សហភាពសហជីពកម្ពុជា សោកស្ដាយដែលតុលាការក្រុងភ្នំពេញបដិសេធសំណើរបស់មេធាវីការពារក្ដីឲ្យលោក រ៉ុង ឈុន មិនអនុញ្ញាតឲ្យធ្វើដំណើរចេញទៅក្រៅប្រទេស ដើម្បីចូលរួមសមាជលើកទី៥ របស់សហភាពសហជីពអន្តរជាតិ (ITUC)។
ការសម្ដែងការសោកស្ដាយរបស់សហភាពសហជីពកម្ពុជានេះ ធ្វើឡើងបន្ទាប់ពីលោក សំ សុគង់ ដែលជាមេធាវីការពារក្ដីឲ្យលោក រ៉ុង ឈុន បានដាក់លិខិតស្នើសុំការអនុញ្ញាតធ្វើដំណើរទៅបរទេស ទៅសាលាដំបូងរាជធានីភ្នំពេញកាលពីថ្ងៃទី២៤ ខែតុលា ឆ្នាំ២០២២ ដើម្បីចូលរួមសមាជលើកទី៥ របស់សហភាពសហជីពអន្តរជាតិ (ITUC) នៅពាក់កណ្ដាលខែវិច្ឆិកា នេះ។
ក្នុងសេចក្ដីថ្លែងការណ៍ចុះថ្ងៃទី៣ ខែវិច្ឆិកា ឆ្នាំ២០២២ របស់សហភាពសហជីពកម្ពុជា ឱ្យដឹងថា ការសម្រេចរបស់តុលាការជាទង្វើគាបសង្កត់សេរីភាពការធ្វើដំណើររបស់លោក រ៉ុង ឈុន យ៉ាងធ្ងន់ធ្ងរ និងមិនបានផ្ដល់តម្លៃឲ្យស្ថាប័ន ITUC ដែលមានសមាជិកជាង ៤០០លាននាក់ និងអង្គការសហជីពជាសមាជិកប្រមាណ ៣០០អង្គការសហជីពទូទាំងពិភពលោក។ លើសពីនេះ ITUC មានដៃគូជាមួយអង្គការអន្តរជាតិសំខាន់ៗ និងមានឥទ្ធិពលនៅលើឆាកអន្តរជាតិផងដែរ។
សហភាពសហជីពកម្ពុជា ចាត់ទុកការមិនអនុញ្ញាតឲ្យលោក រ៉ុង ឈុន ធ្វើដំណើរទៅក្រៅប្រទេស ដើម្បីចូលរួមមហាសន្និបាតលើកទី៥ របស់ ITUC នេះ វាគ្មានផ្ដល់ផលចំណេញអ្វីដល់កម្ពុជាឡើយ ផ្ទុយទៅវិញវានឹងធ្វើឲ្យកម្ពុជាខូចកេរ្តិ៍ឈ្មោះនៅលើឆាកអន្តរជាតិ នៅពេលដែល ITUC លើកករណីលោក រ៉ុង ឈុន នៅក្នុងមហាសន្និបាតនោះ។
សហភាពសហជីពកម្ពុជា បញ្ជាក់ថា នេះជាលើកទីពីរហើយដែលតុលាការមិនអនុញ្ញាតឲ្យលោក រ៉ុង ឈុន ចេញទៅក្រៅប្រទេស បើទោះបីជាមានការអញ្ជើញពី ITUC និងមានលិខិតបញ្ជាក់ ព្រមទាំងការធានាអះអាងពីមេធាវីការពារក្ដីថា លោក រ៉ុង ឈុន នឹងត្រឡប់មកកម្ពុជានៅពេលចប់មហាសន្និបាតក្ដី ប៉ុន្តែតុលាការនៅតែមិនអនុញ្ញាត។
ការមិនអនុញ្ញាតនេះ ដោយសហភាពសហជីពកម្ពុជាថាតុលាការក្រុងភ្នំពេញមិនបានបញ្ជាក់ពីមូលហេតុឡើយ។
បើតាមសេចក្ដីថ្លែងការណ៍របស់សហភាពសហជីពកម្ពុជា បង្ហាញការសោកស្ដាយចំពោះតុលាការក្រុងភ្នំពេញដែលបដិសេធការស្នើសុំរបស់លោក សំ សុគង់ មេធាវីការពារក្ដីឲ្យលោក រ៉ុង ឈុន ក្នុងការធ្វើដំណើរទៅចូលរួមសមាជលើកទី៥ របស់សហភាពសហជីពអន្តរជាតិ ITUC ដែលប្រព្រឹត្តទៅចាប់ពីថ្ងៃទី១៧ ដល់ថ្ងៃទី២២ ខែវិច្ឆិកា ឆ្នាំ២០២២ នៅទីក្រុងម៉ែលប៊ន នៃប្រទេសអូស្ត្រាលី នាពេលខាងមុខនេះ។
ក្រៅពីបង្ហាញការសោកស្ដាយ សហភាពសហជីពកម្ពុជាទទូចឲ្យតុលាការក្រុងភ្នំពេញតម្កល់ផលប្រយោជន៍ជាតិជាធំ ដោយត្រូវពិនិត្យឡើងវិញនូវសេចក្ដីសម្រេចបដិសេធឲ្យលោក រ៉ុង ឈុន ធ្វើដំណើរទៅចូលរួមមហាសន្និបាតរបស់សហភាពសហជីពអន្តរជាតិ ITUC។
សារព័ត៌មាន The Cambodia Daily មិនអាចទាក់ទងអ្នកនាំពាក្យសាលាដំបូងរាជធានីភ្នំពេញ ដើម្បីសុំការបំភ្លឺរឿងនេះបាននៅឡើយទេ។
កាលពីថ្ងៃទី១៨ ខែកញ្ញា ឆ្នាំ២០២១ តុលាការរាជធានីភ្នំពេញសម្រេចផ្ដន្ទាទោសលោក រ៉ុង ឈុន ឲ្យជាប់ពន្ធនាគាររយៈពេល ២ឆ្នាំ ក្រោមបទចោទ «ញុះញង់បង្កឱ្យមានភាពវឹកវរដល់សន្តិសុខសង្គម» ក្រោយពីលោកបានរិះគន់លើបញ្ហាការបោះបង្គោលព្រំដែននៅខេត្តត្បូងឃ្មុំ ដែលពលរដ្ឋអះអាងថាអាជ្ញាធរវៀតណាម បានរំលោភយកដីពួកគាត់។
ក្រោយពីជាប់ពន្ធនាគារជាង ១ឆ្នាំ សាលាឧទ្ធរណ៍បានសម្រេចដោះលែងលោកចេញពីពន្ធនាគារកាលពីថ្ងៃទី១២ ខែវិច្ឆិកា ឆ្នាំ២០២១ ដោយទោសនៅសល់ត្រូវព្យួរ។ ក្រៅពីព្យួរទោសនៅសល់ហើយ ប្រធានសហជីព និងជាអ្នកឃ្លាំមើលរឿងព្រំដែនកម្ពុជាផង លោក រ៉ុង ឈុន ក៏ត្រូវបានដាក់ឲ្យស្ថិតនៅក្រោមការតាមដានរបស់តុលាការរយៈពេល ៣ឆ្នាំផងដែរ៕