មន្ត្រីជាន់ខ្ពស់នៃក្រសួងមហាផ្ទៃ បដិសេធថា បណ្តឹងមួយចំនួនជុំវិញករណីអំពើជួញដូរមនុស្សនៅកម្ពុជា មិនមែនសុទ្ធតែជាការពិតនោះទេ ព្រោះបណ្តឹងខ្លះកើតចេញពីការព្រួយបារម្ភរបស់សាច់ញាតិ និងស្ថានទូតតែប៉ុណ្ណោះ។
អនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អ្នកស្រី ជូ ប៊ុនអេង បានលើកឡើងក្នុងសិក្ខាសាលាស្ដីពីការបង្កើតផែនការសកម្មភាពជាតិប្រយុទ្ធប្រឆាំងអំពើជួញដូរមនុស្សឆ្នាំ២០២២ ដល់ឆ្នាំ២០២៣ ដែលបានធ្វើឡើងកាលពីថ្ងៃទី៣ ដល់ថ្ងៃទី៤ ខែវិច្ឆិកា ឆ្នាំ២០២២ នេះថា នៅកម្ពុជាមិនមានការជួញដូរមនុស្សដល់ទៅរាប់ពាន់ករណីដូចការចោទប្រកាន់ពីមជ្ឈដ្ឋានអន្តរជាតិមួយចំនួននោះឡើយ។
អ្នកស្រីទទួលស្គាល់ថា នៅកម្ពុជាពិតជាមានអំពើជួញដូរមនុស្សប្រាកដមែនក្នុងចំណោមជនបរទេសដែលចូលមកកម្ពុជា ប៉ុន្តែអំពើជួញដូរមនុស្សនេះក៏មិនមែនកើតមានឡើងតែនៅក្នុងប្រទេសកម្ពុជានោះទេ។
អ្នកស្រីបន្តថា ជនបរទេសភាគច្រើនបានសម្ងំលាក់ខ្លួននៅកម្ពុជាដោយគ្មានច្បាប់ ហើយបន្លំខ្លួនជាអ្នកទេសចរដើម្បីមកធ្វើការនៅទីនេះ។
អ្នកស្រី ជូ ប៊ុនអេង បញ្ជាក់ថា កម្ពុជាមិនមែនជាកន្លែងដែលឱ្យពួកគេចេះតែចេញចូលស្រេចតែនឹងចិត្តនោះទេ ដូច្នេះអ្នកទាំងនោះនឹងត្រូវរងនូវការផាកពិន័យដោយគ្មានករណីលើកលែងដាច់ខាត មុននឹងត្រូវបញ្ជូនចេញពីកម្ពុជា។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី៤ វិច្ឆិកា នេះថា ការលើកឡើងរបស់រដ្ឋលេខាធិការក្រសួងមហាផ្ទៃ អ្នកស្រី ជូ ប៊ុនអេង មិនមែនជាហេតុផលគ្រប់គ្រាន់តាមលក្ខណៈវិទ្យាសាស្ត្រដែលមានភស្តុតាងពេញលេញ ដើម្បីឱ្យអន្តរជាតិដកកម្ពុជាចេញពីបញ្ជីតាមដានកម្រិតធ្ងន់នៃអំពើជួញដូរមនុស្សនោះទេ។
លោក សេក សុជាតិ លើកឡើងថា សហគមន៍អន្តរជាតិមានប្រព័ន្ធស៊ើបអង្កេត និងវាយតម្លៃច្បាស់លាស់ជុំវិញអំពើជួញដូរមនុស្ស។ ដូច្នេះ បើកម្ពុជាពិតជាចង់ឱ្យខ្លួនរួចផុតពីបញ្ជីតាមដានមែននោះ រដ្ឋាភិបាលត្រូវតែអនុវត្តដោយស្មើភាព និងតឹងរ៉ឹងជាទីបំផុត ទោះជាអ្នកនោះជាសាច់ញាតិ ឬជាមន្ត្រីជាន់ខ្ពស់របស់ខ្លួនក៏ដោយ ប៉ុន្តែបើកម្ពុជាគ្រាន់តែអនុវត្តតែទៅលើជនល្មើសដែលជាជនរងគ្រោះមិនមែនជាឧក្រិដ្ឋជនធំៗ នោះកម្ពុជានឹងត្រូវបន្តជាប់ឈ្មោះក្នុងបញ្ជីតាមដានរបស់គេដដែល។
ក្រសួងការបរទេសអាមេរិក កាលពីថ្ងៃទី១៩ ខែកក្កដា ឆ្នាំ២០២២ បានបញ្ចេញរបាយការណ៍របស់ខ្លួន ដោយចាត់កម្ពុជាចូលទៅក្នុងបញ្ជីស្ថិតក្រោមការឃ្លាំមើលនៅក្នុងកម្រិត៣ (Tier 3 Watch List) នៃការជួញដូរមនុស្ស។ របាយការណ៍ដដែលក៏បានបញ្ជាក់ផងដែរថា «រាជធានី-ខេត្តទាំង ២៥ របស់ប្រទេសកម្ពុជា គឺជាប្រភពនៃការជួញដូរមនុស្សទាំងអស់»។
ក្រសួងការបរទេសអាមេរិក បន្តថា បច្ចុប្បន្ននេះប្រទេសកម្ពុជា រួមជាមួយប្រទេសចិន ម៉ាកាវ វៀតណាម ម៉ាឡេស៊ី មីយ៉ាន់ម៉ា កូរ៉េខាងជើង ប្រ៊ុយណេ ស៊ីរី អាហ្វហ្គានីស្ថាន ស៊ូដង់ខាងត្បូង និងរដ្ឋចំនួន ១២ ផ្សេងទៀតជាប្រទេសដែលស្ថិតនៅក្នុងចំណាត់ថ្នាក់លេខ៣ ដូចគ្នា។
នៅពេលដែលកម្ពុជាស្ថិតនៅក្នុងចំណាត់ថ្នាក់ទី៣ បែបនេះ នឹងអាចធ្វើឱ្យមានការរឹតត្បិតលើជំនួយពីបរទេសទៅថ្ងៃមុខផងដែរ។
ទាក់ទិននឹងបញ្ហានេះ ក្រុមអ្នកសង្កេតការណ៍ព្រមានថា កម្ពុជាមិនអាចបញ្ឈប់អំពើជួញដូរមនុស្សបានទេ ប្រសិនបើមន្ត្រីជាន់ខ្ពស់របស់រដ្ឋាភិបាលកម្ពុជា ឬសាច់ញាតិរបស់លោក ហ៊ុន សែន មានការជាប់ពាក់ព័ន្ធនឹងបញ្ហានេះ។
សារព័ត៌មាន The Australian បានចេញផ្សាយកាលពីពេលថ្មីៗនេះថា កម្ពុជាកំពុងរងនូវការសង្ស័យថាបានប្រព្រឹត្តអំពើជួញដូរមនុស្សយ៉ាងធំ ដែលគ្រប់គ្រងដោយក្រុមឧក្រិដ្ឋជនលាងលុយជនជាតិចិន មានជាប់ពាក់ព័ន្ធយ៉ាងខ្លាំងជាមួយនឹងក្មួយប្រុសរបស់មេដឹកនាំផ្ដាច់ការកម្ពុជា លោក ហ៊ុន សែន គឺលោក ហ៊ុន តូ៕