27 C
Phnom Penh

លោក ស ខេង៖ ក្រសួង​មហាផ្ទៃ​មិន​មែន​ជា​កន្លែង​ប្រមូលផ្ដុំ​អំណាច​ដូច​រដ្ឋមន្ត្រី​មួយ​ចំនួន​ចោទ​ឡើយ

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​ក្រសួង​មហាផ្ទៃ លោក ស ខេង បាន​ច្រានចោល​ចំពោះ​ការ​ចោទប្រកាន់​របស់​រដ្ឋមន្ត្រី​មួយ​ចំនួន​ដែល​ថា ក្រសួង​មហាផ្ទៃ​ជា​កន្លែង​ប្រមូល​អំណាច និង​ចាត់ទុក​អ្នក​ដែល​ចោទ​នេះ​ថា​បណ្ដាល​មកពី​រដ្ឋមន្ត្រី​ទាំងនោះ​បារម្ភ​ខ្លាច​បាត់​អំណាច​ខ្លួនឯង។

ក្នុង​ពិធី​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​អគារ​សិក្សា និង​សមិទ្ធផល​ផ្សេងៗ​នៅ​ស្រុក​សង្កែ ខេត្ត​បាត់ដំបង កាលពី​ថ្ងៃទី​១០ ខែ​តុលា លោក ស ខេង ថ្លែង​ថា មន្ត្រី​មួយ​ចំនួន​បាន​ចោទប្រកាន់​ទាំង​មិន​យល់ និង​ក្ដាប់​គោលការណ៍​គតិយុត្តិ​មិន​ជាប់ ស្រប​ពេល​កន្លងមក លោក​បាន​ណែនាំ​ឲ្យ​មន្ត្រី​ទាំងអស់​ខិតខំ​កំណែ​ទម្រង់​រដ្ឋបាល​ក្រោម​ជាតិ​ឲ្យ​ខ្លាំង ដើម្បី​ចាត់ចែង​ផលប្រយោជន៍​ជូន​ប្រជាពលរដ្ឋ​តាម​មូលដ្ឋាន។

លោក​ចាត់ទុក​រដ្ឋមន្ត្រី និង​មន្ត្រី​មួយ​ចំនួន​ដែល​ចោទប្រកាន់​ក្រសួង​មហាផ្ទៃ​នោះ ថា​បណ្ដាល​មកពី​មន្ត្រី​រូប​នោះ​បារម្ភ​ខ្លាច​បាត់​អំណាច​ខ្លួនឯង ដោយ​មិន​ចង់​ផ្ទេរ​អំណាច​ទៅ​ឲ្យ​ថ្នាក់​ក្រោម​ជាតិ ព្រោះ​បាត់​ផលប្រយោជន៍​ខ្លួន ខណៈ​មន្ត្រី​ខ្លះ​បាន​កិបកេង​ថវិកា​រដ្ឋ​ជាច្រើន​លាន​ដុល្លារ។ លោក​បញ្ជាក់​ថា គម្រោង​ធ្វើ​ផ្លូវ​មួយ​ចំណាយ​ប្រាក់​អស់​រហូត​ដល់ ១​លាន​ដុល្លារ ប៉ុន្តែ​តម្លៃ​ដែល​ធ្វើ​ជាក់ស្ដែង លោក​ថា​អស់​តែ ៤០​ម៉ឺន​ដុល្លារ​ប៉ុណ្ណោះ។

លោក​ថា មូលហេតុ​ដែល​លោក​លើកឡើង​ដូច្នេះ មិនមែន​ជា​ការ​ហែក​ផ្ទៃក្នុង​ខ្លួនឯង​នោះ​ទេ ប៉ុន្តែ​ដោយសារ​លោក​មិន​អាច​ទ្រាំ​ចំពោះ​ទង្វើ​របស់​មន្ត្រី​ទាំងនោះ​បាន។

លោក ស ខេង អះអាង​ថា អំណាច​ដែល​រូបលោក​ប្រមូល​ឲ្យ​មន្ត្រី​ថ្នាក់​ក្រោម​ជាតិ​នោះ ដើម្បី​ទៅ​បម្រើ​ពលរដ្ឋ​ម្ចាស់​ឆ្នោត មិនមែន​យក​អំណាច​នោះ​បម្រើ​ផលប្រយោជន៍​ក្រសួង​មហាផ្ទៃ​ទេ។ លោក​ថា ការ​ធ្វើ​គណនេយ្យភាព​សង្គម​នៅ​ថ្នាក់​មូលដ្ឋាន មិនមែន​គ្រាន់តែ​ឲ្យ​មន្ត្រី​ដើរ​លើក​ដៃ​សំពះ​ពលរដ្ឋ ដើម្បី​ឲ្យ​ពលរដ្ឋ​បោះឆ្នោត​ឲ្យ​គណបក្ស​ប្រជាជន​កម្ពុជា​ទាំង​មិន​បាន​ដោះស្រាយ​បញ្ហា​ជូន​ពលរដ្ឋ​នោះ​ទេ។

រដ្ឋមន្ត្រី​ក្រសួង​មហាផ្ទៃ​រូប​នេះ​ថា ការ​ធ្វើ​គណនេយ្យភាព​ជា​ការ​ទទួល​ខុសត្រូវ​ចំពោះ​មុខ​ប្រជាពលរដ្ឋ ពីព្រោះ​ប្រសិនបើ​ពលរដ្ឋ​មាន​ទំនាស់​ដីធ្លី ទឹក​លិច និង​ជួប​បញ្ហា​ផ្សេងៗ​នោះ មន្ត្រី​ទាំងនោះ​ត្រូវ​ចុះ​ទៅ​ឲ្យ​ដល់​ទីតាំង​កើតហេតុ ដើម្បី​ដោះស្រាយ​បញ្ហា​ភ្លាមៗ​តែម្ដង។

លោក ស ខេង បន្ត​ថា ប្រសិនបើ​មន្ត្រី​បម្រើ​ប្រជាពលរដ្ឋ​បាន​ល្អ​នោះ គឺ​គណបក្ស​កាន់​អំណាច​នឹង​មិន​ចាញ់​ឆ្នោត​ឡើយ ហើយ​ប្រទេស​ជាតិ​ក៏​បាន​សុខ​សប្បាយ​ថែម​ទៀត។

គួរ​បញ្ជាក់​ផង​ដែរ​ថា សព្វថ្ងៃ​នេះ ក្រសួង​មហាផ្ទៃ​បាន​និង​កំពុង​ធ្វើ​កំណែ​ទម្រង់​វិមជ្ឈការ និង​វិសហមជ្ឈការ ដែល​ការងារ​កំណែ​ទម្រង់​នេះ​គឺជា​ការងារ​ថ្មី​សម្រាប់​កម្ពុជា និង​ទាមទារ​ឱ្យ​មាន​ការ​យកចិត្ត​ទុកដាក់ និង​ការ​ប្ដេជ្ញា​ចិត្ត​ខ្ពស់៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស