27 C
Phnom Penh

អ្នក​ឃ្លាំមើល៖ ការ​ឃុំ​ខ្លួន​កញ្ញា ឈឹម ស៊ីថរ និង​អ្នកទោស​មនសិការ​កំពុង​បង្ក​ការ​ភ័យខ្លាច​ដល់​ពលរដ្ឋ

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​អង្គការ​ក្រៅ​រដ្ឋាភិបាល ព្រមាន​ថា ការ​បន្ត​ឃុំ​ខ្លួន​មេដឹកនាំ​សហជីព​នៃ​ក្រុមហ៊ុន​ណាហ្គា​វើលដ៍ កញ្ញា ឈឹម ស៊ីថរ និង​អ្នកទោស​មនសិការ​ដទៃ​ទៀត​ទាំង​អយុត្តិធម៌ គឺជា​រូបភាព​មួយ​ដែល​បង្ក​ការ​ភ័យខ្លាច​ដល់​ពលរដ្ឋ និង​បង្ក​ឱ្យ​មាន​ភាព​អាប់អួរ​ដល់​បរិយាកាស​នយោបាយ​នៅ​កម្ពុជា ខណៈ​ការ​បោះឆ្នោត​អាណត្តិ​ថ្មី​កាន់តែ​ខិត​ជិត​មក​ដល់។

នាយក​មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស (សង់ត្រាល់) លោក មឿន តុលា ប្រាប់​សារព័ត៌មាន The Cambodia Daily នៅ​ថ្ងៃទី​១៣ មករា នេះ​ថា អាជ្ញាធរ និង​រដ្ឋាភិបាល​កម្ពុជា​មិន​គួរ​ពន្យារ​ពេល​ទុក​ចោល​នូវ​ករណី​កញ្ញា ឈឹម ស៊ីថរ មិន​ដោះស្រាយ​រហូត​ដល់​ពេលនេះ​ទេ ព្រោះ​ថា​ប្រសិនបើ​រដ្ឋាភិបាល​នៅតែ​បន្ត​រឹតត្បិត​សេរីភាព​បញ្ចេញមតិ​ដូច​សព្វថ្ងៃ​នេះ ពលរដ្ឋ​គឺ​នៅតែ​ស្ថិត​នៅ​ក្នុង​ស្ថានភាព​ដែល​រង​ការ​ភ័យខ្លាច​ដដែល។

នាយក​មជ្ឈមណ្ឌល​សម្ព័ន្ធភាព​ការងារ​រូប​នេះ​បញ្ជាក់​ថា បើ​ពលរដ្ឋ​មាន​ការ​ភ័យខ្លាច ការ​សម្រេច​ចិត្ត​ជ្រើសរើស​មេដឹកនាំ​នៅ​ថ្ងៃ​បោះឆ្នោត​ខាងមុខ​នេះ ក៏​ជា​ការ​ជ្រើសរើស​ព្រោះ​តែ​ការ​ភ័យខ្លាច​ដែរ។

លោក​បាន​ឲ្យ​ដឹង​បន្ត​ទៀត​ថា ការ​បន្ត​ការ​ឃុំ​ខ្លួន​មេដឹកនាំ​សហជីព​នៃ​ក្រុមហ៊ុន​ណាហ្គា​វើលដ៍ កញ្ញា ឈឹម ស៊ីថរ និង​អ្នកទោស​មនសិការ​ដទៃ​ទៀត​ទាំង​អយុត្តិធម៌ គឺជា​រូបភាព​មួយ​ដែល​បង្ក​ការ​ភ័យខ្លាច​ដល់​ពលរដ្ឋ និង​បង្ក​ឱ្យ​មាន​ភាព​អាប់អួរ​ដល់​បរិយាកាស​នយោបាយ​នៅ​កម្ពុជា ខណៈ​ការ​បោះឆ្នោត​អាណត្តិ​ថ្មី​កាន់តែ​ខិត​ជិត​មក​ដល់។

ការ​អះអាង​នេះ ធ្វើឡើង​ស្រប​ពេល​ដែល​អង្គការ​សង្គម​ស៊ីវិល​បាន​នាំគ្នា​ធ្វើ​យុទ្ធនាការ​លើ​បណ្ដាញ​សង្គម​ហ្វេសប៊ុក ទាមទារ​ឱ្យ​រដ្ឋាភិបាល​ដោះលែង​មេដឹកនាំ​សហជីព​នៃ​ក្រុមហ៊ុន​ណាហ្គា​វើលដ៍ កញ្ញា ឈឹម ស៊ីថរ ដែល​កំពុង​ត្រូវ​បាន​ឃុំ​ខ្លួន​ទាំង​អយុត្តិធម៌​ជា​លើក​ទី​ពីរ​សព្វថ្ងៃ​នេះ។

នៅ​ថ្ងៃទី​១៣ ខែ​មករា ឆ្នាំ​២០២៣ នេះ អង្គការ​ក្រៅ​រដ្ឋាភិបាល និង​សមាគម​នានា ដូចជា​សមាគម​ការពារ​សិទ្ធិមនុស្ស និង​ការ​អភិវឌ្ឍ​នៅ​កម្ពុជា (ADHOC) មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស (CENTRAL) មជ្ឈមណ្ឌល​សិទ្ធិមនុស្ស​កម្ពុជា (CCHR) និង​អង្គការ​ស្ថាប័ន​ជាច្រើន​ផ្សេង​ទៀត បាន​នាំគ្នា​ធ្វើ​យុទ្ធនាការ​លើ​បណ្ដាញ​សង្គម​ហ្វេសប៊ុក​អំឡុង​ពេល​ដែល​កញ្ញា ឈឹម ស៊ីថរ ត្រូវ​បាន​ឃុំ​ខ្លួន​ក្នុង​ពន្ធនាគារ​អស់​រយៈពេល ៧​សប្តាហ៍ ដោយ​ទាមទារ​ឱ្យ​រដ្ឋាភិបាល​កម្ពុជា​ដោះលែង​តំណាង​សហជីព​រូប​នេះ​ជាបន្ទាន់ និង​ដោយ​ឥត​លក្ខខណ្ឌ។

កាលពី​ថ្ងៃទី​២៦ ខែ​វិច្ឆិកា ឆ្នាំ​២០២២ កន្លងទៅ ប្រធាន​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ​នៃ​ក្រុមហ៊ុន​ណាហ្គា​វើលដ៍ កញ្ញា ឈឹម ស៊ីថរ ត្រូវ​សមត្ថកិច្ច​ក្រុង​ភ្នំពេញ​ចាប់​ខ្លួន​នៅ​អាកាសយានដ្ឋាន​អន្តរជាតិ​ភ្នំពេញ បន្ទាប់ពី​កញ្ញា​ត្រឡប់​មកពី​ចូលរួម​មហាសន្និបាត​ពិភពលោក​នៃ​សហភាព​សហជីព​អន្តរជាតិ​នៅ​ប្រទេស​អូស្ត្រាលី​វិញ ក្រោម​ហេតុផល​ថា តំណាង​សហជីព​រូប​នេះ​បាន​ចាកចេញ​ពី​ដែនដី​នៃ​ព្រះរាជាណាចក្រ​កម្ពុជា ដោយ​គ្មាន​ការ​អនុញ្ញាត​ពី​ចៅក្រម​ស៊ើបសួរ ដែល​ជា​ការ​បំពាន​លើ​កាតព្វកិច្ច​នៃ​ការ​ត្រួតពិនិត្យ​តាម​ផ្លូវ​តុលាការ។

យ៉ាងណាក៏ដោយ សហព័ន្ធ​សហភាព​អន្តរជាតិ (ITUC) តំណាង​ឱ្យ​សមាជិក​ជាង ១២០​ប្រទេស​ទូទាំង​ពិភពលោក បាន​ចេញ​សេចក្តី​ថ្លែងការណ៍​កាលពី​ថ្ងៃទី​២៩ ខែ​វិច្ឆិកា ឆ្នាំ​២០២២ ថា ការ​ចោទប្រកាន់​កញ្ញា ឈឹម ស៊ីថរ ថា​បាន​រំលោភ​លើ​លក្ខខណ្ឌ​នៃ​ការ​ដាក់​ឱ្យ​នៅ​ក្រៅ​ឃុំ​ចំពោះ​ការ​ចូលរួម​កិច្ចប្រជុំ​សហជីព គឺ​មិន​មាន​ភាព​ស្រប​គ្នា​ជាមួយ​នឹង​គោលការណ៍​ច្បាប់​ជា​មូលដ្ឋាន​របស់​អង្គការ​ពលកម្ម​អន្តរជាតិ (ILO) ដែល​រដ្ឋាភិបាល​កម្ពុជា​បាន​ផ្តល់​សច្ចាប័ន​ដោយ​ស្ម័គ្រចិត្ត​កាលពី​ថ្ងៃទី​២៣ ខែ​សីហា ឆ្នាំ​១៩៩៩ និង​រដ្ឋធម្មនុញ្ញ​របស់​ខ្លួន​ឡើយ។

កាលពី​ចុងឆ្នាំ​២០២១ អង្គការ​លើកលែង​ទោស​អន្តរជាតិ (Amnesty International) បាន​ចេញ​សេចក្តី​រាយការណ៍​របស់​ខ្លួន​ស្តីអំពី​ស្ថានភាព​សិទ្ធិមនុស្ស​នៅ​កម្ពុជា​ថា អាជ្ញាធរ​នៃ​រដ្ឋាភិបាល​លោក ហ៊ុន សែន បាន​រំលោភ​បំពាន​ទៅ​លើ​សិទ្ធិ​មូលដ្ឋាន​របស់​ប្រជាពលរដ្ឋ គណបក្ស​ប្រឆាំង សង្គម​ស៊ីវិល និង​ប្រព័ន្ធ​ផ្សព្វផ្សាយ​ឯករាជ្យ​នានា​យ៉ាង​ធ្ងន់ធ្ងរ ចំណែក​ប្រព័ន្ធ​យុត្តិធម៌ និង​តុលាការ ក៏​ត្រូវ​បាន​ប្រើប្រាស់​ដោយ​មិន​ត្រឹមត្រូវ ដើម្បី​បង្ក្រាប​ទៅ​លើ​អ្នក​បញ្ចេញមតិ​រិះគន់​រដ្ឋាភិបាល​ដែល​ដឹកនាំ​ដោយ​ឯក​បក្ស​សព្វថ្ងៃ​នេះ​ផង​ដែរ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស