37 C
Phnom Penh

បុរស​ជនជាតិ​វៀតណាម​ពីរ​នាក់​ទទួល​បាន​សញ្ជាតិ​ខ្មែរ​និង​ប្តូរ​មក​ប្រើ​ឈ្មោះ​ខ្មែរ

ដោយ ឌឹ ខេមបូឌា ដេលី

បទវិភាគ

បុរស​ជនជាតិ​វៀតណាម ២​នាក់​ដែល​មាន​ដើមកំណើត​នៅ​ខេត្ត​នីញប៊ីញ ប្រទេស​វៀតណាម ទទួល​បាន​ការ​ផ្ដល់​សញ្ជាតិ​ខ្មែរ​ដោយ​សញ្ជាតូបនីយកម្ម និង​ប្ដូរ​ឈ្មោះ​ថ្មី​ជា​លំនាំ​ឈ្មោះ​ខ្មែរ បន្ទាប់ពី​លោក​នាយករដ្ឋមន្ត្រី ហ៊ុន សែន បាន​ទូល​ថ្វាយ​ទៅ​ព្រះមហាក្សត្រ។

ក្នុង​ព្រះរាជក្រឹត្យ​ចុះហត្ថលេខា​ដោយ​ប្រមុខ​រដ្ឋ​ស្ដីទី លោក ប៊ិន ឈិន កាល​ថ្ងៃទី​២០ ខែ​មិថុនា ឆ្នាំ​២០២២ ដែល​ទើប​ត្រូវ​បាន​ផ្សព្វផ្សាយ​ជា​សាធារណៈ បាន​ឲ្យ​ដឹង​ថា លោក ង្វៀន វណ្ណឌ័ន (Nguyen Van Doan) អាយុ ៣៣​ឆ្នាំ ដែល​ជា​ជនជាតិ​វៀតណាម សញ្ជាតិ​វៀតណាម រស់នៅ​ខេត្ត​នីញប៊ីញ សាធារណរដ្ឋ​សង្គម​និយម​វៀតណាម បាន​ទទួល​សញ្ជាតិ​ខ្មែរ​ដោយ​សញ្ជាតូបនីយកម្ម​ចាប់ពី​ថ្ងៃទី​២០ ខែ​មិថុនា ឆ្នាំ​២០២២ តទៅ។

ចំណែក​លោក ហ្វាន វណ្ណហ្ស៊ុង (Phan Van Dung) អាយុ ២៩​ឆ្នាំ ដែល​ជា​ជនជាតិ​វៀតណាម សញ្ជាតិ​វៀតណាម រស់នៅ​ខេត្ត​នីញប៊ីញ ដូច​គ្នា ក៏​បាន​ទទួល​សញ្ជាតិ​ខ្មែរ​ដោយ​សញ្ជាតូបនីយកម្ម​ចាប់ពី​ថ្ងៃទី​២០ ខែ​មិថុនា ឆ្នាំ​២០២២ តទៅ​ដែរ។

ព្រះរាជក្រឹត្យ​ដដែល ឲ្យ​ដឹង​ថា បុរស​ជនជាតិ​វៀតណាម ២​នាក់​នេះ​ក៏​ត្រូវ​បាន​ប្ដូរ​ឈ្មោះ​វៀតណាម មក​ប្រើ​ជា​ឈ្មោះ​ជនជាតិ​ខ្មែរ​ផង​ដែរ ក្នុង​នោះ​ឈ្មោះ ង្វៀន វណ្ណឌ័ន (Nguyen Van Doan) បាន​ដាក់​ជំនួស​មក​វិញ​នូវ​ឈ្មោះ ប៊ុន សំណាង ខណៈ​ឈ្មោះ ហ្វាន វណ្ណហ្ស៊ុង (Phan Van Dung) បាន​ដាក់​ជំនួស​មក​វិញ​នូវ​ឈ្មោះ លឹម វាសនា ហើយ​ការ​ផ្ដល់​សញ្ជាតិ​ខ្មែរ​ដោយ​សញ្ជាតូបនីយកម្ម​ដល់​បុរស​ជនជាតិ​វៀតណាម​ខាងលើ​នេះ ធ្វើឡើង​តាម​សំណើ​របស់​លោក​នាយករដ្ឋមន្ត្រី ហ៊ុន សែន។

ច្បាប់​ស្ដីពី​សញ្ជាតិ​ថ្មី​ឆ្នាំ​២០១៨ ត្រង់​មាត្រា​២២ បាន​ចែង​ថា ជនបរទេស​ណា​ដែល​ផ្តល់​ថវិកា​ដើម្បី​អភិវឌ្ឍ​សេដ្ឋកិច្ច សង្គម ឬ​វិស័យ​មនុស្សធម៌​នៅ​កម្ពុជា ជនបរទេស​នោះ​អាច​ស្នើសុំ​សញ្ជាតិ​ខ្មែរ ប៉ុន្តែ​មិន​បាន​ចែង​ពី​ចំនួន​ទឹកប្រាក់​ជាក់លាក់​ដែល​តម្រូវ​ឲ្យ​ជនបរទេស​បរិច្ចាគ មុន​នឹង​ស្នើសុំ​សញ្ជាតិ​ខ្មែរ​ឡើយ ខណៈ​ចំនួន​ទឹកប្រាក់​ដែល​ត្រូវ​បរិច្ចាគ គឺ​ត្រូវ​កំណត់​ដោយ​អនុក្រឹត្យ​ផ្សេង​វិញ។

បែប​នេះ​ក្តី ច្បាប់​ចាស់​ឆ្នាំ​១៩៩៦ បាន​កំណត់​ចំនួន​ទឹកប្រាក់​ដោយ​ចែង​ក្នុង​មាត្រា​១២ ថា ជនបរទេស​ណា​ដែល​បាន​បរិច្ចាគ​ថវិកា ១​ពាន់​លាន​រៀល​ឡើង​ទៅ​ដើម្បី​ស្ដារ និង​កសាង​សេដ្ឋកិច្ច​កម្ពុជា ជនបរទេស​នោះ​អាច​ស្នើសុំ​សញ្ជាតិ​ខ្មែរ​បាន ហើយ​ជនបរទេស​ទាំងនោះ​ត្រូវ​បំពេញ​តាម​លក្ខខណ្ឌ​ដូច​មាន​ចែង​ក្នុង​មាត្រា​ទី​១ ដល់​មាត្រា​ទី​៨ នៃ​ច្បាប់​ស្ដីពី​សញ្ជាតិ។

កាលពី​ថ្ងៃទី​២៦ ខែ​កុម្ភៈ ឆ្នាំ​១៩៨៦ លោក​នាយករដ្ឋមន្ត្រី ហ៊ុន សែន បាន​ចុះហត្ថលេខា​លើ​សារាចរ​ណែនាំ​ស្ដីពី​ការ​អនុវត្ត​គោល​នយោបាយ​ចំពោះ​អាណិកជន​វៀតណាម​នៅ​កម្ពុជា ដែល​តម្រូវ​ឲ្យ​រដ្ឋាភិបាល​កម្ពុជា​ផ្តល់​ដីធ្លី ទីជម្រក ផ្តល់​អត្តសញ្ញាណប័ណ្ណ ថែរក្សា និង​ផ្គត់ផ្គង់​ឲ្យ​បាន​ត្រឹមត្រូវ ហើយ​សារាចរ​នេះ​នៅតែ​មាន​សុពលភាព​រហូត​មក​ដល់​សព្វថ្ងៃ​នេះ។

កាលពី​ថ្ងៃទី​១៣ ខែ​ឧសភា ឆ្នាំ​២០២២ នាយករដ្ឋមន្ត្រី​វៀតណាម លោក ផាម មីញជីញ បាន​សុំ​ឱ្យ​លោក ហ៊ុន សែន ជួយ​ពលរដ្ឋ​វៀតណាម​ដែល​កំពុង​រស់នៅ​លើ​ទឹកដី​កម្ពុជា​ដោយ​ខុស​ច្បាប់ មក​ជា​ការ​រស់នៅ​ដោយ​ស្រប​ច្បាប់​វិញ ខណៈ​មេដឹកនាំ​កម្ពុជា លោក ហ៊ុន សែន មិន​បាន​បដិសេធ​ទៅ​នឹង​សំណើ​នេះ​ឡើយ។

ក្រសួង​មហាផ្ទៃ កាលពី​ថ្ងៃ​ចុង​ខែ​សីហា ឆ្នាំ​២០២២ បាន​ចេញ​សេចក្ដី​ជូនដំណឹង​ស្ដីពី​ការ​ផ្ដល់​ប័ណ្ណ​ស្នាក់នៅ​អចិន្ត្រៃយ៍​ឱ្យ​ជនអន្តោប្រវេសន៍​នៅ​កម្ពុជា ស្រប​ពេល​ដែល​គេ​មើល​ឃើញ​ថា ជនអន្តោប្រវេសន៍​ដែល​រស់នៅ​លើ​ទឹកដី​កម្ពុជា​ដោយ​ខុស​ច្បាប់​ច្រើន​លើសលប់​សព្វថ្ងៃ​នេះ គឺ​មាន​តែ​ជនជាតិ​វៀតណាម​ប៉ុណ្ណោះ។

ជនបរទេស​ដែល​បាន​ទទួល​សញ្ជាតិ​ខ្មែរ នឹង​មាន​ឱកាស​កាន់​តំណែង​ក្នុង​ជួរ​រាជការ កងកម្លាំង​ប្រដាប់​អាវុធ​គ្រប់​លំដាប់​ថ្នាក់​ដូច​ពលរដ្ឋ​ខ្មែរ​មាន​សញ្ជាតិ​ពី​កំណើត​ដូច្នេះ​ដែរ លើកលែងតែ​ឈរ​ឈ្មោះ​ធ្វើ​តំណាងរាស្ត្រ។ នេះ​បើ​តាម​ច្បាប់​ស្ដីពី​ការ​ជ្រើសតាំង​តំណាងរាស្ត្រ។

ទាក់ទិន​នឹង​បញ្ហា​នេះ ក្រុម​អ្នក​សង្កេតការណ៍​សម្ដែង​ការ​ព្រួយបារម្ភ​ថា ពលរដ្ឋ​ខ្មែរ​គ្រប់​រូប រួម​ទាំង​មន្ត្រី​រាជការ​ខ្មែរ​ភាគច្រើន តែង​ព្រួយបារម្ភ​ពី​អធិបតេយ្យ​ជាតិ​របស់​ខ្លួន​ដែល​ត្រូវ​បរទេស​ជិតខាង​រំលោភ​បំពាន​តាមរយៈ​នយោបាយ​ប្រជាសាស្ត្រ ដែល​វៀតណាម​កំពុង​បង្ហូរ​ជនជាតិ​របស់​ពួកគេ​ឱ្យ​ទៅ​រស់នៅ​លើ​ទឹកដី​កម្ពុជា​សព្វថ្ងៃ​នេះ ខណៈ​រដ្ឋាភិបាល​ខ្មែរ​បាន​ផ្តល់​សញ្ជាតិ​ឱ្យ​ជនជាតិ​វៀតណាម​ជា​បន្តបន្ទាប់។

របាយការណ៍​របស់​អគ្គនាយកដ្ឋាន​អត្តសញ្ញាណកម្ម ចេញ​ផ្សាយ​កាលពី​ដើម​ឆ្នាំ​២០១៨ លើកឡើង​ថា រយៈពេល ៣​ឆ្នាំ​ពី​ឆ្នាំ​២០១៤ ដល់​ឆ្នាំ​២០១៧ មាន​ជនបរទេស​ចំនួន ១៥១៨​នាក់​បាន​ទទួល​សញ្ជាតិ​ខ្មែរ​តាមរយៈ​សញ្ជាតូបនីយកម្ម៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស