30 C
Phnom Penh

អ្នក​ឃ្លាំមើល​អំពាវនាវ​ឱ្យ​រដ្ឋាភិបាល​ដោះលែង​កញ្ញា ឈឹម ស៊ីថរ ដើម្បី​ស្ដារ​មុខមាត់​កម្ពុជា​ឡើងវិញ

ដោយ ឌឹ ខេមបូឌា ដេលី

បទវិភាគ

ក្រុម​អ្នក​ឃ្លាំមើល​អំពាវនាវ​ឱ្យ​រដ្ឋាភិបាល​កម្ពុជា​ដោះលែង​មេដឹកនាំ​សហជីព​នៃ​ក្រុមហ៊ុន​ណាហ្គា​វើលដ៍ កញ្ញា ឈឹម ស៊ីថរ ដើម្បី​ស្ដារ​មុខមាត់​របស់​កម្ពុជា​ឡើងវិញ និង​ដើម្បី​ធានា​នូវ​ការ​អនុវត្ត​សិទ្ធិ​មូលដ្ឋាន​របស់​ពលរដ្ឋ​ដែល​មាន​ចែង​ក្នុង​រដ្ឋធម្មនុញ្ញ​ឱ្យ​បាន​ល្អ​ប្រសើរ។

អ្នក​ប្រឹក្សា​យោបល់​ផ្នែក​អភិវឌ្ឍន៍​ផ្នត់គំនិត និង​ការ​ស្រាវជ្រាវ លោក សេក សុជាតិ ប្រាប់​សារព័ត៌មាន The Cambodia Daily នៅ​ថ្ងៃទី​១៧ មករា នេះ​ថា ការ​បណ្តែតបណ្តោយ និង​ការ​មិន​អើពើ​របស់​រដ្ឋាភិបាល​ចំពោះ​វិវាទ​ដែល​បាន​កើតឡើង​លើ​កម្មករ​និយោជិត​នៃ​ក្រុមហ៊ុន​ណាហ្គា​វើលដ៍ គឺជា​គំរូ​អាក្រក់​បំផុត​ដែល​មាន​ន័យ​គ្រប់គ្រាន់​បញ្ជាក់​ពី​ការ​អនុញ្ញាត​របស់​អាជ្ញាធរ រដ្ឋាភិបាល និង​ក្រសួង​ពាក់ព័ន្ធ បើក​ដៃ​ឱ្យ​ភាគី​ខាង​ក្រុមហ៊ុន​បន្ត​ការ​រំលោភ​បំពាន​លើ​សិទ្ធិ​កម្មករ​រហូត​មក។

លោក សេក សុជាតិ លើកឡើង​ថា ការ​បើក​ដៃ​ឱ្យ​ថៅកែ​ក្រុមហ៊ុន​រំលោភ​សិទ្ធិ​កម្មករ​បែប​នេះ គឺ​មាន​ន័យ​ស្មើ​នឹង​ផ្តល់​ឱកាស​ឱ្យ​អ្នក​មាន​ទ្រព្យ និង​អំណាច​ទាំងនោះ​ជាន់ឈ្លី​ច្បាប់​របស់​កម្ពុជា​តាម​អំពើ​ចិត្ត ដូច្នេះ​កិត្តិយស​ជាតិ និង​កិត្តិយស​របស់​រដ្ឋាភិបាល ក៏​នឹង​អាប់ឱន​ទៅ​តាម​ស្ថានភាព​ដែល​ពួកគេ​បាន​ប្រព្រឹត្ត​ទង្វើ​រំលោភ​បំពាន​លើ​កម្មករ​និយោជិត​ទាំងនោះ​ដូច្នោះ​ដែរ។

អ្នក​ប្រឹក្សា​យោបល់​ផ្នែក​អភិវឌ្ឍន៍​ផ្នត់គំនិត​រូប​នេះ​បញ្ជាក់​ថា ប្រសិនបើ​ច្បាប់​របស់​ប្រទេស​កម្ពុជា​ត្រូវ​បាន​យក​ទៅ​អនុវត្ត​ដោយ​ត្រឹមត្រូវ កម្មករ​និយោជិត​ទាំងអស់​នឹង​ទទួល​បាន​ការពារ​ដោយ​ស្រប​ច្បាប់ ហើយ​មេដឹកនាំ​សហជីព កញ្ញា ឈឹម ស៊ីថរ ក៏​មិន​ត្រូវ​បាន​ចាប់​ខ្លួន​ពី​ការ​តវ៉ា​ទាមទារ​យុត្តិធម៌​ពី​ការ​រំលោភ​បំពាន​ពី​សំណាក់​ថៅកែ​ក្រុមហ៊ុន​ដែរ ព្រោះ​ថា​សិទ្ធិ​បញ្ចេញមតិ តវ៉ា​ទាមទារ ត្រូវ​បាន​ធានា​ដោយ​រដ្ឋធម្មនុញ្ញ​យ៉ាង​ពេញ​ទំហឹង។

ការ​អះអាង​នេះ ធ្វើឡើង​ស្រប​ពេល​ដែល​អង្គការ​សង្គម​ស៊ីវិល​ជាច្រើន​ស្ថាប័ន បាន​នាំគ្នា​ធ្វើ​យុទ្ធនាការ​ទាមទារ​ឱ្យ​រដ្ឋាភិបាល​ដោះលែង​មេដឹកនាំ​សហជីព​នៃ​ក្រុមហ៊ុន​ណាហ្គា​វើលដ៍ ដែល​ត្រូវ​បាន​ឃុំ​ខ្លួន​ទាំង​អយុត្តិធម៌​កាលពី​ពេល​កន្លងទៅ​នេះ។

កាលពី​ថ្ងៃទី​១៦ ខែ​មករា ឆ្នាំ​២០២៣ អង្គការ​ក្រៅ​រដ្ឋាភិបាល និង​សមាគម​នានា ដូចជា​សមាគម​ការពារ​សិទ្ធិមនុស្ស និង​ការ​អភិវឌ្ឍ​នៅ​កម្ពុជា (ADHOC) មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស (CENTRAL) មជ្ឈមណ្ឌល​សិទ្ធិមនុស្ស​កម្ពុជា (CCHR) និង​អង្គការ​ស្ថាប័ន​ជាច្រើន​ផ្សេង​ទៀត បាន​នាំគ្នា​ធ្វើ​យុទ្ធនាការ​លើ​បណ្ដាញ​សង្គម​ហ្វេសប៊ុក​សប្តាហ៍​លើក​ទី​៨ នៃ​ការ​ឃុំ​ខ្លួន​កញ្ញា ឈឹម ស៊ីថរ ទាំង​អយុត្តិធម៌ ដោយ​ទាមទារ​ឱ្យ​រដ្ឋាភិបាល​កម្ពុជា​ដោះលែង​តំណាង​សហជីព​រូប​នេះ​ជាបន្ទាន់ និង​ដោយ​ឥត​លក្ខខណ្ឌ។

ជុំវិញ​បញ្ហា​នេះ សហរដ្ឋ​អាមេរិក អូស្ត្រាលី និង​អង្គការ​សង្គម​ស៊ីវិល​ជាតិ និង​អន្តរជាតិ​ជាច្រើន បាន​ចាត់ទុក​ការ​ដាក់​ទោស​លើ​កញ្ញា ឈឹម ស៊ីថរ ដោយសារ​ការ​ខកខាន​ក្នុង​ការ​អនុវត្ត​នូវ​លក្ខខណ្ឌ​ដែល​មិន​បាន​ប្រាប់​ឲ្យ​ដឹង​មុន​ពី​សំណាក់​អាជ្ញាធរ គឺជា​ភាព​អយុត្តិធម៌ និង​ល្មើស​ទៅ​នឹង​គោលការណ៍​ជា​មូលដ្ឋាន​នៃ​នីតិរដ្ឋ​យ៉ាង​ធ្ងន់ធ្ងរ ហើយ​ក៏​ជា​ទង្វើ​រំលោភ​បំពាន​ច្បាប់​ការងារ​មាត្រា ២៩៣ និង​ច្បាប់​ស្ដីពី​សហជីព​មាត្រា ៤៣ និង​មាត្រា​៦៧ យ៉ាង​ធ្ងន់ធ្ងរ​ផង​ដែរ។

មាត្រា​៣៥ នៃ​រដ្ឋធម្មនុញ្ញ​ចែង​ថា ពលរដ្ឋ​ខ្មែរ​មាន​សិទ្ធិ​ចូលរួម​យ៉ាង​សកម្ម​ក្នុង​ជីវភាព​នយោបាយ សេដ្ឋកិច្ច សង្គម និង​វប្បធម៌​របស់​ប្រទេស​ជាតិ ខណៈ​សេចក្តី​ស្នើ​ទាំងឡាយ​របស់​ពលរដ្ឋ ត្រូវ​បាន​ដោះស្រាយ និង​ពិនិត្យ​យ៉ាង​ហ្មត់ចត់​ពី​អង្គការ​រដ្ឋ ប៉ុន្តែ​រដ្ឋាភិបាល​ក្រោម​ការ​គ្រប់គ្រង​របស់​បក្ស​កាន់​អំណាច​សព្វថ្ងៃ​នេះ ត្រូវ​គេ​មើល​ឃើញ​ថា​បាន​អនុវត្ត​ផ្ទុយ​ពី​មាត្រា​ដែល​បាន​ចែង​ក្នុង​រដ្ឋធម្មនុញ្ញ​ទាំងស្រុង។

គិត​ត្រឹម​ថ្ងៃទី​១៧ ខែ​មករា ឆ្នាំ​២០២៣ នេះ កញ្ញា ឈឹម ស៊ីថា ត្រូវ​បាន​តុលាការ​ឃុំ​ខ្លួន​ទាំង​អយុត្តិធម៌​ជា​លើក​ទី​២ ចំនួន ៥២​ថ្ងៃ​ហើយ បើ​គិត​ចាប់តាំងពី​ថ្ងៃ​ដែល​សមត្ថកិច្ច​បាន​ចាប់​ខ្លួន​តំណាង​សហជីព​រូប​នេះ​កាលពី​ចុង​ខែ​វិច្ឆិកា ឆ្នាំ​២០២២ មក ខណៈ​សំណើ​សុំ​នៅ​ក្រៅ​ឃុំ​បណ្ដោះអាសន្ន​ពី​មេធាវី​របស់​កញ្ញា ឈឹម ស៊ីថរ ត្រូវ​បាន​តុលាការ​ច្រានចោល​ទាំងស្រុង​កាលពី​ថ្ងៃទី​២៨ ខែ​ធ្នូ ឆ្នាំ​២០២២ កន្លងទៅ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស