ក្រសួងសុខាភិបាល ព្រមានចាត់វិធានការមន្ទីរសម្រាកព្យាបាលឯកជន «ដើមអង្គ្រង» ក្នុងខេត្តកំពង់ស្ពឺ ដែលធ្វេសប្រហែសវះកាត់ស្ត្រីម្នាក់ដើម្បីយកកូនស្លាប់ចេញពីផ្ទៃទៅតាមច្បាប់ស្ដីពីការគ្រប់គ្រងវិជ្ជាជីវៈវិស័យសុខាភិបាល។ ក្រសួងអះអាងថា ការវះកាត់នោះបណ្ដាលឲ្យអ្នកជំងឺកាន់តែរបួសធ្ងន់ធ្ងរទៅៗ។
ការប្រកាសរបស់ក្រសួងសុខាភិបាលនេះ ធ្វើឡើងបន្ទាប់ពីសហជីព និងអ្នកប្រើប្រាស់បណ្ដាញសង្គមបានរិះគន់ និងទទូចឲ្យក្រសួងចាត់វិធានការចំពោះមន្ទីរសម្រាកព្យាបាលឯកជន «ដើមអង្គ្រង» ដែលបានឲ្យពេទ្យឆ្មបវះកាត់យកកូនស្លាប់ចេញពីផ្ទៃរបស់ស្ត្រីម្នាក់ទាំងខ្វះវិជ្ជាជីវៈ ដែលធ្វើឲ្យអ្នកជំងឺកាន់តែរបួសធ្ងន់ធ្ងរឡើង។
សេចក្ដីប្រកាសរបស់ក្រសួងសុខាភិបាល កាលពីថ្ងៃទី៣០ ខែវិច្ឆិកា ឆ្នាំ២០២២ ដែល The Cambodia Daily ទើបទទួលបាន ឲ្យដឹងថា មន្ទីរសម្រាកព្យាបាល ដើមអង្គ្រង នេះ មានការធ្វេសប្រហែសដោយអនុញ្ញាតឲ្យឆ្មបដែលមិនមានការបណ្ដុះបណ្ដាលចូលវះកាត់យកកូនស្លាប់ក្នុងផ្ទៃម្ដាយ បណ្តាលឲ្យគ្រោះថ្នាក់កាន់តែធ្ងន់ធ្ងរ។ ករណីនេះ ក្រសួងសម្រេចបិទមន្ទីរពេទ្យដើមអង្គ្រងបណ្ដោះអាសន្ន ដើម្បីបន្តនីតិវិធីស្រាវជ្រាវតាមច្បាប់ជាធរមាននូវហេតុការណ៍ដែលបានកើតឡើង ខណៈមន្ទីរសម្រាកព្យាបាល ដើមអង្គ្រង ត្រូវបានក្រសួងសុខាភិបាលតម្រូវឲ្យទទួលខុសត្រូវចំពោះមុខច្បាប់លើបាតុភាពដែលបានកើតឡើងពីការធ្វេសប្រហែសរបស់ខ្លួន។
ចំពោះឆ្មបដែលបានអនុវត្តការរំលូតគភ៌ក្នុងផ្ទៃអាយុ ១៨សប្ដាហ៍របស់ស្ត្រីរូបនោះ ក្រសួងនឹងចាត់វិធានការឲ្យគណៈវិជ្ជាជីវៈឆ្មបចុះធ្វើការស្រាវជ្រាវបន្តបន្ទាប់ ដោយអនុលោមតាមច្បាប់គ្រប់គ្រងអ្នកប្រកបវិជ្ជាជីវៈក្រសួងសុខាភិបាលដែលមានជាធរមាន។
លើសពីនេះ គណៈវិជ្ជាជីវៈឆ្មបដែលស្ថិតនៅក្រោមសមត្ថកិច្ចរបស់ខ្លួន បានស្រាវជ្រាវ និងពិនិត្យលក្ខណៈបច្ចេកទេសឆ្មបយ៉ាងល្អិតល្អន់ ហើយសម្រេចដាក់ទោសទណ្ឌកម្មខាងវិន័យឆ្មបឈ្មោះ អ៊ុង ធារិន ដោយផ្អាកការប្រកបវិជ្ជាជីវៈឆ្មបបណ្ដោះអាសន្នរយៈពេល ២ឆ្នាំ តាមច្បាប់ស្ដីពីការគ្រប់គ្រងវិជ្ជាជីវៈវិស័យសុខាភិបាល។
បើតាមគ្រួសាររបស់ស្ត្រីឈ្មោះ សៀង ស្រីអូន ដែលរងគ្រោះពីការវះកាត់យកកូនស្លាប់ចេញពីក្នុងផ្ទៃ បានអះអាងថា កាលពីពេលថ្មីៗនេះ ប្អូនស្រីរបស់គាត់បានពិនិត្យសុខភាពកូនក្នុងផ្ទៃ ៥ខែ និងចង់ដឹងកូននោះប្រុសឬស្រីនៅមន្ទីរសម្រាកព្យាបាលឯកជន ដើមអង្គ្រង នៅខេត្តកំពង់ស្ពឺ។ ក្រោយទៅពិនិត្យរួចហើយឃើញកូនក្នុងផ្ទៃស្លាប់ ក្រុមគ្រួសារក៏បាននាំជនរងគ្រោះមកវះកាត់នៅមន្ទីរសម្រាកព្យាបាលឯកជន ដើមអង្គ្រង ក្រោយពីបានវះកាត់រួចហើយ គ្រូពេទ្យបានឲ្យប្អូនស្រីត្រឡប់ទៅផ្ទះវិញ។
ក្រោយត្រឡប់ទៅផ្ទះបានប៉ុន្មានថ្ងៃ ប្អូនស្រីគាត់មានអាការៈឈឺចុកចាប់ក្នុងពោះ និងបានត្រឡប់មកឲ្យពេទ្យនៅមន្ទីរសម្រាកព្យាបាល ដើមអង្គ្រង ពិនិត្យម្តងទៀត ហើយក្រុមគ្រូពេទ្យវះកាត់ម្តងទៀត និងបានច្រឡំកាត់ដាច់ពោះវៀនដែលធ្វើឲ្យប្អូនស្រីរបស់គាត់ធ្លាក់ខ្លួនឈឺកាន់តែខ្លាំងថែមទៀត។
សាច់ញាតិស្ត្រីដែលរងគ្រោះពីការវះកាត់យកកូនស្លាប់ចេញពីក្នុងផ្ទៃនៅមន្ទីរសម្រាកព្យាបាលឯកជន ដើមអង្គ្រង ស្ថិតនៅឃុំអង្គពពេល ស្រុកគងពិសី ខេត្តកំពង់ស្ពឺ បានទទូចទៅអាជ្ញាធរពាក់ព័ន្ធជួយរកយុត្តិធម៌ជូនជនរងគ្រោះ រួមទាំងគ្រួសារពួកគេ ខណៈបច្ចុប្បន្នស្ត្រីរងគ្រោះរូបនោះកំពុងសម្រាកព្យាបាល និងជួយសង្គ្រោះជីវិតនៅមន្ទីរពេទ្យកាល់ម៉ែត៕