29 C
Phnom Penh

ពលរដ្ឋ​ស្នើសុំ​លោក ហ៊ុន សែន ជួយ​អន្តរាគមន៍​បន្ទាប់ពី​អាជ្ញាធរ​ឃុបឃិត​រំលោភ​យក​ដី​ជាង​៦១​ហិកតារ

ដោយ ឌឹ ខេមបូឌា ដេលី

បទវិភាគ

ពលរដ្ឋ​ជិត ២០​គ្រួសារ​នៅ​ឃុំ​អូរសោម ខេត្ត​ពោធិ៍សាត់ អង្វរ​សុំ​ឱ្យ​ប្រមុខ​រដ្ឋាភិបាល​កម្ពុជា លោក ហ៊ុន សែន ជួយ​ពួកគាត់​បន្ទាប់ពី​អាជ្ញាធរ​ភូមិ-ឃុំ​បាន​ឃុបឃិត​គ្នា​ជា​ប្រព័ន្ធ​រំលោភ​យក​ដី​របស់​ពួកគាត់​ទំហំ​ជាង ៦១​ហិកតារ​ទុក​សម្រាប់​លក់។

តំណាង​ប្រជាពលរដ្ឋ​ចំនួន ១៩​គ្រួសារ បាន​ប្រាប់​សារព័ត៌មាន The Cambodia Daily ក្នុង​លក្ខខណ្ឌ​មិន​បញ្ចេញ​ឈ្មោះ​នៅ​ថ្ងៃទី​២០ មីនា នេះ​ថា អភិបាល​ខេត្ត​ពោធិ៍សាត់ លោក ខូយ រីដា បាន​បដិសេធ​មិន​ទទួលស្គាល់ និង​មិន​ចុះបញ្ជី​ក្បាលដី​ដើម្បី​ចេញ​ប័ណ្ណ​កម្មសិទ្ធិ​ឱ្យ​ពួកគាត់​ឡើយ ក្រោម​លេស​ថា ដី​ទាំងនោះ​ស្ថិត​ក្នុង​ដី​ធ្វើ​អនុបយោគ​ឆ្នាំ​២០២១ ក្នុង​ដែន​ជម្រក​សត្វព្រៃ​ភ្នំ​សំកុស និង​ក្រោម​លេស​ថា ជា​ដី​ដែល​គ្មាន​ការ​ទទួលស្គាល់​ពី​អាជ្ញាធរ​ភូមិ-ឃុំ បើ​ទោះបីជា​ពលរដ្ឋ​ទាំងនោះ​បាន​កាន់កាប់​ដី​នោះ​តាំងពី​ឆ្នាំ​២០១៤ មក​ហើយ​ក៏ដោយ។

តំណាង​ពលរដ្ឋ​ទាំងនោះ​អះអាង​ថា បើ​លោក ខូយ រីដា ពឹង​តែ​ទៅ​លើ​ការ​សម្រេច​របស់​អាជ្ញាធរ​ភូមិ-ឃុំ ពួកគេ​ច្បាស់​ជា​បដិសេធ​មិន​ទទួលស្គាល់​ដី​ដែល​ពួកគាត់​បាន​កាន់កាប់​អស់​រយៈពេល​ជិត ១០​ឆ្នាំ​នេះ​ទេ ព្រោះ​សមាជិក​ក្រុមប្រឹក្សា​ឃុំ​អូរសោម លោក ចិក ឡា សព្វថ្ងៃ​នេះ​បាន​រំលោភ​យក​ដី​របស់​ពួកគាត់ និង​បាន​ដាក់​គ្រឿងចក្រ​ឈូស​ឆាយ ព្រមទាំង​ដាំ​ដំឡូងមី​លើ​ដី​ទាំងនោះ​ថែមទៀត ដូច្នេះ​បើ​ពួកគេ​ទទួលស្គាល់​ថា​ដី​ទាំងនោះ​ជា​ដី​របស់​ពលរដ្ឋ​ទាំង ១៩​គ្រួសារ​នោះ ធ្វើ​ម៉េច​ពួកគេ​នឹង​អាច​យក​ដី​ទាំងនោះ​ទៅ​លក់​បាន។

តំណាង​ពលរដ្ឋ​ទាំង ១៩​គ្រួសារ បញ្ជាក់​ថា ដី​របស់​ពួកគាត់​មិនមែន​ជា​ដី​ដែល​ស្ថិត​ក្នុង​តំបន់​ដី​ធ្វើ​អនុបយោគ​ទាំង​ជាង ១៥០​ហិកតារ ឬ​ដី​ដែល​ប៉ះពាល់​ដល់​អនុ​ស្ថានីយ​អគ្គិសនី​ក្នុង​ស្រុក​វាលវែង នោះ​ទេ។ ជាង​នេះ​ទៀត ដី​របស់​អ្នក​មាន​អំណាច​នៅ​ជាប់​គ្នា​នឹង​ដី​របស់​ពួកគាត់​ដែល​មាន​ទំហំ​រាប់​រយ​ហិកតារ​ដែរ​នោះ នៅតែ​អាច​ដាំ​ដំណាំ​បាន​ដូច​ធម្មតា មិន​មាន​ការ​ហាមឃាត់ ឬ​រារាំង​ពី​អាជ្ញាធរ​ភូមិ-ឃុំ​ឡើយ។

កាលពី​ថ្ងៃទី​២៧ ខែ​សីហា ឆ្នាំ​២០២១ ទីស្ដីការ​គណៈរដ្ឋមន្ត្រី​បាន​ចេញ​សេចក្តី​ជូនដំណឹង (ស.ជ.ណ) មួយ​ដោយ​បញ្ជាក់​ពី​ការ​ធ្វើ​អនុបយោគ​លើ​ដី​ទំហំ ១៥៦,០៣​ហិកតារ ស្ថិត​ក្នុង​ដែន​ជម្រក​សត្វព្រៃ​ភ្នំ​សំកុស ក្នុង​ភូមិ​ឆាយលូក ឃុំ​អូរសោម ស្រុក​វាលវែង ខេត្ត​ពោធិ៍សាត់ ពី​ដី​សាធារណៈ​របស់​រដ្ឋ​មក​ជា​ដី​ឯកជន​របស់​រដ្ឋ​វិញ។

បន្ទាប់ពី​ទីស្ដីការ​គណៈរដ្ឋមន្ត្រី​ចេញ​សេចក្តី​ជូនដំណឹង​នេះ តំណាង​ប្រជាពលរដ្ឋ ១៩​គ្រួសារ​មាន​លោក តុង អេង និង​អ្នកស្រី លឹម លីតា ជាដើម បាន​ចេញ​លិខិត​កាលពី​ថ្ងៃទី​១៣ ខែ​សីហា ឆ្នាំ​២០២២ ស្នើសុំ​ឱ្យ​ប្រមុខ​រដ្ឋាភិបាល​កម្ពុជា លោក ហ៊ុន សែន ជួយ​អន្តរាគមន៍​ដោយ​អះអាង​ថា​ដី​របស់​ពួកគាត់​ទំហំ ៦១​ហិកតារ និង ៤០​អា ស្ថិត​ក្នុង​ភូមិ​តាឡុះ ឃុំ​អូរសោម ស្រុក​វាលវែង ខេត្ត​ពោធិ៍សាត់​ត្រូវ​បាន​អាជ្ញាធរ​បដិសេធ​មិន​ចុះបញ្ជី​ក្បាលដី​ចេញ​ប័ណ្ណ​កម្មសិទ្ធិ​ឱ្យ​ពួកគាត់​ឡើយ។

ជុំវិញ​បញ្ហា​នេះ ខុទ្ទកាល័យ​លោក​នាយករដ្ឋមន្ត្រី ហ៊ុន សែន បាន​ចេញ​ដីកា​បញ្ជូន​មួយ​កាលពី​ថ្ងៃទី​១៥ ខែ​សីហា ឆ្នាំ​២០២២ ទៅ​កាន់​អភិបាល​ខេត្ត​ពោធិ៍សាត់ ឱ្យ​ពិនិត្យ​លើ​ករណី​នេះ​ផង​ដែរ។ ក្រោយ​មក នៅ​ថ្ងៃទី​២១ ខែ​វិច្ឆិកា ឆ្នាំ​២០២២ ពលរដ្ឋ​ទាំង ១៩​គ្រួសារ នាំគ្នា​ធ្វើ​លិខិត​ផ្ដិត​មេដៃ​បញ្ជាក់​ទៅ​កាន់​ខុទ្ទកាល័យ​លោក​នាយករដ្ឋមន្ត្រី​ថែម​ទៀត។

ប៉ុន្តែ​ក្រោយ​ការ​ចេញ​ដីកា​បញ្ជូន​របស់​ខុទ្ទកាល័យ​នាយករដ្ឋមន្ត្រី លោក ខូយ រីដា ដែល​ជា​អភិបាល​ខេត្ត​ពោធិ៍សាត់ បាន​ឆ្លើយតប​ទៅ​វិញ​នៅ​ថ្ងៃទី​៨ ខែ​ធ្នូ ឆ្នាំ​២០២២ ថា ដី​ដែល​ពលរដ្ឋ ១៩​គ្រួសារ​បាន​ស្នើសុំ​ចេញ​ប័ណ្ណ​កម្មសិទ្ធិ​នោះ មិន​មាន​ការ​ដាំដុះ​អាស្រ័យ​ផល​ពី​មុន​មក​ទេ ហើយ​ក៏​មិន​មាន​ការ​ទទួលស្គាល់​ពី​អាជ្ញាធរ​ភូមិ-ឃុំ​នោះ​ដែរ។

យ៉ាងណាក៏ដោយ ក្រសួង​មហាផ្ទៃ​បាន​ចេញ​លិខិត​ដាច់ដោយឡែក​ពី​គ្នា​ពីរ​ផ្សេង​ទៀត គឺ​នៅ​ថ្ងៃទី​២០ ខែ​ធ្នូ ឆ្នាំ​២០២២ និង​នៅ​ថ្ងៃទី​២៥ ខែ​មករា ឆ្នាំ​២០២៣ បញ្ជាក់​ទៅ​កាន់​អភិបាល​ខេត្ត​ពោធិ៍សាត់ លោក ខូយ រីដា បន្ថែម​ទៀត​ដើម្បី​ឱ្យ​ដោះស្រាយ​ដី​ជូន​ពលរដ្ឋ​ទាំង ១៩​គ្រួសារ​នេះ ប៉ុន្តែ​នៅ​ថ្ងៃទី​១៤ ខែ​កុម្ភៈ ឆ្នាំ​២០២៣ លោក ខូយ រីដា បញ្ជាក់​ថា ការ​ដែល​អាជ្ញាធរ​ខេត្ត​មិន​ចេញ​ប័ណ្ណ​កម្មសិទ្ធិ​នេះ គឺ​ដោយសារ​តែ​ពលរដ្ឋ​ទាំងនោះ​ពុំ​មាន​ឯកសារ​បញ្ជាក់​កម្មសិទ្ធិ​ពី​អាជ្ញាធរ​មូលដ្ឋាន​នោះ​ឡើយ​តាំង​ពី​មុន​មក។

ទោះជា​បែប​នេះ​ក្តី ពលរដ្ឋ​ទាំង ១៩​គ្រួសារ​នោះ​បាន​ត្អូញត្អែរ​ថា ពលរដ្ឋ​ក្រីក្រ​មាន​តែ​ដំណាំ​នៅ​លើ​ដី ដូចជា​ស្វាយចន្ទី ស្រូវ និង​ដំឡូងមី ជាដើម ប៉ុន្តែ​នៅ​ពេល​ដែល​អាជ្ញាធរ​ឈូស​ឆាយ​ដំណាំ​របស់​ពួកគាត់​អស់ ស្រប​ពេល​ដែល​អាជ្ញាធរ​ទាំងនោះ​មិន​បាន​ចេញ​លិខិត​កាន់កាប់​ឱ្យ​ពួកគាត់​ទៀត​នោះ ពួកគាត់​គ្មាន​អ្វី​អាច​បញ្ជាក់​ពី​ម្ចាស់​កម្មសិទ្ធិ​លើ​ដី​របស់​ខ្លួន​បាន​នោះ​ទេ ស្រប​ពេល​ដែល​អ្នក​មាន​លុយ​ដែល​ទើប​នឹង​កាន់កាប់​ដី​នៅ​តំបន់​នោះ​មាន​ទាំង​ប័ណ្ណ​កម្មសិទ្ធិ និង​ដំណាំ​ពេញ​ដី​សព្វថ្ងៃ​នេះ ដែល​មិន​មាន​ការ​រំខាន​ពី​អាជ្ញាធរ​ឡើយ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស