ប្រធានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ថាអ្នកសារព័ត៌មាននៃអង្គភាពសារព័ត៌មាន វីអូឌី (VOD) តែងតែប្រឈមនឹងការគំរាមកំហែងតាមរូបភាពផ្សេងៗ និងការរឹតត្បិតតាមវិធីជាច្រើនពីសំណាក់អាជ្ញាធរនៃរដ្ឋាភិបាលកម្ពុជា។
លោក ប៉ា ងួនទៀង ប្រធានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) បញ្ចេញសុន្ទរកថារបស់ខ្លួនក្នុងពិធីប្រារព្ធខួប ២០ឆ្នាំនៃការបង្កើតអង្គភាពសារព័ត៌មាន វីអូឌី កាលពីថ្ងៃអង្គារ ទី៣១ មករា ថា ការប្រឈម ការប្រថុយប្រថាន និងការពុះពារឧបសគ្គគ្រប់បែបយ៉ាង មិនមែនដើម្បីតែឱ្យអង្គភាពសារព័ត៌មាន វីអូឌី អាចដំណើរការបានទៅមុខប៉ុណ្ណោះទេ ប៉ុន្តែដើម្បីជំរុញឱ្យមានប្រព័ន្ធផ្សព្វផ្សាយឯករាជ្យផង និងវិជ្ជាជីវៈសារព័ត៌មាននៅកម្ពុជាផង និងដើម្បីលើកស្ទួយសេរីភាពសារព័ត៌មាននៅកម្ពុជាផងដែរ ជាពិសេសគឺដើម្បីផ្តល់នូវអត្ថប្រយោជន៍ដល់ប្រជាពលរដ្ឋខ្មែរគ្រប់រូបតាមរយៈនៃការផ្តល់នូវព័ត៌មានពិតពីតថភាពសង្គមកម្ពុជាជាក់ស្តែង។
លោក ប៉ា ងួនទៀង លើកឡើងថា ថ្វីត្បិតតែរូបលោករងនូវការចាប់ខ្លួន ហើយអ្នកសារព័ត៌មាន វីអូឌី រងនូវការគំរាមកំហែង ប៉ុន្តែលោកនៅតែមានមោទកភាពចំពោះការងារដែលខ្លួនបានធ្វើកន្លងមក ព្រោះទុក្ខលំបាករបស់លោក និងសហការីផ្សេងទៀតអាចដោះដូរមកវិញនូវការទទួលស្គាល់ពីរដ្ឋមន្ត្រីក្រសួងព័ត៌មាន ថា វីអូឌី គឺជាអង្គភាពឯករាជ្យ និងអនុវត្តតាមវិជ្ជាជីវៈសារព័ត៌មានបានត្រឹមត្រូវចំពោះស្តង់ដារការងាររបស់ខ្លួនរហូតមក។
នៅឆ្នាំ២០០៧ វីអូឌី បានដាក់លិខិតមួយច្បាប់ទៅរដ្ឋមន្ត្រីក្រសួងព័ត៌មាន ក្នុងបំណងស្នើសុំហ្វ្រេកង់វិទ្យុដើម្បីបើកស្ថានីយផ្សព្វផ្សាយព័ត៌មាន និងកម្មវិធីនានា ប៉ុន្តែត្រូវក្រសួងព័ត៌មានបដិសេធក្រោមហេតុផលថា អស់ហ្រេ្វកង់ ស្របពេលដែលស្ថានីយវិទ្យុថ្មីៗជាច្រើនដែលស្និទ្ធនឹងរដ្ឋាភិបាលបានបើកដំណើរការជាបន្តបន្ទាប់។
រហូតដល់ឆ្នាំ២០១៥ វីអូឌី បានចាប់ផ្តើមដំណើរការផ្សាយកម្មវិធីរបស់ខ្លួនដោយសហការជាមួយក្រុមហ៊ុនឯកជនដែលទទួលបានសិទ្ធិផ្សព្វផ្សាយ ប៉ុន្តែត្រូវក្រសួងព័ត៌មានលុបសិទ្ធិគ្រប់គ្រងអាជ្ញាប័ណ្ណរបស់ក្រុមហ៊ុនឯកជននោះវិញ បន្ទាប់ពីខ្លួនបានផ្សព្វផ្សាយត្រឹមតែមួយសប្តាហ៍ប៉ុណ្ណោះ ក្រៅពីនេះ ស្ថានីយវិទ្យុក្រុមហ៊ុនផ្សេងៗទៀតដែលបានសហការផ្សាយកម្មវិធី វីអូឌី ក៏ត្រូវបានហាមឃាត់ដោយរដ្ឋាភិបាលកាលពីអំឡុងខែសីហា ឆ្នាំ២០១៧ ផងដែរ។
ដោយសារតែមានឧបសគ្គមិនចេះចប់មិនចេះហើយបែបនេះ ថ្នាក់ដឹកនាំ វីអូឌី ក៏បានគិតគូរអំពីលទ្ធភាពនៃការផ្សាយតាមអនឡាញចាប់តាំងពីឆ្នាំ២០០៩ រហូតដល់សព្វថ្ងៃនេះ។
ទោះបី វីអូឌី អាចដំណើរការរបស់ខ្លួនបានក៏ដោយ ក៏ការគំរាមកំហែងនៅមិនទាន់បញ្ចប់ដែរ។ ជាក់ស្តែង កាលពីអំឡុងខែឧសភា ឆ្នាំ២០១៥ អ្នកសារព័ត៌មាន វីអូឌី បានរងនូវការវាយដំទាត់ធាក់រហូតសន្លប់នៅទីលានប្រជាធិបតេយ្យ។ ជាងនេះទៀត ក៏មានការឃាត់ខ្លួន និងការប្រើហិង្សាមកលើក្រុមការងារ វីអូឌី នៅតំបន់អភិរក្សសួនសត្វភ្នំតាម៉ៅ កាលពីថ្ងៃទី១៦ ខែសីហា ឆ្នាំ២០២២ ផងដែរ ក្នុងនោះក៏មានការគំរាមកំហែងជាច្រើនពីអាជ្ញាធរថែមទៀត។
នាយកមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា លើកឡើងថា ២០ឆ្នាំហើយដែល វីអូឌី អាចដើរតួនាទីដ៏សំខាន់ក្នុងការផ្តល់ព័ត៌មានពិតដល់ប្រជាពលរដ្ឋ ស្របពេលដែលសម្ពាធនយោបាយ និងការគំរាមកំហែងបានកើតឡើងរាប់មិនអស់។
លោកបន្ថែមថា ប៉ុន្តែការតស៊ូនេះ គឺបញ្ជាក់ពីវីរភាព ការលះបង់ ការប្ដេជ្ញាចិត្តខ្ពស់របស់ប្រធានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ លោក ប៉ា ងួនទៀង ផងដែរ ដែលជាគំរូមួយសម្រាប់អ្នកជំនាន់ក្រោយរៀនសូត្រ និងយកគំរូតាម។
ទិន្នន័យសង្គមស៊ីវិលបានលាតត្រដាងកាលពីពេលថ្មីៗនេះថា ចាប់តាំងពីឆ្នាំ១៩៩៤ មក យ៉ាងហោចណាស់អ្នកសារព័ត៌មានជិត ២០នាក់ត្រូវបានសម្លាប់នៅប្រទេសកម្ពុជា ក្នុងនោះស្ទើរតែគ្រប់ករណីទាំងអស់ ជនរងគ្រោះត្រូវបានផ្តាច់ជីវិតក្នុងពេលកំពុងបំពេញការងារ ជាពិសេសនៅពេលដែលអ្នកទាំងនោះស៊ើបអង្កេតទៅលើបញ្ហារសើបនានា ដូចជាបញ្ហាអំពើពុករលួយ និងរឿងនយោបាយដែលទាក់ទិនទៅនឹងការដឹកនាំគ្មានតម្លាភាពរបស់រដ្ឋាភិបាលឯកបក្សបច្ចុប្បន្ន។
អង្គការអ្នកសារព័ត៌មានគ្មានព្រំដែន (Reporters Without Borders) បានដាក់ចំណាត់ថ្នាក់សេរីភាពសារព័ត៌មាននៅកម្ពុជាសម្រាប់ឆ្នាំ២០២២ ស្ថិតក្នុងលំដាប់លេខរៀងទី១៤២ ក្នុងចំណោមប្រទេស១៨០ ដែលជាចំណាត់ថ្នាក់ដ៏អាក្រក់មួយ ក្រោយគេរកឃើញថា ប្រព័ន្ធផ្សព្វផ្សាយឯករាជ្យនៅកម្ពុជាត្រូវបានបំផ្លិចបំផ្លាញ និងបោសសម្អាតដោយរដ្ឋាភិបាលកម្ពុជា ចាប់តាំងពីអំឡុងឆ្នាំ២០១៧ និងឆ្នាំ២០១៨ រហូតមក ដែលធ្វើឱ្យសេរីភាពសារព័ត៌មាននៅប្រទេសកម្ពុជាបន្តធ្លាក់ចុះជាបន្តបន្ទាប់ដល់ពេលនេះ៕