សមត្ថកិច្ចរារាំងក្រុមយុវជនស្រឡាញ់បរិស្ថានដែលធ្វើយុទ្ធនាការស្ទង់មតិនៅសួនច្បារមាត់ទន្លេខាងមុខព្រះបរមរាជវាំង ដើម្បីស្នើឱ្យរាជរដ្ឋាភិបាលកម្ពុជាឆ្លើយតបជុំវិញការបំផ្លាញបរិស្ថាន និងធនធានធម្មជាតិនៅកម្ពុជា។
ក្រុមយុវជនចលនាមាតាធម្មជាតិ និងយុវជនស្រឡាញ់បរិស្ថានជាច្រើននាក់ បានធ្វើយុទ្ធនាការស្ទង់មតិនៅសួនច្បារមាត់ទន្លេខាងមុខព្រះបរមរាជវាំង ក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ កាលពីថ្ងៃទី៩ ខែមេសា ឆ្នាំ២០២៣ នេះ តាមរយៈនៃការផ្តល់ជាស្ទីកឃ័រ ១សន្លឹកឱ្យទៅអ្នកដែលកំពុងធ្វើដំណើរតាមផ្លូវ និងសួរសំណួរជុំវិញបញ្ហាបរិស្ថាន ហើយប្រសិនបើអ្នកដំណើរទាំងនោះចង់ចូលរួមចំណែកក្នុងការការពារបរិស្ថាន និងធនធានធម្មជាតិ គឺយុវជនទាំងនោះស្នើឱ្យពួកគេបកស្ទីកឃ័រមួយសន្លឹកបិទលើក្រដាសសផងដែរ។
ក្រុមយុវជនទាំងនេះបានធ្វើយុទ្ធនាការស្ទង់មតិរយៈពេល ៣ថ្ងៃ គឺថ្ងៃទី១ ធ្វើនៅមុខទីស្ដីការគណៈរដ្ឋមន្ត្រី និងថ្ងៃទី២ ធ្វើនៅខាងមុខវិទ្យាល័យបឹងត្របែក និងសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នៅក្នុងទីក្រុងភ្នំពេញផងដែរ។
ក្រុមយុវជនចលនាមាតាធម្មជាតិ និងយុវជនស្រឡាញ់បរិស្ថានទាំងនោះ បញ្ជាក់ថា យុទ្ធនាការស្ទង់មតិនេះមានគោលដៅចម្បងតែមួយគត់ គឺដើម្បីស្នើឱ្យរាជរដ្ឋាភិបាលមានការឆ្លើយតបជាមួយបញ្ហាបរិស្ថាន និងធនធានធម្មជាតិដែលកំពុងរងនូវការបំផ្លាញសព្វថ្ងៃនេះ ព្រោះថាកន្លងមក រាជរដ្ឋាភិបាលមិនទាន់មានការប្រតិកម្មជាវិជ្ជមានណាមួយក្នុងការផ្តល់ដំណោះស្រាយចំពោះការបាត់បង់ព្រៃឈើនៅកម្ពុជានៅឡើយទេ។
យុទ្ធនាការនេះ ធ្វើឡើងស្របពេលដែលបរិស្ថាន ក៏ដូចជាព្រៃឈើនៅកម្ពុជាក្នុងពេលបច្ចុប្បន្ននេះកំពុងរងនូវការកាប់បំផ្លាញយ៉ាងធ្ងន់ធ្ងរ តែគេនៅមិនទាន់ឃើញមានចំណាត់ការណាមួយរបស់រដ្ឋាភិបាលកម្ពុជាឆ្លើយតបនឹងបញ្ហានេះនៅឡើយទេ។
កាលពីថ្ងៃទី៨ ខែមេសា ឆ្នាំ២០២៣ ក្រុមយុវជនចលនាមាតាធម្មជាតិ និងយុវជនស្រឡាញ់បរិស្ថានបានធ្វើយុទ្ធនាការស្ទង់មតិនៅមុខវិទ្យាល័យបឹងត្របែក និងសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច តែត្រូវបានអាជ្ញាធរខណ្ឌចំការមនប្រមាណជាង ៤០នាក់មកសួរនាំពីការសុំអនុញ្ញាតច្បាប់ ប៉ុន្តែក្រុមយុវជនទាំងនោះបញ្ជាក់ថា ការធ្វើសកម្មភាពស្ទង់មតិនេះមិនចាំបាច់មានច្បាប់អនុញ្ញាតនោះទេ ហើយក៏គ្មានច្បាប់ណាចែងថាមិនឲ្យធ្វើសកម្មភាពបែបនេះដែរ។
ទាក់ទិននឹងការស្ទង់មតិនេះ កាលពីថ្ងៃទី៩ ខែមេសា ឆ្នាំ២០២៣ អតីតប្រធានអង្គការមាតាធម្មជាតិ លោក ម៉េង ហេង ដែលបានចុះចូលជាមួយរដ្ឋាភិបាលកម្ពុជាកាលពីពេលថ្មីៗនេះ បានចេញមុខថ្កោលទោសដែលទំនងជាសំដៅទៅកាន់យុវជនបរិស្ថានដែលធ្វើយុទ្ធនាការស្ទង់មតិខាងលើ ថាពួកគេនឹងមិនគាំទ្រចលនាយុវជនខុសច្បាប់ដែលបង្កភាពអនាធិបតេយ្យកើតចេញពីយុវជនមួយក្តាប់តូច និងជនបរទេស លោក អេឡិច ជាដាច់ខាត។
យ៉ាងណាក៏ដោយ អនុប្រធានវេទិកាពលរដ្ឋ លោក ម៉ែន ណាត ធ្លាប់ប្រាប់សារព័ត៌មាន The Cambodia Daily កាលពីពេលថ្មីៗនេះថា ការសម្រេចចិត្តរបស់អតីតយុវជនចលនាមាតាធម្មជាតិទៅចុះចូលជាមួយបក្សកាន់អំណាច ពិតមែនតែជាសិទ្ធិក្នុងការជ្រើសរើសរបស់ពួកគេ ប៉ុន្តែការសម្រេចចិត្តរបស់ពួកគេបែបនេះនឹងធ្វើឲ្យខាតប្រយោជន៍ប្រទេសជាតិទៅថ្ងៃក្រោយ ដោយសារតែពួកគេបានជួយឲ្យរដ្ឋាភិបាលលោក ហ៊ុន សែន មានឱកាសប្រព្រឹត្តអំពើអាក្រក់កាន់តែខ្លាំងបន្ថែមទៀត។
អនុប្រធានវេទិកាពលរដ្ឋរូបនេះបញ្ជាក់ថា ការដឹកនាំរបស់មេដឹកនាំបក្សកាន់អំណាច លោក ហ៊ុន សែន ជិត ៤០ឆ្នាំមកនេះ គឺមានតែភាពវិនាសហិនហោចទៅៗតែប៉ុណ្ណោះ។ លោកបន្ថែមថា ការដឹកនាំរបស់លោក ហ៊ុន សែន បានបំផ្លាញទាំងធនធានធម្មជាតិនៅលើគោក និងក្រោមទឹក ដូចជាព្រៃឈើ រ៉ែ និងមច្ឆជាតិ ជាដើម ខណៈដែនអធិបតេយ្យរបស់កម្ពុជាក៏ត្រូវបាត់បង់បន្តិចម្តងៗថែមទៀត ខណៈក្រុមយុវជនដែលចុះចូលទាំងនោះនឹងធ្វើតាមតែការរៀបចំរបស់លោក ហ៊ុន សែន តែប៉ុណ្ណោះ។
ទាក់ទិននឹងបញ្ហានេះ កាលពីថ្ងៃទី៨ ខែមីនា ឆ្នាំ២០២៣ សារព័ត៌មានអន្តរជាតិ Mongabay លាតត្រដាងអំពីរចនាសម្ព័ន្ធឧក្រិដ្ឋជនព្រៃឈើនៅប្រទេសកម្ពុជា ដែលតារាងនោះបានដាក់រូបលោកនាយករដ្ឋមន្ត្រី ហ៊ុន សែន និងលោក ហ៊ុន ម៉ាណែត មានទំនាក់ទំនងស៊ីជម្រៅជាមួយបណ្ដាញឧក្រិដ្ឋជនព្រៃឈើដែលមានងារជាឧកញ៉ា៕