28 C
Phnom Penh

ក្រុម​យុវជន​បរិស្ថាន​យក​ថ្ងៃ​១៤​កុម្ភៈ ធ្វើ​យុទ្ធនាការ​ទាមទារ​ឱ្យ​ដាក់​កោះកុង​ក្រៅ​ជា​ឧទ្យាន​ជាតិ​សមុទ្រ

ដោយ ឌឹ ខេមបូឌា ដេលី

បទវិភាគ

ក្រុម​យុវជន​បរិស្ថាន​ជាច្រើន​នាក់ បាន​យក​ថ្ងៃទី​១៤ ខែ​កុម្ភៈ ដែល​ជា​ថ្ងៃ​ទិវា​នៃ​ក្តី​ស្រឡាញ់ ធ្វើ​យុទ្ធនាការ​ទាមទារ​ឱ្យ​ក្រសួង​បរិស្ថាន​ដាក់​កោះកុង​ក្រៅ​ទៅ​ជា​ឧទ្យាន​ជាតិ​សមុទ្រ ដើម្បី​ជួយ​កោះ​នេះ​ឱ្យ​រួច​ផុត​ពី​ការ​ដាក់​ឱ្យ​ទៅ​ជា​កម្មសិទ្ធិ​របស់​ក្រុមហ៊ុន​ឯកជន ដែល​នឹង​រង​នូវ​ការ​កាប់​បំផ្លាញ​ព្រៃឈើ​ដ៏​ស្រស់​ស្អាត និង​បំផ្លាញ​ជីវចម្រុះ​រាប់​ម៉ឺន​ជំពូក​ដែល​កំពុង​មាន​ជីវិត​រស់នៅ​លើ​កោះ។

ក្រុម​យុវជន​ដើម្បី​បរិស្ថាន​រាប់​សិប​នាក់ នៅ​ថ្ងៃទី​១៤ កុម្ភៈ នេះ នាំគ្នា​ធ្វើ​យុទ្ធនាការ​ដើរ​ថ្មើរជើង​ពី​ផ្សារ​ទំនើប អេអន​មួយ ទៅ​ក្រសួង​បរិស្ថាន ដោយ​មាន​បដា​សរសេរ​អក្សរ​ផ្សេងៗ ដូចជា «ខ្ញុំ​ស្រឡាញ់​កោះកុង​ក្រៅ» ជាដើម ដើម្បី​យក​ផ្កាឈូក​ទៅ​ជូន​ក្រសួង​បរិស្ថាន​នៅ​ក្នុង​ឱកាស​ទិវា​នៃ​ក្តី​ស្រលាញ់ (Valentine’s Day) នៅ​ថ្ងៃ​នេះ។

ក្រុម​យុវជន​ទាំងនោះ​លើកឡើង​ថា ការ​ធ្វើ​យុទ្ធនាការ​ជូន​ផ្កាឈូក​ដល់​ក្រសួង​បរិស្ថាន​នេះ គឺ​ដើម្បី​បង្ហាញ​ការ​ស្រឡាញ់​រាប់អាន​រវាង​យុវជន​បរិស្ថាន និង​ក្រសួង​បរិស្ថាន​ផង ដើម្បី​ស្នើសុំ​ឱ្យ​ក្រសួង​លុប​បំបាត់​ការ​ចោទប្រកាន់​លាប​ពណ៌​មក​លើ​យុវជន​ដែល​ស្រឡាញ់​ធនធាន​ធម្មជាតិ​ផង និង​ដើម្បី​សួរ​សំណួរ​ទៅ​កាន់​ក្រសួង​បរិស្ថាន​ផង​ដែរ ថា​តើ «ក្រសួង​ត្រូវការ​ពេល​ប៉ុន្មាន​ដើម្បី​បញ្ចប់​ដំណើរការ​នៃ​ការ​ដាក់​កោះកុង​ក្រៅ​ឱ្យ​ទៅ​ជា​ឧទ្យាន​ជាតិ​សមុទ្រ

តំណាង​ក្រុម​យុវជន​បរិស្ថាន​ម្នាក់​ឈ្មោះ លីហ្សា អះអាង​ក្នុង​យុទ្ធនាការ​នេះ​ថា ប្រសិនបើ​កោះកុង​ក្រៅ​នៅតែ​ស្ថិត​នៅ​ក្នុង​ដៃ​ក្រុមហ៊ុន​ឯកជន​ដែល​មាន​លោក​ឧកញ៉ា លី យ៉ុងផាត់ ជា​ម្ចាស់ នោះ​កោះកុង​ក្រៅ​នឹង​មិន​ធានា​បាន​នូវ​ការ​ថែរក្សា និង​ការ​ការពារ​នូវ​សម្បត្តិ​ធម្មជាតិ​ដ៏​មហាសាល​របស់​កោះ​ទាំងនេះ​ឡើយ។ ផ្ទុយទៅវិញ ព្រៃឈើ និង​ជីវចម្រុះ​ដែល​មាន​នៅ​លើ​កោះ​នេះ នឹង​ត្រូវ​បំផ្លាញ​ដើម្បី​តែ​ផល​ប្រយោជន៍​របស់​ក្រុមហ៊ុន​ឯកជន​ជាមិនខាន។

ការ​ធ្វើ​យុទ្ធនាការ​នេះ ធ្វើឡើង​ស្រប​ពេល​ដែល​កោះកុង​ក្រៅ​កំពុង​ប្រឈម​នឹង​បំផ្លិចបំផ្លាញ​ពី​ក្រុមហ៊ុន​ឯកជន​ដែល​ជ្រក​ក្រោម​រូបភាព​អភិវឌ្ឍន៍ បន្ទាប់ពី​រដ្ឋាភិបាល​កម្ពុជា​ប្រគល់​កោះ​នេះ​ឱ្យ​ទៅ​ជា​កម្មសិទ្ធិ​របស់​ពួកគេ។

កោះកុង​ក្រៅ ស្ថិត​នៅ​ក្នុង​ភូមិ​អាវឡាតាន់ ឃុំ​ជ្រោយប្រស់ ស្រុក​កោះកុង ខេត្ត​កោះកុង មាន​ទំហំ​ផ្ទៃដី ១០៣​គីឡូម៉ែត្រ​ក្រឡា ទទឹង​ប្រវែង ៧​គីឡូម៉ែត្រ បណ្តោយ ១៩​គីឡូម៉ែត្រ ព្រមទាំង​មាន​ឆ្នេរ ៦​កន្លែង៖

  • ឆ្នេរ​ទី​១ ប្រវែង ១៨០០​ម៉ែត្រ
  • ឆ្នេរ​ទី​២ ប្រវែង ២០៥០​ម៉ែត្រ
  • ឆ្នេរ​ទី​៣ ប្រវែង ៧០០​ម៉ែត្រ
  • ឆ្នេរ​ទី​៤ ប្រវែង ៩០០​ម៉ែត្រ
  • ឆ្នេរ​ទី​៥ ប្រវែង ៧៥០​ម៉ែត្រ
  • និង​ឆ្នេរ​ទី​៦ ប្រវែង ៦៥០​ម៉ែត្រ។

ក្រៅពី​នេះ ក៏​មាន​តំបន់​ទឹកធ្លាក់ ៩​កន្លែង និង​កូនភ្នំ​ជាច្រើន​ដែល​មាន​ចម្ងាយ​ត្រឹមតែ ៣០​គីឡូម៉ែត្រ​ប៉ុណ្ណោះ​ពី​ក្រុង​ខេមរភូមិន្ទ ខេត្ត​កោះកុង។

ទាក់ទិន​នឹង​បញ្ហា​នេះ កាលពី​ចុង​ខែ​សីហា ឆ្នាំ​២០២២ ក្រុម​យុវជន​ចលនា​មាតា​ធម្មជាតិ បាន​ដាក់​ញត្តិ​មួយ​ទៅ​ក្រសួង​បរិស្ថាន ដើម្បី​ស្នើ​ឱ្យ​ក្រសួង​បង្ហាញ​ជា​សាធារណៈ​នូវ​លទ្ធផល​នៃ​ការ​សិក្សា​ស្រាវជ្រាវ​អំពី​តំបន់​កោះកុង​ក្រៅ និង​ធ្វើ​បច្ចុប្បន្នភាព​នៃ​ការ​ដាក់​តំបន់​មួយ​នេះ​ទៅ​ជា​តំបន់​ឧទ្យាន​ជាតិ​សមុទ្រ ក្រោយ​មន្ត្រី​ក្រសួង​ចុះ​ស្រាវជ្រាវ​រយៈពេល ៦​ឆ្នាំ​មក​ហើយ ប៉ុន្តែ​មិនទាន់​បាន​បង្ហាញ​លទ្ធផល​ការងារ​របស់​ខ្លួន​ជា​សាធារណៈ។

ចំណែក​ក្រុម​សង្គម​ស៊ីវិល និង​សហគមន៍​មួយ​ចំនួន​បាន​ចេញ​សេចក្ដី​ថ្លែងការណ៍​មួយ​កាលពី​អំឡុង​ឆ្នាំ​២០២០ ដោយ​បង្ហាញ​ពី​ការ​ព្រួយបារម្ភ​ជា​ខ្លាំង ក្រោយ​ពេល​រដ្ឋាភិបាល​បាន​ផ្ដល់​សិទ្ធិ​អភិវឌ្ឍន៍​កោះកុង​ក្រៅ​ទាំងមូល​ទៅ​ឱ្យ​ក្រុមហ៊ុន «កោះកុង អេស អ៊ី ហ្ស៊ិត ខូអិល ធីឌី (KOH KONG SEZ CO., LTD.)» របស់​ឧកញ៉ា លី យ៉ុងផាត់។

រហូត​មក​ដល់​ពេលនេះ កោះកុង​ក្រៅ​នៅ​មិនទាន់​មាន​សេចក្ដី​ប្រកាស​ណា​មួយ ឬ​អនុក្រឹត្យ​ណា​មួយ​បញ្ជាក់​ថា កោះ​នេះ​ជា​ឧទ្យាន​ជាតិ​សមុទ្រ​នៅឡើយ​ទេ ប៉ុន្តែ​ត្រូវ​គេ​រក​ឃើញ​ថា កោះ​ដែល​ធំ​ជាងគេ​នៅ​កម្ពុជា​មួយ​នេះ​ត្រូវ​បាន​រដ្ឋាភិបាល​ប្រគល់​ផ្ដាច់មុខ​ដោយ​ស្ងាត់ៗ​ទៅ​ឱ្យ​ក្រុមហ៊ុន​របស់​លោក លី យ៉ុងផាត់ សមាជិក​ព្រឹទ្ធសភា ដើម្បី​ធ្វើការ​អភិវឌ្ឍ​តាំងពី​ឆ្នាំ​២០១៩ មក ដោយ​មិន​បាន​ធ្វើការ​វាយតម្លៃ​ផល​ប៉ះពាល់​បរិស្ថាន​ជាមុន និង​ប្រកាស​ប្រាប់​ជា​សាធារណៈ​នោះ​ឡើយ។

កាលពី​ចុង​ខែ​វិច្ឆិកា ឆ្នាំ​២០២២ សកម្មជន​ចលនា​មាតា​ធម្មជាតិ និង​យុវជន​ស្រឡាញ់​ធនធាន​ធម្មជាតិ ព្រមាន​ថា នៅ​ពីក្រោយ​ភាព​ស្រស់​ស្អាត​របស់​កោះកុង​ក្រៅ គឺជា​ហានិភ័យ​ដ៏​ធំ​មួយ​ដែល​កោះ​មួយ​នេះ​ប្រឈម​នឹង​ការ​បាត់បង់​ជីវចម្រុះ និង​សម្បត្តិ​ធម្មជាតិ​ដែល​មាន​តម្លៃ​មហាសាល​ជាច្រើន​ទៀត ដោយសារ​ការ​សម្រេច​របស់​រដ្ឋាភិបាល​កម្ពុជា បាន​ប្រគល់​កោះ​នេះ​ឱ្យ​ទៅ​ក្រុមហ៊ុន​ឯកជន​របស់​ឧកញ៉ា លី យ៉ុងផាត់ ធ្វើជា​កម្មសិទ្ធិ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស