30 C
Phnom Penh

ក្រសួង​បរិស្ថាន​ព្រមាន​អ្នក​ចូលរួម​ធ្វើ​សកម្មភាព​ការពារ​ធនធាន​ធម្មជាតិ​ជាមួយ​អង្គការ​មាតា​ធម្មជាតិ

ដោយ ឌឹ ខេមបូឌា ដេលី

បទវិភាគ

ក្រសួង​បរិស្ថាន​ប្រកាស​ចាត់​វិធានការ​ច្បាប់​លើ​អ្នក​ដែល​ចូលរួម​ធ្វើ​សកម្មភាព​ជាមួយ​អង្គការ​មាតា​ធម្មជាតិ ដឹកនាំ​ដោយ​លោក អាឡិច បន្ទាប់ពី​យុវជន​អង្គការ​នេះ​ស្នើ​ទៅ​រដ្ឋមន្ត្រី​ក្រសួង​បរិស្ថាន​ឲ្យ​ដកហូត​ដី​តំបន់​ឧទ្យាន​ជាតិ​ពី​ក្រុមហ៊ុន​ឯកជន​មក​ទុក​ជា​សម្បត្តិ​រដ្ឋ​វិញ។

សេចក្ដី​ប្រកាស​ព័ត៌មាន​របស់​ក្រសួង​បរិស្ថាន​ចុះ​ថ្ងៃទី​២៤ ខែ​ឧសភា ដោយ​ចោទ​អង្គការ «មាតា​ធម្មជាតិ» ដឹកនាំ​លោក អាឡិច ហ្សេនដ្រូ ហ្គន់សាឡេស ដេវីដសុន (Alejandro Gonzalez-Davidson) ជនជាតិ​អេស្ប៉ាញ ថា​មិន​មាន​លក្ខណៈ​សម្បត្តិ​ជា​អង្គការ​មិនមែន​រដ្ឋាភិបាល ផ្ទុយទៅវិញ​ជា​អង្គការ​ដែល​ចាត់តាំង​ខុស​ច្បាប់។

ក្រសួង​ថា​អង្គការ​នេះ​មិន​បាន​ធ្វើការ​ចុះបញ្ជី​ជា​សមាគម ឬ​អង្គការ​មិនមែន​រដ្ឋាភិបាល​តាម​ការ​កំណត់​របស់​ច្បាប់​ស្ដីពី​សមាគម និង​អង្គការ​មិនមែន​រដ្ឋាភិបាល​នោះ​ទេ។

ក្រសួង​បរិស្ថាន​ក៏​បាន​ព្រមាន​ចាត់​វិធានការ​ច្បាប់​ទៅ​លើ​អ្នក​ដែល​ចូលរួម​ធ្វើ​សកម្មភាព​ការពារ​ធនធាន​ធម្មជាតិ​ជាមួយ​អង្គការ​ចលនា​មាតា​ធម្មជាតិ ក្រោម​ហេតុផល​ថា អង្គការ​នេះ​ធ្វើ​សកម្មភាព​ប្រាសចាក​នឹង​ឧត្តម​ប្រយោជន៍​នៃ​សង្គម​ជាតិ​កម្ពុជា។

តែ​យ៉ាងណា សារព័ត៌មាន The Cambodia Daily មិន​ទាន់​អាច​សុំ​ការ​ឆ្លើយតប​ពី​លោក អាឡិច ពាក់ព័ន្ធ​នឹង​រឿង​នេះ​បាន​នៅឡើយ​ទេ។

ការ​ព្រមាន​របស់​ក្រសួង​បរិស្ថាន​នេះ ធ្វើឡើង​បន្ទាប់ពី​យុវជន​ស្រឡាញ់​បរិស្ថាន​ជិត ២០​នាក់ កាល​ពី​ថ្ងៃទី​២២ ឧសភា បាន​យក​ញត្តិ​ទៅ​ដាក់​នៅ​ក្រសួង​បរិស្ថាន ដើម្បី​ស្នើ​ទៅ​លោក សាយ សំអាល់ ឲ្យ​ដកហូត​ដី​នៅ​តំបន់​ឧទ្យាន​ជាតិ​ចំនួន​៣ ពី​វិស័យ​ឯកជន​ឲ្យ​មក​ទុក​ជា​សម្បត្តិ​រដ្ឋ​វិញ។ ក្រៅពី​ឲ្យ​ដក​ដី​នៅ​តំបន់​ឧទ្យាន​ជាតិ​ហើយ ពួកគេ​ក៏​បាន​ស្នើ​ទៅ​ក្រសួង​បរិស្ថាន​បញ្ឈប់​សកម្មភាព​កាត់​ដី​ព្រៃ​ធម្មជាតិ​នៅ​តំបន់​ការពារ​ឲ្យ​ទៅ​ក្រុមហ៊ុន​ឯកជន​ផង​ដែរ។

