31 C
Phnom Penh

តុលាការ​លើកលែង​ការ​ចោទប្រកាន់​តំណាង​សហគមន៍​ជនជាតិ​ដើម​ភាគតិច​កួយ​៥​នាក់

ដោយ ឌឹ ខេមបូឌា ដេលី

បទវិភាគ

សាលាដំបូង​ខេត្ត​ព្រះវិហារ សម្រេច​លើកលែង​ការ​ចោទប្រកាន់​ទៅ​លើ​តំណាង​សហគមន៍​ជនជាតិ​ដើម​ភាគតិច​កួយ នៅ​ភូមិ​ប្រមេរុ ចំនួន ៥​នាក់ ជុំវិញ​បទ​ចោទ​គំរាមកំហែង​ថា​នឹង​សម្លាប់ និង​គំរាមកំហែង​ថា​នឹង​ធ្វើ​ឲ្យ​ខូចខាត ដែល​បាន​ប្រព្រឹត្ត​កាលពី​ដើម​ឆ្នាំ​២០២២ កន្លងទៅ។

តុលាការ​ខេត្ត​ព្រះវិហារ បាន​ចេញ​លិខិត​ជូនដំណឹង​កាលពី​ថ្ងៃទី​២០ ខែ​មករា ឆ្នាំ​២០២៣ ប៉ុន្តែ​ត្រូវ​សារព័ត៌មាន The Cambodia Daily ទទួល​បាន​នៅ​ថ្ងៃទី​៩ កុម្ភៈ នេះ ដោយ​សម្រេច​លើកលែង​ការ​ចោទប្រកាន់​ទៅ​លើ​តំណាង​សហគមន៍​ជនជាតិ​ដើម​ភាគតិច​កួយ ភូមិ​ប្រមេរុ រួម​មាន​លោក ងន ហ៊ឹម លោក ថោង ស៊ុត លោក ស៊ុត សាវន អ្នកស្រី រឿង ខាន់ និង​លោក ថាប់ សុឃី ផង​ដែរ។

ចៅក្រម​ស៊ើបសួរ លោក យុត ពន្លឺ បញ្ជាក់​ថា ជន​ត្រូវ​ចោទ​ទាំង ៥​នាក់ បាន​ជាប់​ចោទ​ពី​បទ​គំរាមកំហែង​ថា​នឹង​សម្លាប់ និង​បទ​គំរាមកំហែង​ថា​នឹង​ធ្វើ​ឲ្យ​ខូចខាត ដែល​បាន​ប្រព្រឹត្ត​នៅ​ភូមិ​ស្រែព្រាង ឃុំ​ប្រមេរុ ស្រុក​ត្បែងមានជ័យ ខេត្ត​ព្រះវិហារ កាលពី​ថ្ងៃទី​៤ ខែ​កុម្ភៈ ឆ្នាំ​២០២២ តាម​មាត្រា​២៣៣ និង​មាត្រា​៤២៣ នៃ​ក្រមព្រហ្មទណ្ឌ។

កាលពី​ថ្ងៃទី​៨ ខែ​កុម្ភៈ ឆ្នាំ​២០២៣ នាយ​ប៉ុស្តិ៍​រដ្ឋបាល​ឃុំ​ប្រមេរុ លោក ឃុល អ៊ី បាន​យក​សេចក្តី​ជូនដំណឹង​របស់​សាលាដំបូង​ខេត្ត​ព្រះវិហារ ស្ដីពី​ការ​លើកលែង​ការ​ចោទប្រកាន់​លើ​តំណាង​សហគមន៍​ទាំង ៥​នាក់ ដែល​បាន​រង​ការ​ចោទប្រកាន់​ខាង​លើ​ទៅ​ឲ្យ​តំណាង​សហគមន៍​ជនជាតិ​ដើម​ភាគតិច​កួយ ភូមិ​ប្រមេរុ លោក ថាប់ ឃី បន្ទាប់ពី​គេ​ត្រូវ​ចោទ​ប្តឹង​ទាំង​អយុត្តិធម៌​អស់​រយៈពេល​ពេញ​មួយ​ឆ្នាំ។

ជុំវិញ​ការ​ចោទ​ប្តឹង​តំណាង​សហគមន៍​ទាំង ៥​នាក់​នេះ ធ្វើឡើង​បន្ទាប់ពី​ជម្លោះ​ដីធ្លី​នៅ​ស្រុក​ត្បែងមានជ័យ ស្ថិត​ក្នុង​ខេត្ត​ព្រះវិហារ បាន​កើតឡើង​រវាង​ក្រុមហ៊ុន​ចិន Hengfu Group Sugar Industry Co. LTD ជាមួយ​នឹង​សហគមន៍​ជនជាតិ​ដើម​ភាគតិច​កួយ ភូមិ​ប្រមេរុ លើ​ដី​ទំហំ​ប្រមាណ​ជាង ៤​ម៉ឺន​ហិកតារ​តាំងពី​ឆ្នាំ​២០១១ ដល់​ឆ្នាំ​២០២០។

ទាក់ទិន​នឹង​បញ្ហា​នេះ តំណាង​សហគមន៍​ជនជាតិ​ដើម​ភាគតិច​កួយ នៅ​ឃុំ​ប្រមេរុ ស្រុក​ត្បែងមានជ័យ អ្នកស្រី ទេព ទឹម អះអាង​កាលពី​ពេល​កន្លងទៅ​ថា ក្រុមហ៊ុន​ចិន​ខាងលើ​បាន​រំលោភ​យក​ដី​នៅ​តំបន់​នោះ និង​បណ្តាល​ឲ្យ​សហគមន៍​ជនជាតិ​ដើម​ភាគតិច​ជិត ៤០០​គ្រួសារ​រង​ផល​ប៉ះពាល់ ប៉ុន្តែ​ពួកគេ​បាន​ដាក់​ពាក្យ​បណ្តឹង​ទៅ​សាលា​ឧទ្ធរណ៍​ក្រុង​ភ្នំពេញ​កាលពី​ឆ្នាំ​២០១៦។

តំណាង​សហគមន៍​រូប​នេះ​ត្អូញត្អែរ​ថា បើ​ទោះបីជា​ក្រុមហ៊ុន​ខាង​លើ​បាន​ដក​ខ្លួន​អំឡុង​ឆ្នាំ​២០១៨ ទៅ​ហើយ​ក្តី ក៏​សមាជិក​សហគមន៍​ជនជាតិ​ដើម​ភាគតិច​កួយ នៅតែ​ត្រូវ​បាន​អាជ្ញាធរ​រារាំង​មិន​ឲ្យ​ដាំដុះ​នៅ​លើ​ដី​របស់​ខ្លួន​ដដែល ខណៈ​មន្ត្រី​សុរិយោដី​ស្រុក​ត្បែងមានជ័យ បាន​ចេញ​ប័ណ្ណ​កម្មសិទ្ធិ​ឲ្យ​អ្នក​ខាង​ក្រៅ​ទៅវិញ។

ប្រភព​ដដែល​បញ្ជាក់​ថា សមាជិក​សហគមន៍​ជនជាតិ​ដើម​ភាគតិច​កួយ បាន​កាន់កាប់​អាស្រ័យ​ផល​ដី​នៅ​តំបន់​នោះ​តាំងពី​ឆ្នាំ​២០០០ មក ហើយ​ក៏​មាន​លិខិត​កាន់កាប់​រួច​ហើយ​ដែរ ប៉ុន្តែ​នៅ​ពេលនេះ ដី​ទាំងនោះ​ត្រូវ​អ្នក​ខាងក្រៅ​មក​ទាមទារ​យក​ធ្វើជា​កម្មសិទ្ធិ​ជា​បន្តបន្ទាប់។

ជុំវិញ​បញ្ហា​នេះ កាលពី​ថ្ងៃទី​៧ ខែ​មករា ឆ្នាំ​២០២៣ សហគមន៍​ជនជាតិ​ដើម​ភាគតិច​កួយ ភូមិ​ប្រមេរុ អះអាង​ថា អភិបាល​ស្រុក​ត្បែងមានជ័យ ខេត្ត​ព្រះវិហារ លោក នុត សោភ័ណ្ឌ បាន​កោះហៅ​សមាជិក​សហគមន៍​ចំនួន ៤​គ្រួសារ​ឲ្យ​មក​កាន់​សាលាស្រុក​ត្បែងមានជ័យ ដើម្បី​ពិភាក្សា​បញ្ហា​ដីធ្លី​ដែល​មាន​ទំនាស់​ខាង​លើ​ដែល​សមាសភាព​ចូលរួម​ត្រឹមតែ​មន្ត្រី​អាជ្ញាធរ​ភូមិ ឃុំ ស្រុក និង​ខេត្ត​ប៉ុណ្ណោះ មិន​មាន​តំណាង​សហគមន៍​ចូលរួម​នោះ​ទេ ប៉ុន្តែ​ដោយ​មាន​ការ​បារម្ភ សមាជិក​សហគមន៍​ជាង ៤០​នាក់​បាន​នាំគ្នា​មក​ចូលរួម​ដោយ​គ្មាន​ការ​អញ្ជើញ​ដើម្បី​គាំទ្រ និង​ជួយ​ដឹង​ឮ​ជុំវិញ​កិច្ចប្រជុំ​នេះ។

កាលពី​អំឡុង​ឆ្នាំ​២០២២ អគ្គនាយក​នៃ​អគ្គនាយកដ្ឋាន​សុរិយោដី និង​ភូមិសាស្ត្រ​នៃ​ក្រសួង​រៀបចំ​ដែនដី លោក ឡោ ដាវុធ បាន​អះអាង​ថា ដី​សហគមន៍ និង​ដី​ក្រុមហ៊ុន​មាន​ចំណែក​ជាន់​គ្នា​ដែល​សហគមន៍​ត្រូវតែ​ដាក់​ពាក្យ​ឡើងវិញ ដើម្បី​ចុះបញ្ជី​ដី​សមូហភាព​នេះ​ឲ្យ​បាន​ត្រឹមត្រូវ។

លោក​បន្ថែម​ថា មន្ទីរ​រៀបចំ​ដែនដី នគរូបនីយកម្ម និង​សំណង់ រួម​ជាមួយ​អគ្គនាយកដ្ឋាន​សុរិយោដី នឹង​កោះហៅ​ភាគី​ពាក់ព័ន្ធ​មក​ពិភាក្សា​ដោះស្រាយ​លើ​បញ្ហា​នេះ។

របាយការណ៍​អគ្គនាយកដ្ឋាន​សុរិយោដី និង​ភូមិសាស្ត្រ​នៃ​ក្រសួង​រៀបចំ​ដែនដី ឲ្យ​ដឹង​ថា គិត​ត្រឹម​ខែ​កក្កដា ឆ្នាំ​២០២២ កន្លងទៅ ដី​របស់​សហគមន៍​ជនជាតិ​ដើម​ចំនួន ៣៧​សហគមន៍ ត្រូវ​បាន​ចុះបញ្ជី​រួចរាល់​ហើយ​ដែល​ស្មើ​នឹង ៣​ម៉ឺន ៨​ពាន់ ៧១៨​ហិកតារ និង ៧៥​អា៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស