32 C
Phnom Penh

ក្រសួង​សុខាភិបាល​សម្រេច​បិទ​មន្ទីរ​សម្រាក​ព្យាបាល​ឯកជន ដើម​អង្គ្រង ផ្សារ​ព្រៃទទឹង

ដោយ ឌឹ ខេមបូឌា ដេលី

បទវិភាគ

ក្រសួង​សុខាភិបាល​សម្រេច​បិទ​មន្ទីរ​សម្រាក​ព្យាបាល​ឯកជន​ឈ្មោះ ដើម​អង្គ្រង (ផ្សារ​ព្រៃទទឹង) បន្ទាប់ពី​រក​ឃើញ​ថា ម្ចាស់​មន្ទីរ​សម្រាក​ព្យាបាល​នេះ​បាន​ប្រើប្រាស់​បុគ្គលិក​គ្មាន​ការ​បណ្តុះបណ្តាល​តាម​វិជ្ជាជីវៈ​សុខាភិបាល ដែល​នឹង​ទទួល​ខុសត្រូវ​ចំពោះ​មុខ​ច្បាប់​ជា​ធរមាន។

រដ្ឋលេខាធិការ​ក្រសួង​សុខាភិបាល អ្នកស្រី ឱ វណ្ណឌីន បាន​ចេញ​សេចក្តី​សម្រេច​នៅ​ថ្ងៃទី​៨ ខែ​ធ្នូ ឆ្នាំ​២០២២ នេះ​ថា ម្ចាស់​មន្ទីរ​សម្រាក​ព្យាបាល ដើម​អង្គ្រង និង​ឆ្មប​មាន​ឈ្មោះ អ៊ុង ធារិន ដែល​បាន​ប្រព្រឹត្ត​ខុស​នឹង​ក្រមសីលធម៌​វិជ្ជាជីវៈ​ពេទ្យ ខុស​បច្ចេកទេស​ក្នុង​ការ​ពិនិត្យ និង​ព្យាបាល​អ្នក​ជំងឺ នឹង​ត្រូវ​ទទួល​ខុសត្រូវ​ចំពោះ​មុខ​ច្បាប់ ចំណែក​មន្ទីរ​សម្រាក​ព្យាបាល​ឯកជន​នេះ​នឹង​ត្រូវ​ដកហូត​លិខិត​អនុញ្ញាត​លែង​ឱ្យ​ដំណើរការ​ចាប់​ពី​ពេលនេះ​តទៅ។

អ្នកស្រី ឱ វណ្ណឌីន បញ្ជាក់​ថា មន្ទីរ​សម្រាក​ព្យាបាល​ឯកជន​ឈ្មោះ ដើម​អង្គ្រង ដែល​មាន​ទីតាំង​នៅ​ផ្លូវ​ជាតិ​លេខ​៣ ឃុំ​អង្គពពេល ស្រុក​គងពិសី ខេត្ត​កំពង់ស្ពឺ នេះ បាន​ប្តូរ​ទីតាំង​ដោយ​ខ្លួនឯង​គ្មាន​ការ​ជូនដំណឹង​ដល់​ក្រសួង​សុខាភិបាល​នោះ​ឡើយ ដែល​ជា​ទង្វើ​រំលោភ​បំពាន​ច្បាប់​យ៉ាង​ធ្ងន់ធ្ងរ។

កាលពី​ថ្ងៃទី​១០ ខែ​វិច្ឆិកា ឆ្នាំ​២០២២ មន្ទីរ​សម្រាក​ព្យាបាល​ឯកជន ដើម​អង្គ្រង បាន​ទទួល​ព្យាបាល​អ្នក​ជំងឺ​ដែល​ជា​ស្ត្រី​ឈ្មោះ សឿន ស្រីអូន អាយុ ២២​ឆ្នាំ រស់នៅ​ភូមិ​អន្លង់រមៀត ឃុំ​អន្លង់រមៀត ស្រុក​កណ្ដាលស្ទឹង ខេត្ត​កណ្ដាល ក្រោយ​ពិនិត្យ​ឃើញ​ថា​ស្ត្រី​រូប​នោះ​ត្រូវ​កូន​អាយុ ៥​ខែ​បាន​ស្លាប់​ក្នុង​ស្បូន​របស់​ខ្លួន។

