អ្នកតស៊ូមតិនៅក្រៅស្រុកអះអាងថា អ្នកដែលប្រាថ្នាប្រជាធិបតេយ្យ រឿងចាំបាច់ដែលពួកគេត្រូវតែធ្វើ គឺត្រូវពួតដៃគ្នាស្នើប្រធានាធិបតីអាមេរិក លោក ចូ បៃដិន ដែលនឹងមានវត្តមាននៅកម្ពុជា ឲ្យជួយជំរុញបើកផ្លូវស្ដារប្រជាធិបតេយ្យនៅកម្ពុជាឡើងវិញ។
ប្រធានវេទិកាពលរដ្ឋ លោក គឹម សុខ បានសរសេរលើគណនីហ្វេសប៊ុករបស់លោកកាលពីថ្ងៃទី២ ខែវិច្ឆិកា ឆ្នាំ២០២២ ថា វត្តមានរបស់ប្រធានាធិបតីសហរដ្ឋអាមេរិក លោក ចូ បៃដិន នៅកម្ពុជានៅពេលនេះ គឺជាឱកាសដ៏ល្អសម្រាប់អ្នកនយោបាយកម្ពុជាបញ្ឈប់ការប្រទូសរ៉ាយគ្នា ក្នុងនោះអ្នកដែលចូលចិត្តលេងល្បែងនយោបាយបុគ្គល ក៏គួរតែបញ្ចប់ដែរ ដើម្បីងាកមកនាំគ្នាគិតគូរពីផលប្រយោជន៍ជាតិវិញ ប្រសិនបើអ្នកទាំងនោះនៅតែគិតប្រយោជន៍ជាតិធំជាងប្រយោជន៍បុគ្គលផ្ទាល់ខ្លួន និងបក្សពួករបស់ពួកគេមែននោះ។
លោក គឹម សុខ លើកឡើងថា អាយុជីវិតប្រទេសជាតិខ្មែរទាំងមូលក្នុងការធានានូវបូរណភាពទឹកដី ធានានូវភាពឯករាជ្យ និងធានានូវការអនុវត្តសិទ្ធិមូលដ្ឋានរបស់ពលរដ្ឋ ជាដើម គឺមានកត្តាកំណត់សំខាន់លើការស្ដារប្រជាធិបតេយ្យតាមស្មារតីនៃកិច្ចព្រមព្រៀងសន្តិភាពក្រុងប៉ារីស ថ្ងៃទី២៣ ខែតុលា ឆ្នាំ១៩៩១ តែមួយគត់ ដូច្នេះក្រុមអ្នកនយោបាយទាំងនោះគួរតែស្រុះស្រួលគ្នានៅពេលនេះ ដើម្បីសុភមង្គលរបស់ជាតិខ្មែរទៅថ្ងៃអនាគត។
ប្រធានវេទិកាពលរដ្ឋរូបនេះបញ្ជាក់ថា អ្នកនយោបាយខ្មែរគួរណាស់តែចេះខ្មាសប្រទេសវៀតណាម ព្រោះថាទោះបីជនជាតិវៀតណាមត្រូវច្របាច់បញ្ចូលគ្នាពីពួកសេរីជាមួយនឹងពួកកុម្មុយនីស្តក្ដី ប៉ុន្តែពួកគេអាចសហការគ្នាបានគ្រប់ពេល ដើម្បីប្រយោជន៍ជាតិ។ ដូច្នេះអ្នកនយោបាយខ្មែរ និងកូនខ្មែរគ្រប់រូប គួរតែភ្ញាក់ខ្លួនគិតគូរពីប្រយោជន៍ជាតិរបស់ខ្លួន ជាជាងការបង្អួតបក្សពួក បង្កជម្លោះជាតិឯង ដែលធ្វើឲ្យបាក់បែកសាមគ្គីជាតិដែលនឹងនាំទៅរកក្តីវិនាសអន្តរាយទៅថ្ងៃមុខ។
កាលពីថ្ងៃទី២៩ ខែតុលា ឆ្នាំ២០២២ ស្ថានទូតអាមេរិកប្រចាំកម្ពុជា បានឱ្យដឹងថា ប្រធានាធិបតីសហរដ្ឋអាមេរិក លោក ចូ បៃដិន នឹងធ្វើដំណើរទៅប្រទេសកម្ពុជានៅថ្ងៃទី១២ និងទី១៣ ខែវិច្ឆិកា ខាងមុខនេះ ដើម្បីចូលរួមកិច្ចប្រជុំកំពូលប្រចាំឆ្នាំអាមេរិក-អាស៊ាន និងកិច្ចប្រជុំកំពូលអាស៊ីបូព៌ា ដែលនឹងប្រព្រឹត្តទៅនៅអំឡុងខែវិច្ឆិកា ឆ្នាំ២០២២ ដ៏ខ្លីខាងមុខនេះ។
ស្ថានទូតសហរដ្ឋអាមេរិកប្រចាំកម្ពុជា បញ្ជាក់ថា ដំណើរទស្សនកិច្ចរបស់លោក ចូ បៃដិន នៅពេលនេះ គឺបង្ហាញពីការប្ដេជ្ញាចិត្តយូរអង្វែងរបស់សហរដ្ឋអាមេរិកចំពោះតំបន់អាស៊ីអាគ្នេយ៍ និងអព្យាក្រឹតភាពរបស់អាស៊ាន ដើម្បីពង្រឹងបន្ថែមលើភាពជោគជ័យនៃកិច្ចប្រជុំកំពូលពិសេសជាប្រវត្តិសាស្ត្រអាមេរិក-អាស៊ាន កាលពីអំឡុងខែឧសភា ឆ្នាំ២០២២ កន្លងទៅនេះ។
ប្រភពដដែលបញ្ជាក់ លោក ចូ បៃដិន នឹងបញ្ជាក់ពីសារសំខាន់នៃកិច្ចសហប្រតិបត្តិការអាមេរិក-អាស៊ានក្នុងការធានាសន្តិសុខ និងវិបុលភាពនៅក្នុងតំបន់ និងសុខមាលភាពនៃប្រជាជាតិទូទាំងសកលលោកផងដែរ។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ បានសរសេរលើគណនីហ្វេសប៊ុករបស់លោកកាលពីថ្ងៃទី២ វិច្ឆិកា នេះថា វប្បធម៌នៃការព្យាបាទនយោបាយគ្នានៅកម្ពុជា កំពុងនាំសង្គម និងប្រជាជាតិខ្មែរវិលទៅរកភាពអត្តាធិបតេយ្យនៅពេលខាងមុខ ហើយអ្នកដែលឈឺចាប់បំផុតពីមេរោគសង្គមនេះ គឺពលរដ្ឋខ្មែរតែម្តង។
លោក សេក សុជាតិ លើកឡើងថា វប្បធម៌ព្យាបាទនយោបាយគ្នានេះ គឺជាវប្បធម៌បំផ្លាញនីតិរដ្ឋ និងយុត្តិធម៌សង្គមយ៉ាងធ្ងន់ធ្ងរ ព្រោះថាជនអវិជ្ជាគឺជាជំពូកមនុស្សដែលស្អប់ច្បាប់ជាតិជាទីបំផុត ដូច្នេះអ្នកដែលយកច្បាប់ធ្វើជាឧបករណ៍នយោបាយ ច្រើនតែយកច្បាប់មកធ្វើជាលេសតាមរយៈនៃការប្រើតាមនីតិមាត់របស់ខ្លួនជាប្រចាំ។
ក្រោយកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ កម្ពុជាពិតមែនតែបានរំលត់ជម្លោះផ្ទៃក្នុងជាតិដោយអាវុធ ប៉ុន្តែជម្លោះបុគ្គលផ្ទាល់ខ្លួនរបស់អ្នកនយោបាយនៅតែបន្តមិនចេះចប់ ដែលធ្វើឱ្យប្រជាធិបតេយ្យ ការគោរពសិទ្ធិមនុស្ស និងការធានានូវប្រព័ន្ធយុត្តិធម៌របស់ខ្លួនធ្លាក់ចុះជាលំដាប់ ដែលបានបង្កទៅជាវិបត្តិជាប់គាំងនយោបាយជាតិដោះស្រាយមិនចេញរហូតដល់សព្វថ្ងៃនេះ៕