ពលរដ្ឋចំនួន ៤៧៣គ្រួសាររស់នៅជាប់ព្រលានយន្តហោះថ្មីដែលកំពុងប្រឈមនឹងការបណ្ដេញចេញ ស្នើទៅអាជ្ញាធរខេត្តឲ្យបញ្ឈប់ការចោទប្រកាន់ រួមទាំងឲ្យបុគ្គលិកក្រុមហ៊ុនបញ្ឈប់ការបំភិតបំភ័យលើពួកគេគ្រប់រូបភាពបន្តទៀត ដោយថាពួកគេរស់នៅលើទីតាំងបច្ចុប្បន្នយ៉ាងហោចណាស់ចន្លោះពី ២០ ទៅ ៣០ឆ្នាំ។
ពលរដ្ឋជិត ៥០០គ្រួសាររស់នៅទំនប់៩៤ ភូមិអំពៅព្រៃ ឃុំកណ្ដោក ស្រុកកណ្ដាលស្ទឹង និងភូមិអាចម៍កុក សង្កាត់កំពង់សំណាញ់ ខេត្តកណ្តាល ត្អូញត្អែរថា បច្ចុប្បន្នពួកគេប្រមាណជា ៤៧៣គ្រួសារកំពុងប្រឈមនឹងការបណ្ដេញចេញពីលំនៅឋាននាពេលអនាគត ដោយសារគម្រោងអភិវឌ្ឍន៍ព្រលានយន្តហោះថ្មី និងគម្រោងអភិវឌ្ឍន៍ប្រព័ន្ធប្រឡាយរំដោះទឹករបស់សាលាខេត្តកណ្ដាល មិនបានផ្ដល់ព័ត៌មាន និងមិនបានពិគ្រោះយោបល់ជាមួយពលរដ្ឋដែលរស់នៅក្នុងតំបន់នេះឲ្យបានទូលំទូលាយនោះទេ។
ក្រោយពីមានគម្រោងនេះ នៅថ្ងៃទី១២ និងថ្ងៃទី២១ ខែធ្នូ ឆ្នាំ២០២២ បុគ្គលិកក្រុមហ៊ុនព្រលានប្រហែល ១៥នាក់អមដោយគ្រឿងចក្រផង បម្រុងនឹងរុះរើរោងចិញ្ចឹមសត្វ និងផ្ទះរបស់ពួកគេ ខណៈកាលពីថ្ងៃទី២ ខែមករា ឆ្នាំ២០២៣ កន្លងទៅ បុគ្គលិកក្រុមហ៊ុនសាងសង់ព្រលានយន្តហោះថ្មី និងប៉ូលិសប្រដាប់ដោយអាវុធ (កាំភ្លើងវែង) ប្រមាណជា ២០នាក់ បានចុះរុះរើផ្ទះរបស់ពលរដ្ឋទាំងកំរោលផងដែរ។
ពួកគេស្នើឲ្យលោក ហ៊ុន សែន អន្តរាគមន៍ក្រុមហ៊ុនសាងសង់ព្រលានយន្តហោះថ្មីឲ្យបញ្ឈប់ការបំភិតបំភ័យពលរដ្ឋតាមគ្រប់រូបភាព បន្ទាប់ពីបុគ្គលិកក្រុមហ៊ុនបានធ្វើសកម្មភាពចុះល្បាតទាំងយប់ទាំងថ្ងៃ និងថតផ្ទះពលរដ្ឋស្ទើររាល់ថ្ងៃ។
ក្រៅពីស្នើលោក ហ៊ុន សែន ឲ្យជួយអន្តរាគមន៍ហើយ ពលរដ្ឋទាំង ៤៧៣គ្រួសារ ក៏បានទទូចទៅអភិបាលខេត្តកណ្ដាល លោក គង់ សោភ័ណ្ឌ ឲ្យបញ្ឈប់ការចោទប្រកាន់លើពលរដ្ឋដែលមករស់នៅទំនប់៩៤ ថារស់នៅអនាធិបតេយ្យ និងខុសច្បាប់បន្តទៀត ដោយថាពួកគាត់រស់នៅទីនោះស្របច្បាប់ដោយមានអាជ្ញាធរមូលដ្ឋានដឹងឮ និងមានឯកសារសំខាន់ៗ ដូចជាក្នុងសៀវភៅស្នាក់នៅ សៀវភៅគ្រួសារ អត្តសញ្ញាណប័ណ្ណ សំបុត្រកំណើត លិខិតបញ្ជាក់អាពាហ៍ពិពាហ៍ ប័ណ្ណបោះឆ្នោត និងឯកសារបញ្ជាក់ពីការកាន់កាប់ដីធ្លី ហើយក៏មានសាធារណជនទូទៅរស់នៅក្នុងភូមិសាស្ត្រនេះបានដឹងឮផងដែរ។
ជាមួយគ្នានេះ ពួកគេក៏បានស្នើឲ្យបញ្ឈប់សកម្មភាពមកហាមពលរដ្ឋមិនឲ្យសង់ផ្ទះលើដីរបស់ពួកគេកំពុងរស់នៅ និងជួយផ្តល់កម្មសិទ្ធិដីធ្លីស្របច្បាប់ និងធានាសុវត្ថិភាពដីធ្លី និងលំនៅឋានរបស់ពលរដ្ឋដែលរស់នៅលើទំនប់៩៤។
ការស្នើរបស់ពលរដ្ឋនេះ ធ្វើឡើងបន្ទាប់ពីអភិបាលខេត្តកណ្ដាល លោក គង់ សោភ័ណ្ឌ បានចោទប្រកាន់ និងចាត់ទុកប្រជាពលរដ្ឋដែលរស់នៅតាមទំនប់៩៤ ថាការរស់នៅលើដីបច្ចុប្បន្នដោយខុសច្បាប់ និងអនាធិបតេយ្យ។ ប៉ុន្តែការចោទប្រកាន់នេះ ត្រូវបានប្រជាពលរដ្ឋច្រានចោល ដោយថាពួកគាត់រស់នៅលើដីបច្ចុប្បន្នយ៉ាងហោចណាស់ចន្លោះពី ២០ ទៅ ៣០ឆ្នាំហើយ។
កាលពីខែមិថុនា ឆ្នាំ២០២០ រដ្ឋាភិបាលបានចេញអនុក្រឹត្យមួយដោយកាត់ដីរដ្ឋទំហំ ២៦០០ហិកតារដើម្បីសាងសង់ព្រលានយន្តហោះអន្តរជាតិថ្មីមួយនេះដែលលាតសន្ធឹងលើឃុំចំនួន៤ រួមមានឃុំបឹងខ្យាង ឃុំអំពៅព្រៃ ឃុំព្រែកស្លែង ក្នុងស្រុកកណ្ដាលស្ទឹង ខេត្តកណ្តាល និងឃុំពត់សរ ស្រុកបាទី ខេត្តតាកែវ។
គម្រោងនេះត្រូវបានទទួលសិទ្ធិសាងសង់ដោយក្រុមហ៊ុនសាជីវកម្មវិនិយោគក្រៅប្រទេសកម្ពុជា ហៅកាត់ថា អូស៊ីអាយស៊ី (OCIC) របស់ឧកញ៉ា ពុង ឃាវសែ និងលេខាធិការដ្ឋានអាកាសចរណ៍ស៊ីវិល (SSCA) ដែលត្រូវចំណាយទឹកប្រាក់ប្រហែល ១៥០០លានដុល្លារ ហើយត្រូវបានព្យាករថានឹងសាងសង់ឲ្យរួចរាល់ក្នុងឆ្នាំ២០២៣។
កាលពីខែកក្កដា ឆ្នាំ២០២១ ក្រុមពលរដ្ឋបានចេញលិខិតចំហមួយច្បាប់ដោយបញ្ជាក់ថា គម្រោងអភិវឌ្ឍន៍ព្រលានយន្តហោះអន្តរជាតិថ្មី អូស៊ីអាយស៊ី (OCIC) របស់លោកឧកញ៉ា ពុង ឃាវសែ បានធ្វើឲ្យប៉ះពាល់ប្រជាពលរដ្ឋរាប់រយគ្រួសារនៅឃុំទាំង ៤ នោះ ដែលមានក្បាលដីទំហំជាង ១លានម៉ែត្រការ៉េ។
រដ្ឋធម្មនុញ្ញកម្ពុជា មាត្រា៣៥២ ចែងថា សេចក្តីស្នើទាំងឡាយណារបស់ពលរដ្ឋត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ៕