31 C
Phnom Penh

សង្គម​ស៊ីវិល​រិះគន់​ថា​ការ​បង្ក្រាប​អំពើ​ជួញដូរ​មនុស្ស​កន្លងមក​ចាប់​បាន​តែ​ជនល្មើស​តូចតាច

ដោយ ឌឹ ខេមបូឌា ដេលី

បទវិភាគ

ក្រុម​សង្គម​ស៊ីវិល​រិះគន់​ថា ការ​ប្រយុទ្ធ​ប្រឆាំង និង​ការ​បង្ក្រាប​អំពើ​ជួញដូរ​មនុស្ស​នៅ​កម្ពុជា​កន្លងមក ចាប់​បាន​តែ​ជនល្មើស​តូចតាច​ប៉ុណ្ណោះ ចំណែក​អ្នក​នៅ​ពី​ក្រោយ​ខ្នង​នៃ​អំពើ​ជួញដូរ​ខុស​ច្បាប់​ដែល​មាន​ជាប់​ពាក់ព័ន្ធ​នឹង​មន្ត្រី​រដ្ឋាភិបាល​កម្ពុជា នៅ​មិន​ទាន់​ឃើញ​បើក​ការ​ស៊ើប​អង្កេត​នៅឡើយ។

នាយក​ប្រតិបត្តិ​មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស (សង់ត្រាល់) លោក មឿន តុលា បាន​ប្រាប់​សារព័ត៌មាន The Cambodia Daily នៅ​ថ្ងៃទី​២ វិច្ឆិកា នេះ​ថា លោក​ទទួលស្គាល់​ថា​រយៈពេល​ចុង​ក្រោយ​នេះ រដ្ឋាភិបាល​កម្ពុជា​បាន​ប្រយុទ្ធ​ប្រឆាំង​យ៉ាង​ខ្លាំង​ចំពោះ​អំពើ​ជួញដូរ​មនុស្ស​ខុស​ច្បាប់​នេះ ប៉ុន្តែ​ជា​លទ្ធផល គឺ​អាច​បង្ក្រាប​បាន​តែ​ជនល្មើស​តូចតាច​ប៉ុណ្ណោះ។

លោក​បន្ត​ថា ដើម្បី​ធានា​ប្រសិទ្ធភាព​ក្នុង​ការ​អនុវត្ត​បង្ក្រាប​អំពើ​ជួញដូរ​មនុស្ស​ខុស​ច្បាប់​នេះ រដ្ឋាភិបាល​គួរតែ​មាន​វិធានការ​ត្រួតពិនិត្យ​រាល់​អគារ​ដែល​មាន​ការ​សង្ស័យ និង​គ្រប់គ្រង​ដោយ​ឈ្មួញ​ជនជាតិ​ចិន ដែល​កំពុង​រីក​ស្អេកស្កះ​នៅ​ខេត្ត​មួយ​ចំនួន ដូចជា​ខេត្ត​ព្រះសីហនុ ជាដើម ដែល​បាន​ជាប់​ចំណាត់ថ្នាក់​ជា​ខេត្ត​មួយ​ដែល​រង​នូវ​ហានិភ័យ​នៃ​ការ​កើតមាន​អំពើ​ខុស​ច្បាប់​យ៉ាង​ធ្ងន់ធ្ងរ​នៅ​ពេលនេះ។

នាយក​ប្រតិបត្តិ​មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស​រូប​នេះ​បញ្ជាក់​ថា ដើម្បី​ធានា​នូវ​ប្រសិទ្ធភាព​ក្នុង​ការ​លុបបំបាត់​អំពើ​ជួញដូរ​មនុស្ស​នៅ​កម្ពុជា រដ្ឋាភិបាល​ត្រូវតែ​អនុវត្ត​ច្បាប់​ឱ្យ​តឹងរ៉ឹង​ជា​ទីបំផុត ដោយ​គ្មាន​ករណី​លើកលែង​លើ​ជនល្មើស​ណា​មួយ​ដាច់ខាត ព្រោះ​ថា​បើ​មាន​ការ​លួច​បន្ធូរបន្ថយ​ការ​អនុវត្ត​ច្បាប់​លើ​ជនល្មើស​ណា​ម្នាក់​នោះ អ្នក​ដែល​ទទួល​វាសនា​ដ៏​អាក្រក់​នេះ គឺ​មាន​តែ​កម្ពុជា​ខ្លួនឯង​ប៉ុណ្ណោះ។

លោក មឿន តុលា លើកឡើង​ថា អំពើ​ជួញដូរ​មនុស្ស​បាន​កើតឡើង​គ្រប់​ទម្រង់ និង​គ្រប់​ប្រភេទ​ទៅ​តាម​វិធីសាស្ត្រ​របស់​ជនល្មើស ដោយឡែក​ជន​រងគ្រោះ​ដែល​បាន​ចាញ់បោក​ជនល្មើស​ទាំងនោះ មាន​ករណី​ខ្លះ ពួកគេ​ត្រូវ​បាន​អាជ្ញាធរ​មាន​សមត្ថកិច្ច​បកស្រាយ និង​ចោទប្រកាន់​ថា ពួកគេ​បាន​ឆ្លងដែន​ដោយ​ខុស​ច្បាប់​ទៅវិញ។

លោក​បន្ថែម​ថា ការ​ចោទប្រកាន់​ក្នុង​ករណី​បែប​នេះ គឺ​មាន​ភាព​អយុត្តិធម៌​សម្រាប់​ជនរងគ្រោះ​ពី​អំពើ​ជួញដូរ​ខុស​ច្បាប់​នេះ​យ៉ាង​ធ្ងន់ធ្ងរ។

កាលពី​ថ្ងៃទី​១ ខែ​វិច្ឆិកា ឆ្នាំ​២០២២ រដ្ឋមន្ត្រី​ក្រសួង​មហាផ្ទៃ លោក ស ខេង បាន​អះអាង​ទៅ​កាន់​ឯកអគ្គរដ្ឋទូត​សាធារណរដ្ឋ​បារាំង ប្រចាំ​កម្ពុជា លោក Jacques PELLET ថា អាជ្ញាធរ​កម្ពុជា​កំពុង​អនុវត្ត​ការ​ប្រយុទ្ធ​ប្រឆាំង និង​បង្ក្រាប​បទល្មើស​ជួញដូរ​មនុស្ស​យ៉ាង​សកម្ម​សព្វថ្ងៃ​នេះ ខណៈ​រាជរដ្ឋាភិបាល​កម្ពុជា​ក៏​មាន​ការ​ប្ដេជ្ញាចិត្ត​ខ្ពស់​ក្នុង​ការ​ប្រយុទ្ធ​ប្រឆាំង​នឹង​អំពើ​ជួញដូរ​មនុស្ស​គ្រប់​ទម្រង់​នេះ​ផង​ដែរ។

អនុប្រធាន​បក្ស​កាន់​អំណាច លោក ស ខេង លើកឡើង​ថា តាមរយៈ​លទ្ធផល​ដែល​បាន​អនុវត្ត​កន្លងមក គឺ​ទទួល​ការ​សាទរ​ពី​មជ្ឈដ្ឋាន​ផ្ទៃក្នុង និង​បណ្ដា​ប្រទេស​ជា​មិត្ត​ក្នុង​តំបន់​ជា​បន្តបន្ទាប់។

លោក ស ខេង បន្ថែម​ថា កិច្ចការ​នេះ​ទាមទារ​ឱ្យ​មាន​កិច្ច​សហប្រតិបត្តិការ​ជិតស្និទ្ធ​រវាង​បណ្ដា​ភាគី​ពាក់ព័ន្ធ​ទាំងអស់ ទាំង​ក្នុង​ប្រទេស​ដែល​មាន​ជនរងគ្រោះ​ត្រូវ​បាន​គេ​ឆបោក​មក​កម្ពុជា ដើម្បី​កាត់ផ្ដាច់​ទំនាក់ទំនង និង​ឫសគល់​នៃ​ការ​រត់​ពន្ធ ការ​ជួញដូរ និង​ការ​ឆបោក​នាំ​មនុស្ស​ឆ្លងដែន​ខុស​ច្បាប់​ទាំងនោះ។

ផ្អែក​តាម​របាយការណ៍​របស់​រដ្ឋាភិបាល​កម្ពុជា​ជុំវិញ​ការ​ប្រយុទ្ធ​ប្រឆាំង​នឹង​អំពើ​ជួញដូរ​មនុស្ស​នេះ ត្រូវ​គេ​កត់សម្គាល់​ឃើញ​ថា ខេត្ត​ព្រះសីហនុ បាន​ធ្លាក់​ចូល​ទៅ​ក្នុង​ខេត្ត​ដែល​មាន​ហានិភ័យ​ខ្ពស់​ក្នុង​ការ​បង្ក​ឱ្យ​មាន​អំពើ​ជួញដូរ​មនុស្ស​ធ្ងន់ធ្ងរ។

