អតីតតំណាងរាស្ត្រគណបក្សសង្គ្រោះជាតិ និងជាមន្ត្រីជាន់ខ្ពស់គណបក្សប្រជាធិបតេយ្យជឿនលឿន លោក សួន រីដា អំពាវនាវឱ្យគណបក្សក្រៅរដ្ឋាភិបាលរួបរួមជាធ្លុងដូចគណបក្សសង្គ្រោះជាតិ ដើម្បីបង្រួបបង្រួមអ្នកប្រជាធិបតេយ្យឡើងវិញ បន្ទាប់ពីកម្លាំងអ្នកប្រជាធិបតេយ្យបែកខ្ញែកជិត ១០ឆ្នាំ។
លោក សួន រីដា បានសរសេរលើគណនីហ្វេសប៊ុករបស់ខ្លួននៅថ្ងៃទី២៣ មេសា នេះថា ក្រោយពីគណបក្សសង្គ្រោះជាតិ ត្រូវបានរំលាយកាលពីចុងឆ្នាំ២០១៧ អ្នកប្រជាធិបតេយ្យបានបែកបាក់គ្នាជាចម្រៀកៗ ដោយនាំគ្នាទៅបង្កើតគណបក្សនយោបាយថ្មីរៀងៗខ្លួន។
លោកលើកឡើងថា មកដល់ពេលនេះ អ្នកប្រជាធិបតេយ្យភាគច្រើនចង់ឃើញការរួបរួមឡើងវិញ ដើម្បីបង្កើតជាប៉ូលនយោបាយតែមួយស្របតាមឆន្ទៈម្ចាស់ឆ្នោត ប៉ុន្តែការរួបរួមហាក់ពិបាករកចំណុចរួមមួយសម្រាប់ពួកគេ។
លោកអះអាងថា សម្រាប់គណបក្សប្រជាធិបតេយ្យជឿនលឿន ប្រកាន់ជំហររួបរួមដោយយកបក្សតែមួយជាតំណាង ដែលមានន័យថា បក្សណាក៏បាន ដោយរៀបបញ្ជីបេក្ខជនបោះឆ្នោតតែមួយដូចគណបក្សសង្គ្រោះជាតិ គឺការច្របាច់បញ្ចូលគ្នាចាប់ពីថ្នាក់ជាតិរហូតដល់មូលដ្ឋាន។
លោកថា យ៉ាងណាក៏ដោយ សម្រាប់គណបក្សផ្សេងវិញ ដូចជាគណបក្សកម្លាំងជាតិ ជាដើម បានប្រកាន់ជំហរនយោបាយឱ្យគេចូលរួមជាមួយខ្លួន ដែលមានន័យថា គណបក្សដទៃត្រូវចុះចូលជាមួយខ្លួន ប៉ុន្តែការធ្វើបែបនេះមិនមែនជាការរួបរួមនោះទេ។ ចំណែកគណបក្សប្រជាធិបតេយ្យមូលដ្ឋាន វិញ បានប្រកាន់ជំហរ «រួបរួមតាមបែបសហការ ដោយការចែកឃុំ-សង្កាត់រវាងគណបក្សសម្ព័ន្ធភាពនីមួយៗឈរជាតំណាងក្នុងការបោះឆ្នោត»។ ដោយឡែកគណបក្សភ្លើងទៀន និងគណបក្សឆន្ទៈខ្មែរ ប្រកាន់ជំហររួបរួមដោយយកគណបក្សដទៃទៅឈរឈ្មោះនៅខេត្តតូចៗ ឬខេត្តដែលខ្លួនពុំមានសមាជិករបស់ខ្លួន ប៉ុន្តែត្រូវស្ថិតក្រោមការដឹកនាំរបស់គណបក្សទាំងពីរនេះ ដូច្នេះជំហរនេះមានន័យថាគ្រាន់តែជាការរួបរួមបំពេញចន្លោះឱ្យខ្លួនប៉ុណ្ណោះ។
មន្ត្រីបក្សក្រៅរដ្ឋាភិបាលដដែលនេះ សួរថា តើជម្រើសទាំងនេះ អ្នកប្រជាធិបតេយ្យគួរជ្រើសរើសវិធីមួយណាសម្រាប់ការរួបរួមដើម្បីកសាងកម្លាំងប្រជាធិបតេយ្យឡើងវិញឱ្យដូចកម្លាំងនយោបាយគណបក្សសង្គ្រោះជាតិ កាលពីជិត ១០ឆ្នាំមុននោះ។
ការអះអាងនេះ ធ្វើឡើងស្របពេលដែលអ្នកនយោបាយជាច្រើនដែលចេញមកពីគណបក្សសង្គ្រោះជាតិ កំពុងចេញទៅបង្កើតគណបក្សនយោបាយថ្មីរៀងៗខ្លួនក្នុងពេលនេះ។
ចាប់តាំងពីគណបក្សសង្គ្រោះជាតិ ត្រូវបានរំលាយកាលពីឆ្នាំ២០១៧ មក មន្ត្រីជាន់ខ្ពស់គណបក្សប្រឆាំងដ៏ធំមួយនេះ បានបែកចេញទៅបង្កើតគណបក្សនយោបាយថ្មីដោយខ្លួនឯងរៀងៗខ្លួន ខណៈមេដឹកនាំកំពូលបក្សនេះត្រូវបានតុលាការកាត់ទោសឱ្យជាប់ពន្ធនាគារជិត ៣០ឆ្នាំ និងដកហូតសិទ្ធិនយោបាយទាំងស្រុង។
គណបក្សនយោបាយដែលបង្កើតឡើងដោយអតីតមន្ត្រីជាន់ខ្ពស់គណបក្សសង្គ្រោះជាតិ មានចំនួន ៧គណបក្សហើយគិតមកទល់នឹងពេលនេះ រួមមាន គណបក្សខ្មែរស្រឡាញ់ជាតិ ត្រូវបានបង្កើតឡើងដោយលោក ជីវ កត្តា ប៉ុន្តែក្រោយដំណើរការមួយរយៈ ក៏បានប្រកាសរំលាយដោយខ្លួនឯង ខណៈមន្ត្រីបក្សនេះមួយចំនួនបាននាំគ្នាទៅចុះចូលជាមួយគណបក្សប្រជាជនកម្ពុជា វិញ។
ចំណែកគណបក្សខ្មែរអភិរក្ស ត្រូវបានបង្កើតឡើងដោយលោក រៀល ខេមរិន្ទ្រ គណបក្សឆន្ទៈខ្មែរ ត្រូវបានបង្កើតឡើងដោយលោក គង់ មុនីកា គណបក្សកែទម្រង់កម្ពុជា ត្រូវបានបង្កើតឡើងដោយលោក អ៊ូ ច័ន្ទរ័ត្ន ខណៈគណបក្សកម្លាំងជាតិ ត្រូវបានបង្កើតឡើងដោយ ស៊ុន ចន្ធី។
ដោយឡែកគណបក្សកម្ពុជានិយម ដែលពេលនេះបានប្តូរឈ្មោះមកជា គណបក្សប្រជាធិបតេយ្យជឿនលឿន ត្រូវបានបង្កើតឡើងដោយលោក យ៉ែម បុញ្ញឫទ្ធិ និងគណបក្សជំនាន់ថ្មី ត្រូវបានបង្កើតឡើងដោយលោក មាជ សុវណ្ណារ៉ា។
ពាក់ព័ន្ធនឹងបញ្ហានេះ គណបក្សភ្លើងទៀន បានចេញសេចក្តីប្រកាសព័ត៌មាន កាលពីដើមខែមេសា នេះថា ក្រោយចុះកិច្ចព្រមព្រៀងធ្វើសម្ព័ន្ធភាពរវាងគណបក្សភ្លើងទៀន និងគណបក្សឆន្ទៈខ្មែរ ខ្លួនមានបំណងពង្រីកមហាសាមគ្គីក្នុងចំណោមអ្នកប្រជាធិបតេយ្យដទៃទៀតឱ្យកាន់តែទូលំទូលាយ ដើម្បីដោះស្រាយបញ្ហាប្រទេសជាតិជាមួយគ្នា៕
© 2026, ឌឹ ខេមបូឌា ដេលី. All rights reserved.