ក្រុមអ្នកវិទ្យាសាស្ត្រលំហអាកាស NASA សហរដ្ឋអាមេរិក បានបើកកិច្ចប្រជុំពិសេសរបស់ខ្លួនកាលពីថ្ងៃទី៣១ ឧសភា ដើម្បីពិនិត្យ និងវាយតម្លៃអំពីលទ្ធផលនៃការស្រាវជ្រាវដែលធ្វើឡើងដោយក្រុមអ្នកជំនាញសិក្សាអំពីបាតុភូតលំហអាកាសដែលមិនស្គាល់អត្តសញ្ញាណ Unexplained Anomalous Phenomena ហៅកាត់ថា UAP។
ក្រុមនេះមានសមាជិក ១៦នាក់ ក្នុងនោះមានទាំងអាកាសយានិកចូលនិវត្តន៍ លោក Scott Kelly ដែលធ្លាប់ចំណាយពេលជិតមួយឆ្នាំរស់នៅលើលំហអាកាស។ កិច្ចប្រជុំរបស់ក្រុមអ្នកវិទ្យាសាស្ត្រសហរដ្ឋអាមេរិកនេះ បានប្រើពេលដល់ ៤ម៉ោងដើម្បីពិនិត្យរូបភាព និងសកម្មភាពរបស់ UAP រួមទាំងវាយតម្លៃអំពីលទ្ធផលនៃការស្រាវជ្រាវមនុស្សក្រៅភពដែលគេសង្ស័យថាជាអ្នកបង្កើតយានថាសហោះ UFO។
សារព័ត៌មាន National World និងបណ្ដាញផ្សាយព័ត៌មាន Aljazeera ឱ្យដឹងថា ក្រុមស្រាវជ្រាវអំពីបាតុភូត UAP បានរកឃើញសញ្ញា និងបាតុភូតលំហអាកាសដល់ទៅ ៨០០ដង។
ប្រធានដឹកនាំកិច្ចប្រជុំ លោក David Spergel បាននិយាយថា លោកនឹងបញ្ចេញរបាយការណ៍ទាក់ទងនឹងការស្រាវជ្រាវនេះជាសាធារណៈនៅចុងខែកក្កដា នេះ។
ចំណែកអ្នកវិទ្យាសាស្ត្រ Dan Evans ដែលជាមន្ត្រីស្រាវជ្រាវផ្ទាល់អំពីបាតុភូតលំហអាកាស UAP និយាយថា ការស្រាវជ្រាវមានភាពសកម្មជាខ្លាំងនៅរយៈពេលប៉ុន្មានខែចុងក្រោយនេះ ដោយចាប់បាតុភូតសញ្ញាបាន ៨០០ដងនៃបាតុភូតលំហអាកាស។
យោងតាមការប្រជុំនេះ ក្រុមអ្នកជំនាញនឹងបង្ហាញទិន្នន័យនៃសកម្មភាពរបស់ថាសហោះ UFO នេះនៅចំពោះគណៈកម្មការកិច្ចការវិទ្យាសាស្ត្រនៃព្រឹទ្ធសភាសហរដ្ឋអាមេរិក ក្នុងពេលដ៏ឆាប់ខាងមុខនេះ។
ក្រុមអ្នកវិទ្យាសាស្ត្រ NASA និងក្រុមជំនាញរបស់មន្ទីរប៉ុងតាហ្គោន បានស្រាវជ្រាវបាតុភូតនេះជាច្រើនទសវត្សមកហើយចាប់តាំងពីចុងទសវត្ស១៩៤០ ប៉ុន្តែដំណាក់កាលចុងក្រោយនេះ បាតុភូតលំហកាន់តែបង្ហាញរូបរាងជាញឹកញាប់រហូតដល់កងទ័ពជើងទឹក និងទ័ពជើងអាកាសរបស់សហរដ្ឋអាមេរិកចាប់រូបភាពបានទៀតផង។
តើ UFO ជាអ្វី?
អស់រយៈពេលជាច្រើនទសវត្សមកហើយ UFO ដែលមកពីភាសាអង់គ្លេសហៅថា Unidentified Flying Object ត្រូវបានកំណត់ថាជា “យានថាសហោះ“ ឬវត្ថុដែលមានរាងមូលហើយសំប៉ែត។ វត្ថុនេះហោះហើរនៅលើភពផែនដីដោយមិនអាចកំណត់អត្តសញ្ញាណបានពិតប្រាកដថាជាបាតុភូតធម្មជាតិ ឬជាអ្វីឲ្យពិតប្រាកដនោះទេ តែត្រូវបានគេហៅថាថាសហោះ UFO។
ការពិតមានការចងក្រងឯកសារទាក់ទងនឹងយានថាសហោះ UFO តាំងពីឆ្នាំ១៩៥៣ ដោយកងទ័ពអាកាសរបស់សហរដ្ឋអាមេរិក។ នេះយោងតាមគេហទំព័រ WorldUFOday.com ដែលជាគេហទំព័រមួយបានចែករំលែកព័ត៌មានអំពីសកម្មភាពបាតុភូត UAP។
កងទ័ពអាកាស និងកងនាវាសហរដ្ឋអាមេរិកត្រូវបានគេនិយាយថាជាអ្នកបង្កើតពាក្យថា UFO។ ដោយសារបញ្ហាសន្តិសុខជាតិ បានធ្វើឱ្យសហរដ្ឋអាមេរិកឈានមុខគេស្រាវជ្រាវបាតុភូតនេះ ដោយបានកត់ត្រាអំពីសកម្មភាពរបស់យានថាសហោះ UFO ដែលបានហោះលើភពផែនដី។
សកម្មភាពរបស់ UFO បានកំពុងក្លាយជាបញ្ហាសន្តិសុខជាតិរបស់សហរដ្ឋអាមេរិក ដែលគេថាអ្នកមានជីវិតក្រៅភពផែនដីជាអ្នកបង្កើតវាឡើង។
មន្ទីរ Pengtagon បានបង្កើតកម្លាំងប្រតិបត្តិការបាតុភូតលំហអាកាសដើម្បីពិនិត្យ និងស្រាវជ្រាវយានថាសហោះ UFO និងបាតុភូតលំហអាកាស UAP ដែលមកពីភាសាអង់គ្លេស Unidentified Anomalous Phenomena។
កាលពី ៤ឆ្នាំមុន កងនាវាសហរដ្ឋអាមេរិកចាប់បានរូបភាព និងសកម្មភាពរបស់ UFO ឬយានអវកាសថាសហោះដែលបានហោះហើរលើលំហសមុទ្រ។
ជាមួយគ្នានេះ មន្ទីរ Pengtagon បានបង្ហាញរូបភាពចាប់បាន ១៤៣ដងក្នុងការហោះហើរចំនួន ១៤៤ដងរបស់យានថាសហោះ UFO តែពុំអាចមានទិន្នន័យ និងព័ត៌មានច្បាស់លាស់ថា UFO ត្រូវបានបង្កើតឡើងដោយប្រទេសណា ឬក៏ពិភពណានោះឡើយ។
តើអង្គការ NASA ជាអ្វី?
អង្គការ NASA មានឈ្មោះពេញថា «National Aeronautics and Space Administration» ត្រូវបានបង្កើតឡើងនៅថ្ងៃទី២៩ ខែកក្កដា ឆ្នាំ១៩៥៨ ក្នុងរដ្ឋការរបស់ប្រធានាធិបតីសហរដ្ឋអាមេរិក Dwight Eisenhower។ លោក Eisenhower បានចុះហត្ថលេខាលើច្បាប់ស្ដីពីអវកាសជាតិអាមេរិក ដែលច្បាប់នេះហើយនាំឱ្យមានការបង្កើតអង្គការ NASA។ អង្គការនេះត្រូវបានដំណើរការជាផ្លូវការនៅថ្ងៃទី១ ខែតុលា ឆ្នាំ១៩៥៨។
បេសកកម្មរបស់ NASA គឺស្រាវជ្រាវលំហអាកាស និងភពខាងក្រៅនៃភពរបស់មនុស្ស ហើយនិងបេសកកម្មមួយទៀត គឺនៅចន្លោះផែនដី និងព្រះចន្ទ។
ការបង្កើតអង្គការនេះ ក្រោយពេលសហភាពសូវៀត បានបាញ់បង្ហោះផ្កាយរណបទី១ របស់ខ្លួនដោយជោគជ័យដែលមានឈ្មោះថា «Sputnik» ទៅកាន់គន្លងលំហអាកាសនៅក្នុងខែតុលា ឆ្នាំ១៩៥៧ ក្នុងអំឡុងសង្គ្រាមត្រជាក់កំពុងផ្ទុះឡើង។
តែមួយឆ្នាំក្រោយមក អង្គការ NASA បានបង្ហោះយានអវកាសរបស់ខ្លួនលើកទី១ ឈ្មោះ «Pioneer 1» ទម្ងន់ ៣៨គីឡូក្រាម ត្រូវបានបាញ់បង្ហោះនៅថ្ងៃទី១១ ខែតុលា ឆ្នាំ១៩៥៨ ឱ្យហោះចូលទៅគន្លងលំហអាកាស។
តែនៅពេលនេះ អង្គការ NASA ទទួលបន្ទុកបេសកកម្មមួយទៀត គឺការស្រាវជ្រាវអំពីបាតុភូតលំហអាកាស UAP ដែលពាក់ព័ន្ធនឹងយានថាសហោះ UFO ដែលសង្ស័យថាជាយានអវកាសរបស់មនុស្សនៅភពក្រៅផែនដី៕