កាលពី​ខែ​មិថុនា ឆ្នាំ​២០២២ លោក ហ៊ុន សែន បាន​កាត់​ដី​នៅ​តំបន់​ដី​ព្រៃ​ដែន​ជម្រក​សត្វព្រៃ​ភ្នំ​ឱរ៉ាល់ ជាង ៦០០​ហិកតារ ដី​ព្រៃ​ឧទ្យាន​ជាតិ​គិរីរម្យ ជាង ២០០​ហិកតារ និង​ដី​នៅ​ដែន​ជម្រក​សត្វព្រៃ​កែវសីមា ៧០​ហិកតារ ឲ្យ​ទៅ​ក្រុមហ៊ុន វ័នម៉រ (One More Group) របស់​អ្នកស្រី ជឹង សុគន្ធារី ដើម្បី​អភិវឌ្ឍ​ជា​តំបន់​ទេសចរណ៍។

អ្នកស្រី ជឹង សុគន្ធារី ត្រូវ​ជា​កូនស្រី​របស់​លោកស្រី ជឹង សុភាព ហៅ​យាយ​ភូ ដែល​ជា​ប្រពន្ធ​របស់​លោក ឡៅ ម៉េងឃីន សមាជិក​ព្រឹទ្ធសភា​គណបក្ស​ប្រជាជន​កម្ពុជា ដែល​ល្បី​ឈ្មោះ​ខាង​យក​ដី​ពលរដ្ឋ លុប​បឹង លុប​ឆ្នេរ និង​បំផ្លាញ​ធនធាន​ធម្មជាតិ​នៅ​ក្នុង​ប្រទេស​កម្ពុជា។

អ្នកស្រី ជឹង សុគន្ធារី ក៏​ជា​ម្ចាស់​ក្រុមហ៊ុន​ផលិតផល​ទឹក​សុទ្ធ ឈ្មោះ វីតាល់ (VITAL) មី​ជាតិ នៃ​ក្រុមហ៊ុន​ផលិត​ចំណី​អាហារ និង​ភេសជ្ជៈ អិន.វី.ស៊ី (N.V.C Corporation Co.,LTD) និង​សេវាកម្ម​ក្រុមហ៊ុន​លក់ និង​ទីផ្សារ វ័ន ហ្វ្រេតធើនីធី (One Fraternity Co,.LTD) ផង​ដែរ។

អង្គការ​មាតា​ធម្មជាតិ (Mother Nature) ត្រូវ​បាន​ក្រសួង​មហាផ្ទៃ​លុប​ឈ្មោះ​ចេញពី​បញ្ជី​នៃ​អង្គការ​មិនមែន​រដ្ឋាភិបាល​កាលពី​អំឡុង​ខែ​កញ្ញា ឆ្នាំ​២០១៧ កន្លងទៅ បន្ទាប់ពី​សកម្មជន​ពីរ​នាក់​របស់​អង្គការ​នេះ​ត្រូវ​បាន​អាជ្ញាធរ​ខេត្ត​កោះកុង ចាប់​ខ្លួន​ដាក់​ពន្ធនាគារ ដោយសារ​បាន​ចុះ​ទៅ​ស៊ើបអង្កេត​រឿង​ការ​ធ្វើ​អាជីវកម្ម​ខ្សាច់​របស់​ក្រុមហ៊ុន​ឧកញ៉ា លី យ៉ុងផាត់ ដែល​ជា​ឧកញ៉ា​ដ៏​មាន​ឥទ្ធិពល​ស្និទ្ធ​នឹង​លោក ហ៊ុន សែន៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស