32 C
Phnom Penh

លោក ស ខេង ថា​ពួក​ឧក្រិដ្ឋជន​អាច​ទៅ​ជ្រក​នៅ​តាម​ខេត្ត​ផ្សេងៗ​ក្រៅពី​ខេត្ត​ព្រះសីហនុ

ដោយ ឌឹ ខេមបូឌា ដេលី

បទវិភាគ

លោក ស ខេង ថ្លែង​ថា ពួក​ឧក្រិដ្ឋជន​អាច​ចេញ​ទៅ​ជ្រក​នៅ​តាម​ខេត្ត​ផ្សេងៗ ទោះបី​ប្រតិបត្តិការ​ប្រឆាំង​ការ​ជួញដូរ​មនុស្ស​នៅ​ខេត្ត​ព្រះសីហនុ បាន​ថយ​ចុះ​ហើយ​ក៏ដោយ ហើយ​ករណី​នេះ​ស្ថាប័ន​ពាក់ព័ន្ធ និង​សមត្ថកិច្ច​កុំ​ទាន់​មាន​មោទកភាព​ចំពោះ​លទ្ធផល​នៃ​ការ​ប្រយុទ្ធ​ប្រឆាំង​ការ​ជួញដូរ​មនុស្ស​បច្ចុប្បន្ន។

ក្នុង​ពិធី​ផ្សព្វផ្សាយ​របាយការណ៍​ជាតិ​ស្ដីពី​ការងារ​ប្រយុទ្ធ​ប្រឆាំង​អំពើ​ជួញដូរ​មនុស្ស​ឆ្នាំ​២០២២ និង​ទិសដៅ​ការងារ​ឆ្នាំ​២០២៣ នា​ថ្ងៃទី​២៣ ខែ​មីនា នេះ លោក ស ខេង បាន​ណែនាំ​ទៅ​លេខាធិការដ្ឋាន​ប្រយុទ្ធ​ប្រឆាំង​អំពើ​ជួញដូរ​មនុស្ស​កុំ​ឲ្យ​មាន​មោទកភាព​ចំពោះ​លទ្ធផល​នៃ​ការ​ប្រយុទ្ធ​ប្រឆាំង​អំពើ​ជួញដូរ​មនុស្ស​របស់​ខ្លួន ដោយ​ថា​បញ្ហា​នេះ​នៅតែ​ស្ថិត​ក្នុង​ស្ថានភាព​ប្រឈម​នៅឡើយ។

លោក​បញ្ជាក់​ថា ការ​ប្រយុទ្ធ​ប្រឆាំង​អំពើ​ជួញដូរ​មនុស្ស​មិន​ទាន់​បញ្ចប់ និង​មិនទាន់​មាន​ការ​ពេញចិត្ត​នៅឡើយ​ទេ ពិសេស​ការងារ​បង្ក្រាប ការ​ជួយ​សង្គ្រោះ​ជនរងគ្រោះ ការ​ចាប់​ជនល្មើស​មក​ផ្ដន្ទាទោស និង​ការ​បិទ​អាជីវកម្ម​ពាក់ព័ន្ធ​នឹង​អំពើ​ជួញដូរ​មនុស្ស។ មួយ​វិញ​ទៀត ដើម្បី​ធានា​បាន​ថា​ជនរងគ្រោះ​ត្រូវ​បាន​ជួយ​សង្គ្រោះ និង​ទទួល​បាន​យុត្តិធម៌​ត្រឹមត្រូវ​នោះ លុះត្រាតែ​អ្នក​ប្រព្រឹត្ត​បទល្មើស​ជួញដូរ​មនុស្ស​ត្រូវ​ផ្ដន្ទាទោស​ទៅ​តាម​ផ្លូវច្បាប់។

លោក ស ខេង បាន​សង្កត់​ធ្ងន់​ថា ទោះបី​អាជ្ញាធរ​មាន​សមត្ថកិច្ច​បាន​ចុះ​កិច្ចប្រតិបត្តិការ​យ៉ាង​ក្ដៅ​គគុក​ដែល​ធ្វើ​ឱ្យ​បញ្ហា​ជួញដូរ​មនុស្ស​នៅ​ខេត្ត​ព្រះសីហនុ បាន​ថមថយ​ច្រើន​ក៏ដោយ ប៉ុន្តែ​លោក​បង្ហាញ​ក្ដី​បារម្ភ​ថា ពួក​ឧក្រិដ្ឋជន​អាច​ចេញ​ទៅ​ជ្រក​នៅ​តាម​ខេត្ត​ផ្សេងៗ​ទៀត ដែល​ករណី​នេះ​ទាមទារ​ឲ្យ​ទាំង​មន្ត្រី និង​វិស័យ​ឯកជន​ត្រូវ​យកចិត្ត​ទុកដាក់​បន្ថែម​ទៀត។

លោក​ក៏​ស្នើ​ទៅ​លេខាធិការដ្ឋាន គ.ជ.ប.ជ ឲ្យ​ស្រង់​គ្រប់​ព័ត៌មាន​ទាំងឡាយ​ពាក់ព័ន្ធ​ការ​ជួញដូរ​មនុស្ស រាប់​ទាំង​ព័ត៌មាន​ចេញ​ដោយ​ក្រសួង​ការបរទេស​អាមេរិក ដើម្បី​រួម​គ្នា​រិះរក​គ្រប់​មធ្យោបាយ​ឆ្លើយតប​ឲ្យ​បាន​សមស្រប និង​ទាន់​ពេលវេលា​ចំពោះ​បញ្ហា​នេះ។

បើ​តាម​រដ្ឋលេខាធិការ​ក្រសួង​មហាផ្ទៃ និង​ជា​អនុប្រធាន​អចិន្ត្រៃយ៍ គ.ជ.ប.ជ អ្នកស្រី ជូ ប៊ុនអេង លើកឡើង​ថា ចាប់ពី​ថ្ងៃទី​១៨ ខែ​សីហា ដល់​ថ្ងៃទី​១០ ខែ​វិច្ឆិកា ឆ្នាំ​២០២២ សមត្ថកិច្ច​បាន​រក​ឃើញ​ជនបរទេស ៨៧១​នាក់ ក្នុង​នោះ​ចំនួន ១៦២​នាក់​ត្រូវ​បាន​កំណត់​អត្តសញ្ញាណ​ថា​ពាក់ព័ន្ធ​នឹង​អំពើ​រត់​ពន្ធ និង​ជួញដូរ​មនុស្ស។ ចំណែក​ចំនួន ៨០​នាក់​ទៀត ត្រូវ​បាន​កំណត់​ថា​ជា​ជនសង្ស័យ​ប្រព្រឹត្ត​បទល្មើស ដែល​ត្រូវ​បាន​ឃាត់​ខ្លួន​បញ្ជូន​ទៅ​តុលាការ។

ដោយឡែក​ចំពោះ​ករណី​អំពើ​ធ្វើ​អាជីវកម្ម​ផ្លូវភេទ​ឆ្នាំ​២០២២ វិញ អាជ្ញាធរ​មាន​សមត្ថកិច្ច​បង្ក្រាប​បាន​ចំនួន ១៣០​ករណី/១២៤​ករណី (កើន ៦​ករណី) ដោយ​ឃាត់​ខ្លួន​ជនសង្ស័យ​ចំនួន ១៤៩​នាក់ ក្នុង​នោះ​អនីតិជន ១៩​នាក់ និង​ជនបរទេស ១០​នាក់​ដែល​មាន ៣​សញ្ជាតិ។ ក្រៅពី​ឃាត់​ជនសង្ស័យ​ហើយ អ្នកស្រី​ថា​ជនរងគ្រោះ​ចំនួន ២២៥​នាក់ ត្រូវ​បាន​ជួយ​សង្គ្រោះ​ដោយ​ប្រគល់​ឲ្យ​មន្ទីរ​សង្គមកិច្ច ៤៨​នាក់ និង​គ្រួសារ​ចំនួន ១៧៧​នាក់។

បើ​តាម​របាយការណ៍​ស្ដីពី​ការ​ជួញដូរ​មនុស្ស​ឆ្នាំ​២០២២ របស់​ក្រសួង​ការបរទេស​អាមេរិក ដែល​ចេញ​ផ្សាយ​កាលពី​ថ្ងៃទី​១៩ ខែ​កក្កដា បាន​ទម្លាក់​ចំណាត់ថ្នាក់​កម្ពុជា​មក​កម្រិត​ទី​៣ ដែល​អាក្រក់​បំផុត​ពុំ​ធ្លាប់​មាន​តាំងពី​ឆ្នាំ​២០១៥ មក ក្រោយ​ពេល​កម្ពុជា​ស្ថិត​ក្នុង​ចំណាត់ថ្នាក់​កម្រិត​ទី​២ ក្រោម​ការ​ឃ្លាំមើល​អស់​រយៈពេល ៣​ឆ្នាំ​ជាប់ៗ​គ្នា​ចាប់តាំងពី​ឆ្នាំ​២០១៩ មក។

របាយការណ៍​បាន​បញ្ជាក់​ថា កត្តា​ដែល​នាំ​ឲ្យ​មាន​ការ​ទម្លាក់​ចំណាត់ថ្នាក់​កម្ពុជា​អាក្រក់​បំផុត​នេះ ដោយសារ​រដ្ឋាភិបាល​កម្ពុជា​ពុំ​បាន​គោរព​តាម​ពេញលេញ​នូវ​ស្តង់ដារ​អប្បបរមា​ដើម្បី​បំបាត់​នូវ​អំពើ​ជួញដូរ​មនុស្ស និង​ពុំ​បាន​ខិតខំ​ប្រឹងប្រែង​ក្នុង​ការ​ប្រយុទ្ធ​ប្រឆាំង​នឹង​អំពើ​ជួញដូរ​មនុស្ស​នៅឡើយ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស