មន្ត្រីជាន់ខ្ពស់បក្សប្រឆាំងសម្ដែងការអស់សង្ឃឹមចំពោះវិស័យកសិកម្មរបស់កម្ពុជា ដែលមិនអាចងើបឡើងដូចជាការអះអាងរបស់រដ្ឋមន្ត្រីក្រសួងកសិកម្ម លោក ឌិត ទីណា នៅគ្រាដែលកម្ពុជាពឹងផ្អែកតែទៅលើដង្ហើមសេដ្ឋកិច្ចរបស់ប្រទេសជិតខាងសម្រាប់ការនាំចូល និងការនាំចេញផលិតផលកសិកម្មទាំងស្រុងដូចសព្វថ្ងៃ។
អតីតអ្នកទោសនយោបាយ និងជាមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានប្រាប់សារព័ត៌មាន The Cambodia Daily នៅថ្ងៃទី២១ តុលា នេះថា កន្លងមករដ្ឋាភិបាលតែងអួតពីគោលនយោបាយយុទ្ធសាស្ត្រចតុកោណរបស់ខ្លួន ដែលក្នុងនោះក៏បានចាត់ទុកវិស័យកសិកម្មជាវិស័យអាទិភាពផងដែរ ប៉ុន្តែវិស័យនេះជាក់ស្តែងគឺមិនមានការធានាបាននូវភាពល្អប្រសើរជូនពលរដ្ឋនោះទេ ទាំងហេដ្ឋារចនាសម្ព័ន្ធគ្រប់គ្រង និងតម្លៃកសិផលដែលប្រជាពលរដ្ឋផលិតបាន។
លោក មាជ សុវណ្ណារ៉ា ត្អូញត្អែរថា វិស័យកសិកម្មនៅកម្ពុជានៅតែរំពឹងលើទឹកភ្លៀងដដែល បើទោះបីជានៅប្រទេសជិតខាងបានឈានដល់ដំណាក់កាលតាមបែបកសិកម្មទំនើបហើយក៏ដោយ ដោយសារតែបែបនេះហើយ ទើបដំណាំកសិករខ្មែរតែងជួបបញ្ហាជាប្រចាំ ដូចជាជួបគ្រោះរាំងស្ងួត ជួបគ្រោះទឹកជំនន់ និងគ្រោះមហន្តរាយដែលបណ្តាលមកពីសត្វល្អិតបំផ្លាញ ជាដើម។ ជាងនេះទៀត រដ្ឋាភិបាលក៏មិនដែលធានាបាននូវទីផ្សារស្ថិតស្ថេរសម្រាប់កសិផលរបស់កសិករខ្មែរតាំងពីដើមរហូតមកទល់ពេលបច្ចុប្បន្ននេះ។
មន្ត្រីជាន់ខ្ពស់បក្សប្រឆាំងរូបនេះបញ្ជាក់ថា លោកហាក់គ្មានសង្ឃឹមលើប្រព័ន្ធដឹកនាំរដ្ឋាភិបាលបច្ចុប្បន្ននេះ ថានឹងអាចលើកស្ទួយពីជីវភាពកសិករក្រោមផែនការអភិវឌ្ឍន៍កសិកម្មរបស់កម្ពុជាឱ្យរីកចម្រើនបានទេ ព្រោះថាសេណារីយោក្នុងការអភិវឌ្ឍជាតិគ្រប់វិស័យសព្វថ្ងៃនេះ ត្រូវគេមើលឃើញថា បានធ្លាក់ចូលទៅក្នុងល្បិចកលនៃការកេងចំណេញនយោបាយរបស់បក្សកាន់អំណាចទៅហើយ បើទោះបីជាមានការរីកចម្រើនហេដ្ឋារចនាសម្ព័ន្ធខ្លះៗ ក៏គ្រាន់តែជាវិធីបន្លំភ្នែកពលរដ្ឋប៉ុណ្ណោះ។
កាលពីថ្ងៃទី២០ ខែតុលា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា អះអាងក្នុងពេលចុះចែកស្រូវពូជដល់ពលរដ្ឋក្នុងខេត្តកំពង់ចាម ថា គោលនយោបាយកសិកម្មរបស់កម្ពុជាទៅថ្ងៃមុខមិនមែនជាការជំរុញឲ្យឡើងថ្លៃកសិផលដែលនឹងបង្កការលំបាកដល់ពលរដ្ឋ អ្នកប្រើប្រាស់នោះទេ ប៉ុន្តែលោកនឹងធ្វើឲ្យកសិករកាត់បន្ថយការចំណាយក្នុងការផលិតឱ្យបានកាន់តែច្រើន ដើម្បីទទួលបានការចំណេញកាន់តែខ្ពស់លើវិស័យនេះ។
ទាក់ទិននឹងបញ្ហានេះ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានប្រកាសតែងតាំងមន្ត្រីខុទ្ទកាល័យរបស់ខ្លួនដែលមានសមាសភាព ៧រូបកាលពីថ្ងៃទី១៨ ខែតុលា ឆ្នាំ២០២២ កន្លងទៅ ដើម្បីជំរុញវិស័យនេះឱ្យរីកចម្រើនទៅមុខ។
យ៉ាងណាក៏ដោយ គេមិនទាន់មានទំនុកចិត្តលើរដ្ឋមន្ត្រីថ្មីនេះនៅឡើយទេ ដោយសារតែលោក ឌិត ទីណា មិនធ្លាប់មានប្រវត្តិ និងស្នាដៃក្នុងការដឹកនាំវិស័យកសិកម្មកន្លងមក។ ជាងនេះទៀត ក៏មានការរិះគន់ដែរថា ការតែងតាំងលោកឱ្យឡើងជារដ្ឋមន្ត្រីកសិកម្មនេះ គឺធ្វើឡើងដោយយោងតាមខ្សែបណ្ដាញបក្ខពួកដែលឪពុករបស់គាត់ គឺលោក ឌិត មុន្ទី ជាប្រធានតុលាការកំពូល និងជាសមាជិកជាន់ខ្ពស់ក្នុងបក្សកាន់អំណាចប៉ុណ្ណោះ។
បច្ចុប្បន្ននេះ វិស័យកសិកម្មនៅកម្ពុជាតែងតែជួបគ្រោះធម្មជាតិជារៀងរាល់ឆ្នាំ ក្នុងនោះកាលពីថ្ងៃទី១៨ ខែតុលា ឆ្នាំ២០២១ ក្រសួងកសិកម្ម រុក្ខាប្រមាញ់ និងនេសាទ បានចេញរបាយការណ៍របស់ខ្លួនស្ដីពីការគ្រប់គ្រងលើវិស័យកសិកម្មនៅកម្ពុជាថា ដំណាំស្រូវដែលបានប៉ះពាល់ដោយសារគ្រោះរាំងស្ងួតក្នុងឆ្នាំ២០២១ មានចំនួនជាង ២៤ម៉ឺនហិកតារ ខណៈដំណាំស្រូវដែលរងគ្រោះដោយសារទឹកជំនន់មានចំនួនជាង ៧ម៉ឺនហិកតារផងដែរ។ ដោយឡែកដំណាំសាកវប្បកម្ម ក៏ត្រូវរងការខូចខាតដោយសារគ្រោះទឹកជំនន់ គ្រោះរាំងស្ងួត និងសត្វល្អិតបំផ្លាញជាច្រើនម៉ឺនហិកតារថែមទៀត។
ជុំវិញបញ្ហានេះ គណៈកម្មការជាតិគ្រប់គ្រងគ្រោះមហន្តរាយ បានបង្ហាញរបាយការណ៍ស្ដីពីការខូចខាតដំណាំកសិកម្មដែលរងគ្រោះដោយទឹកជំនន់ កាលពីថ្ងៃទី៨ ខែតុលា ឆ្នាំ២០២២ នេះថា កម្ពុជាបានរងនូវការជន់លិចដោយជំនន់ទឹកភ្លៀងចំនួន ២២ខេត្ត ៩៦ស្រុក និង ៧៧០ឃុំ ដែលធ្វើឲ្យលិចលង់ដំណាំស្រូវជាង ១សែន ៥ម៉ឺនហិកតារ និងដំណាំរួមផ្សំជាង ១ម៉ឺន ៤ពាន់ហិកតារផងដែរ៕