ក្រសួងការងារ និងបណ្តុះបណ្តាលវិជ្ជាជីវៈ ប្រកាសពីការប្រារព្ធទិវាពិភពលោកដើម្បីសុវត្ថិភាព និងសុខភាពការងារ នៅថ្ងៃទី២៨ ខែមេសា ខាងមុខ ដើម្បីលើកកម្ពស់សុវត្ថិភាព និងសុខភាពការងារដល់កម្មករនិយោជិតនៅកម្ពុជា ក៏ដូចជាកម្មករនិយោជិតនៅទូទាំងពិភពលោក។
ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីជូនដំណឹងកាលពីថ្ងៃទី១១ ខែមេសា ឆ្នាំ២០២៣ នេះថា ក្រសួងនឹងប្រារព្ធទិវាពិភពលោកដើម្បីសុវត្ថិភាព និងសុខភាពការងារក្រោមប្រធានបទ «បរិយាកាសការងារប្រកបដោយសុវត្ថិភាព និងសុខភាពការងារ គឺជាសិទ្ធិ និងគោលការណ៍គ្រឹះនៅកន្លែងធ្វើការ» ដែលនឹងប្រារព្ធនៅតំបន់សេដ្ឋកិច្ចពិសេសភ្នំពេញ ដោយមានអ្នកចូលរួមមកពីតំណាងនិយោជក តំណាងសហជីព និងកម្មករនិយោជិតសរុប ១៣០០នាក់ផងដែរ។
ក្រសួងការងារកម្ពុជា លើកឡើងថា ការប្រារព្ធទិវាពិភពលោកដើម្បីសុវត្ថិភាព និងសុខភាពការងារ គឺដើម្បីលើកកម្ពស់សុវត្ថិភាព និងសុខភាពការងាររបស់កម្មករនិយោជិតនៅកម្ពុជា។ ជាងនេះទៀត ក៏ដើម្បីរំលឹកដល់វិញ្ញាណក្ខន្ធកម្មករនិយោជិតដែលបានបាត់បង់ជីវិតដោយសារគ្រោះថ្នាក់ការងារ និងជំងឺវិជ្ជាជីវៈថែមទៀត។
ក្រសួងអំពាវនាវឱ្យម្ចាស់រោងចក្រសហគ្រាសទាំងអស់ដែលមានទីតាំងនៅកម្ពុជា ត្រូវរៀបចំចងបដាពាក្យស្លោកមួយចំនួននៅតាមមុខរោងចក្រ សហគ្រាស ដើម្បីចូលរួមអបអរសាទរទិវាពិភពលោកនេះ ដូចជាពាក្យថា៖
- បរិយាកាសការងារប្រកបដោយសុវត្ថិភាព និងសុខភាពការងារ គឺជាសិទ្ធិ និងគោលការណ៍ជាមូលដ្ឋាននៅកន្លែងធ្វើការ
- ត្រូវរៀបចំឱ្យមានប្រព័ន្ធគ្រប់គ្រងសុវត្ថិភាព និងសុខភាពការងារនៅគ្រប់កន្លែងធ្វើការ
- មានសុវត្ថិភាពការងារ គឺគ្មានគ្រោះថ្នាក់ការងារ
- និងមានពាក្យស្លោកជាច្រើនទៀតផងដែរ។
ការប្រារព្ធទិវាពិភពលោកដើម្បីសុវត្ថិភាព និងសុខភាពការងារនេះ ធ្វើឡើងស្របពេលដែលការរំលោភសិទ្ធិការងារពីថៅកែរោងចក្រ និងការមិនអើពើពីក្រសួងការងារចំពោះកម្មករនិយោជិតនៅកម្ពុជា កំពុងកើតមានព្រោងព្រាតសព្វថ្ងៃនេះ។
ប្រធានសហភាពការងារកម្ពុជា (CLC) លោក អាត់ ធន់ ធ្លាប់បានសម្ដែងនូវក្តីបារម្ភកាលពីពេលថ្មីៗនេះថា ស្ថានភាពកម្មករដែលបាត់បង់ការងារដោយសាររោងចក្របិទទ្វារ និងកាត់បន្ថយម៉ោងធ្វើការជាបន្តបន្ទាប់នៅពេលនេះ គឺជាបញ្ហាដែលគួរឱ្យព្រួយបារម្ភបំផុត ព្រោះថាមានថៅកែរោងចក្រខ្លះបានឆ្លៀតយកឱកាសកេងប្រវ័ញ្ចកម្លាំងកម្មករ ដោយបិទរោងចក្រគ្មានការជូនដំណឹងជាមុន និងលួចដឹកជញ្ជូនអីវ៉ាន់ចេញពីរោងចក្រដោយស្ងាត់ៗក្នុងបំណងគេចវេះពីការសងប្រាក់ខែ និងប្រាក់អត្ថប្រយោជន៍ការងារឱ្យកម្មករ ជាដើម។
ជាងនេះទៀត មានរោងចក្រមួយចំនួនក៏បានបំពានសិទ្ធិការងារដោយព្យួរកិច្ចសន្យាការងារជាច្រើនលើករហូតលើសចំនួនកំណត់ ក្នុងនោះរោងចក្រខ្លះបានព្យួរការងាររហូតដល់ទៅ ៦ខែ ប៉ុន្តែពួកគេបានផ្ដល់ប្រាក់កម្រៃតិចតួចប្រមាណ ១៥ភាគរយនៃប្រាក់ខែគោលរបស់កម្មករដែលខ្លួនបានព្យួរការងារនោះប៉ុណ្ណោះ។
របាយការណ៍ក្រសួងការងារ បានបង្ហាញថា ឆ្នាំ២០២២ កន្លងទៅ យ៉ាងហោចណាស់មានកម្មករនិយោជិតក្នុងវិស័យកាត់ដេរសរុបជាង ៥ម៉ឺននាក់បានបាត់បង់ការងារ ខណៈរោងចក្រសហគ្រាសជិត ៥០០ បានបិទទ្វារ និងព្យួរការងារផងដែរ។
ដោយឡែកនៅដើមឆ្នាំ២០២៣ នេះមានរោងចក្រចំនួន ១០ បានបិទទ្វារ ខណៈរោងចក្រចំនួន ៧១ បានព្យួរកិច្ចសន្យាការងារ រីឯរោងចក្រ ៦០ ផ្សេងទៀតបានកាត់បន្ថយបុគ្គលិក។ បញ្ហានេះកំពុងធ្វើឱ្យប៉ះពាល់ដល់កម្មករនិយោជិតប្រមាណ ៣ម៉ឺន ២ពាន់នាក់ រីឯកម្មករជាច្រើននាក់ផ្សេងទៀតបានបាត់បង់ការងារទាំងស្រុងតែម្តង។
ទាក់ទិននឹងបញ្ហានេះ ក្រុមអ្នកសង្កេតការណ៍លើកឡើងថា វិបត្តិការងារនេះគឺបណ្តាលមកពីការបាត់បង់ប្រព័ន្ធអនុគ្រោះពន្ធ EBA របស់សហភាពអឺរ៉ុប និងការមិនវិលត្រឡប់មកវិញនៃប្រព័ន្ធអនុគ្រោះពន្ធ GSP របស់សហរដ្ឋអាមេរិកផងដែរ ដែលពួកគេទាមទារឱ្យរដ្ឋាភិបាលគោរពសិទ្ធិការងាររបស់កម្មករនិយោជិតរហូតមក តែរដ្ឋាភិបាលកម្ពុជាមិនអនុវត្តទៅតាមការទាមទាររបស់ពួកគេឡើយរហូតដល់ពេលនេះ៕