ស្នងការដ្ឋាននគរបាលខេត្តរតនគិរី កំពុងធ្វើការសាកសួរប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន និងសហការី ២នាក់ទៀត បន្ទាប់ពីសមត្ថកិច្ចខេត្តក្រចេះ ឃាត់ខ្លួនកាលពីថ្ងៃទី១៧ ឧសភា អំឡុងពេលពួកគេធ្វើដំណើរពីខេត្តរតនគិរី មករាជធានីភ្នំពេញវិញ។
លោក ថេង សាវឿន បានដឹកនាំបុគ្គលិក រួមទាំងក្រុមគ្រួសារដែលមានគ្នាប្រមាណ ៣០នាក់ទៅកម្សាន្តនៅខេត្តរតនគិរី ចំនួន ៤ថ្ងៃ ចាប់ពីថ្ងៃទី១៤ ដល់ថ្ងៃទី១៧ ខែឧសភា ក៏នាំគ្នាត្រឡប់មកភ្នំពេញវិញ ប៉ុន្តែលុះមកដល់ខេត្តក្រចេះ លោកត្រូវបានសមត្ថកិច្ចឃាត់ខ្លួន រួមទាំងសមាជិករបស់លោកចំនួន ១៦នាក់ទៀតផងដែរ។ អំឡុងពេលនោះ សមត្ថកិច្ចបានឆែក និងដកហូតកុំព្យូទ័រ Laptop ១៧គ្រឿង រួមទាំងទូរសព្ទរបស់ពួកគេផងដែរ។
ក្រោយពីឃាត់ខ្លួន និងសាកសួររួច សមត្ថកិច្ចក៏បានដោះលែងសមាជិក ១៤នាក់វិញ ប៉ុន្តែលោក ថេង សាវឿន និងសហការី ២នាក់ទៀត ក្នុងនោះលោក ញ៉ិល ភាព ជាមន្ត្រីសម្របសម្រួលសហគមន៍នៅប្រចាំខេត្តកោះកុង និងខេត្តកំពង់ស្ពឺ និងលោក ថាន់ ហាច ប្រធានគម្រោងនៃ CCFC ត្រូវបានអាជ្ញាធរខេត្តក្រចេះ បញ្ជូនទៅកាន់សាលាដំបូងខេត្តរតនគិរី នៅថ្ងៃទី១៨ ខែឧសភា ដើម្បីបន្តនីតិវិធី។
គិតមកដល់ល្ងាចថ្ងៃទី១៨ ឧសភា តុលាការខេត្តរតនគិរី កំពុងសាកសួរដោយនៅមិនទាន់ដោះលែងលោក ថេង សាវឿន និងលោក ញ៉ិល ភាព និងលោក ថាន់ ហាច នៅឡើយទេ ខណៈអង្គការសង្គមស៊ីវិលដែលធ្វើការលើកកម្ពស់សិទ្ធិមនុស្សកំពុងតាមដានចំពោះរឿងនេះ។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក ដែលតាមដានរឿងនេះ បានឲ្យដឹងថា ការចាប់ខ្លួននេះ គឺបន្ទាប់ពីសមាគមសម្ព័ន្ធសហគមន៍កសិករកម្ពុជាបានរៀបចំវគ្គឆ្លុះបញ្ចាំងកសាងសមត្ថភាពក្រុមការងារ កាលពីថ្ងៃទី១៣-១៤ ខែឧសភា ដែលស្ថិតនៅខេត្តរតនគិរី។ ការឃាត់ខ្លួននេះ ដើម្បីសាកសួរព័ត៌មានពីបញ្ជិកា និងឯកសារពាក់ព័ន្ធនានា។
បើតាមលោក ស៊ឹង សែនករុណា ករណីការចាប់ខ្លួនអ្នកខាងលើនេះ ខាងសមាគមអាដហុក និងអង្គការដៃគូដទៃទៀត បាននិងកំពុងតែតាមដាន និងឃ្លាំមើលផងដែរ ខណៈការចោទប្រកាន់អំពីការចាប់ខ្លួនភាគីសមត្ថកិច្ចនៅមិនទាន់អាចបញ្ជាក់ឲ្យបានច្បាស់នៅឡើយ គិតមកទល់នឹងពេលនេះ។
អភិបាលខេត្តរតនគិរី លោក ញ៉ែម សំអឿន បានប្រាប់សារព័ត៌មានក្នុងស្រុកឲ្យដឹងថា ការដែលស្នងការខេត្តរតនគិរី ស្នើឲ្យសមត្ថកិច្ចខេត្តក្រចេះ ឃាត់ខ្លួនលោក ថេង សាវឿន និងក្រុមការងារសមាគមសម្ព័ន្ធសហគមន៍កសិករកម្ពុជា ដោយសារតែពួកគេបានធ្វើសកម្មភាពការងារនៅខេត្តរតនគិរី ហាក់ប្រាសចាកពីច្បាប់ដែលគួរឲ្យសង្ស័យ។
យ៉ាងណាក៏ដោយ អភិបាលខេត្តរូបនេះមិនបានបញ្ជាក់ឲ្យបានច្បាស់អំពីកំហុសដែលនាំឲ្យមានការចាប់ខ្លួនពួកគេនោះឡើយ ដោយគ្រាន់តែនិយាយថា ករណីនេះកំពុងធ្វើការស្រាវជ្រាវ និងតាមដាននៅឡើយ។
ជុំវិញរឿងនេះ សហគមន៍ដីធ្លីភូមិព្រលាន ២៤៣គ្រួសារនិងសហគមន៍ដីធ្លីនៅជីខក្រោម ក្នុងខេត្តកោះកុង ក៏បានបង្ហោះសារលើបណ្ដាញសង្គម ដោយទាមទារឲ្យតុលាការដោះលែងលោក ថេង សាវឿន និងសហការី ២នាក់ទៀតដោយឥតលក្ខខណ្ឌ ដោយថាប្រទេសដែលប្រកាន់ខ្ជាប់ប្រជាធិបតេយ្យ ត្រូវធានា និងគោរពសិទ្ធិជួបជុំរបស់ពលរដ្ឋតាមរដ្ឋធម្មនុញ្ញដែលជាច្បាប់កំពូលរបស់កម្ពុជា។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន ធ្លាប់ត្រូវបានតុលាការក្រុងភ្នំពេញកាត់ទោសឲ្យលោកជាប់ពន្ធនាគាររយៈពេល ៤ឆ្នាំ ២៨ថ្ងៃ ពីបទញុះញង់ឲ្យមានការប្រើប្រាស់អំពើហិង្សា ប៉ុន្តែលោក និងអ្នកផ្សេងទៀតត្រូវបានដោះលែងវិញនៅថ្ងៃទី៣០ ខែឧសភា ឆ្នាំ២០១៤ ក្រោយតុលាការព្យួរទោសដែលនៅសេសសល់។
បើតាមលោក ថេង សាវឿន បានអះអាងកាលពីដើមឆ្នាំ២០២៣ ថា បើទោះពួកគាត់បានប្ដឹងទាស់ប្រឆាំងនឹងសាលក្រមកាត់ទោសពីសំណាក់សាលាដំបូងរាជធានីភ្នំពេញទៅតុលាការជាន់ខ្ពស់ បន្ទាប់ពីតុលាការដោះលែងពួកគាត់តាំងពីខែឧសភា ឆ្នាំ២០១៤ ក្ដី ប៉ុន្តែរហូតមកទល់បច្ចុប្បន្ននេះ លោកថាសំណុំរឿងរបស់ពួកគាត់ស្ថិតក្នុងដៃតុលាការជាន់ខ្ពស់នៅឡើយ។
សមាគមសម្ព័ន្ធសហគមន៍កសិករកម្ពុជា (CCFC) ដែលបច្ចុប្បន្នលោក ថេង សាវឿន ជាប្រធានត្រូវបានបង្កើតឡើងកាលពីឆ្នាំ២០១១ ដើម្បីជួយដោះស្រាយបញ្ហាសិទ្ធិដីធ្លី និងបញ្ហានានាដែលប៉ះពាល់ដល់កសិករ៕