31 C
Phnom Penh

អ្នក​តស៊ូ​មតិ​ក្រៅ​ស្រុក​ថ្កោលទោស​អាជ្ញាធរ​ខ្មែរ​ដែល​ចាប់​ខ្លួន​សកម្មជន​តវ៉ា​រឿង​ជនអន្តោប្រវេសន៍

ដោយ ឌឹ ខេមបូឌា ដេលី

បទវិភាគ

វេទិកា​ពលរដ្ឋ​ថ្កោលទោស​អាជ្ញាធរ​នៃ​រដ្ឋាភិបាល​លោក ហ៊ុន សែន ដែល​បាន​ចាប់​ខ្លួន​សកម្មជន​សង្គម លោក ថែល ល ធីលែន យ៉ាង​តក់ក្រហល់ គឺជា​ឧបាយកល​ក្នុង​ការ​បំផ្លាញ​ទឹកចិត្ត​តស៊ូ​ដើម្បី​មាតុភូមិ​កម្ពុជា​របស់​កូន​ខ្មែរ ក្នុង​គោលដៅ​ជ្រោមជ្រែង​យុទ្ធសាស្ត្រ​ឈ្លានពាន​របស់​វៀតណាម​តែប៉ុណ្ណោះ។

វេទិកា​ពលរដ្ឋ​បាន​ចេញ​សេចក្តី​ថ្លែងការណ៍​កាលពី​ថ្ងៃទី​៤ ខែ​តុលា ឆ្នាំ​២០២២ ជុំវិញ​ការ​ចាប់​ខ្លួន​សកម្មជន​សង្គម លោក ថែល ធីលែន កាលពី​ថ្ងៃ​អង្គារ ទី​៤ តុលា ថា វា​គឺជា​រឿង​អកុសល​បំផុត​សម្រាប់​ពូជសាសន៍​ខ្មែរ​ដែល​មាន​លោក ហ៊ុន សែន ជា​មេដឹកនាំ​ដែល​ហ៊ាន​ប្រើ​គ្រប់​ឧបាយកល​ក្នុង​ការ​បំផ្លាញ​ទឹកចិត្ត​តស៊ូ​ដើម្បី​មាតុភូមិ​កម្ពុជា​របស់​កូន​ខ្មែរ ក្នុង​គោលដៅ​ជ្រោមជ្រែង​យុទ្ធសាស្ត្រ​ឈ្លានពាន​របស់​វៀតណាម​ដែល​កំពុង​ប្រព្រឹត្ត​យ៉ាង​ងងើល​សព្វថ្ងៃ​នេះ។

ប្រភព​ដដែល​លើកឡើង​ថា ការ​លេច​ចេញ​ភ្លាមៗ​នូវ​ដីកា​បង្គាប់​ឲ្យ​ឃុំ​ខ្លួន​លោក ថែល ធីលែន ភ្ជាប់​នឹង​សាច់រឿង​នៃ​ការ​ចោទប្រកាន់​ថា​បាន​លួច​លក់​អចលនវត្ថុ​របស់​អ្នកដទៃ​កាលពី​អំឡុង​ឆ្នាំ​២០១៦ នៅ​ចំ​ពេល​ដែល​លោក ថែល ធីលែន ធ្វើ​សកម្មភាព​តស៊ូ​មតិ​ការពារ​ពូជសាសន៍​ខ្មែរ​នៅ​ពេលនេះ គឺជា​ចេតនា​បំបាក់​ស្មារតី​កូន​ខ្មែរ​ដែល​មាន​ឆន្ទៈ​គិតគូរ​អាយុជីវិត​ជាតិ​ខ្មែរ​យ៉ាង​ធ្ងន់ធ្ងរ។

វេទិកា​ពលរដ្ឋ​សម្ដែង​នូវ​ការ​សោកស្ដាយ​ដែល​រដ្ឋាភិបាល​លោក ហ៊ុន សែន យក​វៀតណាម​ជា​មិត្ត​ដ៏​ស៊ីជម្រៅ មិន​លើក​ទឹកចិត្ត​ពលរដ្ឋ​ខ្មែរ​ឱ្យ​នាំគ្នា​ការពារ​អធិបតេយ្យ​ជាតិ​ខ្លួន​ដូច​មេដឹកនាំ​វៀតណាម ដែល​បំបាក់​ស្មារតី​ជាតិ​ដល់​ពលរដ្ឋ​របស់​គេ។

ប្រភព​ដដែល​បន្ថែម​ថា បើ​រដ្ឋាភិបាល​លោក ហ៊ុន សែន មិន​ធ្វើជា​ឧបករណ៍​ឈ្លានពាន​របស់​វៀតណាម​ទេ គួរ​ណាស់​លើក​ទឹកចិត្ត​ដល់​ពលរដ្ឋ​ខ្មែរ​ដែល​ចេញ​មុខ​ការពារ​ជាតិ​ដូច​មេដឹកនាំ​វៀតណាម ដែល​លើក​តម្កើង​ប្រជាជន​ដែល​ការពារ​ទឹកដី​របស់​គេ​ដូច្នោះ​ដែរ។

វេទិកា​ពលរដ្ឋ​ដែល​មាន​មូលដ្ឋាន​នៅ​សហរដ្ឋ​អាមេរិក បញ្ជាក់​ថា លោក ថែល ធីលែន និង​សកម្មជន​សង្គម​ដទៃ​ទៀត​ត្រូវតែ​ទទួល​បាន​ការ​ដោះលែង​ឲ្យ​មាន​សេរីភាព​ពី​សកម្មភាព​តស៊ូ​មតិ​ដោយ​អហិង្សា​របស់​ពួកគេ ដើម្បី​បុព្វហេតុ​ជាតិ​នា​ពេល​កន្លងមក បើ​មិន​ដូច្នោះ​ទេ គឺ​បញ្ជាក់​យ៉ាង​ច្បាស់​ថា លោក ហ៊ុន សែន គឺជា​ភ្នាក់ងារ​បន្ត​សម្រួល​ការ​ឈ្លានពាន​របស់​វៀតណាម ដែល​មិន​អាច​ប្រកែក​បាន​ឡើយ។

ការ​ចេញ​លិខិត​ថ្កោលទោស​នេះ ធ្វើឡើង​បន្ទាប់ពី​សកម្មជន​សង្គម លោក ថែល ធីលែន ត្រូវ​បាន​សមត្ថកិច្ច​ចាប់​ខ្លួន ស្រប​ពេល​ដែល​យុវជន​រូប​នេះ​កំពុង​ធ្វើ​សកម្មភាព​ស្នើសុំ​ឱ្យ​បញ្ឈប់​ការ​ផ្តល់​ប័ណ្ណ​ស្នាក់នៅ​ដល់​ជនអន្តោប្រវេសន៍​ខុស​ច្បាប់​នៅ​កម្ពុជា​នៅ​ពេលនេះ។

កាលពី​ថ្ងៃទី​៤ ខែ​តុលា ឆ្នាំ​២០២២ សកម្មជន​សង្គម លោក ថែល ធីលែន ត្រូវ​បាន​សមត្ថកិច្ច​ចាប់​ខ្លួន​ក្រោយពី​យុវជន​រូប​នេះ​ជួប​ជាមួយ​មន្ត្រី​រដ្ឋបាល​រាជធានី​ភ្នំពេញ និង​ត្រៀម​ទៅ​ធ្វើ​សន្និសីទ​សារព័ត៌មាន​នៅ​ទីលាន​ប្រជាធិបតេយ្យ ដើម្បី​ទាមទារ​ឱ្យ​រដ្ឋាភិបាល​កម្ពុជា​បញ្ឈប់​ការ​ចេញ​ប័ណ្ណ​ស្នាក់នៅ​អចិន្ត្រៃយ៍​ដល់​ជនបរទេស និង​លុប​គម្រោង​បង្កើត​អគារ​សិក្សា​ភាសា​វៀតណាម នៅ​ក្នុង​សាកលវិទ្យាល័យ​ភូមិន្ទ​ភ្នំពេញ ដែល​រដ្ឋាភិបាល​កម្ពុជា​កំពុងតែ​ដំណើរការ​អនុវត្ត​នៅ​ពេលនេះ។

ក្រោយ​ការ​ចាប់​ខ្លួន​ភ្លាមៗ ក៏​លេច​ចេញ​នូវ​ដីកា​របស់​សាលាដំបូង​ខេត្ត​កណ្តាល ដែល​បាន​ចេញ​ដីកា​បង្គាប់​ឱ្យ​ចាប់​ខ្លួន​លោក ថែល ធីលែន ក្រោម​បទ​ចោទ​លួច​លក់​អចលនវត្ថុ​អ្នកដទៃ តាម​មាត្រា​២៥៥ នៃ​ច្បាប់​ភូមិបាល កាលពី​អំឡុង​ឆ្នាំ​២០១៦ ដែល​ធ្វើឡើង​នៅ​ភូមិ​ព្រែកដូនហែម ឃុំ​ព្រែកអំពិល ស្រុក​ខ្សាច់កណ្ដាល ខេត្ត​កណ្តាល។ លោក ថែល ធីលែន នៅ​ពេលនេះ​កំពុងតែ​ត្រូវ​បាន​ឃុំ​ខ្លួន​នៅ​ពន្ធនាគារ​ខេត្ត​កណ្តាល។

ជុំវិញ​បញ្ហា​នេះ ក្រុម​អ្នក​សង្កេតការណ៍​រិះគន់​ថា ក្នុង​សង្គម​ខ្មែរ​បច្ចុប្បន្ន​ដែល​ដឹកនាំ​ដោយ​រដ្ឋាភិបាល​ឯក​បក្ស​របស់​បុរស​ខ្លាំង តែង​អនុវត្ត​នូវ​ទ្រឹស្ដី​លាប​ពណ៌​លើ​សកម្មជន​សង្គម ឬ​សកម្មជន​នយោបាយ ដើម្បី​ចាប់​ខ្លួន និង​បំបិទ​សេរីភាព​នៃ​ការ​បញ្ចេញមតិ​របស់​ពួកគេ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស