31 C
Phnom Penh

ពលរដ្ឋ​មកពី​ខេត្ត​សៀមរាប​ស្នើ​លោក ហ៊ុន សែន ជួយ​ដោះស្រាយ​បញ្ហា​ដីធ្លី​ជាមួយ​អាជ្ញាធរ​អប្សរា

ដោយ ឌឹ ខេមបូឌា ដេលី

បទវិភាគ

ពលរដ្ឋ​នៅ​ខេត្ត​សៀមរាប ឡើង​មក​រក​កិច្ច​អន្តរាគមន៍​ពី​លោក ហ៊ុន សែន និង​ក្រសួង​ដែនដី ឲ្យ​ជួយ​ដោះស្រាយ​បញ្ហា​ដីធ្លី​ដែល​ពួកគេ​ចោទ​ថា អាជ្ញាធរ​អប្សរា និង​អ្នក​មាន​អំណាច​បាន​រំលោភ​យក​ដី​របស់​ពួកគេ​ដោយ​ខុស​ច្បាប់។

ប្រធាន​សមាគម​សម្ព័ន្ធ​សហគមន៍​កសិករ​កម្ពុជា លោក ថេង សាវឿន បាន​សរសេរ​លើ​ហ្វេសប៊ុក​ថា ពលរដ្ឋ​ចំនួន ១០០​នាក់​ដែល​ឡើង​មក​ភ្នំពេញ​កាលពី​ថ្ងៃទី​២៧ ខែ​មីនា ឆ្នាំ​២០២៣ មកពី​សហគមន៍​ចំនួន​៦ ក្នុង​ខេត្ត​សៀមរាប ក្នុង​នោះ​មាន​សហគមន៍​ស្នាសង្គ្រាម សហគមន៍​ស្គុន សហគមន៍​អង្គរធំ សហគមន៍​ត្រពាំងស្វាយ សហគមន៍​ឃ្លាំងទឹក​៧៨ និង​សហគមន៍​ភ្នំក្រោម។

ប្រភព​ដដែល​បញ្ជាក់​ថា មូលហេតុ​ដែល​ក្រុម​ប្រជាពលរដ្ឋ​នាំគ្នា​ឡើង​មក​ភ្នំពេញ​ដាក់​ញត្តិ​នៅ​ក្រសួង​ដែនដី និង​ខុទ្ទកាល័យ​លោក​នាយករដ្ឋមន្ត្រី ដើម្បី​ស្នើសុំ​ឲ្យ​លោក ហ៊ុន សែន និង​ស្ថាប័ន​ធំៗ​ទាំង​ពីរ​ជួយ​រក​កិច្ច​អន្តរាគមន៍ ព្រោះ​អាជ្ញាធរ​អប្សរា និង​អ្នក​មាន​អំណាច​បាន​រំលោភ​យក​ដី​ប្រជាពលរដ្ឋ​ដោយ​ខុស​ច្បាប់។

ចំណែក​នៅ​ថ្ងៃទី​២៨ ខែ​មីនា នេះ ពលរដ្ឋ​ចំនួន ៧០​គ្រួសារ​ខេត្ត​សៀមរាប ក៏​បាន​យក​ញត្តិ​ទៅ​ដាក់​នៅ​ក្រសួង​មហាផ្ទៃ ដើម្បី​ស្នើ​ទៅ​លោក ស ខេង ឲ្យ​ជួយ​ដោះស្រាយ​វិវាទ​ដីធ្លី​ទំហំ ១០​ហិកតារ​ដែល​ពួកគេ​ចោទ​ថា អាជ្ញាធរ​មូលដ្ឋាន​បាន​យក។ ក្រៅពី​ស្នើសុំ​ឲ្យ​យក​ដី​មក​វិញ ពួកគេ​ស្នើ​ទៅ​លោក ស ខេង ជួយ​ចេញ​ប័ណ្ណ​កម្មសិទ្ធិ​ដល់​ពួកគេ​ផង​ដែរ ដោយ​ថា​បច្ចុប្បន្ន ពួកគេ​មិន​មាន​ដីធ្លី​សម្រាប់​សង់​ផ្ទះ​ស្នាក់នៅ​ឡើយ។

ជុំវិញ​រឿង​ដីធ្លី​នេះ កាលពី​ខែ​កុម្ភៈ ឆ្នាំ​២០២៣ រដ្ឋមន្ត្រី​ក្រសួង​មហាផ្ទៃ លោក ស ខេង បាន​ស្ដីបន្ទោស​អភិបាល​រាជធានី-ខេត្ត រួម​ទាំង​មន្ត្រី​មួយ​ចំនួន​ផ្សេង​ទៀត​ដែល​អសកម្ម​ក្នុង​តួនាទី​ព្រងើយ​កន្តើយ​ក្នុង​ការ​ដោះស្រាយ​បញ្ហា​ដីធ្លី​ជូន​ពលរដ្ឋ។ ក្រៅពី​មិន​ដោះស្រាយ​ហើយ លោក ស ខេង ថា​ពួកគេ​ក៏​មិន​រាយការណ៍​ដោយ​សម្ងំ​តែ​សុខ​សម្រាប់​ខ្លួន​ប៉ុណ្ណោះ។

របាយការណ៍​ដែល​មាន​ចំណងជើង​ថា «ការ​បន្ត​ចោទប្រកាន់ការ​ចាប់​ឃុំ​ខ្លួន​ពលរដ្ឋ​ក្នុង​រឿង​វិវាទ​ដីធ្លី» ចេញ​ផ្សាយ​នៅ​ក្នុង​ឆ្នាំ​២០២១ កន្លង​ទៅ បាន​ឲ្យ​ដឹង​ថា មាន​ជនរងគ្រោះ​ដោយសារ​ជម្លោះ​ដីធ្លី​ចំនួន ១​ម៉ឺន ៧​ពាន់ ៣៣​គ្រួសារ ស្មើ ៦១៤៦៩​នាក់ ក្នុង​នោះ​មាន​ករណី​វិវាទ​ដីធ្លី​ចំនួន ៦៩​ករណី​លើ​ដី​ទំហំ​ជាង ៥​ម៉ឺន​ហិកតារ (៥២៦០១,៨៧​ហិកតារ) ក្នុង​នោះ​មាន​ជនជាតិ​ដើម​ភាគតិច​ចំនួន ១៣៤៧​គ្រួសារ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស