ភាពតានតឹងជាថ្មីម្ដងទៀតបានកើតឡើងនៅក្នុងរដ្ឋសភាសហរដ្ឋអាមេរិករវាងក្រុមមន្ត្រីសមាជិកសភា និងក្រុមអ្នកស្រាវជ្រាវអំពីបាតុភូតវត្ថុមិនអាចកំណត់អត្តសញ្ញាណបានដែលគេហៅថាជា UAP ឬ UFO។
ក្រុមអ្នកស្រាវជ្រាវនេះបង្កើតឡើងដោយមន្ទីរប៉ុងតាហ្គោន។
ភាពតានតឹងក្រោមប្រធានបទបញ្ហា UAP ឬ UFO ព្រោះកំពុងតែក្លាយជាការព្រួយបារម្ភដល់សន្តិសុខផែនដី ដែលអនុគណៈកម្មការសភាបានកោះហៅក្រុមបេសកកម្មស្រាវជ្រាវ UAP ឬ UFO មកចោទសួរកាលពីថ្ងៃពុធ ទី២៦ កក្កដា។ នេះបើតាមការចុះផ្សាយរបស់បណ្ដាញផ្សាយព័ត៌មាន Aljazeera កាលពីថ្ងៃទី២៧ ខែកក្កដា។
ក្នុងសវនាការរបស់អនុគណៈកម្មការសភាអាមេរិកទទួលបន្ទុកសន្តិសុខជាតិ លោក David Grusch អតីតមន្ត្រីចារកម្មយោធាបានថ្លែងថា សហរដ្ឋអាមេរិកកំពុងស្ថិតក្នុងភាពទាល់ច្រកក្នុងការដោះស្រាយអំពីបាតុភូត UAP ឬ UFO ដែលវាជាវត្ថុដ៏អស្ចារ្យ តែស្ថិតក្នុងភាពអាថ៌កំបាំងច្រើនទសវត្សមកហើយនេះ។
លោក David Grusch ដែលបម្រើការងារ ១៤ឆ្នាំ ហើយជាមន្ត្រីចារកម្មនៅទីភ្នាក់ងារចារកម្មភូគព្ភសាស្ត្រជាតិ និងដែនអាកាសសហរដ្ឋអាមេរិក បានបង្ហាញមុខនៅក្នុងជំនួបជាមួយអនុគណៈកម្មការសន្តិសុខជាតិរបស់រដ្ឋសភា។
ក្រុមរបស់លោក David Grusch ត្រូវបានបង្កើតឡើងដោយមន្ទីរប៉ុងតាហ្គោន ក្រោយពីអ្នកបើកយន្តហោះចម្បាំងពីររូបបានប្រទះឃើញជាលើកដំបូងដោយផ្ទាល់ភ្នែករបស់ពួកគេនូវ UAP ឬ UFO នោះកាលពី ៥០ឆ្នាំមុន។
ជាការឆ្លើយតបនឹងការសង្ស័យពីបាតុភូតលំហអាកាស ហើយបារម្ភពីការអាចប៉ះទង្គិចជាមួយភពផែនដីរបស់មនុស្ស រដ្ឋាភិបាលសហរដ្ឋអាមេរិកបានលើកយកបញ្ហានេះមកពិភាក្សាភ្លាមៗ ហើយធ្វើការស្រាវជ្រាវជាបន្ទាន់។
សេតវិមានដាក់ការព្រួយបារម្ភថា អ្វីដែលមើលឃើញនោះវាអាចជាឧបករណ៍បច្ចេកទេសស៊ើបការណ៍របស់ភពក្រៅ ដើម្បីប្រមូលព័ត៌មានចារកម្មយោធារបស់សហរដ្ឋអាមេរិក។
ខាងក្រោមនេះគឺជាការពិភាក្សាដេញដោលក្នុងសភា
ឧត្តមសេនីយ៍ចូលនិវត្តន៍លោក David Grusch គឺជាម្នាក់ក្នុងចំណោមឧត្តមសេនីយ៍ច្រើនរូបដែលមកចូលខ្លួនក្នុងសវនាការរដ្ឋសភាកាលពីថ្ងៃពុធ។ លោកត្រូវបានចោទសួរដេញដោលអំពីបាតុភូត UAP ឬ UFO ក្នុងឋានៈលោកជាប្រធានក្រុមស្រាវជ្រាវនៃបាតុភូតលំហអាកាសនេះ។
លោកថា ការិយាល័យស្រាវជ្រាវថ្នាក់ជាតិរបស់លោកធ្វើការស្រាវជ្រាវទៅតាមការចាប់បានរូបភាពរបស់វត្ថុដែលមិនស្គាល់អត្តសញ្ញាណ UAP ឬ UFO ដោយចារកម្មផ្កាយរណប។ លោកថ្លែងប្រាប់សមាជិកសភានៃអនុគណៈកម្មការសន្តិសុខជាតិថា គេបានឃើញបំណែករបស់ UAP ឬ UFO ដែលហេតុការណ៍នេះហើយបាននាំឱ្យមានការពិបាកប៉ាន់ស្មានណាស់ ព្រោះមិនចាប់ឃាត់ទុកវត្ថុ UFO នោះឱ្យបាន។
ឧត្តមសេនីយ៍ចូលនិវត្តន៍លោក David Grusch ត្រូវបានចាត់តាំងជាមេក្រុម UAP តែគាត់ធ្លាប់បដិសេធមិនចង់ទទួលយកភារកិច្ចនេះទេ។ លោកថា រដ្ឋាភិបាលសហរដ្ឋអាមេរិកបានដឹងថាមានជីវិតខាងក្រៅផែនដីដែលពុំមែនជាមនុស្សបង្កើត UFO នេះទេ គឺតាំងពីទសវត្ស១៩៣០ មកម្ល៉េះ។
សមាជិកសភា Tim Burchett គាំទ្រគំនិតរបស់លោក David Grusch ដែលថារដ្ឋាភិបាលគួរបំបាត់ចោលការសង្ស័យពីបាតុភូតរបស់ UFO ដែលជាព័ត៌មានផ្ដល់ថ្មីទៀតដោយអតីតមន្ត្រីនាវាជើងទឹករបស់អាមេរិក ២នាក់ ដែលពួកគេបានឃើញ UAP ហើយមកដល់ពេលនេះនៅតែពុំអាចរកឃើញការពិត។
តែយ៉ាងណា មន្ទីរប៉ុងតាហ្គោនបានច្រានចោលគំនិតរបស់ឧត្តមសេនីយ៍ចូលនិវត្តន៍លោក David Grusch។
នៅក្នុងសេចក្ដីថ្លែងការណ៍របស់ Sue Gough ជាអ្នកនាំពាក្យក្រសួងការពារជាតិសហរដ្ឋអាមេរិក បាននិយាយថា បើទោះជាក្រុមស្រាវជ្រាវនៅមិនទាន់បង្ហាញភស្តុតាង ឬព័ត៌មានជាក់លាក់ក៏ដោយ ក៏ក្រុមស្វែងរកការពិតអំពីបាតុភូតនៃវត្ថុដែលមិនស្គាល់អត្តសញ្ញាណ UAP ឬ UFO ត្រូវតែបង្កើនការស្រាវជ្រាវវត្ថុរបស់មនុស្សក្រៅភពផែនដីជាបន្តទៀត ហើយមិនថាឡើយ UAP ឬ UFO គឺអ្វីក៏ដោយដែលជារបស់ខាងក្រៅភព គឺជារឿងចម្លែក និងគួរប្រុងប្រយ័ត្ន។
តែសម្រាប់ឧត្តមសេនីយ៍ចូលនិវត្តន៍លោក David Grusch ដែលដឹកនាំការស្រាវជ្រាវ UAP ឬ UFO បាននិយាយថា លោកបានក្លាយជាក្រុមបេសកកម្មមួយរបស់រដ្ឋាភិបាល ដែលពេលនេះកំពុងប្រឈមមុខនឹងការវាយប្រហាររិះគន់ព្រោះតែរឿង UAP ឬ UFO។ តែលោកមិនបានបោះបង់ចោលបេសកកម្មរបស់លោកទេ។
ជាមួយគ្នានេះ សមាជិកសភា Tim Burchett បានលើកឡើងថា បើក្រុមនេះមានជំនាញ គួរតែបន្តបេសកកម្មរបស់ខ្លួនបន្តទៀត។
យ៉ាងណាសម្រាប់លោក David Grusch សឹងតែលែងចង់និយាយអ្វីទាំងអស់ដោយគ្រាន់តែបង្ហើបថា រដ្ឋាភិបាលសហរដ្ឋអាមេរិកនៅតែលាក់បាំងព័ត៌មានអំពី UAP ដែលមិនឱ្យបញ្ចេញជាសាធារណៈទេ។ យ៉ាងណា សមាជិកសភាបានទាមទារឱ្យរដ្ឋាភិបាលបញ្ចេញទិន្នន័យឱ្យបានច្រើនថែមទៀតអំពីបាតុភូតរបស់ UAP ឬ UFO។
ករណីនេះ ក្រុមអ្នកវិទ្យាសាស្ត្រលំហអាកាស NASA សហរដ្ឋអាមេរិក បានបើកកិច្ចប្រជុំពិសេសរបស់ខ្លួនកាលពីថ្ងៃទី៣១ ខែឧសភា ដើម្បីពិនិត្យ និងវាយតម្លៃអំពីលទ្ធផលនៃការស្រាវជ្រាវដែលធ្វើឡើងដោយក្រុមអ្នកជំនាញសិក្សាអំពីបាតុភូតលំហអាកាស UAP និង UFO។
ក្រុមនេះមានសមាជិក ១៦នាក់ក្នុងនោះមានទាំងអាកាសយានិកចូលនិវត្តន៍ លោក Scott Kelly ដែលធ្លាប់ចំណាយពេលជិតមួយឆ្នាំរស់នៅលើលំហអាកាស។
កិច្ចប្រជុំរបស់ក្រុមអ្នកវិទ្យាសាស្ត្រសហរដ្ឋអាមេរិកនេះ បានប្រើពេលដល់ ៤ម៉ោងដើម្បីពិនិត្យរូបភាព និងសកម្មភាពរបស់ UAP និងវាយតម្លៃអំពីលទ្ធផលនៃការស្រាវជ្រាវមនុស្សក្រៅភពដែលសង្ស័យថាជាអ្នកបង្កើតយានថាសហោះ UFO។
អ្នកវិទ្យាសាស្ត្រ Dan Evans ជាមន្ត្រីស្រាវជ្រាវផ្ទាល់អំពីបាតុភូតលំហអាកាស UAP និយាយថា ការស្រាវជ្រាវមានភាពសកម្មជាខ្លាំងនៅរយៈពេលប៉ុន្មានខែចុងក្រោយនេះ ដោយចាប់សញ្ញានៃបាតុភូតលំហអាកាសបាន ៨០០ដង តែនៅតែមិនអាចតាមវាទាន់ ហើយចាប់ឃាត់ខ្លួនក៏មិនដែលអាចធ្វើបានដែរ។
ក្រុមអ្នកវិទ្យាសាស្ត្រ NASA និងក្រុមជំនាញរបស់មន្ទីរប៉ុងតាហ្គោន បានស្រាវជ្រាវបាតុភូតនេះជាច្រើនទសវត្សមកហើយចាប់តាំងពីចុងទសវត្ស១៩៤០។ ប៉ុន្តែដំណាក់កាលចុងក្រោយនេះ បាតុភូតលំហអាកាសថា UAP កាន់តែបង្ហាញរូបរាងជាញឹកញាប់រហូតដល់កងទ័ពជើងទឹក និងទ័ពជើងអាកាសសហរដ្ឋអាមេរិកចាប់រូបភាពបានទៀតផង។
តើ UFO ជាអ្វី?
អស់រយៈពេលជាច្រើនទសវត្សមកហើយ UFO ដែលមកពីភាសាអង់គ្លេសហៅថា Unidentified Flying Object ត្រូវបានកំណត់ថាជា “យានថាសហោះ” ឬវត្ថុដែលមានរាងមូល ហើយសំប៉ែត។ វត្ថុនេះហោះហើរនៅលើភពផែនដីដោយមិនអាចកំណត់អត្តសញ្ញាណបានពិតប្រាកដថាជាបាតុភូតធម្មជាតិ ឬជាអ្វីពិតប្រាកដនោះទេ តែត្រូវបានគេហៅថាថាសហោះ UFO។
ការពិត មានការចងក្រងឯកសារទាក់ទងនឹងយានថាសហោះ UFO តាំងពីឆ្នាំ១៩៥៣ ដោយកងកម្លាំងទ័ពអាកាសរបស់សហរដ្ឋអាមេរិក។ កងទ័ពអាកាស និងកងនាវាសហរដ្ឋអាមេរិកត្រូវបានគេនិយាយថាជាអ្នកបង្កើតពាក្យថា UFO។ ដោយសារបញ្ហាសន្តិសុខជាតិ បានធ្វើឱ្យសហរដ្ឋអាមេរិកឈានមុខគេស្រាវជ្រាវបាតុភូតនេះ ដោយបានកត់ត្រាអំពីសកម្មភាពរបស់យានថាសហោះ UFO ដែលបានហោះលើភពផែនដី។
សកម្មភាពរបស់ UFO បានកំពុងក្លាយជាបញ្ហាសន្តិសុខជាតិរបស់សហរដ្ឋអាមេរិក ដែលគេថាវាជារបស់ក្រុមអ្នកក្រៅភពផែនដីជាអ្នកបង្កើតវាឡើង៕