ច្បាប់ថ្មីមួយកំពុងតែត្រូវបានសិក្សាពិចារណានៅក្នុងគណៈកម្មាធិការកិច្ចការបរទេសនៃព្រឹទ្ធសភាសហរដ្ឋអាមេរិក ដើម្បីដាក់ទណ្ឌកម្មទៅលើប្រទេស និងរដ្ឋាភិបាលបរទេសទាំងឡាយណាដែលមានផែនការរៀបគម្រោងឃុបឃិត សមគំនិត ជំពាក់ជំពិននឹងការប្រព្រឹត្តឧក្រិដ្ឋកម្មឆ្លងដែនគ្រប់មធ្យោបាយ ដែលប៉ះពាល់ដល់សន្តិសុខ សុវត្ថិភាព អាយុជីវិតពលរដ្ឋអាមេរិកាំងនៅតាមសហគមន៍ ឬក្នុងប្រទេសណាមួយផ្សេងដែលពលរដ្ឋអាមេរិកាំងរស់នៅ ធ្វើការងារ ឬដើរកម្សាន្ត។
ច្បាប់ថ្មីលេខ S. 831 មានចំណងជើងថា «ច្បាប់គោលនយោបាយលើការគាបសង្កត់ឆ្លងដែន (Transnational Repression Policy Act)» ដែលស្នើឡើងនៅថ្ងៃទី១៦ ខែមីនា ឆ្នាំ២០២៣ ដោយសមាជិកព្រឹទ្ធសភាពីខាងគណបក្សប្រជាធិបតេយ្យ លោក Jeff Merkley ពីរដ្ឋ Oregon គាំទ្រដោយសមាជិកព្រឹទ្ធសភា Marco Rubio ខាងបក្សសាធារណរដ្ឋ ពីរដ្ឋ Florida លោក Ben Cardin ពីខាងបក្សប្រជាធិបតេយ្យប្រចាំរដ្ឋ Maryland និងលោក Bill Hagerty ពីខាងបក្សសាធារណរដ្ឋប្រចាំរដ្ឋ Tennessee សំដៅដាក់ទណ្ឌកម្មយ៉ាងធ្ងន់ធ្ងរដល់រដ្ឋាភិបាលបរទេសណាដែលព្យាយាមគំរាមកំហែង បំភិតបំភ័យ បំបិទមាត់ពលរដ្ឋរបស់ខ្លួនដែលបានទៅដល់ទឹកដីសហរដ្ឋអាមេរិក មានទាំងតាមមធ្យោបាយបណ្ដាញសារព័ត៌មានសង្គមគ្រប់បែបយ៉ាង តាមមធ្យោបាយប្រើបុគ្គលិកទូត តាមមធ្យោបាយប្រើប្រាស់សាខាប៉ូលិសអន្តរជាតិ Interpol តាមរយៈមធ្យោបាយធ្វើការតាមដានតាមប្រព័ន្ធអេឡិចត្រូនិក តាមមធ្យោបាយប្រើភ្នាក់ងារស៊ីឈ្នួលយាយីធ្វើទុក្ខបុកម្នេញ ឬតាមមធ្យោបាយប្រើបរិវារជេរប្រមាថ ដើម្បីបន្ទាបបន្ថោកសម្អុយឈ្មោះបុគ្គលណាមួយ ជាដើម។
ច្បាប់ថ្មីដែលយោងតាមច្បាប់ស្តីអំពីអន្តោប្រវេសន៍ និងសញ្ជាតិ ច្បាប់ Global Magnitsky Human Rights Accountability Act ច្បាប់ស្តីអំពីជំនួយបរទេស តម្រូវឲ្យក្រសួងការបរទេស ក្រសួងសន្តិសុខជាតិ នាយកដ្ឋានអន្តោប្រវេសន៍ ការិយាល័យប៉ូលិសសហព័ន្ធ FBI ស៊ើបអង្កេតតាមដាន កត់ត្រា រាយការណ៍ អនុវត្តច្បាប់លើបុគ្គលណាដែលបម្រើរដ្ឋាភិបាលបរទេសណាមួយទៅអុកឡុក រំខាន យាយីជនណាដែលជំទាស់នឹងរដ្ឋអំណាចនោះ ទោះជានៅលើទឹកដីរបស់ខ្លួននៅឡើយក៏ដោយ។
នៅលើទឹកដីសហរដ្ឋអាមេរិក យោងតាមច្បាប់ស្តីអំពីសន្តិសុខជាតិឆ្នាំ១៩៤៧ លេខ 50 U.S.C 3003 តម្រូវឲ្យក្រសួងយុត្តិធម៌ ក្រសួងសន្តិសុខជាតិ ក្រសួងការបរទេស ការិយាល័យនៃនាយកចារកម្មជាតិ ប្រមូលព័ត៌មានស៊ើបការណ៍ នឹងចាត់វិធានការតាមច្បាប់ជាធរមាន។
ច្បាប់ថ្មីនេះសំដៅការពារពលរដ្ឋចូលសញ្ជាតិអាមេរិកាំង ជនបរទេសចូលទឹកដីសហរដ្ឋអាមេរិកស្របច្បាប់ និងជនបរទេសមានសិទ្ធិរស់នៅអចិន្ត្រៃយ៍ក្នុងសហរដ្ឋអាមេរិក។
ចំពោះពលរដ្ឋខ្មែរ-អាមេរិកាំងដែលស្អប់ខ្ពើមអំពើជិះជាន់ គាបសង្កត់ គំរាមកំហែង បំភិតបំភ័យ បំបិទមាត់មិនឲ្យមានសិទ្ធិសេរីភាពនិយាយស្តី រងនូវអំពើអយុត្តិធម៌ គេអាចសរសេរទៅកាន់ការិយាល័យសមាជិកព្រឹទ្ធសភាតាមរដ្ឋរបស់គេរៀងខ្លួន ដើម្បីឲ្យគាំទ្រសេចក្តីស្នើច្បាប់នេះ ហើយអនុម័តចេញជាច្បាប់ជាតិចុះហត្ថលេខាដោយប្រធានាធិបតី។
ច្បាប់នេះនឹងជួយទប់ទល់នឹងការប៉ុនប៉ងរាតត្បាតហួសព្រំដែនពីពពួកមេដឹកនាំផ្ដាច់ការក្នុងសកលលោក រួមទាំងប្រទេសកម្ពុជាផងដែរ។
ចំពោះជនណាដែលបម្រើឲ្យប្រយោជន៍រដ្ឋាភិបាលផ្ដាច់ការ ជននោះក៏នឹងប្រឈមនឹងផលវិបាកខាងផ្លូវច្បាប់ចៀសមិនរួចដែរ បើសិនជាមានគេរាយការណ៍ទៅអាជ្ញាធរមានសមត្ថកិច្ចអាមេរិកាំង៕