យុវជនខ្មែរថាវរៈ ១នាក់ក្នុងចំណោម ៥នាក់ បានដួលសន្លប់ក្រោយពីបង្អត់អាហារចំនួន ៤ថ្ងៃ ប៉ុន្តែពួកគេប្ដេជ្ញាបន្តតស៊ូមតិដោយការបង្អត់អាហារនៅទីលានប្រជាធិបតេយ្យដដែល ដើម្បីទាមទារឲ្យមានការដោះលែងកញ្ញា សេង ធារី និងយុត្តិធម៌សង្គម ខណៈអាជ្ញាធរព្រមានចាត់វិធានការច្បាប់ បើពួកគេមិនរើតង់ចេញ។
នេះជាថ្ងៃទី៤ ហើយដែលក្រុមយុវជនខ្មែរថាវរៈបាននាំគ្នាបង្អត់អាហារ ដើម្បីទាមទារឱ្យដោះលែងកញ្ញា សេង ធារី និងអ្នកទោសនយោបាយផ្សេងទៀតដែលកំពុងជាប់ពន្ធនាគារ ខណៈកញ្ញា សេង ធារី ក៏បង្អត់អាហារនៅពន្ធនាគារដែរ ដើម្បីទាមទារយុត្តិធម៌សម្រាប់ខ្លួនឯង និងសង្គម។
ក្នុងចំណោមយុវជនខ្មែរថាវរៈ ៥នាក់ គឺមានសមាជិកម្នាក់ កញ្ញា ឆែម ស្រីគា បានដួលសន្លប់ក្រោយពីបង្អត់អាហាររយៈពេល ៤ថ្ងៃ។
ការប្រកាសប្ដេជ្ញារបស់យុវជនខ្មែរថាវរៈនាថ្ងៃព្រហស្បតិ៍នេះ ធ្វើឡើងបន្ទាប់ពីអាជ្ញាធរខណ្ឌឫស្សីកែវ បានហៅពួកគេទៅណែនាំដោយឲ្យរើតង់ចេញពីទីលានប្រជាធិបតេយ្យ ក្រោមហេតុផលថា ប៉ះពាល់សណ្ដាប់ធ្នាប់សាធារណៈ ខណៈកម្ពុជាកំពុងដំណើរការកិច្ចប្រជុំអាស៊ាន។
អាជ្ញាធរស្លៀកពាក់ស៊ីវិលម្នាក់ក្នុងចំណោមអាជ្ញាធរផ្សេងទៀត បានឲ្យយុវជនខ្មែរថាវរៈទាំង ៥នាក់រើតង់ចេញពីទីលានប្រជាធិបតេយ្យ បើមិនរុះរើចេញទេ អាជ្ញាធរនឹងមានវិធានការបន្ថែមទៀត។ អាជ្ញាធររូបនេះបានចោទក្រុមយុវជន ៥នាក់ថាការដែលបោះតង់ស្នាក់ និងការធ្វើសមាធិបង្អត់អាហារនៅទីលានប្រជាធិបតេយ្យ បានប៉ះពាល់ដល់របៀបរៀបរយសង្គម និងសណ្ដាប់ធ្នាប់សាធារណៈ ព្រមទាំងប៉ះពាល់កិច្ចប្រជុំអាស៊ានផងដែរ។
លោក ហ៊ុន វណ្ណៈ អះអាងថា យុវជនខ្មែរថាវរៈអះអាងថាពួកគេធ្វើការតស៊ូមតិដោយបង្អត់អាហារនេះ ដើម្បីទាមទារដោះលែងកញ្ញា សេង ធារី និងអ្នកមនសិការផ្សេងទៀតដែលត្រូវបានឃុំខ្លួនទាំងអយុត្តិធម៌។ លោកបន្តថា ការតស៊ូមតិមិនបរិភោគអាហារ និងបោះតង់ស្នាក់នៅទីលានប្រជាធិបតេយ្យនេះ មិនបង្កផលប៉ះពាល់សង្គមដូចការចោទប្រកាន់របស់អាជ្ញាធរទេ ខណៈពួកគេក៏ធ្លាប់រងគ្រោះ និងរងនូវអំពើអយុត្តិធម៌ដោយការចាប់ដាក់ពន្ធនាគារដែរនោះ។
យុវជនខ្មែរថាវរៈរូបនេះថា ពួកគេបង្អត់អាហារនៅទីលានប្រជាធិបតេយ្យនេះ មិនបានទៅលើកបដានៅកន្លែងមេដឹកនាំនៃបណ្ដាប្រទេសផ្សេងៗដែលកំពុងប្រជុំអាស៊ាននោះឡើយ ខណៈទីតាំងប្រជុំក៏នៅឆ្ងាយ ហើយថែមទាំងមានកម្លាំងការពារជាច្រើនរយនាក់ថែមទៀត។
យ៉ាងណា ក្រុមយុវជនទាំង ៥នាក់អះអាងថា ពួកគេនឹងមិនរើតង់ចេញពីទីលានប្រជាធិបតេយ្យឡើយ ប៉ុន្តែបើអាជ្ញាធរមិនអនុញ្ញាត និងធ្វើទុក្ខបុកម្នេញទៀតនោះ ពួកគេនឹងនាំគ្នាដើរថ្មើរជើងដាក់ញត្តិនៅតាមស្ថានទូតផ្សេងៗអំឡុងពេលដំណើរការកិច្ចប្រជុំអាស៊ាន។ ពួកគេថា ការដើរដាក់ញត្តិនេះ ដើម្បីឲ្យបណ្ដាប្រទេសទាំងនោះបានឃើញពីការរឹតត្បិតសេរីភាពជាមូលដ្ឋានរបស់ពលរដ្ឋពីសំណាក់រដ្ឋាភិបាលកម្ពុជា។
កាលពីថ្ងៃទី៧ ខែវិច្ឆិកា ក្រុមយុវជនខ្មែរថាវរៈចំនួន ៥នាក់ បានចាប់ផ្តើមធ្វើយុទ្ធនាការមិនបរិភោគអាហារនៅខេត្តព្រះវិហារ ជាទីដែលឃុំខ្លួនកញ្ញា សេង ធារី។ ក្រោយពីបង្អត់អាហារបាន ២ថ្ងៃនៅខេត្តព្រះវិហារ ពួកគេក៏បាននាំគ្នាធ្វើដំណើរមកកាន់រាជធានីភ្នំពេញ កាលពីថ្ងៃទី៩ វិច្ឆិកា ដោយបន្តយុទ្ធនាការបង្អត់អាហារដោយបោះតង់សម្រាកនៅទីលានប្រជាធិបតេយ្យក្នុងខណ្ឌឫស្សីកែវ រាជធានីភ្នំពេញ។
រដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក ជិន ម៉ាលីន ធ្លាប់ប្រាប់អ្នកសារព័ត៌មានកន្លងមកថា ក្រុមយុវជនថាវរៈមានតែស្វែងរកភស្តុតាងដោះបន្ទុក និងចូលរួមតាមនីតិវិធីរបស់តុលាការទេ ទើបអាចជួយការពារកញ្ញា សេង ធារី បាន។ ឯការធ្វើពហិការបង្អត់អាហារខ្លួនឯងនេះ មិនអាចជួយការពារតាមផ្លូវច្បាប់ដល់កញ្ញា សេង ធារី ឡើយ។
មន្ត្រីជាន់ខ្ពស់នៃក្រសួងយុត្តិធម៌រូបនេះថ្លែងថា យុទ្ធនាការបង្អត់អាហារនេះគ្រាន់តែជាវិធីសាស្ត្រដើម្បីទាមទារការចាប់អារម្មណ៍ និងបិទបាំងនូវកំហុសដែលខ្លួនបានប្រព្រឹត្ត តែគ្មានឥទ្ធិពលអ្វីលើតុលាការដែលជាស្ថាប័នអនុវត្តច្បាប់ទេ។
កញ្ញា សេង ធារី ដែលមានសញ្ជាតិអាមេរិកាំង និងជាមេធាវីអន្តរជាតិមួយរូបផងនោះ ត្រូវបានលោក រស់ ពិសិដ្ឋ ចៅក្រមជំនុំជម្រះនៃសាលាដំបូងរាជធានីភ្នំពេញ កាលពីថ្ងៃទី១៤ ខែមិថុនា ឆ្នាំ២០២២ ផ្ដន្ទាទោសដាក់ពន្ធនាគាររយៈពេល ៦ឆ្នាំពីបទ «ញុះញង់ និងរួមគំនិតក្បត់» ពាក់ព័ន្ធនឹងដំណើរវិលត្រឡប់របស់លោក សម រង្ស៊ី ថ្ងៃទី៩ ខែវិច្ឆិកា ឆ្នាំ២០១៩៕