តុលាការកំពូលក្រុងភ្នំពេញសម្រេចប្រគល់លិខិតឆ្លងដែនឱ្យអតីតបុគ្គលិកវិទ្យុអាស៊ីសេរី លោក យាង សុធារិន្ទ ហៅ យាង សុជាមេត្តា វិញ ដោយសំអាងថាជនជាប់ចោទតែងចូលរួមសហការជាមួយតុលាការនៅគ្រប់នីតិវិធី និងដើម្បីឱ្យរូបលោកអាចទៅជួបមុខបងស្រីរបស់ខ្លួនដែលកំពុងមានជំងឺស្ថិតក្នុងដំណាក់កាលចុងក្រោយនៅស្រុកកំណើត។
កាលពីថ្ងៃទី២៦ ខែតុលា ឆ្នាំ២០២២ តុលាការកំពូលបានបើកសវនាការលើបណ្តឹងសាទុក្ខសុំដកលិខិតឆ្លងដែនទៅប្រើប្រាស់វិញរបស់លោក យាង សុធារិន្ទ ហៅ យាង សុជាមេត្តា អតីតអ្នករាយការណ៍ព័ត៌មានវិទ្យុអាស៊ីសេរី ដោយប្រកាសសាលដីកានៅថ្ងៃសុក្រនេះ។
នៅក្នុងបន្ទប់សវនាការនាព្រឹកថ្ងៃសុក្រនេះ ប្រធានក្រុមប្រឹក្សាជំនុំជម្រះ លោក គង់ ស្រ៊ីម បានសម្រេចប្រគល់លិខិតឆ្លងដែនឱ្យទៅលោក យាង សុធារិន្ទ កាន់កាប់វិញ ដោយសំអាងថា ជនជាប់ចោទរូបនេះតែងចូលរួមសហការជាមួយតុលាការនៅគ្រប់នីតិវិធី ហើយម្យ៉ាងទៀត បងស្រីរបស់លោកកំពុងឈឺធ្ងន់នៅឯស្រុកកំណើតក្នុងទឹកដីកម្ពុជាក្រោម។ ជាងនេះទៅទៀត លោក យាង សុធារិន្ទ សន្យាថានឹងបង្ហាញខ្លួននៅចំពោះមុខតុលាការគ្រប់ពេលកោះហៅ។
តែយ៉ាងណា ប្រធានក្រុមប្រឹក្សាជំនុំជម្រះក៏បានព្រមានដែរថា ក្នុងករណីដែលជនជាប់ចោទគេចវេះមិនចូលខ្លួនធ្វើតាមការសន្យានៅពេលតុលាការកោះហៅ លោកអាចប្រឈមនឹងការចាប់ខ្លួនដាក់ពន្ធនាគារសាជាថ្មីទៀត។
កាលពីថ្ងៃទី២៦ ខែតុលា ឆ្នាំ២០២២ នេះ អតីតបុគ្គលិកវិទ្យុអាស៊ីសេរី លោក យាង សុធារិន្ទ ហៅ យាង សុជាមេត្តា បានចូលទៅបំភ្លឺក្នុងសវនាការរបស់លោកតាមដីកាតុលាការកំពូល ដែលបានកោះហៅកាលពីថ្ងៃទី៣ ខែតុលា ឆ្នាំ២០២២ ជុំវិញបណ្ដឹងសាទុក្ខដែលលោកត្រូវបានចោទប្រកាន់ពីបទ ប្រគល់ឱ្យរដ្ឋបរទេសនូវព័ត៌មានដែលធ្វើឱ្យអន្តរាយដល់ការការពារជាតិ ឬហៅថា បទចារកម្ម តាមមាត្រា៤៤៥ នៃក្រមព្រហ្មទណ្ឌ ដែលបានប្រព្រឹត្តនៅក្នុងប្រទេសកម្ពុជាកាលពីឆ្នាំ២០១៧ កន្លងទៅ។
ក្នុងសវនាការនោះ លោក យាង សុធារិន្ទ បានស្នើសុំឯកសារសម្គាល់ខ្លួនរបស់លោកមកវិញ រួមមានអត្តសញ្ញាណប័ណ្ណ និងលិខិតឆ្លងដែន ជាដើម ដើម្បីឱ្យលោកអាចឆ្លងដែនទៅស្រុកកំណើតនៅក្នុងទឹកដីកម្ពុជាក្រោម និងជួបជុំបងស្រីដែលកំពុងធ្លាក់ខ្លួនឈឺធ្ងន់ក្នុងដំណាក់កាលចុងក្រោយ និងបានជួបជុំឪពុកម្តាយដែលខកខានជួបមុខគ្នាចាប់តាំងពីលោកត្រូវបានចាប់ខ្លួនកាលពីខែវិច្ឆិកា ឆ្នាំ២០១៧ មក។
លោក យាង សុធារិន្ទ បានប្រាប់សារព័ត៌មាន The Cambodia Daily នៅមុនការផ្សាយនេះបន្តិចថា លោកមានការសប្បាយចិត្តខ្លាំងណាស់ដែលលោកអាចមានលទ្ធភាពធ្វើដំណើរទៅស្រុកកំណើតរបស់លោក ដើម្បីជួបជុំក្រុមគ្រួសារ និងឲ្យទាន់ដង្ហើមចុងក្រោយរបស់បងស្រីរបស់លោក។ លោកបន្តថា នេះជាជំហានវិជ្ជមានទៅមុខសម្រាប់លោក ប៉ុន្តែទោះបីជាយ៉ាងណាក៏ដោយ លោកនៅតែអំពាវនាវឲ្យមានការទម្លាក់ចោលការចោទប្រកាន់រូបលោក និងលោក អ៊ួន ឈិន ដោយសារលោកទាំងពីរមិនមានកំហុសដូចការចោទប្រកាន់របស់តុលាការនោះឡើយ។
ចំណែកនាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព បានសរសេរលើគណនីហ្វេសប៊ុករបស់អ្នកស្រីនៅថ្ងៃទី២៨ តុលា នេះថា វាជាដំណឹងល្អដែលតុលាការកំពូលបានសម្រេចប្រគល់លិខិតឆ្លងដែនជូនលោក យាង សុធារិន្ទ វិញ។
អ្នកស្រី ចក់ សុភាព អំពាវនាវឱ្យតុលាការកំពូលទម្លាក់បទចោទប្រកាន់ដ៏អយុត្តិធម៌ពីបុគ្គលិកសារព័ត៌មានរូបនេះ ដើម្បីឱ្យលោកមានសេរីភាពពេញលេញឡើងវិញក្នុងការចូលរួមអភិវឌ្ឍសង្គមជាតិដូចពលរដ្ឋដទៃដែរ ព្រោះថាតុលាការបានអូសបន្លាយសំណុំរឿងនេះអស់រយៈពេលជិត ៥ឆ្នាំមកហើយ។
កាលពីថ្ងៃទី១៨ ខែវិច្ឆិកា ឆ្នាំ២០១៧ អតីតអ្នកសារព័ត៌មានវិទ្យុអាស៊ីសេរី លោក យាង សុធារិន្ទ ត្រូវបានអាជ្ញាធរក្រុងភ្នំពេញចាប់ខ្លួន ក្រោមបទចោទ ប្រគល់ឱ្យរដ្ឋបរទេសនូវព័ត៌មានដែលធ្វើឱ្យអន្តរាយដល់ការការពារជាតិ ឬហៅថា បទចារកម្ម តាមមាត្រា៤៤៥ នៃក្រមព្រហ្មទណ្ឌ ដែលនឹងត្រូវផ្ដន្ទាទោសដាក់ពន្ធនាគារពី ៧ឆ្នាំទៅ ១៥ឆ្នាំ ប៉ុន្តែការចាប់ខ្លួននេះធ្វើឡើងក្រោយរូបលោកបានបញ្ចប់កិច្ចសន្យាបម្រើការឱ្យវិទ្យុអាស៊ីសេរីកាលពីចុងខែកញ្ញា ឆ្នាំ២០១៧ ទៅហើយនោះ៕