ្ពស់បក្សប្រឆាំងរូបនេះបញ្ជាក់ថា ការដឹកនាំដែលលើកទឹកចិត្តឱ្យមានការរំលោភសិទ្ធិមនុស្ស និងការជិះជាន់កម្មករនិយោជិត ដោយការបង្ក្រាប និងការប្រើអំពើហិង្សាផ្សេងៗសព្វថ្ងៃនេះ គឺមានតែរុញច្រានឱ្យកម្ពុជាធ្លាក់ទៅក្នុងចំណោមប្រទេសដែលរំលោភសិទ្ធិមនុស្សកាន់តែធ្ងន់ធ្ងរប៉ុណ្ណោះ ខណៈផលប្រយោជន៍ដែលកម្ពុជានឹងទទួលបានពីប្រទេសលោកសេរី ដូចជាសហគមន៍អឺរ៉ុប និងអាមេរិក ជាដើម តាមរយៈប្រព័ន្ធអនុគ្រោះពន្ធ EBA និង GSP នឹងត្រូវបាត់បង់ជាបន្តបន្ទាប់ជាមិនខាន។
ការអះអាងនេះ ធ្វើឡើងស្របពេលដែលវិវាទការងាររវាងបុគ្គលិក និងថៅកែក្រុមហ៊ុនណាហ្គាវើលដ៍នៅតែគ្មានដំណោះស្រាយ ខណៈក្រសួងការងារត្រូវគេមើលឃើញថា មិនបានអនុវត្តតាមតួនាទីរបស់ខ្លួន ដោយប្រើច្បាប់ដើម្បីដាក់ពិន័យលើក្រុមហ៊ុនដែលបានរំលោភសិទ្ធិការងាររបស់កម្មករនោះឡើយ។
កាលពីថ្ងៃទី១ ខែតុលា ឆ្នាំ២០២២ ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីបំភ្លឺអំពីវិវាទនៅក្រុមហ៊ុនណាហ្គាវើលដ៍ ថា ចំពោះបញ្ហាដែលជាប់គាំងក្នុងការដោះស្រាយវិវាទការងាររួមនៅក្រុមហ៊ុនណាហ្គាវើលដ៍កន្លងមក មិនមែនជាការព្រងើយកន្តើយរបស់ក្រសួងនោះឡើយ ប៉ុន្តែដោយសារភាគីទាំងសងខាងចរចាមិនត្រូវគ្នា ខណៈក្រសួងមិនអាចបង្ខំឱ្យភាគីណាមួយត្រូវតែយល់ព្រមតាមអ្នកផ្សះផ្សាវិវាទនេះឡើយ។
ជុំវិញបញ្ហានេះ កាលពីថ្ងៃទី២៨ ខែកញ្ញា ឆ្នាំ២០២២ អង្គការសមាគមជិត ២០ស្ថាប័ន រួមមានសម្ព័ន្ធសហជីពកម្ពុជា (CATU) សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) និងសមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (ADHOC) បានរៀបចំសន្និសីទសារព័ត៌មានដើម្បីប្រកាសជំហរគាំទ្រសិទ្ធិជាមូលដ្ឋានរបស់កម្មករនិយោជិតលើដំណោះស្រាយករណីវិវាទការងារនៅក្រុមហ៊ុនណាហ្គាវើលដ៍ ដែលកំពុងរងនូវភាពអយុត្តិធម៌សព្វថ្ងៃនេះ។
ចាប់តាំងពីខែមេសា ឆ្នាំ២០២១ ដែលកម្មករនិយោជិតនៃក្រុមហ៊ុនណាហ្គាវើលដ៍ចំនួន ៣៦៥នាក់ត្រូវបានបញ្ឈប់ពីការងារដោយបង្ខំ និងចេញតវ៉ាទាមទារបញ្ចប់ការរំលោភសិទ្ធិការងាររបស់ពួកគេចាប់តាំងពីថ្ងៃទី១៨ ខែធ្នូ ឆ្នាំ២០២១ មក កម្មករនិយោជិតត្រូវបានបង្ក្រាបដោយអាជ្ញាធរកម្ពុជារហូតមក ក្នុងនោះមានការចាប់ខ្លួន ការបង្ក្រាបដោយហិង្សា ដូចជាការវាយដំទៅលើកម្មការិនីរហូតធ្វើឱ្យរលូតកូនក្នុងផ្ទៃថែមទៀត៕