អង្គការសង្គមស៊ីវិល លើកឡើងថា ប្រទេសកម្ពុជាមានច្បាប់តែមួយសម្រាប់ពលរដ្ឋគ្រប់រូប ប៉ុន្តែត្រូវបានយកទៅអនុវត្តដោយការប្រកាន់យកស្តង់ដារពីរ ដែលក្នុងនោះ ស្ត្រីដែលមាននិន្នាការឯករាជ្យមិនដែលទទួលបានការគាំពារពីរដ្ឋាភិបាលឡើយ។
នាយកមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក មឿន តុលា ប្រាប់សារព័ត៌មាន The Cambodia Daily នៅថ្ងៃទី៩ មីនា នេះថា សព្វថ្ងៃនេះ ក្រុមស្ត្រីដែលចេញតវ៉ារកភាពយុត្តិធម៌ដែលត្រូវតទល់ជាមួយនឹងអាជ្ញាធរមានសមត្ថកិច្ច ឬរដ្ឋាភិបាល តែងរងនូវការធ្វើទុក្ខបុកម្នេញជាប្រចាំ ដូចជាក្រុមស្ត្រីថ្ងៃសុក្រ ដែលនាំគ្នាតវ៉ារកយុត្តិធម៌ឲ្យស្វាមីរបស់ពួកគេដែលកំពុងជាប់ពន្ធនាគារសព្វថ្ងៃនេះ ជាដើម។
លោក មឿន តុលា លើកឡើងថា សព្វថ្ងៃនេះ ស្ត្រីដែលបំពេញការងារក្នុងស្ថាប័នឯករាជ្យ ដូចជាអង្គការក្រៅរដ្ឋាភិបាល សហជីព និងស្ថាប័នសារព័ត៌មាន ជាដើម តែងរងនូវការបៀតបៀនពីអាជ្ញាធរ ដោយការប្រើអំពើហិង្សាជាប្រចាំ ប៉ុន្តែគ្មានចំណាត់ការណាមួយរបស់ស្ថាប័នមានសមត្ថកិច្ចដាក់ទោសទណ្ឌទៅលើអ្នកប្រព្រឹត្តិឡើយ។ ជាក់ស្តែង ដូចជាការប្រើអំពើហិង្សាពីសំណាក់អាជ្ញាធរទៅក្រុមស្ត្រីដែលជាកូដករណាហ្គាវើលដ៍ កាលពីពេលកន្លងទៅ ជាដើម។ ជាងនេះទៀត ការបៀតបៀនលើស្ត្រីអ្នកសារព័ត៌មានរបស់អង្គភាពសារព័ត៌មាន វីអូឌី ក៏មិនត្រូវដាក់ទោសទណ្ឌលើជនអ្នកប្រព្រឹត្តិផងដែរ។
នាយកមជ្ឈមណ្ឌលសម្ព័ន្ធភាពការងាររូបនេះ អំពាវនាវកុំឲ្យអ្នកនយោបាយធ្វើប្រជាភិថុតិលើពលរដ្ឋខ្លួនឯងបន្តទៀត ព្រោះអ្នកនយោបាយខ្លះប្រើលេសយកថ្ងៃទិវាអន្តរជាតិនារី ៨មីនា អំពាវនាវឲ្យមានការគោរពសិទ្ធិស្ត្រី ប៉ុន្តែក្រោយថ្ងៃ ៨មីនា បែរជាពួកគេនាំគ្នាគាបសង្កត់លើសិទ្ធិស្ត្រីដែលចេញតវ៉ាដើម្បីយុត្តិធម៌សង្គមទៅវិញ។
អង្គការសង្គមស៊ីវិលជាច្រើន ដូចជាសហព័ន្ធសហជីពកម្មករចំណីអាហារ និងសេវាកម្ម (CFSWF) សម្ព័ន្ធសហគមន៍កសិករកម្ពុជា (CCFC Association) សហព័ន្ធសហជីពកម្ពុជា (CATU) និងមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) ជាដើម បានប្រារព្ធទិវាអន្តរជាតិនារី ៨មីនា លើកទី១១២ នៅទីលានប្រជាធិបតេយ្យ ក្រោមប្រធានបទ គាំពារស្ត្រី និងក្មេងស្រីដើម្បីយុត្តិធម៌ទាំងអស់គ្នា កាលពីថ្ងៃទី៨ ខែមីនា ឆ្នាំ២០២៣ នេះ។
ក្នុងពិធីនេះ ពួកគេបានទាមទារឲ្យរដ្ឋាភិបាលកម្ពុជា ដោះស្រាយនូវទុក្ខកង្វល់ពាក់ព័ន្ធនឹងប្រព័ន្ធគាំពារសង្គម និងភាពអយុត្តិធម៌សម្រាប់ស្ត្រី ក្មេងស្រីចំនួន ១៧ចំណុចតាមវិស័យនីមួយៗ ដើម្បីដោះស្រាយបញ្ហាជូនស្ត្រី និងក្មេងស្រីដែលកំពុងរងគ្រោះនៅកម្ពុជាសព្វថ្ងៃនេះ។
ការទាមទាររបស់ក្រុមអង្គការសង្គមស៊ីវិលទាំងនោះ មានដូចជា រដ្ឋាភិបាលត្រូវតែផ្តល់ជម្រកសុវត្ថិភាពសម្រាប់ស្ត្រីដែលជួបបញ្ហាអំពើហិង្សាក្នុងគ្រួសារ និងសម្រាប់កម្មករស្ត្រីដែលធ្វើការតាមផ្ទះ និងកម្មករចំណាកស្រុក ជាដើម។ លើសពីនេះ ត្រូវចាត់វិធានការឱ្យមានប្រសិទ្ធភាពចំពោះអំពើហិង្សា និងការបៀតបៀនគ្រប់ទម្រង់មកលើស្ត្រីដោយគ្មានការលើកលែង។
ជាងនេះទៀត ត្រូវចាត់វិធានរដ្ឋបាលជាក់លាក់ និងបញ្ឈប់ការប្រើប្រាស់អំពើហិង្សាលើស្ត្រីអ្នកការពារសិទ្ធិមនុស្ស សិទ្ធិដីធ្លី បរិស្ថាន និងសិទ្ធិការងារផងដែរ។ បន្ថែមពីនេះ រដ្ឋាភិបាលត្រូវតែធ្វើកំណែទម្រង់នូវមធ្យោបាយដឹកជញ្ជូនកម្មករក្នុងវិស័យវាយនភ័ណ្ឌកាត់ដេរ និងស្បែកជើងឲ្យល្អប្រសើរជាងពេលបច្ចុប្បន្ន។
ជាងនេះទៀត រដ្ឋាភិបាលត្រូវកែលំអលក្ខខណ្ឌការងារ និងពង្រឹងយន្តការការពារអ្នកធ្វើការងារតាមផ្ទះ និងពង្រឹងយន្តការការពារសិទ្ធិពលករចំណាកស្រុកពីការកេងប្រវ័ញ្ចការងារ ការជួញដូរមនុស្ស និងទាសភាពក្នុងសម័យទំនើប ព្រមទាំងពង្រីកវិសាលភាពនៃប្រព័ន្ធគាំពារសង្គមឱ្យបានល្អថែមទៀត។
កាលពីឆ្នាំ២០២០ រដ្ឋាភិបាលកម្ពុជាបានដាក់ចេញនូវផែនការសកម្មភាពទប់ស្កាត់អំពើហិង្សាលើស្ត្រីឆ្នាំ២០១៩ ដល់ឆ្នាំ២០២៣ ដែលតម្រូវឲ្យគ្រប់ក្រសួងស្ថាប័ន វិស័យឯកជន និងអង្គការសង្គមស៊ីវិល ត្រូវចូលរួមអនុវត្តឲ្យបានម៉ឺងម៉ាត់ ដើម្បីទប់ស្កាត់ បង្ក្រាប និងការពារជនរងគ្រោះដែលជាស្ត្រីឲ្យមានប្រសិទ្ធភាពខ្ពស់។
បែបនេះក្តី ស្ត្រី និងក្មេងស្រីដែលជាសកម្មជនសិទ្ធិមនុស្ស សកម្មជនបរិស្ថាន សកម្មជននយោបាយ បក្សក្រៅរដ្ឋាភិបាលនៅកម្ពុជាសព្វថ្ងៃនេះ តែងរងនូវការគាបសង្កត់ និងធ្វើទុក្ខបុកម្នេញពីសំណាក់រដ្ឋាភិបាលកម្ពុជាយ៉ាងធ្ងន់ធ្ងរ។ ជាក់ស្តែង សកម្មជនសិទ្ធិមនុស្ស កញ្ញា សេង ធារី ប្រធានសហជីពទ្រទ្រង់បុគ្គលិកកម្មករខ្មែរ កញ្ញា ឈឹម ស៊ីថរ កំពុងត្រូវបានឃុំខ្លួនក្នុងពន្ធនាគារទាំងអយុត្តិធម៌ ដោយសារតែតវ៉ាដើម្បីសិទ្ធិសេរីភាពរបស់កម្មករ និងសិទ្ធិមូលដ្ឋានរបស់ពលរដ្ឋកន្លងមក។
ប្រទេសកម្ពុជាបានចុះហត្ថលេខា និងផ្តល់សច្ចាប័នលើអនុសញ្ញាស្ដីពីការលុបបំបាត់រាល់ទម្រង់នៃការរើសអើងលើស្ត្រី កាលពីឆ្នាំ១៩៩២ ហើយអនុសញ្ញានេះបានបញ្ចូលនូវអនុសាសន៍ដើម្បីកាត់បន្ថយនូវការកេងប្រវ័ញ្ចផ្លូវភេទ ការរើសអើង និងបង្កើននូវវិធានការលើកកម្ពស់ និងការគោរពស្ត្រីយ៉ាងម៉ឺងម៉ាត់ថែមទៀត៕