មន្ត្រីក្រសួងរ៉ែ និងថាមពល ឱ្យដឹងថា កម្ពុជានឹងទទួលបានចំណូលពីការលក់ប្រេងឆៅជាង ១៤លានដុល្លារក្រោយពីតស៊ូតាមច្បាប់ជាតិ និងអន្តរជាតិយ៉ាងស្វិតស្វាញរយៈពេលប្រមាណ ២ឆ្នាំមកនេះ ខណៈមតិភាគច្រើនចាត់ទុកថាជាការបរាជ័យរបស់កម្ពុជា។
រដ្ឋលេខាធិការក្រសួងរ៉ែ និងថាមពល លោក ម៉េង សក្តិធារ៉ា បានសរសេរនៅលើទំព័រហ្វេសប៊ុករបស់លោកកាលពីថ្ងៃទី១១ ខែតុលា ឆ្នាំ២០២២ នេះថា បន្ទាប់ពីការប្រកាសក្ស័យធនរបស់ក្រុមហ៊ុន KrisEnergy និងការចាកចេញរបស់កប៉ាល់ផ្ទុកប្រេងពីកម្ពុជាកាលពីឆ្នាំមុននេះ តំណក់ប្រេងដំបូងរបស់កម្ពុជាត្រូវបានមតិភាគច្រើនចាត់ទុកថាជាការបរាជ័យរបស់កម្ពុជា នៅក្នុងដំណើរផលិតកម្មប្រេងរបស់ខ្លួន ហើយបានបាត់បង់ធនធានទាំងនេះទាំងស្រុង ប៉ុន្តែក្រោយពីរដ្ឋាភិបាលកម្ពុជាបានតស៊ូតាមច្បាប់ជាតិ និងអន្តរជាតិ ព្រមទាំងមានការចរចាពាណិជ្ជកម្មដ៏ស្វិតស្វាញមក លោកថាកម្ពុជាបានរក្សាការពារកម្មសិទ្ធិ និងផលប្រយោជន៍សេដ្ឋកិច្ចរបស់កម្ពុជាបានយ៉ាងពេញលេញក្នុងនាមជាម្ចាស់ធនធានដោយរកឃើញប្រេងឆៅដែលបានបាត់ជិត ៣០ម៉ឺនបារ៉ែលត្រឡប់មកវិញ។
លោកបញ្ជាក់ថា គិតត្រឹមខែកញ្ញា ឆ្នាំ២០២២ នេះ កម្ពុជាបានបិទបញ្ចប់ដោយជោគជ័យក្នុងការលក់ប្រេងឆៅរបស់កម្ពុជាបានទឹកប្រាក់ជាង ២៥លានដុល្លារ ដោយទឹកប្រាក់ដែលបាននេះត្រូវកាត់កងថ្លៃឈ្នួលទីផ្សារ និងការបញ្ចុះថ្លៃតាមគុណភាពប្រេង ១១,៤៥ដុល្លារក្នុងមួយបារ៉ែល ស្មើនឹងជាង ៣លានដុល្លារ។
ចំពោះការចំណាយលើការដឹកជញ្ជូន ការបង់ថ្លៃធានារ៉ាប់រង ថ្លៃសេវាផ្ទេរផ្ទុក និងសេវាជំនាញការអន្តរជាតិផ្សេងៗជិត ២លានដុល្លារ។
ក្រោយពីការទូទាត់ថ្លៃទាំងអស់នេះ លោក ម៉េង សក្តិធារ៉ា អះអាងថា ចំណូលដែលកម្ពុជាលក់ប្រេងឆៅនៅសល់សម្រាប់ការបែងចែកដល់ភាគីពាក់ព័ន្ធជាង ២០លានដុល្លារ ក្នុងនោះភាគីរដ្ឋាភិបាលកម្ពុជាត្រូវទទួលបាន ៧០% នៃចំណូលលក់នៅសល់ជាង ២០លានដុល្លារនេះ ឬស្មើនឹងជាង ១៤លានដុល្លារ។
ក្រៅពីប្រាក់បានទទួលលក់ប្រេងឆៅហើយ មន្ត្រីក្រសួងរ៉ែ និងថាមពលរូបនេះថា ភាគីរដ្ឋាភិបាលក៏ទទួលបានបន្ថែមនូវចំណូលថវិកាចំនួន ៥លានដុល្លារដែលរឹបអូសពីប្រាក់តម្កល់ធានាកាតព្វកិច្ចរបស់ក្រុមហ៊ុន KrisEnergy ដែលបានតម្កល់នៅមុនពេលប្រកាសក្ស័យធន និងស្ថាប័នភណ្ឌ និងកប៉ាល់ផលិតកម្មប្រេងដែលមានស្រាប់នៅទីតាំងផលិតកម្ម ស្ថិតក្នុងតំបន់ផ្លាតហ្វម A នៅប្លុក A ផងដែរ។
លោក ម៉េង សក្តិធារ៉ា អះអាងថាដំណើរផលិតកម្មប្រេងរបស់កម្ពុជាមិនបញ្ចប់ដោយការក្ស័យធនរបស់ក្រុមហ៊ុន KrisEnergy នោះទេ។ ជាមួយប្រព័ន្ធស្ថាប័នភណ្ឌដែលមានរួចហើយ និងទុនដំបូងដែលបានពីការលក់ប្រេងនេះ រដ្ឋអាចបន្តដំណើរការផលិតប្រេងដែលនៅសល់តាមអណ្ដូងប្រេងទាំង៥ ប្រមាណជាង ១០ម៉ឺនបារ៉ែលបន្តទៀត និងអាចខួងអណ្ដូងប្រេងកាតបន្ថែមដើម្បីផលិតប្រេងនៅតំបន់មួយចំនួនទៀតក្រៅពីតំបន់ផ្លាតហ្វម A នោះផងដែរ។
ស្ថាបនិកនៃអង្គការអភិវឌ្ឍន៍ផ្នត់គំនិត លោក សេក សុជាតិ បានប្រាប់សារព័ត៌មានក្នុងស្រុកថា លោកសាទរចំពោះចំណាត់ការរបស់រដ្ឋាភិបាលក្នុងការស្វែងរកប្រេងឆៅដែលបាត់ និងទទួលបានចំណូលពីការលក់ប្រេងឆៅនេះ ប៉ុន្តែលោកថា រដ្ឋាភិបាលត្រូវចាត់ចែងថវិកាដែលប្រមូលបាននោះឱ្យមានតម្លាភាព ឬយកទៅចំណាយទៅលើផ្នែកណាមួយ ត្រូវបង្ហាញជាសាធារណៈដើម្បីកុំឱ្យប្រជាពលរដ្ឋមានមន្ទិលសង្ស័យលើការចាត់ចែងថវិកានោះ ដែលនាំឱ្យមានការរិះគន់ថាមានអំពើពុករលួយ ជាដើម។
តំណក់ប្រេងឆៅដែលបូមចេញពីប្លុក A ត្រូវបានក្រុមហ៊ុន គ្រីសអិនណឺជី (KrisEnergy) ចេញពីដែនសមុទ្រកម្ពុជាកាលពីថ្ងៃទី២៩ ខែធ្នូ ឆ្នាំ២០២០ ក្រោយពីប្រកាសក្ស័យធនអំឡុងពេលប្រតិបត្តិការដោយមិនអាចបន្តអាជីវកម្មរបស់ខ្លួនបានដូចផែនការដែលបានគ្រោងទុក៕