38 C
Phnom Penh

កម្មការិនី​ដែល​គ្រូពេទ្យ​កាត់​ច្រឡំ​ពោះវៀន​ថា​ជា​ទងសុក​បាន​ទទួល​មរណភាព

ដោយ ឌឹ ខេមបូឌា ដេលី

បទវិភាគ

កម្មការិនី​ម្នាក់​ដែល​ត្រូវ​បាន​កាយ​យក​សព​ទារក​ក្នុង​ផ្ទៃ​ដោយ​ពោះវៀន​មក​ក្រៅ ហើយ​កាត់​ច្រឡំ​ថា​ជា​ទងសុក​នោះ បាន​ទទួល​មរណភាព​បន្ទាប់​មន្ទីរពេទ្យ​កាល់ម៉ែត​បញ្ជូន​ដល់​ស្រុក​កំណើត​របស់​នាង​នៅ​ខេត្ត​កំពត នៅ​ម៉ោង ៤​ទៀបភ្លឺ​កាលពី​ថ្ងៃទី​១៦ ខែ​មីនា។

បើ​តាម​លោក ឡឹម តារា អគ្គនាយករង​មន្ទីរពេទ្យ​កាល់ម៉ែត ប្រាប់​សារព័ត៌មាន​របស់​លោក ហ៊ុន សែន Fresh News ថា ក្រុម​គ្រូពេទ្យ​នៃ​មន្ទីរពេទ្យ​កាល់ម៉ែត​បាន​បញ្ជូន​កម្មការិនី​រងគ្រោះ​ទៅ​ដល់​គេហដ្ឋាន​គាត់​វិញ​តាម​ការ​ស្នើសុំ​របស់​អ្នកជំងឺ ដោយសារ​ប៉ុន្មាន​ថ្ងៃ​ចុងក្រោយ​នេះ ស្ត្រី​អ្នកជំងឺ​មាន​ស្ថានភាព​ធ្ងន់ធ្ងរ​ខ្លាំង ទោះបីជា​ក្រុម​គ្រូពេទ្យ​បាន​ដាក់​ឧបករណ៍​សប់​ដង្ហើម​ឲ្យ​ហើយ​ក្ដី ប៉ុន្តែ​នៅតែ​គ្មាន​សង្ឃឹម។

លោក ឡឹម តារា អះអាង​ថា កន្លងមក​ក្រុម​គ្រូពេទ្យ​បាន​ខំប្រឹង​ជួយ​សង្គ្រោះ​ទាំង​សមត្ថភាព និង​លទ្ធភាព​បច្ចេកទេស ហើយ​ថែម​ទាំង​បញ្ជូន​ស្ត្រី​រងគ្រោះ​ទៅ​ព្យាបាល​នៅ​វៀតណាម និង​ថៃ ទោះបី​ដឹង​តាំងពី​ដំបូង​ថា​គ្មាន​សង្ឃឹម​រស់​ក្ដី។

លោក​ថា បើ​ស្ត្រី​ជនរងគ្រោះ​មាន​ស្ថានភាព​បែប​នេះ​វា​ប្រឈម​នឹង​កត្តា​គ្រោះថ្នាក់ ដូចជា​ការ​លេច​ធ្លាយ​ទឹក​ប្រមាត់ ទឹក​លំពែង ហូរ​ចូល​ទៅ​ក្នុង​ពោះ និង​ហូរ​ចេញ​ក្រៅ​វិញ​តាម​ទុយោ​បង្ហូរ ហើយ​ដុំ​ឈាម​ដែល​កក​ក្នុង​សរសៃ​ឈាម រួម​ទាំង​មិន​អាច​ហូប​អាហារ​តាម​មាត់​បាន​ទៀត គឺ​ត្រូវ​ឲ្យ​អាហារ (វេជ្ជសាស្ត្រ) តាម​សរសៃ​ឈាម​ទាំងស្រុង។

លោក​ថា បន្ទាប់ពី​រថយន្ត​សង្គ្រោះ​បញ្ជូន​ទៅ​ដល់​ផ្ទះ​ដោយ​រៀបចំ​កន្លែង​សម្រាក​អស់​ហើយ មួយ​សន្ទុះ​ក្រោយ​មក កម្មការិនី​រោងចក្រ​វ័យ ២២​ឆ្នាំ​រូប​នេះ​ក៏​បាន​ទទួល​មរណភាព​តែម្តង។

តែ​យ៉ាងណា សារព័ត៌មាន The Cambodia Daily មិនទាន់​អាច​សុំ​ការ​បំភ្លឺ​បន្ថែម​ពី​អគ្គនាយករង​មន្ទីរពេទ្យ​កាល់ម៉ែត លោក ឡឹម តារា ថា​តើ​ខាង​មន្ទីរពេទ្យ​កាល់ម៉ែត បាន​បញ្ជូន​កម្មការិនី​រងគ្រោះ​ពី​មន្ទីរពេទ្យ​ក្នុង​ប្រទេស​វៀតណាម ឬ​ប្រទេស​ថៃ តាំងពី​ថ្ងៃ​ណា​នោះ​នៅឡើយ​ទេ។

ចំណែក​អ្នក​ប្រើប្រាស់​បណ្ដាញ​សង្គម​បាន​នាំគ្នា​បង្ហោះ​សារ​ចូលរួម​រំលែក​ទុក្ខ​ជាមួយ​គ្រួសារ​ជនរងគ្រោះ​នៅ​លើ​ហ្វេសប៊ុក​របស់​ខ្លួន និង​ស្នើ​ទៅ​មន្ទីរពេទ្យ​សម្ភព​ឯកជន​ទាំងអស់ បង្កើន​ការ​ប្រុងប្រយ័ត្ន​ឲ្យ​បាន​ខ្ពស់​ផង​ដែរ ខណៈ​អ្នក​ខ្លះ​ទៀត​បង្ហាញ​ការ​សោកស្ដាយ និង​រង់ចាំ​មើល​វិធានការ​របស់​ក្រសួង​សុខាភិបាល​ផង​ដែរ។

កម្មការិនី សឿន ស្រីអូន អាយុ ២២​ឆ្នាំ ជា​កម្មការិនី​កាត់ដេរ​មាន​អាសយដ្ឋាន​នៅ​ខេត្ត​កណ្ដាល បាន​ចូល​ទៅ​សម្រាក​នៅ​គ្លីនិក​ដើម​អង្គ្រង កាលពី​ថ្ងៃទី​១០ ខែ​វិច្ឆិកា ឆ្នាំ​២០២២ ដោយ​រោគ​វិនិច្ឆ័យ គឺ​កូន​ស្លាប់​ក្នុង​ស្បូន​អាយុ ១៨​សប្តាហ៍។ ក្រុម​គ្រូពេទ្យ​របស់​គ្លីនិក​បាន​ធ្វើ​ការ​ព្យាបាល​ដោយ​រំលូត​យក​កូន​ដែល​ស្លាប់​ក្នុង​ផ្ទៃ​ចេញ និង​បន្ត​សម្រាក​នៅ​គ្លីនិក​រយៈពេល​មួយ​យប់ ហើយ​បាន​ចេញ​ទៅ​ផ្ទះ។

ក៏ប៉ុន្តែ​នៅ​ថ្ងៃទី​២២ ខែ​វិច្ឆិកា ឆ្នាំ​២០២២ ស្ត្រី​អ្នកជំងឺ​បាន​ទៅ​គ្លីនិក​ដដែល​ម្ដង​ទៀត​ដោយ​មាន​សញ្ញា​ឈឺ​ពោះ​ខ្លាំង​នៅ​ផ្នែក​ខាងក្រោម ដោយ​អាការៈ​ធ្ងន់ធ្ងរ គ្លីនិក​ក៏​បាន​បញ្ជូន​ស្ត្រី​អ្នកជំងឺ​ទៅ​ព្យាបាល​បន្ត​នៅ​ទីក្រុង​ភ្នំពេញ។

ក្រោយពី​មាន​ហេតុការណ៍​នេះ នៅ​ថ្ងៃទី​២៩ ខែ​វិច្ឆិកា ឆ្នាំ​២០២២ ក្រសួង​សុខាភិបាល​បាន​សម្រេច​បិទ​ជា​បណ្ដោះអាសន្ន​មន្ទីរ​សម្រាក​ព្យាបាល​ឯកជន ឬ​គ្លីនិក​ឯកជន​ឈ្មោះ «ដើម​អង្គ្រង» ស្ថិត​នៅ​ក្នុង​ស្រុក​គងពិសី ខេត្ត​កំពង់ស្ពឺ បន្ទាប់ពី​មាន​ការ​ធ្វេសប្រហែស​ធ្ងន់ធ្ងរ​ផ្នែក​បច្ចេកទេស ករណី​កាយ​យក​សាកសព​ទារក​ស្លាប់​ក្នុង​ស្បូន ៥​ខែ​ដោយ​ទាំង​ពោះវៀន​មក​ក្រៅ ហើយ​កាត់​ច្រឡំ​ថា​ជា​ទងសុក។

ប៉ុន្តែ​សម្រាប់​ម្ចាស់​មន្ទីរ​សម្រាក​ព្យាបាល​ឯកជន ឬ​គ្លីនិក​ឯកជន​ឈ្មោះ «ដើម​អង្គ្រង» ក្រសួង​មិនទាន់​មាន​វិធានការ​ច្បាប់​នៅឡើយ​ទេ ខណៈ​គណៈ​វិជ្ជាជីវៈ​ឆ្មប​ដែល​ស្ថិត​នៅ​ក្រោម​សមត្ថកិច្ច​របស់​ក្រសួង​នោះ បាន​សម្រេច​ដាក់​ទោស​ទណ្ឌកម្ម​ខាង​វិន័យ​ឆ្មប​ឈ្មោះ អ៊ុង ធារិន ដោយ​ផ្អាក​ការ​ប្រកប​វិជ្ជាជីវៈ​ឆ្មប​បណ្ដោះអាសន្ន​រយៈពេល ២​ឆ្នាំ​តាម​ច្បាប់​ស្ដីពី​ការ​គ្រប់គ្រង​វិជ្ជាជីវៈ​វិស័យ​សុខាភិបាល៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស