26 C
Phnom Penh

មន្ត្រី​រដ្ឋាភិបាល​ចាត់ទុក​ការ​ជំរុញ​ពលរដ្ឋ​ឱ្យ​តវ៉ា​អំឡុង​ពេល​ប្រជុំ​អាស៊ាន​ថា​គ្មាន​តម្លៃ

ដោយ ឌឹ ខេមបូឌា ដេលី

បទវិភាគ

មន្ត្រី​រដ្ឋាភិបាល​កម្ពុជា ចាត់ទុក​ការ​ជំរុញ​ឲ្យ​ពលរដ្ឋ សង្គម​ស៊ីវិល និង​អ្នក​នយោបាយ​ងើប​ឡើង​តវ៉ា​នៅ​ទូទាំង​ប្រទេស​របស់​ក្រុម​វេទិកា​ពលរដ្ឋ ខណៈ​កម្ពុជា​រៀបចំ​កិច្ចប្រជុំ​អាស៊ាន ថា​ជា​គំនិត​រវើរវាយ​ដែល​គ្មាន​តម្លៃ​ឲ្យ​មេដឹកនាំ និង​ប្រមុខ​ការទូត​អាស៊ាន​ត្រូវ​ចាប់​បង្ខំ​រដ្ឋាភិបាល​កម្ពុជា​ឲ្យ​គោរព​នោះ​ឡើយ។

អ្នក​សារព័ត៌មាន​វីអូឌី (VOD) បាន​ដកស្រង់​សម្ដី​របស់​លោក ផៃ ស៊ីផាន ប្រធាន​អង្គភាព​អ្នក​នាំពាក្យ​រដ្ឋាភិបាល​កម្ពុជា ចុះផ្សាយ​នៅ​ថ្ងៃទី​៨ វិច្ឆិកា នេះ​ថា គំនិត​របស់​ក្រុម​លោក គឹម សុខ ជា​គំនិត​រវើរវាយ​កើត​ចេញពី​បុគ្គល​ផ្ទាល់ខ្លួន។ លោក​បន្ត​ថា ស្មារតី​នៃ​កិច្ចព្រមព្រៀង​សន្តិភាព​ទីក្រុង​ប៉ារីស ១៩៩១ បាន​ដាក់​បញ្ចូល​ទៅ​ក្នុង​រដ្ឋធម្មនុញ្ញ​របស់​កម្ពុជា​រួច​អស់​ទៅ​ហើយ។

កាលពី​ថ្ងៃទី​៧ ខែ​វិច្ឆិកា វេទិកា​ពលរដ្ឋ​បាន​ចេញ​សេចក្តី​ថ្លែងការណ៍​អំពាវនាវ​ឲ្យ​ពលរដ្ឋ​ចេញ​តវ៉ា​នៅ​ទូទាំង​ប្រទេស​ចាប់ពី​ថ្ងៃ​នេះ​រហូត​ដល់​ថ្ងៃ​ចុងក្រោយ​នៃ​កិច្ចប្រជុំ​កំពូល​អាស៊ាន។

ប្រធាន​វេទិកា​ពលរដ្ឋ លោក គឹម សុខ អះអាង​ថា កាលៈទេសៈ​នេះ​គឺជា​ឱកាស​ល្អ​បំផុត​ក្នុង​ការ​ចេញ​ទាមទារ​យក​ភាព​ជា​ម្ចាស់​ប្រទេស​របស់​ខ្លួន​មក​វិញ មិន​គួរ​នៅ​បន្ត​ញញើត​ខ្លាច​អំណាច​នាយករដ្ឋមន្ត្រី​ហួសហេតុ​ពេក​ទេ ពីព្រោះ​អំណាច​នាយករដ្ឋមន្ត្រី​មិន​មាន​អ្វី​ហួស​ពី​សេចក្ដី​ចែង​ក្នុង​ខ្លឹមសារ​នៃ​រដ្ឋធម្មនុញ្ញ​ឡើយ គឺ​ត្រូវ​ទទួលស្គាល់​សិទ្ធិ​របស់​ពលរដ្ឋ​ខ្មែរ​ដូច​ដែល​មាន​ចែង​ក្នុង​ធម្មនុញ្ញ​អង្គការ​សហប្រជាជាតិ សេចក្ដី​ប្រកាស​ជា​សកល​ស្ដីពី​សិទ្ធិមនុស្ស កតិកាសញ្ញា ព្រមទាំង​អនុសញ្ញា​ទាំងឡាយ​ដែល​ទាក់ទង​នឹង​សិទ្ធិមនុស្ស សិទ្ធិ​នារី និង​សិទ្ធិ​កុមារ ជាដើម។

ការ​ជំរុញ​របស់​វេទិកា​ពលរដ្ឋ​នេះ ធ្វើឡើង​អំឡុង​ពេល​ដែល​កម្ពុជា​នឹង​រៀបចំ​កិច្ចប្រជុំ​កំពូល​អាស៊ាន​លើក​ទី​៤០ លើក​ទី​៤១ កិច្ចប្រជុំ​កំពូល​ពាក់ព័ន្ធ​ក្នុង​ក្របខ័ណ្ឌ​អាស៊ាន និង​កិច្ច​សន្ទនា​អាស៊ាន​ជា​សកល​លើក​ទី​២ នៅ​រាជធានី​ភ្នំពេញ ដែល​នឹង​ប្រព្រឹត្ត​ទៅ​នៅ​ថ្ងៃទី​១០ ដល់​ថ្ងៃទី​១៣ ខែ​វិច្ឆិកា ឆ្នាំ​២០២២ ខាងមុខ​នេះ។

កិច្ចប្រជុំ​នេះ​នឹង​មាន​ប្រទេស​ដែល​ជា​ម្ចាស់​ហត្ថលេខី​នៃ​កិច្ចព្រមព្រៀង​សន្តិភាព​ទីក្រុង​ប៉ារីស ដើម្បី​ធានា​នូវ​ការ​បង្រួបបង្រួម​ជាតិ ការ​គោរព​សិទ្ធិមនុស្ស និង​លទ្ធិប្រជាធិបតេយ្យ​នៅ​កម្ពុជា​ទាំង ១៨​ប្រទេស រួម​មាន​សមាជិក​អចិន្ត្រៃយ៍​ក្រុមប្រឹក្សា​សន្តិសុខ​អង្គការ​សហប្រជាជាតិ មាន ៥​ប្រទេស ដូចជា​អាមេរិក អង់គ្លេស បារាំង ព្រមទាំង​ចិន និង​សហភាព​សូវៀត​ផង​ដែរ។

ចំណែក​ប្រទេស​នៅ​អាស៊ី​អាគ្នេយ៍ ៨​ប្រទេស​ផ្សេង​ទៀត​រួម​មាន ឥណ្ឌូនេស៊ី វៀតណាម ឡាវ ថៃ សិង្ហបុរី ម៉ាឡេស៊ី ហ្វីលីពីន និង​ប្រ៊ុយណេ លើកលែង​តែ​ភូមា​ប៉ុណ្ណោះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស