គណបក្សឆន្ទៈខ្មែរ នឹងមិនដាក់បញ្ជីបេក្ខជនឈរឈ្មោះបោះឆ្នោតជ្រើសរើសតំណាងរាស្ត្រសម្រាប់អាណត្តិទី៧ នៅឆ្នាំ២០២៣ ខាងមុខនេះទេ បន្ទាប់ពីខ្លួនបានសម្រេចចិត្តចូលជ្រកកោនជាមួយអតីតទ្រនំចាស់គឺគណបក្សភ្លើងទៀនឡើងវិញ។
គណបក្សឆន្ទៈខ្មែររបស់លោក គង់ មុនីកា បានចេញសេចក្តីថ្លែងការណ៍កាលពីថ្ងៃទី៣ ខែតុលា ឆ្នាំ២០២២ ថា ខ្លួននឹងមិនដាក់បញ្ជីបេក្ខជនឈរឈ្មោះបោះឆ្នោតជ្រើសរើសតំណាងរាស្ត្រសម្រាប់អាណត្តិទី៧ នៅឆ្នាំ២០២៣ ខាងមុខនេះទេ ដោយសារតែគណបក្សនេះបានសម្រេចចុះចូលជាមួយគណបក្សភ្លើងទៀនហើយ បន្ទាប់ពីមន្ត្រីជាន់ខ្ពស់នៃគណបក្សទាំងពីរបានចរចាគ្នាកាលពីពេលថ្មីៗនេះ។
ប្រភពដដែល អំពាវនាវឱ្យកម្លាំងអ្នកប្រជាធិបតេយ្យ និងពលរដ្ឋដែលចង់ឱ្យមានការផ្លាស់ប្ដូរជាវិជ្ជមានតាមរយៈនៃការបោះឆ្នោត ចូលរួមគាំទ្រគណបក្សភ្លើងទៀនឱ្យបានទូលំទូលាយ និងខ្លាំងក្លាជាងពេលណាៗទាំងអស់ ដើម្បីអំណាចប្រជាធិបតេយ្យសេរីពហុបក្សទទួលបានជោគជ័យ ស្របតាមស្មារតីកិច្ចព្រមព្រៀងសន្តិភាពទីក្រុងប៉ារីស និងស្មារតីនៃរដ្ឋធម្មនុញ្ញរបស់កម្ពុជា។
លោក គង់ គាំ ទីប្រឹក្សាគណបក្សឆន្ទៈខ្មែរ បានថ្លែងប្រាប់សារព័ត៌មានក្នុងស្រុកថា ចំពោះការទៅចាប់ដៃជាមួយសហការីក្នុងគណបក្សភ្លើងទៀនឡើងវិញ ដ្បិតលោកមើលឃើញថា គណបក្សភ្លើងទៀនទទួលបានការគាំទ្រធំធេងក្នុងការបោះឆ្នោតឃុំ-សង្កាត់អាណត្តិទី៥ នេះ។
លោកអះអាងថា ការរួបរួមគ្នារវាងគណបក្សឆន្ទៈខ្មែរ និងគណបក្សភ្លើងទៀននាពេលនេះ មិនពាក់ព័ន្ធនឹងលោក សម រង្ស៊ី ឡើយ បើទោះបីជាលោក សម រង្ស៊ី ជាស្ថាបនិកគណបក្សភ្លើងទៀនក៏ដោយ។ លោកបន្ថែមថា ពលរដ្ឋ និងអ្នកនយោបាយចង់ឲ្យមានការប្រកួតប្រជែង និងចង់ឲ្យមានពហុបក្សដែលស្របតាមស្មារតីនៃកិច្ចព្រមព្រៀងសន្តិភាពទីក្រុងប៉ារីសផង និងស្មារតីនៃរដ្ឋធម្មនុញ្ញកម្ពុជាផង។
យ៉ាងណា បន្ទាប់ពីប្រកាសចូលរួមជាមួយគណបក្សភ្លើងទៀន នៅថ្ងៃអង្គារនេះ (ថ្ងៃទី៤ តុលា) ព្រះមហាក្សត្រក៏បានបញ្ចប់មុខតំណែងលោក គង់ មុនីកា ពីសមាសភាពឧត្ដមក្រុមប្រឹក្សាពិគ្រោះ និងផ្ដល់យោបល់ និងមន្ត្រីតំណាងក្នុងលេខាធិការដ្ឋានឧត្ដមក្រុមប្រឹក្សាពិគ្រោះ និងផ្ដល់យោបល់ចាប់ពីថ្ងៃទី៤ ខែតុលា ឆ្នាំ២០២២ តទៅ។ ការបញ្ចប់មុខតំណែងសមាសភាពឧត្ដមក្រុមប្រឹក្សាពិគ្រោះ និងផ្ដល់យោបល់ដែលមានឋានៈស្មើនឹងទេសរដ្ឋមន្ត្រីនេះ ធ្វើឡើងបន្ទាប់ពីមានសំណើរបស់លោក ហ៊ុន សែន។
ក្រៅពីលោក គង់ មុនីកា ក៏មានមនុស្សពីរនាក់ដែលត្រូវលោក ហ៊ុន សែន ស្នើព្រះមហាក្សត្រឲ្យបញ្ចប់មុខតំណែងដែរ ក្នុងនោះមានលោក អ៊ី មុយលី ចេញពីសមាសភាពឧត្ដមក្រុមប្រឹក្សាពិគ្រោះ និងផ្ដល់យោបល់ដែលមានឋានៈស្មើរដ្ឋមន្ត្រី និងលោក តុល ប្រាសាទ ដែលជាមន្ត្រីតំណាងក្នុងលេខាធិការដ្ឋានឧត្ដមក្រុមប្រឹក្សាពិគ្រោះ និងផ្ដល់យោបល់ ដែលមានឋានៈស្មើនឹងអនុរដ្ឋលេខាធិការចាប់ពីថ្ងៃនេះតទៅ។
ទោះជាបែបនេះក្តី សកម្មជនគណបក្សសង្គ្រោះជាតិ លោក ហ៊ុន កុសល បានប្រាប់សារព័ត៌មាន The Cambodia Daily នៅថ្ងៃទី៤ តុលា នេះថា ទាំងគណបក្សភ្លើងទៀន ទាំងគណបក្សឆន្ទៈខ្មែរ សុទ្ធតែជាគណបក្សដែលបានក្បត់ស្មារតីរួបរួមរបស់គណបក្សសង្គ្រោះជាតិ និងក្បត់ឆន្ទៈពលរដ្ឋជាងកន្លះប្រទេស ដែលគាំទ្រឱ្យមានការផ្លាស់ប្ដូរ ហើយការរួមបញ្ចូលគ្នារវាងគណបក្សទាំងពីរនេះនៅពេលនេះ គ្រាន់តែជាការជួយសម្របសម្រួលដំណើរការនៃការបោះឆ្នោតជាតិឆ្នាំ២០២៣ ខាងមុខឱ្យបក្សកាន់អំណាចតែប៉ុណ្ណោះ។
លោក ហ៊ុន កុសល លើកឡើងថា ចំណែកស្មារតីរបស់គណបក្សទាំងពីរនេះ កុំថាឡើយដល់ទៅជួយរកយុត្តិធម៌ក្នុងសង្គមជូនពលរដ្ឋ សូម្បីបក្សប្រឆាំងដែលខ្លួនធ្លាប់ជាសមាជិក ហើយត្រូវគេរំលាយទាំងអយុត្តិធម៌ ក៏ខ្លួនមិនដែលរកយុត្តិធម៌ឱ្យផង តើពួកគេនឹងទៅរកយុត្តិធម៌សង្គមលើកស្ទួយការគោរពសិទ្ធិមនុស្ស និងស្ដារលទ្ធិប្រជាធិបតេយ្យនៅកម្ពុជាសព្វថ្ងៃនេះម្តេចនឹងកើត។
គណបក្សឆន្ទៈខ្មែរ ត្រូវបានបង្កើតឡើងដោយ លោក គង់ គាំ និងលោក គង់ មុនីកា ដែលជាអតីតមន្ត្រីជាន់ខ្ពស់គណបក្ស សម រង្ស៊ី ដែលបានប្តូរឈ្មោះមកជាគណបក្សភ្លើងទៀននៅពេលនេះ កាលពីថ្ងៃទី១០ ខែឧសភា ឆ្នាំ២០១៨ កន្លងទៅ បន្ទាប់ពីគណបក្សសង្គ្រោះជាតិត្រូវបានរំលាយកាលពីចុងឆ្នាំ២០១៧។
ក្រោយការបង្កើតអស់រយៈពេលជិត ៥ឆ្នាំមកនេះ គណបក្សឆន្ទៈខ្មែរ ធ្លាប់បានចូលរួមការបោះឆ្នោតជាតិអាណត្តិទី៦ ឆ្នាំ២០១៨ ម្តងរួចមកហើយ តែមិនទទួលបានសំឡេងគាំទ្រពីពលរដ្ឋដែលអាចឱ្យខ្លួនទទួលបានកៅអីក្នុងរដ្ឋសភានោះទេ។ រហូតដល់ការបោះឆ្នោតឃុំ-សង្កាត់អាណត្តិទី៥ កាលពីដើមខែមិថុនា ឆ្នាំ២០២២ កន្លងទៅនេះ គណបក្សនេះក៏បានចូលរួមការបោះឆ្នោតម្តងទៀត ប៉ុន្តែត្រូវបរាជ័យម្តងទៀត ព្រោះមិនទទួលបានក្រុមប្រឹក្សាសូម្បីតែម្នាក់។
យ៉ាងណាក៏ដោយ គណបក្សឆន្ទៈខ្មែរក៏ធ្លាប់ប្រកាសចងសម្ព័ន្ធជាមួយគណបក្សភ្លើងទៀន គណបក្សកែទម្រង់កម្ពុជា និងគណបក្សប្រជាធិបតេយ្យមូលដ្ឋាន កាលពីថ្ងៃទី១១ ខែកក្កដា ឆ្នាំ២០២២ ផងដែរ ប៉ុន្តែនៅពេលនេះ គណបក្សនេះបែរជាសម្រេចចូលជ្រកក្រោមដំបូលគណបក្សភ្លើងទៀនទៅវិញ៕