ក្រុមយុវជន និងសង្គមស៊ីវិលប្រមាណ ២០នាក់ នៅថ្ងៃទី២៩ មីនា បាននាំគ្នាយកលិខិតដាក់ថ្វាយព្រះមហាក្សត្រដើម្បីសុំចូលគាល់ព្រះអង្គ ក្នុងបំណងបង្ហាញក្ដីកង្វល់របស់ពួកគេទាក់ទងនឹងបញ្ហាសិទ្ធិមនុស្ស បរិស្ថាន និងការបាត់បង់ព្រៃឈើនៅកម្ពុជា។
ការដាក់លិខិតទូលថ្វាយរបស់អង្គការសង្គមស៊ីវិល សមាគម សហគមន៍ការពារព្រៃឈើ សកម្មជនបរិស្ថាន និងយុវជនសកម្មនាថ្ងៃពុធនេះ ធ្វើឡើងបន្ទាប់ពីបញ្ហាសិទ្ធិមនុស្សកំពុងធ្លាក់ចុះកាន់តែខ្លាំង ហើយបញ្ហាព្រៃឈើនៅកម្ពុជាកំពុងរងការកាប់បំផ្លាញពីសំណាក់ក្រុមហ៊ុន និងឧកញ៉ាដោយមានខ្នងបង្អែកពីគ្រួសារត្រកូលហ៊ុន។
យុវជនសកម្មផ្នែកការពារបរិស្ថាន និងយុត្តិធម៌សង្គម កញ្ញា មាន លីសា បង្ហាញក្ដីសង្ឃឹមថា ព្រះមហាក្សត្រនឹងអនុញ្ញាតឲ្យពួកគេចូលគាល់ ដើម្បីទូលថ្វាយទៅព្រះអង្គអំពីបញ្ហាប្រឈមជាច្រើន ជាពិសេសរឿងសិទ្ធិមនុស្ស បរិស្ថាន និងព្រៃឈើ ជាដើម។
យុវតីម្នាក់ទៀត កញ្ញា សុវណ្ណា លើកឡើងដែរថា ការដែលកញ្ញាចូលរួមការងារជាមួយក្រុមយុវជនបរិស្ថាន និងសង្គមស៊ីវិល ដោយគិតថាការចូលរួមសកម្មភាព និងបញ្ចេញមតិនេះមិនមែនជារឿងខុសច្បាប់។ មួយវិញទៀត កញ្ញាក៏ចង់ចូលគាល់ព្រះមហាក្សត្រដើម្បីលើកឡើងពីបញ្ហារបស់ប្រជាពលរដ្ឋដែលកំពុងរងទុក្ខបុកម្នេញ និងរឹតត្បិតសិទ្ធិសេរីភាពនៅពេលដែលចូលរួមធ្វើការងារសង្គម បើទោះបីជាសិទ្ធិនេះធានាដោយច្បាប់ជាតិ និងអន្តរជាតិក្ដី។
ចំណែកប្រធានសមាគមនិស្សិតបញ្ញវន្តខ្មែរ លោក កើត សារ៉ាយ បានលើកឡើងថា មូលហេតុពួកគេមិនទៅរកអន្តរាគមន៍ពីក្រសួងកសិកម្ម និងស្ថាប័នពាក់ព័ន្ធផ្សេងទៀត ដោយសារកន្លងមកពួកគេបានដាក់ញត្តិទៅហើយ ប៉ុន្តែក្រសួងស្ថាប័នទាំងនោះមិនបានឆ្លើយតប និងដោះស្រាយឡើយ។
លោកថា នៅពេលយុវជន និងពលរដ្ឋចូលការពារ សម្ដែងមតិ បែរជាមានការគំរាមកំហែង និងចាប់ខ្លួនពីសំណាក់អាជ្ញាធរទៅវិញ ដែលទាំងអស់នេះធ្វើឲ្យពួកគេមិនមានជំនឿលើក្រសួង និងស្ថាប័នទាំងនោះទៀត ទើបបាននាំគ្នាមករកព្រះមហាក្សត្រឲ្យជួយវិញ។
លោកបន្ថែមទៀតថា មូលហេតុដូច្នេះហើយទើបពួកគេចង់ចូលគាល់ព្រះមហាក្សត្រ ដើម្បីសុំថ្វាយព្រះពរដល់ព្រះអង្គអំឡុងបុណ្យចូលឆ្នាំថ្មី ហើយឆ្លៀតឱកាសទូលថ្វាយព្រះអង្គអំពីការបាត់បង់ព្រៃឈើនៅកម្ពុជា ជាពិសេសព្រៃឡង់ ដែលបច្ចុប្បន្នកំពុងរងការបំផ្លាញ ហើយឈានទៅរកការវិនាសនាពេលឆាប់ៗ បើគ្មានការអន្តរាគមន៍ដើម្បីទប់ស្កាត់នោះ។
មួយទៀត ពួកគេចង់ទូលថ្វាយទៅព្រះអង្គឲ្យជួយអន្តរាគមន៍ដល់សង្គមស៊ីវិល យុវជនដែលទទួលរងអយុត្តិធម៌ និងធ្វើទុក្ខបុកម្នេញ ដោយសារតែចូលរួមធ្វើការងារសង្គមជាតិ។ ដូច្នេះលោកសង្ឃឹមថា ព្រះបរមនាថ នរោត្តម សីហមុនី ទ្រង់នឹងជួយអន្តរាគមន៍ដោយដើរតាមមាគ៌ារបស់ព្រះបិតារបស់ព្រះអង្គ។
បើតាមលោក កើត សារ៉ាយ ថាមន្ត្រីរដ្ឋបាលបានទទួលយកលិខិត ហើយសន្យានឹងបញ្ជូនទៅថ្នាក់លើតាមបែបបទរដ្ឋបាល។ លោកថា ពួកគេនឹងរង់ចាំការឆ្លើយតបពីមន្ត្រីផ្នែករដ្ឋបាល បន្ទាប់ពីព្រះមហាក្សត្របានទទួលលិខិត។
មាត្រា៨ នៃរដ្ឋធម្មនុញ្ញចែងថា ព្រះមហាក្សត្រព្រះអង្គទ្រង់ជានិមិត្តរូបនៃឯកភាពជាតិ និងនិរន្តរភាពជាតិ។ ព្រះមហាក្សត្រទ្រង់ជាអ្នកធានាឯករាជ្យជាតិ អធិបតេយ្យ និងបូរណភាពទឹកដីនៃព្រះរាជាណាចក្រកម្ពុជា ទ្រង់ជាអ្នកធានាការគោរពសិទ្ធិ និងសេរីភាពរបស់ប្រជាពលរដ្ឋ និងការគោរពសន្ធិសញ្ញាអន្តរជាតិ។
មាត្រា៩ នៃរដ្ឋធម្មនុញ្ញដដែលចែងថា ព្រះមហាក្សត្រទ្រង់មានតួនាទីខ្ពង់ខ្ពស់ជាអាជ្ញាកណ្ដាលដើម្បីធានាការប្រព្រឹត្តទៅនៃអំណាចសាធារណៈឲ្យមានភាពទៀងទាត់៕