បន្ទាប់ពី​មាន​ការ​ព្រមព្រៀង​គ្នា ក្រុម​គ្រូពេទ្យ​របស់​គ្លីនិក​បាន​ធ្វើ​ការ​ព្យាបាល​ដោយ​រំលូត​យក​កូន​ដែល​បាន​ស្លាប់​ក្នុង​ផ្ទៃ​នោះ​ចេញ និង​បន្ត​ឱ្យ​សម្រាក​នៅ​គ្លីនិក​របស់​ខ្លួន​រយៈពេល​មួយ​យប់ ហើយ​ក៏​បាន​អនុញ្ញាត​ឱ្យ​ត្រឡប់​ទៅ​ផ្ទះ​វិញ ប៉ុន្តែ​រំលង​បាន ១១​ថ្ងៃ គឺ​នៅ​ថ្ងៃទី​២២ ខែ​វិច្ឆិកា ឆ្នាំ​២០២២ អ្នក​ជំងឺ​ដដែល​នោះ​បាន​មក​គ្លីនិក​នេះ​ម្ដង​ទៀត ដោយ​មាន​អាការៈ​ឈឺ​ពោះ​ធ្ងន់ធ្ងរ។ ភ្លាម​នោះ ក្រុម​គ្រូពេទ្យ​ក៏​បាន​ចាប់ផ្តើម​ពិនិត្យ និង​ព្យាបាល​ដោយ​ការ​សម្អាត​ស្បូន​ឡើងវិញ​សាជាថ្មី ប៉ុន្តែ​ដោយ​អាការៈ​ធ្ងន់ធ្ងរ​ខ្លាំង​លើស​ពី​សមត្ថភាព​របស់​ខ្លួន ខាង​គ្លីនិក​ក៏​សម្រេច​បញ្ជូន​អ្នក​ជំងឺ​រូប​នោះ​ទៅ​សង្គ្រោះ​បន្ទាន់​នៅ​មន្ទីរពេទ្យ​កាល់ម៉ែត ទីក្រុង​ភ្នំពេញ​ភ្លាមៗ​តែម្តង។

ជុំវិញ​បញ្ហា​នេះ រដ្ឋមន្ត្រី​ក្រសួង​សុខាភិបាល លោក ម៉ម ប៊ុនហេង បាន​ចេញ​សេចក្តី​ប្រកាស​ព័ត៌មាន​កាលពី​ថ្ងៃទី​៣០ ខែ​វិច្ឆិកា ឆ្នាំ​២០២២ ថា មន្ទីរ​សម្រាក​ព្យាបាល​ឯកជន ដើម​អង្គ្រង បាន​អនុញ្ញាត​ឱ្យ​ឆ្មប​ដែល​មាន​ការ​បណ្តុះបណ្តាល​ជា​ឆ្មប​មែន ប៉ុន្តែ​ឆ្មប​រូប​នេះ​នៅ​មិន​ទាន់​ទទួល​បាន​ការ​បណ្តុះបណ្តាល​បន្ថែម​ពី​ការ​រំលូត​គភ៌​នៅឡើយ​ទេ ដែល​ជា​ការ​អនុវត្ត​ខុស​ពី​បច្ចេកទេស​គោលការណ៍​ណែនាំ​របស់​ក្រសួង​សុខាភិបាល​ទាំងស្រុង។

លោក ម៉ម ប៊ុនហេង បញ្ជាក់​ថា ក្រសួង​បាន​សម្រេច​ដាក់​ទណ្ឌកម្ម​ខាង​វិន័យ​ទៅ​លើ​ឆ្មប​ឈ្មោះ អ៊ុង ធារិន ដោយ​ផ្អាក​ការ​ប្រកប​វិជ្ជាជីវៈ​ជា​ឆ្មប​រយៈពេល ២​ឆ្នាំ ដោយ​យោង​តាម​ច្បាប់​ស្ដីពី​ការ​គ្រប់គ្រង​អ្នក​ប្រកប​វិជ្ជាជីវៈ​ខាង​វិស័យ​សុខាភិបាល៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស