ព្រះមហាក្សត្រី នរោត្ដម មុនីនាថ សីហនុ មានបន្ទូរថា ព្រះរាជដំណាក់ខេត្តសៀមរាប ដែលអគ្គីភ័យឆេះឆាបថ្មីៗនេះបានបន្សល់នូវអនុស្សាវរីយ៍ ប្រវត្តិសាស្ត្រ និងអត្ថន័យជាតិដ៏ធំធេងជាមួយនឹងព្រះរាជបូជនីយកិច្ចតស៊ូទាមទារឯករាជ្យ។
បើតាមព្រះរាជសារពីក្រុងប៉េកាំង នាថ្ងៃទី១៤ ខែមីនា ឆ្នាំ២០២៣ របស់សម្តេចព្រះមហាក្សត្រី នរោត្ដម មុនីនាថ សីហនុ បានថ្លែងអំណរគុណដ៏ជ្រាលជ្រៅជូនដល់ជនរួមជាតិ និងអន្តរជាតិ ដែលបានផ្ញើសារមកខ្ញុំផ្ទាល់ និងតាមរយៈប្រព័ន្ធផ្សព្វផ្សាយសង្គមជាច្រើន ដើម្បីសម្ដែងនូវសមានចិត្តសោកស្តាយចំពោះព្រឹត្តិការណ៍ឧបទ្ទវហេតុយ៉ាងតក់ស្លុត និងរន្ធត់បំផុតលើព្រះរាជដំណាក់ខេត្តសៀមរាប ដោយគ្រោះអគ្គីភ័យឆេះឆាបនាយប់ថ្ងៃទី១២ ខែមីនា ឆ្នាំ២០២៣ វេលាម៉ោង ២២:០៥នាទីកន្លងទៅនេះ។
ក្រៅពីថ្លែងអំណរគុណដល់ជនរួមជាតិ និងអន្តរជាតិហើយ ព្រះមហាក្សត្រីក៏បានថ្លែងអំណរគុណថ្នាក់ដឹកនាំ និងមន្ត្រីនៃក្រសួងព្រះបរមរាជវាំង ព្រមទាំងអាជ្ញាធរមូលដ្ឋាន កងកម្លាំងសមត្ថកិច្ច ក្រុមពន្លត់អគ្គីភ័យ ក្រុមប្រឹក្សា និងគណៈអភិបាលខេត្ត ដែលបានជួយអន្តរាគមន៍បានភ្លាមៗ។
ព្រះមហាក្សត្រីមានបន្ទូរថា ព្រះរាជដំណាក់ខេត្តសៀមរាប ដែលត្រូវអគ្គីភ័យឆេះមានអាយុកាលជាង ៧០ឆ្នាំមកហើយ។ ព្រះរាជដំណាក់នេះ ព្រះមហាក្សត្រីមានបន្ទូរបញ្ជាក់ថា បានបន្សល់នូវអនុស្សាវរីយ៍ ប្រវត្តិសាស្ត្រ និងអត្ថន័យជាតិដ៏ធំធេងជាមួយនឹងព្រះរាជបូជនីយកិច្ចតស៊ូទាមទារឯករាជ្យ បន្ទាប់ពីការយាងបំពេញយុទ្ធនាការនៅបរទេស រួមមាន បារាំង កាណាដា អាមេរិក ជប៉ុន និងថៃឡង់។
ព្រះមហាក្សត្រីមានបន្ទូរថា ព្រះករុណាព្រះមហាវីរក្សត្រ ព្រះវររាជបិតាជាតិខ្មែរ ព្រះបរមរតនកោដ្ឋ បានដឹកនាំការតស៊ូជាមួយការចូលរួមដ៏សកម្ម និងដ៏អង់អាចក្លាហានពីសំណាក់ជនរួមជាតិគ្រប់ស្រទាប់វណ្ណៈ និងគ្រប់និន្នាការដោយគ្មានការបង្ហូរឈាម។
នៅអំឡុងខែមិថុនា ដល់ខែវិច្ឆិកា ឆ្នាំ១៩៥៣ ព្រះមហាក្សត្រីក៏មានមហាកិត្តិយសបានដង្ហែព្រះបិតាឯករាជ្យជាតិក្នុងព្រះរាជបូជនីយកិច្ចប្រវត្តិសាស្ត្រខាងលើនេះនៅក្នុងខេត្តសៀមរាប ខេត្តកំពង់ធំ និងខេត្តបាត់ដំបង ដែលជាតំបន់ស្វយ័តនាពេលនោះ រហូតទទួលបានជោគជ័យជាស្ថាពរជូនជាតិមាតុភូមិទាំងមូលនៅថ្ងៃទី៩ ខែវិច្ឆិកា ឆ្នាំ១៩៥៣ ផងដែរ។
ក្រោយពីព្រះរាជដំណាក់ត្រូវអគ្គីភ័យឆេះ ព្រះមហាក្សត្រីមានបន្ទូរថា សម្ដេចចៅហ្វាវាំងវរវៀងជ័យ អធិបតីស្រឹង្គារ គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង បានទូលស្នើសុំកសាងព្រះរាជដំណាក់ថ្មី ដែលនឹងត្រូវរៀបចំឡើងវិញនៅពេលឆាប់ៗខាងមុខនេះ។
បើតាមសេចក្ដីប្រកាសរបស់ក្រសួងព្រះបរមរាជវាំង កាលពីថ្ងៃទី១៣ មីនា ឲ្យដឹងថា ករណីអគ្គីភ័យឆេះអគារព្រះរាជដំណាក់តូចក្នុងព្រះរាជដំណាក់ខេត្តសៀមរាប បណ្តាលមកពីឆ្លងចរន្តអគ្គិសនី ឬទុស្សេខ្សែភ្លើង ខណៈពលរដ្ឋខេត្តសៀមរាបបានបង្ហាញការសោកស្ដាយ និងមានមន្ទិលចំពោះអគ្គីភ័យឆាបឆេះព្រះរាជដំណាក់ស្ដេចកាលពីយប់ថ្ងៃទី១២ មីនា៕