ប្រជាពលរដ្ឋចំនួន ១៨៨គ្រួសារស្ថិតនៅឃុំស្គុះ ស្រុកសំរោងទង ខេត្តកំពង់ស្ពឺ បានចោទអាជ្ញាធរមូលដ្ឋាន និងមន្ត្រីជាន់ខ្ពស់នៃក្រសួងរៀបចំដែនដី ថាបានគប់គិតគ្នាយកដីប្រជាពលរដ្ឋចំនួន ២៩ហិកតារក្រោមហេតុផលថា យកដីទៅឲ្យរដ្ឋដើម្បីអភិវឌ្ឍ។
ប្រជាពលរដ្ឋប្រមាណ ២០នាក់ស្ថិតនៅក្នុងតំបន់ជ្រោះរការ ភូមិដូនអាត់ ឃុំស្គុះ ស្រុកសំរោងទង ខេត្តកំពង់ស្ពឺ នៅថ្ងៃព្រហស្បតិ៍ ទី៩ មីនា នេះ បានប្រមូលផ្ដុំគ្នាតវ៉ានៅលើដីជម្លោះ ដោយមានកាន់រូបថតលោក ហ៊ុន សែន និងភរិយា ដើម្បីស្នើសុំឲ្យជួយអន្តរាគមន៍បញ្ហាដីធ្លី ដោយពួកគេចោទថា អាជ្ញាធរមូលដ្ឋាននិងខេត្ត បានយកដីធ្លីរបស់ពួកគេទៅឲ្យមន្ត្រីជាន់ខ្ពស់នៃក្រសួងដែនដី នគរូបនីយកម្ម និងសំណង់ លោក ប៉ាក់ ចាន់ផល។
លោក ជា សាវឿន ដែលអះអាងថាជាតំណាងឲ្យប្រជាពលរដ្ឋ ១៨៨គ្រួសារនៅឃុំស្គុះ ស្រុកសំរោងទង បានលើកឡើងថា ពួកគាត់នាំគ្នាប្រមូលផ្ដុំតវ៉ានាថ្ងៃនេះដោយអាជ្ញាធរមូលដ្ឋានបានគប់គិតគ្នាជាមួយលោក ប៉ាក់ ចាន់ផល យកដីពួកគាត់ដែលអាស្រ័យផលជាច្រើនឆ្នាំទៅធ្វើកម្មសិទ្ធិផ្ទាល់ខ្លួន ដោយមិនបានទៅយកអភិវឌ្ឍបម្រើផលប្រយោជន៍រួមដូចការអះអាងប្រាប់ពួកគាត់ឡើយ។
លោកបន្តថា បញ្ហាដីធ្លីនេះ ពួកគាត់បាននាំគ្នាតវ៉ាជាច្រើនលើក ប៉ុន្តែមិនមានដំណោះស្រាយ។ ក្រៅពីមិនដោះស្រាយហើយ តំណាងពលរដ្ឋរូបនេះបញ្ជាក់ថា អំឡុងឆ្នាំ២០២១ មន្ត្រីជាន់ខ្ពស់ក្រសួងដែនដី លោក ប៉ាក់ ចាន់ផល បានហៅលោកទៅជួបជជែក ដោយសន្យាផ្ដល់ដីមួយឡូត៍ និងប្រាក់មួយចំនួនទៀត ជាថ្នូរទៅនឹងការឈប់ធ្វើជាតំណាងឲ្យពលរដ្ឋជាង ១០០គ្រួសារ ដោយមានការសម្របសម្រួលពីអធិការស្រុកសំរោងទង ប៉ុន្តែការផ្ដល់នេះត្រូវបានលោកបដិសេធ។
លោក ជា សាវឿន អំពាវនាវទៅលោក ហ៊ុន សែន ឲ្យជួយដោះស្រាយវិវាទដីធ្លីដល់ពួកគាត់ទាំង ១៨៨គ្រួសារ ដោយថាកន្លងមក ពួកគាត់បាននាំគ្នាទៅរកកិច្ចអន្តរាគមន៍ពីអាជ្ញាធរមូលដ្ឋាន ខេត្ត រហូតដល់ក្រសួងរៀបចំដែនដី ខណៈក្រសួងមហាផ្ទៃបានចេញចំណារឲ្យអាជ្ញាធរខេត្តដោះស្រាយដែរ ប៉ុន្តែមកដល់ពេលនេះ អភិបាលខេត្តកំពង់ស្ពឺ លោម វ៉ី សំណាង មិនបានអើពើដោះស្រាយបញ្ហាវិវាទដីធ្លីជូនពួកគាត់ឡើយ។
តំណាងពលរដ្ឋម្នាក់ទៀត លោកស្រី ម៉ាលីស សាវឿន បានរៀបរាប់ថា ពួកគាត់ទាំង ១៨៨គ្រួសារប្រគល់ដីចំនួន ២៩ហិកតារទៅឲ្យរដ្ឋវិញ បន្ទាប់ពីអាជ្ញាធរអះអាងថា រដ្ឋត្រូវការដីនេះដើម្បីអភិវឌ្ឍសម្រាប់បម្រើផលប្រយោជន៍រួម ប៉ុន្តែជាក់ស្ដែងលោកស្រីថា ដីដែលអាជ្ញាធរយកពីពួកគាត់នោះ គឺមិនបានយកទៅអភិវឌ្ឍឡើយ តែបែរជាយកទៅឱ្យលោក ប៉ាក់ ចាន់ផល ទៅវិញ។
លោកស្រីចាត់ទុកការលើកឡើងរបស់អាជ្ញាធរមូលដ្ឋានជាការបោកប្រាស់ប្រជាពលរដ្ឋ ក្នុងចេតនាទុច្ចរិតដើម្បីផលប្រយោជន៍ខ្លួនឯង ខណៈដីចំនួន ២៩ហិកតារដែលពួកគាត់តវ៉ានេះ ពលរដ្ឋបានអាស្រ័យផលតាំងពីឆ្នាំ១១៩៨០ មកម្ល៉េះ។
លោកស្រី ម៉ាលីស សាវឿន បញ្ជាក់ថា ដីដែលអាជ្ញាធរ និងលោក ប៉ាក់ ចាន់ផល គប់គិតគ្នាយកនេះ បច្ចុប្បន្នកំពុងឈូសឆាយដើម្បីពុះជាដីឡូត៍លក់ផងដែរ។
លោកស្រីបញ្ជាក់ថា នៅពេលពួកគាត់តវ៉ា អគ្គនាយករងនៃអគ្គនាយកដ្ឋានសំណង់នៃក្រសួងរៀបចំដែនដី លោក ប៉ាក់ ចាន់ផល បានគំរាម ហើយប្ដឹង និងឃុំខ្លួនលោកស្រីផងដែរ ខណៈពលរដ្ឋដែលធ្លាប់តវ៉ាកន្លងមកបានបោះបង់ ដោយសារលោក ប៉ាក់ ចាន់ផល អគ្គនាយករងនៃអគ្គនាយកដ្ឋានសំណង់នៃក្រសួងរៀបចំដែនដី បានគំរាមកំហែងពួកគាត់។
សារព័ត៌មាន The Cambodia Daily មិនទាន់អាចសុំការឆ្លើយពីមេឃុំស្គុះ និងលោក ប៉ាក់ ចាន់ផល អគ្គនាយករងនៃអគ្គនាយកដ្ឋានសំណង់នៃក្រសួងរៀបចំដែនដី ជុំវិញរឿងនេះទេ។
ជុំវិញរឿងនេះ រដ្ឋមន្ត្រីក្រសួងមហាផ្ទៃ លោក ស ខេង កាលពីខែកុម្ភៈ ឆ្នាំ២០២៣ កន្លងទៅ បានស្ដីបន្ទោសអភិបាលរាជធានី-ខេត្ត រួមទាំងមន្ត្រីមួយចំនួនផ្សេងទៀតដែលអសកម្មក្នុងតួនាទីរបស់ខ្លួន ដោយបានព្រងើយកន្តើយក្នុងការដោះស្រាយបញ្ហាដីធ្លីជូនប្រជាពលរដ្ឋ។
លោកបញ្ជាក់ថា អាជ្ញាធរខ្លះមិនធ្វើការឡើយ បើថ្នាក់លើមិនស្រែក ដោយពួកគេនៅស្ងាត់ដូចចោរលួចសេះ ដោយបញ្ហាដីធ្លីរបស់ប្រជាពលរដ្ឋក៏មិនដោះស្រាយ ហើយក៏មិនរាយការណ៍ទៅថ្នាក់លើដែរ។ ដូច្នេះ លោកថាអាជ្ញាធរទាំងនោះទៅធ្វើភ្នាក់ងាររដ្ឋាភិបាលខ្មោចយកអី បើពួកគេសម្ងំសុខនៅនុ៎ង។
បើតាមតំណាងរបស់ប្រជាពលរដ្ឋ ឲ្យដឹងថា ដីធ្លីចំនួន ២៩ហិកតារស្ថិតនៅក្នុងតំបន់ជ្រោះរការ ភូមិដូនអាត់ ឃុំស្គុះ ស្រុកសំរោងទង ខេត្តកំពង់ស្ពឺ មានជម្លោះជាមួយលោក ប៉ាក់ ចាន់ផល អគ្គនាយករងនៃអគ្គនាយកដ្ឋានសំណង់នៃក្រសួងរៀបចំដែនដី តាំងពីឆ្នាំ២០១១ មកម្ល៉េះ ហើយរហូតដល់បច្ចុប្បន្ននេះនៅមិនទាន់មានដំណោះស្រាយនៅឡើយ៕