មន្ត្រីរាជការនៃអគ្គនាយកដ្ឋានគយ និងរដ្ឋាករកម្ពុជា សំណូមពរឲ្យប្រមុខរាជរដ្ឋាភិបាលកម្ពុជា លោក ហ៊ុន សែន ត្រួតពិនិត្យការដឹកនាំរបស់អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លោក គុណ ញឹម ដែលបានបើកដៃឲ្យលោក ប៉ោ សួន ជំរិតលុយដាក់ខែពីក្រុមហ៊ុននាំចេញនាំចូលនៅតាមច្រកព្រំដែនយ៉ាងអនាធិបតេយ្យ។
មន្ត្រីរាជការនៃអគ្គនាយកដ្ឋានគយ និងរដ្ឋាករកម្ពុជា បានទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះថា អគ្គនាយកដ្ឋានគយ និងរដ្ឋាករកម្ពុជាដែលកំពុងស្ថិតក្រោមការគ្រប់គ្រងរបស់លោក គុណ ញឹម សព្វថ្ងៃនេះ បានធ្វើព្យុះភ្លៀងតាមអំពើចិត្តក្រោមរូបភាពក្បត់ខ្លឹមសារជាច្រើន ដូចជាការបង្កើតឱ្យមានក្រុមអនុលោម ឬក្រុមជំនួយការសម្រាប់ចុះត្រួតពិនិត្យសាខា ការិយាល័យគយ និងរដ្ឋាករតាមច្រកចេញព្រំដែន ដើម្បីប្រព្រឹត្តអំពើពុករលួយដោយលួចលាក់។
ប្រភពដដែលលើកឡើងថា ក្រោមរូបភាពអនុវត្តនៃការត្រួតពិនិត្យទំនិញតាមមាត់ច្រកនេះ ក្រុមអនុលោម ឬក្រុមជំនួយការដែលមានលោក ប៉ោ សួន ជាអនុប្រធាននាយកដ្ឋានកិច្ចការច្បាប់សវនកម្ម និងទំនាក់ទំនងសាធារណៈ បានប្រើអំណាចរបស់ខ្លួនកោះហៅក្រុមហ៊ុននាំចូលនាំចេញទាំងអស់មកជួប ដើម្បីធ្វើការចរចាសម្របសម្រួលតាមរយៈការសូកប៉ាន់សម្រាប់ការដឹកជញ្ជូនទំនិញរបស់ក្រុមហ៊ុនទាំងនោះដោយគេចពន្ធ។
ក្រុមមន្ត្រីរាជការទាំងនោះបញ្ជាក់ថា ជាធម្មតា ម្ចាស់ក្រុមហ៊ុននាំចេញនាំចូលទំនិញទាំងនោះមិនដែលបង់ពន្ធជូនរដ្ឋគ្រប់ ១០០% នោះទេ ព្រោះថាបើទោះបីជាពួកគេបង់ថវិកាចូលរដ្ឋ ១០០% ក៏ដោយ ក៏ត្រូវបានមន្ត្រីគយទាមទារឲ្យបង់សេវាបន្ថែមទៀត ដើម្បីឲ្យពួកគេអាចបែងចែកថវិកាទាំងនោះសម្រាប់ដាក់ហោប៉ៅរៀងៗខ្លួនដែរ ដូច្នេះម្ចាស់ក្រុមហ៊ុនទាំងនោះមានតែធ្វើតាមមធ្យោបាយពុករលួយរបស់លោក ប៉ោ សួន តែប៉ុណ្ណោះ។
ប្រភពដដែលបញ្ជាក់ថា ទង្វើរបស់លោក ប៉ោ សួន កាន់តែអនាធិបតេយ្យឡើងៗ ដោយសារមានអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លោក គុណ ញឹម និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ជាអ្នកការពារពីក្រោយខ្នង។
ទាក់ទិននឹងបញ្ហានេះ ក៏មានការរិះគន់ព្រោងព្រាតផងដែរកាលពីពេលកន្លងទៅថា លោក ប៉ោ សួន បានប្រព្រឹត្តអំពើពុករលួយ កែបន្ថយឆ្នាំកំណើតដល់ទៅ ១០ឆ្នាំ ពីឆ្នាំ១៩៦៤ មកឆ្នាំ១៩៧៤ វិញ ដើម្បីពន្យារពេលចូលនិវត្តន៍ ខណៈតារាងបៀវត្សរ៍ឆ្នាំ២០២១ បង្ហាញថាលោក ប៉ោ សួន បានកើតនៅឆ្នាំ១៩៦៤។
ទោះជាបែបនេះក្តី លោក ប៉ោ សួន ធ្លាប់អះអាងថា ការកែប្រែឆ្នាំកំណើតរបស់លោក គឺដើម្បីឲ្យត្រូវនឹងឆ្នាំកំណើតពិតដែលលោកបានកើតប៉ុណ្ណោះ។
ជុំវិញបញ្ហានេះ ប្រភពខ្លះដែលអះអាងថាជាមិត្តភក្ដិរបស់លោក ប៉ោ សួន ធ្លាប់រៀនជាមួយគ្នានៅថ្នាក់វិទ្យាល័យក្នុងខេត្តតាកែវ អះអាងថា លោក ប៉ោ សួន មានឈ្មោះដើមថា ឡេង វណ្ណារិទ្ធិ ហៅ ប្រុស មានស្រុកកំណើតនៅក្នុងភូមិត្រើយទន្លាប់ ឃុំព្រះបាទជាន់ជុំ ស្រុកគិរីវង់ ខែត្រតាកែវ ដែលបានប្រឡងជាប់បាក់ឌុបនៅក្នុងឆ្នាំ១៩៨៩ ហើយក៏បានចូលធ្វើជាមន្ត្រីគយនៅក្នុងឆ្នាំ១៩៩៣ ក្រោយពីលោកបានទិញឈ្មោះពីមន្ត្រីគយម្នាក់តាមរយៈមន្ត្រីគណបក្សហ៊្វុនស៊ិនប៉ិច ក្នុងតម្លៃប្រហែល ៣ពាន់ដុល្លារអាមេរិកនៅពេលនោះ ហើយលោកក៏បន្តធ្វើជាមន្ត្រីគយរហូតមកដល់សព្វថ្ងៃនេះ។
ទាក់ទិននឹងបញ្ហានេះ កាលពីចុងឆ្នាំ២០២២ លិខិតរបស់មន្ត្រីជិតដល់អាយុចូលនិវត្តន៍ក្នុងពេលឆាប់ៗនេះមានចំនួន ១៩រូប បានស្នើសុំកិច្ចអន្តរាគមន៍ទៅរដ្ឋាភិបាល និងស្ថាប័នពាក់ព័ន្ធ ត្រូវបានបែកធ្លាយអំពីព័ត៌មានដែលពួកគេនាំគ្នារត់ការសុំបន្ថយអាយុ ដើម្បីអាចមានលទ្ធភាពបន្តការងារជាមន្ត្រីគយ និងរដ្ឋាករកម្ពុជាបានបន្តទៀត។ ក្នុងនោះ ពួកគេត្រូវចំណាយលុយក្នុងម្នាក់ៗចំនួន ២ម៉ឺនដុល្លារអាមេរិកក្នុង ១ឆ្នាំ។
ច្បាប់ស្ដីពីសហលក្ខន្តិកៈមន្ត្រីរាជការស៊ីវិលមាត្រា ៥៤ ចែងថា អ្នករាជការទាំងពីរភេទត្រូវដាក់ឱ្យចូលនិវត្តន៍ជាកំហិតពេលដល់អាយុ ៥៥ឆ្នាំ។ តែអាយុកំហិតនេះអាចរំកិលដល់ ៦០ឆ្នាំបាន ប្រសិនបើមានលក្ខន្តិកៈដាច់ដោយឡែកបានកំណត់ ប៉ុន្តែច្បាប់នេះក៏បានកំណត់ដោយកំហិតដែរថា អ្នកដែលមានអាយុកំណត់ដោយច្បាប់ ត្រូវតែចូលនិវត្តន៍ដោយពុំមានកិច្ចអន្តរាគមន៍ពិសេសណាមួយនោះទេ។
ទោះជាយ៉ាងណាក៏ដោយ សន្ទស្សន៍នៃការយល់ឃើញពីអំពើពុករលួយ (CPI) ឆ្នាំ២០២២ ត្រូវបានចេញផ្សាយដោយអង្គការតម្លាភាពអន្តរជាតិ កាលពីថ្ងៃទី៣១ ខែមករា ឆ្នាំ២០២៣ ដោយផ្តល់ចំណាត់ថ្នាក់អំពើពុករលួយសម្រាប់ប្រទេសកម្ពុជាឆ្នាំ២០២២ ទទួលបានពិន្ទុ ២៤ លើពិន្ទុអតិបរមា ១០០ និងជាប់ចំណាត់ថ្នាក់ទី១៥០ ក្នុងចំណោម ១៨០ប្រទេស ដែលចំណាត់ថ្នាក់នេះបង្ហាញថា កម្ពុជានៅតែមានអំពើពុករលួយអាក្រក់ជាងគេបន្ទាប់ពីប្រទេសភូមា បើប្រៀបធៀបទៅនឹងបណ្តាប្រទេសក្នុងតំបន់អាស៊ាន៕