អគ្គនាយកសារព័ត៌មានដើមអម្ពិល លោក សយ សុភាព ដែលស្និទ្ធនឹងលោក ហ៊ុន សែន ព្រមានឧកញ៉ាស្រុកខ្មែរដែលរកស៊ីឈើខុសច្បាប់នៅតំបន់ព្រៃឡង់ ថាត្រូវប្រយ័ត្នសកម្មភាពរបស់ខ្លួនទៅថ្ងៃមុខ ព្រោះពួកគេកំពុងនាំគ្នាបំផ្លាញរដ្ឋាភិបាលកម្ពុជាយ៉ាងធ្ងន់ធ្ងរ។
អគ្គនាយកសារព័ត៌មានដើមអម្ពិល លោក សយ សុភាព បានលើកឡើងក្នុងកម្មវិធី Monday Talk របស់លោកកាលពីថ្ងៃទី២ ខែឧសភា ឆ្នាំ២០២៣ នេះថា លោកទ្រាំយូរហើយចំពោះទង្វើឧកញ៉ាខ្លះដែលបានរកស៊ីកាប់បំផ្លាញព្រៃឈើខុសច្បាប់នៅតំបន់ព្រៃឡង់ ព្រោះទង្វើទាំងនោះគឺជាទង្វើបំផ្លាញទ្រព្យសម្បត្តិជាតិខ្មែរឱ្យវិនាសហិនហោចទៅថ្ងៃមុខ។
លោក សយ សុភាព លើកឡើងថា ឈើដែលពួកឧកញ៉ាទាំងនោះបានកាប់បំផ្លាញដោយការរកស៊ីខុសច្បាប់កន្លងមក គឺតែងតែដឹកជញ្ជូនទៅកាន់ប្រទេសវៀតណាម។ លោកបន្ថែមថា មានឈើខ្លះទៀតពួកគេបានដឹកជញ្ជូនពីប្រទេសឡាវ ប៉ុន្តែប្រទេសដែលរងគ្រោះ និងរងចោទប្រកាន់ពីការកាប់បំផ្លាញព្រៃឈើ បែរជាកម្ពុជាទៅវិញ ដោយសារតែការរកស៊ីឈើខុសច្បាប់របស់ឧកញ៉ាទាំងនោះ។
ការអះអាងនេះ ធ្វើឡើងបន្ទាប់ពីប្រធានគណៈកម្មការជាតិទប់ស្កាត់ និងបង្ក្រាបបទល្មើសធនធានធម្មជាតិ លោក សៅ សុខា ចេញប្រតិបត្តិការរឹបអូសឈើខុសច្បាប់ពីឈ្មួញទុច្ចរិតកាលពីពេលថ្មីៗនេះ។
កាលពីថ្ងៃទី២៧ ខែមេសា ឆ្នាំ២០២៣ កម្លាំងអាវុធហត្ថកម្ពុជាបានរឹបអូសឈើជាង ៣០០ម៉ែត្រគូប ក្នុងនោះ៖
- ឈើហ៊ុំមូល ១៨២កំណាត់ ស្មើនឹងជាង ២០០ម៉ែត្រគូប
- ឈើប្រភេទលេខ១ សរុប ២២៤ដុំ ស្មើនឹងជាង ៦០ម៉ែត្រគូប
- ឈើប្រភេទលេខ២ ចំនួន ៩០៨សន្លឹក ស្មើនឹងជាង ៣០ម៉ែត្រគូប
- និងប្រភេទឈើជាច្រើនផ្សេងទៀត។
ប្រតិបត្តិការនេះធ្វើឡើងក្នុងខេត្តចំនួន៤ រួមមានខេត្តក្រចេះ ស្ទឹងត្រែង កំពង់ធំ និងខេត្តព្រះវិហារ ដែលសុទ្ធសឹងតែជាខេត្តដែលស្ថិតក្នុងតំបន់អភិរក្សសត្វព្រៃព្រៃឡង់ទាំងអស់។
ការបង្ក្រាបបទល្មើសព្រៃឈើនេះ ធ្វើឡើងបន្ទាប់ពីប្រធានគណៈកម្មការជាតិទប់ស្កាត់ និងបង្ក្រាបបទល្មើសធនធានធម្មជាតិ លោក សៅ សុខា កាលពីថ្ងៃទី២៦ ខែមេសា ឆ្នាំ២០២៣ បានចោទថា បទល្មើសព្រៃឈើដែលតែងតែកើតមាននៅកម្ពុជាទប់ស្កាត់មិនបាន គឺដោយសារតែមន្ត្រីមូលដ្ឋានជាអ្នកបើកដៃឱ្យឈ្មួញពីខាងក្រៅតែប៉ុណ្ណោះ។
លោក សៅ សុខា អះអាងថា មន្ត្រីជំនាញតែងផ្ដេកផ្ដួលចំពោះបញ្ហានេះ ព្រោះថាឈើដឹកតែលើផ្លូវមិនដែលដឹកខុសពីលើផ្លូវទេ ហើយទីស្នាក់ការរដ្ឋបាលព្រៃឈើក៏នៅលើផ្លូវ ទីស្នាក់ការបរិស្ថានក៏នៅលើផ្លូវដែរ ដូច្នេះបើមន្ត្រីទាំងនោះមិនផ្សំគំនិតគ្នាទេ បទល្មើសព្រៃឈើក៏មិនកើតឡើងដែរ។ លោកសង្កត់ធ្ងន់ថា បើនៅតែបែបនេះទៀត ប្រទេសកម្ពុជានឹងរលាយហិនហោចជាមិនខាន។
យ៉ាងណាក៏ដោយ កាលពីខែកញ្ញា ឆ្នាំ២០២២ អ្នកនាំពាក្យក្រសួងបរិស្ថាន លោក នេត្រ ភក្ត្រា រិះគន់ថា ការចោទប្រកាន់ថាព្រៃឈើនៅកម្ពុជាកំពុងបន្តរងនូវការកាប់បំផ្លាញ គឺជាចេតនាបង្កប់សារនយោបាយ និងជាយុទ្ធនាការមួយដែលប្រឆាំងនឹងកម្ពុជា ដើម្បីបំភ្លៃ បំផ្លើស និងបំប៉ោងរបស់ក្រុមអ្នកស្រឡាញ់ព្រៃឈើតែសម្បកក្រៅ។
ក្រុមអ្នកសង្កេតការណ៍លើកឡើងថា បទល្មើសព្រៃឈើមិនអាចបំបាត់បានទេ បើទោះបីជាមានការបង្ក្រាបខ្លះក៏ដោយ ព្រោះថានោះគ្រាន់តែជារូបភាពដែលល្អមើលតែសម្បកក្រៅប៉ុណ្ណោះ ត្បិតពួកឧកញ៉ាដែលរកស៊ីឈើខុសច្បាប់ត្រូវគេរកឃើញថា សុទ្ធសឹងតែជាមនុស្សដែលរកស៊ីខុសច្បាប់ប្រមូលលុយឱ្យក្រុមគ្រួសារលោក ហ៊ុន សែន ទាំងអស់ ដូចជាឧកញ៉ា លី យ៉ុងផាត់ ហៅស្តេចកោះកុង និងឧកញ៉ា ទ្រី ភាព ហៅស្តេចគ្រញូង ជាដើម។
អង្គការឃ្លាំមើលព្រៃឈើពិភពលោក បានចេញរបាយការណ៍របស់ខ្លួនកាលពីអំឡុងឆ្នាំ២០២១ ស្ដីពីឧក្រិដ្ឋកម្មព្រៃឈើនៅកម្ពុជាថា ការវិនាសព្រៃឈើខ្មែរក្នុងដែនជម្រកសត្វព្រៃព្រៃឡង់របស់កម្ពុជាសព្វថ្ងៃនេះ គឺបង្កឡើងដោយក្រុមហ៊ុនមួយចំនួនដែលរកស៊ីកាប់ឈើខុសច្បាប់បច្ចុប្បន្ននេះ ដូចជាក្រុមហ៊ុន Think Biotech ក្រុមហ៊ុន Angkor Plywood ក្រុមហ៊ុន Sam Oeun Sovann ក្រុមហ៊ុន PNT និងក្រុមហ៊ុន Thy Ngan Development ជាដើម ខណៈក្រុមហ៊ុនទាំងនេះគឺមានការជាប់ពាក់ព័ន្ធជាមួយក្រុមហ៊ុន TSMW របស់ឧកញ៉ា ម៉ឹក សុផាន់ណារ៉េត ហៅឧកញ៉ា ជ័យ យ៉ាងខ្លាំង។
ទាក់ទិននឹងបញ្ហានេះ សារព័ត៌មានអន្តរជាតិ Mongabay បានចេញផ្សាយរបាយការណ៍ស៊ើបអង្កេតរបស់ខ្លួនកាលពីថ្ងៃទី៨ ខែមីនា ឆ្នាំ២០២៣ ថា លោក ហ៊ុន សែន និងលោក ហ៊ុន ម៉ាណែត អាចមានជាប់ពាក់ព័ន្ធជាមួយឧកញ៉ា ម៉ឹក សុផាន់ណារ៉េត ហៅឧកញ៉ា ជ័យ ដែលល្បីល្បាញខាងរកស៊ីឈើខុសច្បាប់នៅខេត្តស្ទឹងត្រែង សព្វថ្ងៃនេះ៕