ក្រសួងកសិកម្ម អះអាងថា ផលនេសាទក្នុងឆ្នាំ២០២៣ មានការកើនឡើងជាងឆ្នាំមុន ៤០ភាគរយ ដែលឆ្លុះបញ្ចាំងពីលទ្ធផលនៃការទប់ស្កាត់បទល្មើសនេសាទខុសច្បាប់ក្នុងបឹងទន្លេសាប ក្នុងរដូវត្រីពង អំឡុងឆ្នាំ២០២២ កន្លងទៅ។
ក្រសួងកសិកម្ម រុក្ខាប្រមាញ់ និងនេសាទ ចេញសេចក្តីប្រកាសព័ត៌មានកាលពីថ្ងៃទី៣ ខែមករា ឆ្នាំ២០២៣ ថា ផលនេសាទនៅរាជធានីភ្នំពេញ និងខេត្តកណ្តាល ក្នុងរយៈពេល ៥ថ្ងៃចាប់ពីចុងខែធ្នូ ឆ្នាំ២០២២ ដល់ដើមខែមករា ឆ្នាំ២០២៣ ទទួលបានត្រីចំនួនប្រមាណជាង ១៤៨០តោន កើនឡើងជាង ៦០០តោន ដែលស្មើនឹងប្រមាណជា ៤០ភាគរយ បើប្រៀបធៀបទៅនឹងផលនេសាទនារដូវនេសាទកាលពីឆ្នាំ២០២២ ដែលទទួលបានត្រឹមតែ ៨៩០តោនប៉ុណ្ណោះ។
ក្រសួងកសិកម្ម លើកឡើងថា ទន្លេសាបជាកន្លែងត្រីធំធាត់ ចំណែកទន្លេមេគង្គលើជាកន្លែងត្រីបន្តពូជ និងជាកន្លែងសត្វផ្សោតរស់នៅ ដូច្នេះក្រសួងកសិកម្មនឹងបន្តរកតុល្យភាពរវាងការអភិរក្ស និងការអភិវឌ្ឍមិនត្រឹមតែនៅបឹងទន្លេសាបប៉ុណ្ណោះទេ ប៉ុន្តែការអភិរក្ស ព្រមទាំងការអភិវឌ្ឍនឹងធ្វើឡើងនៅទន្លេមេគង្គខាងលើផងដែរ ដើម្បីរក្សាតំបន់ទាំងពីរនេះកុំឲ្យមានការនេសាទហួសកម្រិត ដែលនឹងនាំមកនូវភោគផលត្រីពោរពេញផ្ទៃប្រទេសទៅថ្ងៃក្រោយ។
ក្រសួងខាងលើប្ដេជ្ញាអនុវត្តច្បាប់ឱ្យបានម៉ឺងម៉ាត់បំផុតចំពោះបទល្មើសជាក់ស្តែង និងបទល្មើសទាំងឡាយណាដែលមានភស្តុតាង និងកំណត់អត្តសញ្ញាណនៃជនដែលបានប្រព្រឹត្តបទល្មើស ដើម្បីយកមកផ្ដន្ទាទោសតាមផ្លូវច្បាប់ឲ្យខាងតែបាន។
ចាប់ពីថ្ងៃទី២៩ ខែធ្នូ ឆ្នាំ២០២២ ដល់ថ្ងៃទី២ ខែមករា ឆ្នាំ២០២៣ ប្រជាពលរដ្ឋនាំគ្នានេសាទត្រីតាមដងទន្លេក្នុងរាជធានីភ្នំពេញ និងខេត្តកណ្តាល ក្នុងនោះប្រភេទត្រីដែលនេសាទបានពីដាយត្រី រួមមាន ត្រីរៀល ត្រីស្លឹកឫស្សី ត្រីខ្នងវែង ត្រីកប្រូក ត្រីច្រកែង ត្រីល្បាត និងត្រីចម្រុះជាច្រើនផ្សេងទៀត ខណៈប្រជាពលរដ្ឋដែលនេសាទដើម្បីធ្វើប្រហុក ផ្អក ត្រីឆ្អើរ និងទឹកត្រី មានចំនួនប្រមាណជា ៨ពាន់នាក់។
កាលពីថ្ងៃទី២៨ ខែធ្នូ ឆ្នាំ២០២២ រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ បានចេញសេចក្តីជូនដំណឹងថា ត្រីចាប់ផ្តើមបន្លាស់ទីចេញពីបឹងទន្លេសាប បឹងបួនានា ស្ទឹង និងព្រែកផ្សេងៗចូលទៅក្នុងទន្លេសាប ទន្លេមេគង្គ និងទន្លេបាសាក់ ដែលអំណោយផលដល់ការធ្វើនេសាទ ជាពិសេសគន្លងដាយត្រីតាមដងទន្លេសាបនៅភូមិសាស្ត្ររាជធានីភ្នំពេញ និងខេត្តកណ្តាល។
ប្រធានរាជបណ្ឌិត្យសភាកម្ពុជា បណ្ឌិត សុខ ទូច សរសេរលើគណនីហ្វេសប៊ុករបស់លោកថា រយៈពេលជាង ២ឆ្នាំហើយដែលអ្នករស់នៅតំបន់ជុំវិញបឹងទន្លេសាបស្អប់រូបលោក ដែលបានសហការជាមួយអាជ្ញាធរទប់ស្កាត់បទល្មើសនេសាទខុសច្បាប់ជុំវិញបឹងទន្លេសាបកន្លងមក។
បណ្ឌិត សុខ ទូច អះអាងថា ការទប់ស្កាត់នេសាទខុសច្បាប់រួមមានការហាមឃាត់មិនឱ្យមានការដាក់ព្រួលជាប់ៗគ្នា ដែលជាហេតុធ្វើឱ្យត្រីមិនអាចបន្លាស់ទីទៅកាន់ទីឆ្ងាយដើម្បីរកចំណី និងកន្លែងពង។ លើសពីនេះ ក៏មានការហាមមិនឱ្យដាក់ស្បៃមុងក្រឡាល្អិត មិនឱ្យចូលនេសាទនៅតំបន់អភិរក្ស មិនឱ្យនេសាទនៅរដូវត្រីពង មិនឱ្យធ្វើស្រែនៅតំបន់៣ ដើម្បីទប់ស្កាត់ការបាញ់ថ្នាំសម្លាប់សត្វល្អិត ដែលនាំឱ្យប៉ះពាល់ដល់ត្រី និងជីវចម្រុះនានានៅក្នុងបឹងទន្លេសាបផងដែរ។
លើសពីនេះ ក៏មានការហាមឃាត់មិនឱ្យដាក់ស្បៃមុងក្រឡាល្អិតនៅក្នុងតំបន់ព្រៃលិចទឹក មិនឱ្យបំផ្លាញព្រៃលិចទឹកដែលជាជង្រុកនៃចំណីត្រី និងជាកន្លែងផ្តល់ជម្រកសម្រាប់ត្រីពងនារដូវវស្សា និងហាមមិនឱ្យមានបទល្មើសឆក់ត្រីគ្រប់ប្រភេទថែមទៀត ដូច្នេះហើយទើបប្រជាពលរដ្ឋទទួលបានទិន្នផលត្រីពីបឹងទន្លេសាបកើនឡើងជាងឆ្នាំមុនបែបនេះ។
ក្រុមអ្នកសង្កេតការណ៍ធ្លាប់ព្រមានកាលពីពេលកន្លងទៅថា ប្រសិនបើរាជរដ្ឋាភិបាលមិនទប់ស្កាត់នូវការនេសាទខុសច្បាប់ឱ្យបានទាន់ពេលវេលាទេ ក្នុងរង្វង់ ២ ទៅ ៣ឆ្នាំទៀត ត្រីធំៗ និងពូជត្រីដែលកម្រមួយចំនួននឹងផុតពូជអស់ជាមិនខាន ហើយបឹងទន្លេសាបនឹងក្លាយជាបឹងមួយដែលមានតែឈ្មោះថា ជាជង្រុកត្រី ប៉ុន្តែនឹងប្រែក្លាយជាបឹងមួយដែលប្រៀបបាននឹងជង្រុកដែលគ្មានស្រូវដូច្នោះដែរ៕