រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ អះអាងថា កម្ពុជាជាប្រទេសឈានមុខក្នុងការអនុវត្តកម្មវិធីការងារសមរម្យដែលបានផ្តល់ការការពារសិទ្ធិ អត្ថប្រយោជន៍ និងកិច្ចគាំពារ រួមទាំងការផ្តល់នូវសេវានានាជូនកម្មករនិយោជិតទាំងសេដ្ឋកិច្ចក្នុងប្រព័ន្ធ និងសេដ្ឋកិច្ចក្រៅប្រព័ន្ធបានល្អ។
រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង លើកឡើងក្នុងពិធីបើកសិក្ខាសាលាស្ដីពីការត្រួតពិនិត្យប្រចាំឆ្នាំលើកម្មវិធីការងារសមរម្យសម្រាប់ប្រទេសកម្ពុជាឆ្នាំ២០១៩ ដល់ឆ្នាំ២០២៣ នៅថ្ងៃទី២៩ ខែមីនា ឆ្នាំ២០២៣ នេះថា កម្ពុជាពិតជាមានមោទកភាពដែលក្លាយជាប្រទេសឈានមុខក្នុងការអនុវត្តកម្មវិធីការងារសមរម្យសម្រាប់កម្មវិធីឆ្នាំ២០១៩ ដល់ឆ្នាំ២០២៣ នេះ។
លោក អ៊ិត សំហេង បញ្ជាក់ថា កម្ពុជាសម្រេចបាននូវលទ្ធផលគួរជាទីមោទនៈ ដូចជាការអភិវឌ្ឍមុខរបរការងារ និងសហគ្រាស ការពង្រឹង និងពង្រីកកិច្ចគាំពារសង្គម និងការធ្វើឱ្យប្រសើរឡើងទំនាក់ទំនងវិជ្ជាជីវៈសិទ្ធិការងារ ដែលស្របទៅតាមបទដ្ឋានអន្តរជាតិខាងការងារ រាប់បញ្ចូលទាំងពលករ ទេសន្តរប្រវេសក៍ផងដែរ។
សហព័ន្ធសហជីពសេរីកម្មករ បានបញ្ចេញសេចក្តីរាយការណ៍របស់ខ្លួនកាលពីពេលថ្មីៗនេះថា នៅដើមឆ្នាំ២០២៣ នេះមានរោងចក្រចំនួន ១០ ហើយដែលបានបិទទ្វារ ខណៈរោងចក្រចំនួន ៧១ ព្យួរកិច្ចសន្យាការងារ និងរោងចក្រ ៦០ផ្សេងទៀតបានកាត់បន្ថយបុគ្គលិក ដែលនាំឱ្យប៉ះពាល់ដល់កម្មករ ៣ម៉ឺន ២ពាន់នាក់ ខណៈកម្មកររាប់ពាន់នាក់ផ្សេងទៀតត្រូវបាត់បង់ការងារទាំងស្រុងតែម្ដង។
ទាក់ទិននឹងបញ្ហានេះ ប្រធានសហព័ន្ធសហជីពតាមរោងចក្រមួយចំនួនអះអាងថា ការបិទ និងព្យួរការងាររបស់រោងចក្រនៅពេលនេះ គឺបណ្តាលមកពីខ្វះអ្នកបញ្ជាទិញដែលទំនងបណ្តាលមកពីការដកប្រព័ន្ធអនុគ្រោះពន្ធ EBA របស់សហភាពអឺរ៉ុប និងមិនវិលត្រឡប់មកវិញនៃ GSP របស់សហរដ្ឋអាមេរិក ដែលធ្វើឱ្យការនាំចេញផលិតផលកាត់ដេររបស់កម្ពុជាត្រូវជួបរបាំងពន្ធធ្ងន់ធ្ងរ។
យ៉ាងណាក៏ដោយ កាលពីដើមខែមីនា ឆ្នាំ២០២៣ នេះ ក្រសួងការងារ និងបណ្តុះបណ្តាលវិជ្ជាជីវៈ បានបញ្ចេញរបាយការណ៍របស់ខ្លួនថា ទោះបីជាមានរោងចក្របិទទ្វារជិត ៥០០ ហើយក៏ដោយ ក៏កម្ពុជានៅមានរោងចក្រសហគ្រាសបើកថ្មីជាង ៣ពាន់រោងចក្រទៀតដែរ ដែលស្មើនឹងកម្មករនិយោជិតសរុបប្រមាណជាង ១៤ម៉ឺន ៧ពាន់នាក់ឯណោះ។
ក្រសួងការងារ បញ្ជាក់ថា រដ្ឋាភិបាលកម្ពុជាកំពុងខិតខំប្រឹងប្រែងធានា ការពារ និងលើកទឹកចិត្តវិនិយោគក្នុងវិស័យអាទិភាព និងលើកទឹកចិត្តដល់រោងចក្រសហគ្រាសឱ្យដំណើរការរយៈពេលយូរដើម្បីរក្សា និងបង្កើតការងារនៅកម្ពុជា ដោយទាក់ទាញរោងចក្រសហគ្រាសបើកថ្មីដែលផ្តល់តម្លៃបន្ថែមខ្ពស់ឱ្យបានកាន់តែច្រើនជាងរោងចក្រដែលបិទ និងព្យួរការងារនៅពេលនេះ។
បែបនេះក្តី ប្រធានសហភាពការងារកម្ពុជា (CLC) លោក អាត់ ធន់ ធ្លាប់បានសម្ដែងបារម្ភកាលពីពេលថ្មីៗនេះថា ស្ថានភាពកម្មករដែលបាត់បង់ការងារដោយសាររោងចក្របិទទ្វារ និងកាត់បន្ថយម៉ោងធ្វើការជាបន្តបន្ទាប់នៅពេលនេះ គឺជាបញ្ហាដែលគួរឱ្យព្រួយបារម្ភបំផុត។
លោក អាត់ ធន់ ស្នើឱ្យរដ្ឋាភិបាលគួរពិចារណាចរចាជាមួយសហភាពអឺរ៉ុប និងសហរដ្ឋអាមេរិក ដើម្បីស្នើសុំប្រព័ន្ធអនុគ្រោះពន្ធមកវិញ មុននឹងវិស័យវាយនភ័ណ្ឌនៅកម្ពុជាដួលរលំ ដោយសារការបិទទ្វាររោងចក្រជាបន្តបន្ទាប់នៅពេលខាងមុខ។
ជុំវិញការកាត់បន្ថយការងាររបស់រោងចក្រនៅពេលនេះ មានថៅកែរោងចក្រខ្លះបានឆ្លៀតយកឱកាសកេងប្រវ័ញ្ចកម្លាំងកម្មករ ដោយបិទរោងចក្រគ្មានការជូនដំណឹងមុន និងលួចដឹកជញ្ជូនអីវ៉ាន់ចេញពីរោងចក្រដោយស្ងាត់ៗ ក្នុងបំណងគេចវេះពីការសងប្រាក់ខែ និងប្រាក់អត្ថប្រយោជន៍ការងារផ្សេងៗឱ្យកម្មកររបស់ខ្លួន។
ជាងនេះទៀត មានរោងចក្រមួយចំនួនទៀតក៏បានបំពានសិទ្ធិការងារ ដោយព្យួរកិច្ចសន្យាការងារជាច្រើនលើករហូតលើសចំនួនកំណត់ ក្នុងនោះរោងចក្រខ្លះបានព្យួរការងាររហូតដល់ទៅ ៦ខែ ប៉ុន្តែពួកគេបានផ្ដល់ប្រាក់កម្រៃតិចតួចប្រមាណ ១៥ភាគរយនៃប្រាក់ខែគោលរបស់កម្មករដែលខ្លួនបានព្យួរការងារនោះប៉ុណ្ណោះ៕