ជាក់ស្តែង កាលពី​ចុង​ខែ​សីហា ឆ្នាំ​២០២២ កន្លងទៅ ក្រសួង​មហាផ្ទៃ​បាន​អះអាង​ថា គិត​ត្រឹម​ថ្ងៃទី​១ ខែ​មករា រហូត​ដល់​ថ្ងៃទី​២០ ខែ​សីហា ឆ្នាំ​២០២២ អាជ្ញាធរ​កម្ពុជា​បាន​រក​ឃើញ និង​ជួយ​សង្គ្រោះ​ជនបរទេស​ដែល​ប្រកាស​ថា​ជា​ជនរងគ្រោះ​ពី​អំពើ​ជួញដូរ​មនុស្ស​មាន​ចំនួន ៨៧​ករណី ដែល​មាន​ជនរងគ្រោះ​ចំនួន ៨៦៥​នាក់ ខណៈ​សំណុំរឿង​ដែល​បាន​បញ្ជូន​ទៅ​តុលាការ​មាន​ចំនួន ១៧​ករណី​ដែល​មាន​ជនសង្ស័យ​សរុប​ចំនួន ៦០​នាក់។

សារព័ត៌មាន​អន្តរជាតិ អាល់ចាហ្ស៊ីរ៉ា (Aljazeera) កាលពី​ថ្ងៃទី​១៤ ខែ​កក្កដា ឆ្នាំ​២០២២ បាន​ចេញ​ផ្សាយ​ជា​វីដេអូ​រយៈពេល​ជាង ៤០​នាទី​ដែល​មាន​ចំណងជើង​ថា «Forced to Scam: Cambodia’s Cyber Slaves» «ទាសករ​តាម​អ៊ីនធឺណិត​នៅ​កម្ពុជា» ដោយ​ក្នុង​វីដេអូ​នោះ​បាន​រៀបរាប់​យ៉ាង​ច្រើន​ពី​ការ​ស៊ើប​អង្កេត​នៃ​អំពើ​ជួញដូរ​មនុស្ស និង​ការ​ធ្វើ​ទាសភាព​ដោយ​ប្រតិបត្តិការ​បោកប្រាស់​តាម​អ៊ីនធឺណិត​របស់​ជនជាតិ​ចិន​នៅ​កម្ពុជា និង​បណ្ដាញ​របស់​ពួកគេ​ដែល​ពាក់ព័ន្ធ​ជាមួយ​នឹង​មន្ត្រី​រដ្ឋាភិបាល​កម្ពុជា​ជា​ប្រព័ន្ធ។

ក្រសួង​ការបរទេស​អាមេរិក កាលពី​ថ្ងៃទី​១៩ ខែ​កក្កដា ក៏​បាន​បញ្ចេញ​របាយការណ៍​ប្រចាំ​ឆ្នាំ​២០២២ ស្ដីពី​ការ​ជួញដូរ​មនុស្ស​របស់​ខ្លួន​ផង​ដែរ ដែល​ទម្លាក់​កម្ពុជា វៀតណាម តំបន់​ម៉ាកាវ និង​ប្រទេស​ផ្សេង​ទៀត​ពី​បញ្ជីខ្មៅ​ស្ថិត​ក្រោម​ការ​ឃ្លាំមើល​នៅ​កម្រិត​ពីរ (Tier 2 Watch List) ទៅ​កម្រិត​៣ (Tier 3 Watch List) ដែល​ធ្វើ​ឲ្យ​កម្ពុជា​ស្ថិត​នៅ​ក្នុង​បញ្ជីខ្មៅ​នៃ​ការ​ជួញដូរ​មនុស្ស​ធ្ងន់ធ្ងរ​សព្វថ្ងៃ​នេះ។

កាលពី​ថ្ងៃទី​២០ ខែ​សីហា ឆ្នាំ​២០២២ សារព័ត៌មាន Taipei Times បាន​ចុះផ្សាយ​ថា នគរបាល​ក្រុង​តៃប៉ិ នៃ​កោះ​តៃវ៉ាន់ កាលពី​ពាក់កណ្តាល​ខែ​សីហា ឆ្នាំ​២០២២ នេះ បាន​សន្និដ្ឋាន​ថា មាន​ជនជាតិ​ចិន​តៃវ៉ាន់​ចន្លោះ​ពី ២​ពាន់​នាក់​ទៅ ៥​ពាន់​នាក់ ត្រូវ​បាន​រងគ្រោះ​ដោយសារ​អំពើ​ជួញដូរ​នៅ​ក្នុង​ប្រទេស​កម្ពុជា ក្នុង​នោះ​ជនជាតិ​ចិន​តៃវ៉ាន់​ដែល​ត្រូវ​បាន​ជួយ​សង្គ្រោះ​ពី​ការ​ឃុំឃាំង​នៅ​កម្ពុជា បាន​អះអាង​ថា ពួកគេ​បាន​រង​ការ​វាយ​ធ្វើ​បាប​តាម​មធ្យោបាយ​ផ្សេងៗ​ដោយ​អ្នក​ជួញដូរ​មនុស្ស​នៅ​ក្នុង​សណ្ឋាគារ​មួយ​ចំនួន​ក្នុង​ខេត្ត​ព្រះសីហនុ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស