រដ្ឋមន្ត្រីក្រសួងកសិកម្ម លើកឡើងថា ក្រសួងនឹងរៀបចំប្រព័ន្ធផលិតកម្មកសិកម្មមួយដែលមានប្រសិទ្ធភាពបំផុត ដោយធានានូវស្ថិរភាពតម្លៃមិនឱ្យកើនឡើង និងមិនឱ្យធ្លាក់ចុះសម្រាប់ការផលិតកសិកម្មក្នុងស្រុក ដើម្បីកុំឱ្យប៉ះពាល់ដល់អ្នកផលិត និងអ្នកប្រើប្រាស់។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា លើកឡើងក្នុងសន្និសីទសារព័ត៌មានកាលពីថ្ងៃទី០៥ ខែមករា ឆ្នាំ២០២៣ ថា ក្រសួងនឹងដាក់ចេញនូវទស្សនទានស្ថិរភាពតម្លៃក្នុងវិស័យកសិកម្មមិនឱ្យកើនឡើង ហើយក៏មិនឱ្យធ្លាក់ចុះសម្រាប់ការផលិតកសិកម្មក្នុងស្រុក ដើម្បីកុំឱ្យប៉ះពាល់ដល់អ្នកផលិត និងអ្នកប្រើប្រាស់។
រដ្ឋមន្ត្រីក្រសួងកសិកម្មរូបនេះលើកឡើងថា ក្រសួងកសិកម្ម រុក្ខាប្រមាញ់ និងនេសាទ ចង់ឱ្យមានការរីកចម្រើនព្រមគ្នាសម្រាប់តួអង្គពាក់ព័ន្ធទាំងអស់នៅក្នុងខ្សែច្រវាក់ផលិតកម្មនេះ។ លោកបន្ថែមថា ដោយឡែកការទុកចោល ឬមិនផ្តល់សារសំខាន់ដល់តួអង្គណាមួយ នឹងនាំឱ្យខ្សែច្រវាក់ផលិតកម្មទាំងមូលជាប់គាំង និងជួបបញ្ហាជាមិនខាន។
លោក ឌិត ទីណា បញ្ជាក់ថា ក្រសួងនឹងទាញយកសក្ដានុពលកសិកម្មមានស្រាប់ដែលអំណោយផលពីធម្មជាតិរបស់កម្ពុជា មកបែងចែកប្រកបដោយសមធម៌ទៅតាមខ្សែច្រវាក់ផលិតកម្មទាំងមូល ដែលឆ្លើយតបទៅនឹងតម្រូវការទីផ្សារ ដើម្បីធានាឱ្យបាននូវប្រាក់ចំណេញរបស់តួអង្គទាំងអស់។ ជាងនេះទៀត ក្រសួងបានគិតគូរដល់គុណភាព និងសុវត្ថិភាពលើកសិផលចំពោះអ្នកប្រើប្រាស់ផងដែរ។
ការអះអាងនេះ ធ្វើឡើងដើម្បីជំរុញឱ្យវិស័យកសិកម្មធានាបាននូវតម្លៃដែលអាចទទួលយកបានសម្រាប់តួអង្គពាក់ព័ន្ធទាំងអស់ ទាំងអ្នកផលិត និងអ្នកប្រើប្រាស់ទៅថ្ងៃមុខ។
ក្នុងផែនការទី៤ នៃយុទ្ធសាស្ត្រចតុកោណរបស់រដ្ឋាភិបាលកម្ពុជាក្នុងការអភិវឌ្ឍវិស័យកសិកម្មឆ្នាំ២០១៩ ដល់ឆ្នាំ២០២៣ អះអាងថា កម្ពុជានៅតែចាត់ទុកវិស័យកសិកម្មជាវិស័យអាទិភាពក្នុងការទ្រទ្រង់កំណើនសេដ្ឋកិច្ចជាតិ ធានាសន្តិសុខស្បៀង និងជំរុញការអភិវឌ្ឍជនបទ ដើម្បីកាត់បន្ថយភាពក្រីក្រ ប៉ុន្តែកន្លងមក កសិករខ្មែរតែងរងនូវការខាតបង់ពីការប្រកបរបរកសិកម្មរបស់ពួកគេ ដោយគ្មានការដោះស្រាយពីរដ្ឋាភិបាលដើម្បីធានានិរន្តរភាពលើការផលិត និងតម្លៃកសិផលរបស់អ្នកទាំងនោះឡើយ។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី៦ មករា នេះថា ប្រសិនបើការអនុវត្តរបស់ក្រសួងកសិកម្ម រុក្ខាប្រមាញ់ និងនេសាទ ឬគោលនយោបាយរបស់រាជរដ្ឋាភិបាលលេចចេញជារូបរាង គឺជារឿងល្អ ប៉ុន្តែលោកនៅតែមិនទាន់មានជំនឿលើការអះអាងរបស់ក្រសួងកសិកម្មនៅឡើយ ព្រោះថាជាទម្លាប់ រដ្ឋាភិបាលតែងនិយាយឱ្យតែល្អស្តាប់ ជាជាងការអនុវត្ត ជាពិសេសនៅពេលដែលរដូវកាលនៃការបោះឆ្នោតជិតមកដល់។
លោក សេក សុជាតិ លើកឡើងថា សព្វថ្ងៃនេះ ក្រសួងកសិកម្មនៅមិនទាន់បង្ហាញនូវយន្តការជាក់លាក់ណាមួយ ដើម្បីធានាដោះស្រាយនូវបញ្ហារបស់កសិករដែលធ្លាប់កើតមាននៅឡើយទេ ដូចជាការប្រមូលផលរួមគ្នា ការកំណត់តម្លៃតាមអំពើចិត្តរបស់ឈ្មួញកណ្តាល ដែលជាហេតុធ្វើឱ្យតម្លៃកសិផលធ្លាក់ចុះបណ្តាលឱ្យកសិករខាតបង់ធ្ងន់ធ្ងរ។
ស្ថាបនិកអង្គការអភិវឌ្ឍន៍ផ្នត់គំនិតរូបនេះបញ្ជាក់ថា ក្រសួងកសិកម្មក៏ត្រូវគិតគូរធានានូវដំណើរការនៃការផលិតរបស់កសិករផងដែរ ត្បិតកន្លងមកពិតមែនតែរដ្ឋាភិបាលចាត់ទុកវិស័យកសិកម្មជាវិស័យអាទិភាព ប៉ុន្តែកសិករតែងជួបគ្រោះទឹកជំនន់ និងគ្រោះរាំងស្ងួតស្ទើរតែរាល់ឆ្នាំ ខណៈវិធានការទប់ស្កាត់នៅតែមិនទាន់ដាក់ចេញនៅឡើយរហូតដល់ពេលនេះ។
លើសពីនេះ ក្រសួងក៏ត្រូវគិតគូរពីថ្លៃដើមដែលកសិករត្រូវចំណាយលើការផលិតផងដែរ ព្រោះថាតម្លៃជី តម្លៃថ្នាំសម្លាប់សត្វល្អិត តម្លៃថ្នាំបំប៉នរុក្ខជាតិ និងការចំណាយលើឧបករណ៍ប្រើប្រាស់ក្នុងវិស័យកសិកម្មផ្សេងៗ នៅតែមានតម្លៃខ្ពស់ដដែល ដូច្នេះកសិករនៅតែពិបាកនឹងទទួលប្រាក់ចំណេញពីការផលិតរបស់ពួកគេយ៉ាងខ្លាំង។
កសិករធ្វើស្រូវប្រាំងក្នុងខេត្តសៀមរាប ប្រាប់សារព័ត៌មាន The Cambodia Daily នៅថ្ងៃទី៦ មករា នេះដែរថា សព្វថ្ងៃនេះ ដើម្បីទទួលផលស្រូវចាប់ពី ៥តោនទៅ ៧តោនក្នុង ១ហិកតារ ទាល់តែប្រើជី ៥ ទៅ ៦ការុងដែរ ខណៈតម្លៃស្រូវចាប់ ១ពាន់រៀលក្នុងមួយគីឡូក្រាមឡើងទៅ ទើបអាចទទួលបានប្រាក់ចំណេញ ប៉ុន្តែការធ្វើកសិកម្មរបស់ពួកគាត់រាល់ឆ្នាំ គឺពឹងតែទៅលើសំណាងប៉ុណ្ណោះ ដោយសារក្រសួងកសិកម្មគ្មានវិធានការជាក់លាក់ក្នុងការកំណត់តម្លៃច្បាស់លាស់នៅឡើយ។
ទាក់ទិននឹងវិស័យកសិកម្មនេះ តម្លៃជីលក់រាយលើទីផ្សារកម្ពុជាសព្វថ្ងៃនេះ បានហក់ឡើងពីជាង ១០ម៉ឺនរៀលក្នុងមួយការុង ៥០គីឡូក្រាមទៅ ២០ម៉ឺនរៀលតាមប្រភេទជីនៃក្រុមហ៊ុននាំចូលនីមួយៗ ខណៈតម្លៃប្រេងឥន្ធនៈនៅកម្ពុជានៅតែរក្សាតម្លៃខ្ពស់ដដែល៕