រដ្ឋមន្ត្រីក្រសួងមហាផ្ទៃជំរុញឱ្យសមត្ថកិច្ចក្រោមឱវាទ ខិតខំប្រឹងប្រែងប្រយុទ្ធប្រឆាំងអំពើជួញដូរមនុស្ស ល្បែងស៊ីសងខុសច្បាប់ និងបទល្មើសសម្អាតប្រាក់ដែលជាបទឧក្រិដ្ឋអន្តរជាតិ ដើម្បីកុំឱ្យបញ្ហានេះកាន់តែធ្ងន់ធ្ងរ និងមិនអាចគ្រប់គ្រងបានដូចបណ្ដាប្រទេសមួយចំនួន។
អនុប្រធានបក្សកាន់អំណាច និងជារដ្ឋមន្ត្រីក្រសួងមហាផ្ទៃ លោក ស ខេង បានលើកឡើងក្នុងពិធីដាក់ឲ្យប្រើប្រាស់នូវអគារហ្វឹកហាត់អាវុធខ្លីនៅបណ្ឌិត្យសភានគរបាលកម្ពុជា ក្នុងស្រុកកៀនស្វាយ ខេត្តកណ្ដាល នៅថ្ងៃទី១៩ ខែតុលា ឆ្នាំ២០២២ ថា អំពើជួញដូរមនុស្ស ល្បែងស៊ីសងខុសច្បាប់ និងការសម្អាតប្រាក់ ទាមទារឱ្យមានការចូលរួមឱ្យបានសកម្មជាទីបំផុតពីគ្រប់ភាគីទាំងអស់ ក្នុងនោះក៏មានមន្ត្រីនគរបាលជាតិដែរ ដើម្បីកុំឱ្យបញ្ហានេះកាន់តែធ្ងន់ធ្ងរ និងមិនអាចគ្រប់គ្រងបានដូចបណ្ដាប្រទេសមួយចំនួន។
ការអះអាងនេះ ធ្វើឡើងស្របពេលដែលកម្ពុជាកំពុងត្រូវបានគេចាត់ចូលក្នុងចំណោមប្រទេសលាងលុយកខ្វក់ និងជួញដូរមនុស្សធ្ងន់ធ្ងរ ដែលត្រូវឃ្លាំមើលឱ្យកាន់តែហ្មត់ចត់ក្នុងឆ្នាំ២០២២ នេះ។
អ្នកនាំពាក្យក្រសួងមហាផ្ទៃ ខៀវ សុភ័គ បានអះអាងនៅថ្ងៃទី១៩ ខែតុលា ឆ្នាំ២០២២ នេះថា សមត្ថកិច្ចកម្ពុជាបានទទួលសំណើចំនួន ១៦ករណីថែមទៀតដែលស្នើឱ្យជួយសង្គ្រោះជនបរទេសចំនួន ៦២នាក់ ដែលមានជនជាតិចិនចំនួន ២៩នាក់ ជនជាតិចិនតៃវ៉ាន់ ៣នាក់ ជនជាតិស្រីលង្កា ចំនួន ៤នាក់ ជនជាតិម៉ាឡេស៊ី ចំនួន ៤នាក់ ជនជាតិវៀតណាម ចំនួន ២៣នាក់ ជនជាតិជប៉ុន ១នាក់ និងជនជាតិបង់ក្លាដេស ១នាក់ផងដែរ។
លោក ខៀវ សុភ័គ អះអាងថា សព្វថ្ងៃនេះ សំណើក្នុងបញ្ជីតាមដានរបស់ក្រសួងមហាផ្ទៃមានចំនួនសរុប ៤៧៦ករណីហើយដែលមានមនុស្សត្រូវជួយសង្គ្រោះជាង ១២៤០នាក់ ប៉ុន្តែតាមរយៈនៃការស្រាវជ្រាវអង្កេតបឋម គឺបានធ្វើឡើងចំនួន ២៦១សំណើ និងបានបិទបញ្ចប់ ១៣៧សំណើផងដែរ។
ជុំវិញករណីបង្ក្រាបការជួញដូរមនុស្សនេះ ធ្វើឡើងបន្ទាប់ពីរបាយការណ៍ប្រចាំឆ្នាំស្ដីពីការជួញដូរមនុស្សនៅលើពិភពលោករបស់ក្រសួងការបរទេសសហរដ្ឋអាមេរិក ដែលបានបង្ហាញកាលពីថ្ងៃទី១៩ ខែកក្កដា ឆ្នាំ២០២២ ថា កម្ពុជាបានធ្លាក់ចុះពីចំណាត់ថ្នាក់កម្រិតពីរកាលពីឆ្នាំ២០២១ មកចំណាត់ថ្នាក់កម្រិតបី ឬបញ្ជីខ្មៅនៅឆ្នាំ២០២២ ហើយចំណាត់ថ្នាក់សម្រាប់ឆ្នាំនេះ របាយការណ៍បានបញ្ជាក់ថា រដ្ឋាភិបាលកម្ពុជាមិនបានបំពេញតាមស្តង់ដារអប្បបរមាក្នុងការប្រឹងប្រែងលុបបំបាត់ការជួញដូរមនុស្សនោះទេ។
ទាក់ទិននឹងបញ្ហានេះ រដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃទី២៣ ខែកក្កដា ឆ្នាំ២០២២ បានបង្ហាញការតាំងចិត្តបន្តស្វែងរកមូលហេតុនៅពីក្រោយអំពើជួញដូរមនុស្ស ល្បែងស៊ីសងខុសច្បាប់ និងការសម្អាតប្រាក់នេះឱ្យកាន់តែមានប្រសិទ្ធភាព ដើម្បីធ្វើការកែលំអចំណុចដែលនៅសេសសល់។
លោក ស ខេង បន្ថែមថា ចំណាត់ថ្នាក់ដែលចេញផ្សាយដោយក្រសួងការបរទេសសហរដ្ឋអាមេរិកនេះ អាចជាការបើកផ្លូវមួយឱ្យកម្ពុជារងនូវការដាក់ទណ្ឌកម្មផងដែរ។
យ៉ាងណាក៏ដោយ លោក ហ៊ុន សែន បានអះអាងក្នុងវេទិកាជាតិអន្តរសាសនាប្រឆាំងការជួញដូរមនុស្សលើកទី៦ កាលពីថ្ងៃទី២៩ ខែកញ្ញា ឆ្នាំ២០២២ ថា អំពើជួញដូរមនុស្សមិនមែនកើតមានតែនៅកម្ពុជានោះទេ ហើយការកើតមាននូវអំពើទាំងនេះ ក៏ជាការបង្ហាញឱ្យឃើញផងដែរថា កម្ពុជាមានសន្តិភាព ទើបអ្នកទាំងនោះនាំគ្នាសម្រុកចូលទៅកម្ពុជាបែបនេះ។
បច្ចុប្បន្ននេះ ខេត្តព្រះសីហនុ ត្រូវបានគេដឹងថាជាមជ្ឈមណ្ឌលនៃប្រតិបត្តិការជួញដូរមនុស្សយ៉ាងធ្ងន់ធ្ងរជាទីបំផុត ក្នុងនោះសមត្ថកិច្ចខេត្តព្រះសីហនុ បានចាប់ខ្លួនជនបរទេសជិត ៥០០នាក់កាលពីថ្ងៃទី២៥ ខែកញ្ញា ឆ្នាំ២០២២ កន្លងទៅនេះ ដែលពាក់ព័ន្ធនឹងបទល្មើសជួញដូរមនុស្ស និងសញ្ចរកម្មនៅកម្ពុជា ក្នុងនោះសមត្ថកិច្ចបានបញ្ជូនជនសង្ស័យចំនួន ៥នាក់ទៅតុលាការ ដើម្បីបន្តស៊ើបអង្កេតបទល្មើសសម្អាតប្រាក់ថែមទៀត។
បែបនេះក្តី អភិបាលខេត្តព្រះសីហនុ លោក គួច ចំរើន ធ្លាប់បានត្អូញត្អែរកាលពីពេលថ្មីៗនេះថា បច្ចុប្បន្ននេះ ក្រុមឧក្រិដ្ឋជនមានសមត្ថភាពខ្ពស់ជាងសមត្ថកិច្ច ព្រោះថាពួកគេបានប្រើប្រាស់ពលកម្មឆ្លាតវៃ និងប្រព័ន្ធព័ត៌មានវិទ្យាឆ្លាតវៃ ដូច្នេះសមត្ថកិច្ចពិបាកក្នុងការស្វែងរកភស្តុតាងដើម្បីចាប់ខ្លួនឧក្រិដ្ឋជនទាំងនោះយ៉ាងខ្លាំង៕