អភិបាលខេត្តព្រះសីហនុ អះអាងថា កម្លាំងសមត្ថកិច្ចពិបាកក្នុងការស្វែងរកភស្តុតាងចោទប្រកាន់បទល្មើសនៃអំពើជួញដូរមនុស្សខុសច្បាប់នៅលើទឹកដីរបស់ខ្លួននាពេលបច្ចុប្បន្ននេះ ដោយសារពួកឧក្រិដ្ឋជនបានប្រើប្រាស់ពលកម្មឆ្លាតវៃ និងប្រព័ន្ធព័ត៌មានវិទ្យាឆ្លាតវៃ។
លោក គួច ចំរើន លើកឡើងក្នុងកិច្ចពិភាក្សាជាមួយប្រធានអង្គការ វីនរ៉ក់អន្តរជាតិ លោក ម៉ាក ថេយ៍លឺរ៍ កាលពីថ្ងៃទី១២ ខែតុលា ថា មិនទាន់មានបណ្តឹងថ្មីទាក់ទងនឹងអំពើជួញដូរមនុស្សនៅឡើយទេ បន្ទាប់ពីរដ្ឋាភិបាលបានបើកយុទ្ធនាការរយៈពេល ៤៥ថ្ងៃបង្ក្រាបអំពើជួញដូរមនុស្សដែលត្រូវបានបិទបញ្ចប់កាលពីថ្ងៃទី២ ខែតុលា ឆ្នាំ២០២២ កន្លងទៅនេះ។
លោក គួច ចំរើន លើកឡើងថា គណៈបញ្ជាការឯកភាពរដ្ឋបាលខេត្តព្រះសីហនុ បានបើកប្រតិបត្តិការប្រយុទ្ធប្រឆាំងការជួញដូរមនុស្សដោយមានការចូលរួមពីកងកម្លាំងប្រដាប់អាវុធ និងអយ្យការអមសាលាដំបូង ចាប់តាំងពីខែមករា រហូតដល់ថ្ងៃទី១៧ ខែសីហា ឆ្នាំ២០២២ កន្លងទៅនេះ គឺបង្ក្រាបបានចំនួន ១៣៥ករណី។
លោកបន្តទៀតថា កម្លាំងសមត្ថកិច្ចពិបាកក្នុងការស្វែងរកភស្តុតាងចោទប្រកាន់បទល្មើសនៃអំពើជួញដូរមនុស្សខុសច្បាប់នៅលើទឹកដីរបស់ខ្លួន ដោយសារពួកឧក្រិដ្ឋជនប្រើប្រាស់ពលកម្មឆ្លាតវៃ និងប្រព័ន្ធព័ត៌មានវិទ្យាឆ្លាតវៃ។ លោកក៏ចង់បានអ្នកដែលមានបច្ចេកវិទ្យាក្នុងការគ្រប់គ្រងបទល្មើសនៃអំពើជួញដូរមនុស្សខុសច្បាប់ និងអ្នកមានបច្ចេកវិទ្យាផងដែរ។
អភិបាលខេត្តព្រះសីហនុរូបនេះបញ្ជាក់ថា ចាប់តាំងពីពាក់កណ្តាលខែសីហា រហូតដល់ដើមខែតុលា ឆ្នាំ២០២២ កន្លងទៅនេះ ក្រសួងមហាផ្ទៃទទួលបានបណ្តឹង ២៥៣ករណីបន្ថែមទៀត ដែលបានកើតមាននៅក្នុងខេត្តនេះ ទាក់ទងនឹងការបង្ខាំងមនុស្សខុសច្បាប់ ការជួញដូរមនុស្ស និងការប្រព្រឹត្តអាជីវកម្មផ្លូវភេទ ជាដើម។
ការអះអាងនេះ ធ្វើឡើងស្របពេលដែលកម្ពុជាត្រូវបានរកឃើញថាជាប្រទេសដែលកំពុងកើតមាននូវអំពើខុសច្បាប់នានាយ៉ាងអនាធិបតេយ្យ ដូចជាអំពើជួញដូរមនុស្ស ការលាងលុយកខ្វក់ និងអំពើទុច្ចរិតផ្សេងទៀតយ៉ាងធ្ងន់ធ្ងរ។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី១៣ តុលា នេះថា ដើម្បីធានាប្រសិទ្ធភាពក្នុងការប្រយុទ្ធប្រឆាំងនឹងអំពើជួញដូរមនុស្សដែលកំពុងកើតមានព្រោងព្រាតនៅកម្ពុជាសព្វថ្ងៃនេះឲ្យមានប្រសិទ្ធភាព ជាពិសេសគឺនៅខេត្តព្រះសីហនុផ្ទាល់តែម្តង លោក គួច ចំរើន មិនអាចពឹងតែលើសមត្ថភាពបង្ក្រាបនៃអង្គភាពតែមួយផ្នែករបស់ខ្លួនបានទេ។
លោក សេក សុជាតិ លើកឡើងថា ដើម្បីទទួលបានភាពជោគជ័យក្នុងការប្រយុទ្ធប្រឆាំងអំពើជួញដូរមនុស្សនេះ រដ្ឋបាលខេត្តព្រះសីហនុ អាចស្នើសុំការសហការជាមួយក្រសួងប្រៃសណីយ៍ និងទូរគមនាគមន៍ដែលជាស្ថាប័នជំនាញខាងបច្ចេកវិទ្យា ដើម្បីដោះស្រាយបញ្ហានេះបន្ទាន់ មិនអាចដោះសាយករួចខ្លួនពីការទទួលខុសត្រូវក្នុងនាមខ្លួនជាអ្នកគ្រប់គ្រងនោះទេ។ បន្ថែមពីនេះ រដ្ឋបាលខេត្តព្រះសីហនុ ក៏អាចសុំជំនួយពីក្រសួងការពារជាតិ ក្រសួងមហាផ្ទៃ និងស្ថាប័នអន្តរជាតិផ្សេងៗទៀតផងដែរ ដើម្បីធានានូវប្រសិទ្ធភាពនៃការប្រយុទ្ធប្រឆាំងអំពើជួញដូរមនុស្សនេះ។
ស្ថាបនិកអង្គការអភិវឌ្ឍន៍ផ្នត់គំនិតរូបនេះបញ្ជាក់ថា ក្រៅពីសហការជាមួយស្ថាប័នជំនាញ រដ្ឋបាលខេត្តព្រះសីហនុ ត្រូវតែបើកទូលាយបង្ហាញពីចំណុចខ្សោយរបស់ខ្លួនដែលគ្មានសមត្ថភាពនឹងបង្ក្រាបឧក្រិដ្ឋជន ដើម្បីទទួលយកធាតុចូលពីសាកលវិទ្យាល័យឯកជននានា និងស្ថាប័នពាក់ព័ន្ធមួយចំនួនដែលមានជំនាញខាងបច្ចេកវិទ្យានេះ។
ជុំវិញបញ្ហានេះ គណៈកម្មាធិការប្រយុទ្ធប្រឆាំងអំពើជួញដូរមនុស្ស បានចេញសេចក្តីប្រកាសព័ត៌មានស្ដីពីលទ្ធផលនៃកិច្ចប្រជុំត្រួតពិនិត្យនៃការអនុវត្តយុទ្ធនាការប្រយុទ្ធប្រឆាំងគ្រប់ទម្រង់នៃអំពើជួញដូរមនុស្ស កាលពីថ្ងៃទី៧ ខែតុលា ឆ្នាំ២០២២ នេះថា ខ្លួនបានរកឃើញជនបរទេសដែលបានចូលមកបម្រើការនៅកម្ពុជាចំនួន ១០ទីតាំងក្នុងខេត្តព្រះសីហនុ ដែលមានចំនួនជាង ២៧០០នាក់ ក្នុងនោះជនបរទេសដែលមានលិខិតឆ្លងដែនចំនួនជាង ១៩០០នាក់ និងជនបរទេសដែលគ្មានប័ណ្ណការងារចំនួនជាង ១៥០០នាក់ផងដែរ។
គណៈកម្មាធិការនេះបញ្ជាក់ថា បច្ចុប្បន្ននេះ ជនបរទេសខុសច្បាប់ដែលក្រសួងបានរៀបចំបែបបទបណ្តេញចេញពីកម្ពុជាមានចំនួន ៦៨៥នាក់ និងអ្នកដែលកំពុងត្រូវបានត្រៀមបណ្តេញចេញពីកម្ពុជា ហើយកំពុងតែស្នាក់នៅទីស្នាក់ការគណៈកម្មាធិការប្រយុទ្ធប្រឆាំងអំពើជួញដូរមនុស្សមានចំនួន ៩២០បន្ថែមទៀត។
កាលពីដើមខែកញ្ញា រដ្ឋមន្ត្រីក្រសួងមហាផ្ទៃ លោក ស ខេង ត្អូញត្អែរថា កម្ពុជាកំពុងធ្លាក់ចូលទៅក្នុងបញ្ហាធំៗពីរ គឺកម្ពុជាត្រូវបានគេដាក់ឱ្យស្ថិតក្នុងបញ្ជីប្រផេះនៃក្រុមប្រទេសដែលមានហានិភ័យខ្ពស់ខាងលាងលុយកខ្វក់ និងត្រូវគេដាក់ចំណាត់ថ្នាក់ទី៣ ក្នុងបញ្ជីខ្មៅនៃក្រុមប្រទេសជួញដូរមនុស្សដែលពិភពលោកបង្កើនការតាមដានសម្រាប់ឆ្នាំ២០២២ នេះផងដែរ ដែលធ្វើឱ្យប៉ះពាល់ដល់មុខមាត់របស់កម្ពុជាយ៉ាងធ្ងន់ធ្ងរ។
ក្រសួងការបរទេសអាមេរិក កាលពីថ្ងៃទី១៩ ខែកក្កដា ក៏បានបញ្ចេញរបាយការណ៍ប្រចាំឆ្នាំ២០២២ ស្ដីពីការជួញដូរមនុស្សរបស់ខ្លួនផងដែរ ដែលទម្លាក់កម្ពុជា វៀតណាម តំបន់ម៉ាកាវ និងប្រទេសផ្សេងទៀតពីបញ្ជីខ្មៅស្ថិតក្រោមការឃ្លាំមើលនៅកម្រិតពីរ (Tier 2 Watch List) ទៅកម្រិត៣ (Tier 3 Watch List) ដែលធ្វើឲ្យកម្ពុជាស្ថិតនៅក្នុងបញ្ជីខ្មៅនៃការជួញដូរមនុស្សធ្ងន់ធ្ងរសព្វថ្ងៃនេះ៕